Mbampin mba Mbaôron Takeda Ne Ve Pin La

Er Bibilo i tese gbenda u eren tom a awambe sha inja yô, Mbashiada mba Yehova mba nengen gbenda u sôron twer a awambe la nena?

Shin er i gbe u or nana tsua twer u nana er la iyol i nan nahan kpa, gba u hanma Orkristu yô nana nenge kwagh u Bibilo i ôr sha ikyar ne ér ka beerkwagh ga. Doo u nana fa ér ka kwagh u nan vea Yehova.

Er i lu Yehova a ne se uma yô, a wa tindi ér i de ye awambe ga. (Genese 9:3, 4) Ken tindi u yange i wa ikyurior i Iserael la, Aôndo yange ôr ve kwagh u vea er a awambe yô sha ci u ka awambe a lu uma ye. Yange wa tindi ér: “Gadia uma u inyam yô ka ken awambe a lu ye, Mo M na ne a sha atse a nanden nagh sha mi, sha u nan iwom a mi sha ci u uuma enev.” Nahan kpa, or yange nana wua inyam sha ci u nana ya di ye? Aôndo kaa ér: “Or la nana haa awambe a i inya, nana cir inya sha mi.”  * (Levitiku 17:11, 13) Yehova yange ôr kwagh u tindi ne acin imôngo je. (Duteronomi 12:16, 24; 15:23) Takeda u I yer ér The Jewish Soncino Chumash la kaa ér: “Gba u a kura awambe a za koso mape ga, kpa a nenge a ér ka kwagh u ndôhôrshima u i gbe u a ya ga kpa a haa a hen inya yô.” Yange gba u or u Iserael môm nana kura awambe a zendenya shin ma kwagh u uma ugen nana za koso mape ga sha ci u uma la due hen Aôndo.

Yange Mesiya va kpen kera yô lu u a kera dondo atindi a Mose la ga. Nahan kpa, mnenge u Aôndo a nengen awambe ér ka icighankwagh la gema ga. Jijingi u Aôndo yange mgbegha mbaapostoli ve nger Mbakristu ér ‘ve nyagh awambe.’ Man yange gba u vea nenge tindi ne ér ka beerkwagh ga. Sha ci u tindi ne yange lu hange hange di vough er u nyaghen idya kua akombo kpa i lu nahan. (Aer 15:28, 29; 21:25) Er kwagh u tan awambe la va ngee ken deri anyom u sha 20 la nahan kpa, Mbashiada mba Yehova yô fa wang er kwagh la a hendan a tindi u Aôndo yô. *

Ashighe agen, ortwer ka nan kaa a oruange u i gbe u a er nan twer la ér nana na awambe a nan kasua jimin cii ve iyange i i gbe u a pav nan la ia kuma ye, sha er aluer gba u a va ta nan awambe kpa i lu a nan iyol i nan yô. Nahan kpa, u kuran awambe koson her shi hiden va tan or la hendan a kwagh u i ôr ken Levitiku man Duteronomi la. Nahan gba u a kura awambe a koso her ga; kpa a haa a inya—a hide hen Aôndo er i gbe u a lu nahan. Er se kera lu sha ikyev i tindi u Mose la hegen ga nahan kpa, Mbashiada mba Yehova mba tesen icivir sha akaawan a Aôndo a a lu ken atindi a Mose la, shi ve kange ishima u palegh awambe sha hanma gbenda cii. Sha nahan yô, se mba ne ior awambe ga shi se mba kuran awambe a i gbe u a ‘haa inya’ la se mba koson her sér i va hide i ta se ga. Sha ci u ieren la i hendan a tindi u Aôndo.

Igbenda igen i uumace ve eren tom a mi i karen awambe la i hendan a akaawan a i nger ken Mkaanem ma Aôndo la keng ga. U tesen ikyav yô, Mbakristu kpishi ka ve lumun ér i kura ve awambe i kar, kpa ka a been kwaghkaren la yô i haa a kera. Igbenda igen kpa ngi kpishi i mbatwerev ve eren tom a awambe yô.

Ikyav i tesen yô, ashighe agen mbatwerev ka vea paven or yô, ve er tom a gbenda u i yer ér hemodilution u ka i goom a awambe a or u i lu paven nan la i due a mi hua ugen, i gema i haa nan icigh ki seer awambe, nahan a paven nan a been cii yô i hide a awambe shon her la. Nahan maa awambe a nan a hide her je i nôngo u lun vough er yange lu sha hiihii nahan. Ka a lu gbenda u paven or u i yer ér cell salvage la yô, i kohol awambe a i lu paven or ve a lu duen la cica cii i hide i nyôr a mi ken iyol i nan. Ka i kohol awambe ne cica cii i kire a wang shin i kase a, maa i hide i nyôr a mi ken iyol i oruange la. Shi gbenda ugen di yô, ka i goom a awambe i haa ken ikyekye maa a er tom u alegh a iyolugh er ishima shin huhu gayô ahi ma ve er la sha anshighe kpuaa. A been yô, i hide a awambe a ken ikyekye la i nyôr a mi ken iyol i oruange la her. Sha igbenda igen di yô, ka i goom a awambe i haa ken ikyekye i ka i pav awambe a a doo ga la i ver kposo a dedoo la yô. Kpa ashighe agen yô, ka i goom a awambe la i haa ken ikyekye sha er ia dugh aveghemakaa a ken awambe agen a hide a er tom a mi ken iyol i oruange la yô. Shi ashighe agen yô, ka i gba u a kura awambe a oruange la a za kar shi a nugwa icigh ker sha er a hide a nyôr a mi ken iyol i oruange la her yô.

Igbenda i eren twer ne ia kaha shi igbenda i he i eren twer shi karen akaa kpa ia seer duen. Kpa ka tom wase u tôvon fan igbenda i sôron twer shi tsuan twer u or a er ga. Gba u Orkristu nana tsua er a er tom a awambe a nan shighe u i lu paven nan, shin i lu karen nan kwagh gayô i gbe u a er nan ma twer ugen yô. Doo u nana vande lamen a ortwer u nan, nana fa kwagh u i gbe u a er a awambe a nan shighe a lu eren nan twer la yô. Maa nana tsua kwagh u imoshima i nan i ne nan ian u eren yô. (Nenge ngeren u kiriki la.)

Gba u Orkristu nana fa ér nan tsegha iyol i nan hen Aôndo nahan gba u una doo nan ishima a ishima i nan cii, man a uma u nan cii, man a agee a nan cii man a mhen u nan cii.’ (Luka 10:27) Er kwagh a gbe ior kpishi ken tar sha kwagh u mlu ve vea Aôndo ga nahan kpa, Mbashiada mba Yehova yô, ijende i ve ye vea Yehova la i gba ve kwagh. Orgban wase kaa a vese cii ér se na awambe a Yesu yange haa sha ci wase la jighjigh. ‘Ka sha wan na shon [Yesu Kristu] i de se akaabo a ase sha awambe a un shon la ye. Sha kpôô yô, erdoo u sha mhôôn u Aôndo la ngee!’—Mbaefese 1:7.

[Ngeren mba shin]

[Ngeren u kiriki]

MBAMPIN MBA U PINE IYOL YOU YÔ

‘Aluer mba eren mo twer man gba u awambe am aa due ken iyol yam aa zende ken ikyekye igen, alaghga je yô aa timbir ker cii ve aa hide aa nyôrom ken iyol yô, imoshima yam ia lumun ér awambe ne ka a ken iyol yam nahan i de ‘hee a inya’ gaa?

Aluer mba eren mo twer man i kura awambe am i sôr kwagh ker i hide shi i nyôr a mi ken iyol yam nahan, kwagh ne una za imoshima yam i Bibilo i tsaase i la iyolo?