Yange i marem hen geri u Rome, vegher u atsanaior tseegh lu her yô, shi lu her kpa m vese ye. Uma yange taver kpishi. Yange m fa ngôm u maren jim jim la ga, shi m zuan vea terem ga. Nahan m hen inja i taver i agumaior a hen ijiir ne lu a mi la, sha er mo kpa me fatyô u lun her yô.

Yange m hii u iin je m lu a nyôr anyom pue ga. Shighe u m lu anyom 12 la, m yevese m undu ya sha kwa hiihii. Terem yange ngohol mo uwegh sha tashan u dasenda acin imôngo. Yange m shi eren ayôôso a ior; m lu or u wan tswam shi m vihi ishima a hanma or cii. M va nyôron anyom 14 yô, m undu ya. Maa m va hii u man mcimbim ma bom shi tsan sha godobi. Er m lu a ijiir i tsan ga yô, or a ver mato yô, m za vihi hunda m nyôr m yav shimi, sev mbua va zurum u aven yô, m due. Maa m ker ape mngerem ma lu yô, m za ôr ishigh.

Yange m hingir côr ormbaiv, m tsuwen ior akpa shi m nyôron sha aya mba i lu ayou a sha aôndo man ken uya mba uzegembaiorov tugh, m ngohol ior akaa. Kwagh ne na yô, m zua a iti i bo shi gwa wam hii u samber. Ica kera gba ga maa nongo u mbaeren tswam ugen kaa ér mo m za kohol ve. M nyer nongo a ve yô, m gema nyôron ken ubanke iin. Er m lu nomor yô, ica gba ga maa mba ken nongo la hii u nan mo icivir. Yange m kenden gbuuka wam ga; jighilii yô, yange mea yaven je kpa, m ver gbuuka wam sha ityough ki gambe m penda pilo sha mi. Yange tswam man mcimbim ma bom man iliam i dang kua idya ya tor ken a mo. Udasenda yange ve shi keren mo. Yange i kôrom kwa kimbir kimbir, i wuhem ken purusu shighe a karen tsô shi i pasem, nahan zan zan anyom imôngo.

Kwa gen la mba dughun mo ken purusu kera yô, m za hen anmgbian u ngôm u kwase. Kwagh er u kpilighyol mo iyol yô, anmgbian u ngôm ne kua mbayev nav uhar cii hingir Mbashiada mba Yehova. Tsô ve lôhôm mkombo u Mbashiada. Er m soo u fan kwagh u ve eren ken mkombo shon yô, m za vea ve. M za nyer hen Iyol i Tartor yô, m tema ikyua a hunda, sha er me fatyô u kenger sha hanma or u nan lu nyôron ker shin u nan lu duen cii yô. M lu a gbuuka wam.

Mkombo la yange gema uma wam. Yange lum er m yem m za ngu ken tar ugen kposo nahan. Ior lu sughun mo sar sar. Mbashiada lu lamen a mo sar sar, shi ashe a ve a ken ikyôr kpa tese er ve lu ior mba mimi yô; ka kwagh u hungur mo ga. Lu kwagh u i maren je or er a mo ga yô!

Tsô m hii u henen Bibilo vea Mbashiada. M gbe henen kwagh yemen yô, m lu hemban kaven er i gbe u me de uma u m eren la vindi vindi yô. Nahan m dondo kwaghwan u i nger ken Anzaakaa 13:20 la. Ijiir la kaa ér: “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” M mase kaven er i gbe u me palegh nongo u mbawan tswam la yô. Lum ican kpishi, kpa sha iwasen i Yehova yô, m kôrcio.

Shi m er akaa agen a yange wasem m hingir wang sha iyol yô. Yange m nôngo kpoghuloo m de u man taav kua mcimbim ma bom. M hondo ice i yange m de i lum sha ityou gumeen la kera, shi m gema mbaabinkuni av m haa kera, shi m de iliam i dang. Ken uma wam cii, lu shighe ne m hii u kôron iyol tsaha sha aeren a am ye.

Yange m soo takeda u ôron ga kua kwaghhenen cii, nahan lum ican u veren ishima henen Bibilo kpen kpen. Nahan kpa, tegh tegh tsô, Yehova va hii u doon mo ishima, maa akaa hii u geman ken a mo—imoshima yam hii u zan mo iyol. Ashighe agen ishima i zer nan mo ibo gbem; i gba lum mo er mayange Yehova una dem aferakaa a yange er la ga nahan. Yange a lum ken ishima nahan yô, m ôr Bibilo henpe i ôr kwagh u Yehova yange de Tor Davidi akaabo a vesen a yange er la, maa ishima i kera zam iyol ga.—2 Samuel 11:1–12:13.

Kwagh ugen u yange lum ican u eren yô, lu u zenden sha uya uya pasen ior atesen a Bibilo a m ne jighjigh a mi la. (Mateu 28:19, 20) Yange i cier mo iyol er me va za zua a ma or u yange m er kwagh a nan caveraa nahan! Kpa kure kure tsô, m va de mciem mara. Maa hii u saan mo iyol sha mimi, er m lu wasen ior sha u ve fa kwagh u Ter wase u sha u se doo un ishima kpishi, shi a den se kwaghbo wuee la yô.

Er m va fe Yehova yô, kwagh la war uma wam! Ior kpishi mba yange m luun vea ve imôngo yô kera mba uma hegen ga. Mbagenev yô, mba ken purusu, kpa mo yô, saan mo iyol sha mimi, shi m ngu a ishimaveren sha kwagh u mlu wam u ken hemen. M hen u hiden a iyol ijime, shi ungwan kwagh, shi kighir iyol yam shighe u ishima i vihim je i lum pe eren kwagh u dang yô. Kwagh ne na yô, mlu wam vea ior hemba doon hegen. M vôso kwase, iti na ér Carmen, a doom ishima kpishi. Mo vea na cii, ka i saan se iyol kpishi u wasen ior ser ve hen Bibilo.

Hegen ne, ka mea eren tom kpa m kera nyighen ior ga, man ashighe agen ka i lu tom u ken banke, kpa m iin inyaregh ga, m eren tom sha mimi!