Ior umiliôn imôngo sha tar na jighjigh ér ka Tartor u Aôndo ua na mlu ve u ken hemen una doo ye. Mba dondon ikyav i Yesu, un u yange tese mbadondon nav ér ve eren msen ve sônon ér: “Tartor Wou u̱ va, i̱ er ishima You shin tar” la.—Mateu 6:10.

Kpa kwagh gema er lan ishima yô, er i gbe ior kpishi ishima tsung u fan kwagh u Tartor u Aôndo nahan kpa, ikyav tese ér ukwaghaôndo kpishi ver ishima sha kwagh u Tartor la ga. Orgen u timen sha akaa a mbayiase, u i yer un ér H. G. Wells yô ôr kwagh sha kwagh ne kaa ér “yange gba Yesu ishima u tesen ior kwagh u yila ér Tartor u Sha la kpishi,” nahan kpa ityesen ne ‘ngi kwagh hen ucôôci mba Mbakristu kpishi nyian ga.’

Mbashiada mba Yehova mba hembe ôron ior kwagh u Tartor u Aôndo, mba er ucôôci mbara nahan ga. Hen ase sha kwagh ne: Magazin u u lu ôron ne, ka u se hemban gberen yô, shi i gber u ken ijô 220. Hanma uwer ka i gber magazin ne i nôngo u kuman ukôpi miliôn 46. Kwagh ne na yô, ka magazin ne i hemban samber a mi sha tar cii ye. Man ka loho u nyi magazin ne a hemban ôrono? Nenge ase iti na ne: Iyoukura U Yôôn Tartor u Yehova.  *

Er nan Mbashiada mba Yehova ve lu yôôn kwagh u Tartor u Aôndo kpoghuloo nahana? Ityôkyaa i môm yô, se na jighjigh ser ka Tartor u Aôndo u lu loho u vesen u i nger ken Bibilo i̱ i̱ lu takerada u hemban sha tar cii la ye. Heela tseegh ga, se na jighjigh ser ka Tartor u Aôndo tseegh ua va bee a mbamzeyol mba uumace ve lu tagher a mi nyian ne ye.

Mbashiada mba Yehova mba nôngon kpoghuloo ér vea dondo ikyav i Yesu la sha u pasen ior kwagh u Tartor u Aôndo sha gbashima. Shighe u Yesu lu shin tar la, Tartor u Aôndo hemba lun un kwagh u vesen shi hemban pasen ior kwagh u ú kpaa. (Luka 4:43) Er nan ve Tartor la yange gba Yesu kwagh yumu? Man we yô, ua er nyi sha ci wouwe? Se mba taver we ishima ser nenge mbamlumun mba Bibilo i ne la, ken ngeren mba ve dondo ne.