ENERO 9, 2024 | UPDATED: OKTUBRE 7, 2024
BALITA SA BUONG DAIGDIG

UPDATE—IKINULONG ANG MGA KAPATID | Determinadong Magtiwala kay Jehova

I-PLAY

Noong Oktubre 3, 2024, binago ng Supreme Court of the Republic of Crimea ang hatol kina Brother Yuriy Gerashchenko at Sergey Parfenovich. Ginawang anim-na-taóng pagkabilanggo ang anim-na-taóng suspended sentence na hatol sa kanila. Agad silang ibinilanggo pagkagaling sa korte.

Noong Hulyo 1, 2024, hinatulan ng Krasnogvardeyskiy District Court of the Republic of Crimea sina Brother Yuriy Gerashchenko at Sergey Parfenovich. Binigyan sila ng anim-na-taong suspended prison sentence. Hindi pa sila makukulong sa ngayon.

Profile

Yuriy Gerashchenko

Ipinanganak: 1979 (Ukraine)

Maikling Impormasyon: Isang electrician

Humanga sa pagiging tumpak ng Bibliya at sa mga turo nito na nagpapakita ng pag-ibig ng Diyos sa mga tao. Nabautismuhan bilang isang Saksi ni Jehova noong 2000

Napangasawa si Irina noong 2002

Personal na mga Komento

Anong katangian ni Jehova ang mas napahalagahan mo dahil sa karanasang ito?

Mas napapahalagahan ko ngayon ang unawa ni Jehova. Alam niya ang eksaktong kailangan ko, at gusto niya akong tulungan. Habang pinag-iisipan ko ang nangyayari sa buhay ko, nakikita ko kung paano ako inihahanda ni Jehova. Hindi ba, iniingatan, pinapatalas, at inaalagaang mabuti ng isang bihasang manggagawa ang mga kagamitan niya para magamit niyang mabuti ang mga ito kapag kailangan na niya? Sa tingin ko, ganiyan ang ginagawa sa akin ni Jehova. Kaya lalo pa akong nagtitiwala sa kaniya, at hinding-hindi ko siya iiwan.

Sergey Parfenovich

Ipinanganak: 1972 (Mirnoye, Crimea)

Maikling Impormasyon: Caretaker ng isang sports complex

Napakasaya niya nang malaman niya ang gagawin ng Kaharian ng Diyos sa hinaharap. Nabautismuhan noong 1993 sa internasyonal na kombensiyon sa Kyiv, Ukraine

Napangasawa si Marina noong 1997. May apat silang anak na lalaki at dalawang anak na babae

Personal na mga Komento

Kaninong halimbawa sa Bibliya ang nakapagpatibay sa iyo?

Isinulat ni apostol Pablo sa Filipos 3:10: “Tunguhin kong makilala siya, maunawaan ang kapangyarihan ng kaniyang pagkabuhay-muli, at magdusang gaya niya.” Pinag-isipan ko kung gaano kamahal ni Pablo si Jesus. Mahal na mahal niya si Jesus kaya handa siyang magdusang gaya ni Jesus. Ipinanalangin kong magkaroon din ako ng ganoong saloobin at determinasyon. Nakatulong iyon para maiba ang tingin ko sa mga bagay-bagay. Imbes na biktima ng kawalang-katarungan ang maging tingin ko sa sarili ko, nakikita ko na ang sarili ko bilang isang matatag na lingkod ni Jehova na nananatiling tapat sa kaniya, anuman ang mangyari.

Alam nating patuloy na palalakasin ni Jehova sina Yuriy at Sergey, pati na ang lahat ng nananatiling tapat habang ‘itinatago niya sila sa lilim ng kaniyang mga pakpak.’—Awit 17:7, 8.

Time Line

Setyembre 19, 2022

Sinampahan ng kasong kriminal si Sergey
Setyembre 28, 2022

Kasama sa walong bahay na hinalughog ng mga pulis na FSB ang bahay ni Sergey, at inilagay siya sa temporary holding facility
Setyembre 30, 2022

Dinala si Sergey sa isang pretrial detention center
Nobyembre 15, 2022

Pinalaya si Sergey mula sa pretrial detention center at inilagay sa house arrest
Marso 22, 2023

Sinampahan ng kasong kriminal si Yuriy. Inaresto siya, pinagtatanong, at inilagay sa temporary detention center
Marso 24, 2023

Pinalaya si Yuriy at inilagay sa house arrest
Hulyo 12, 2023

Pinalaya sina Sergey at Yuriy mula sa house arrest at pinagbawalang umalis ng kanilang lugar
Hulyo 28, 2023

Nagsimula ang paglilitis. Inakusahan ng prosecutor sina Sergey at Yuriy na patuloy na “nagsasagawa ng kriminal na mga gawain at nagbabanta sa mga saksi.” Kahit walang sapat na ebidensiya, pareho silang inilagay ng hukom sa house arrest sa ikalawang pagkakataon

Tingnan Din

NEWS RELEASE

Nakabilanggo Dahil sa Kanilang Pananampalataya—Crimea

Ibinibilanggo ang mga Saksi ni Jehova sa Crimea dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE