ENERO 24, 2022 | UPDATED: DISYEMBRE 29, 2023
RUSSIA

UPDATE—NAHATULAN ANG MGA KAPATID | Pinagpapala Sina Brother Aleksandr Polozov at Stepan Shevelev sa Kabila ng Pag-uusig

I-PLAY

Noong Disyembre 29, 2023, hinatulan ng Norilsk City Court of the Krasnoyarsk Territory sina Brother Aleksandr Polozov at Stepan Shevelev. Nakatanggap sila nang anim-na-taóng suspended prison sentence. Hindi nila kailangang makulong sa ngayon.

Time Line

Oktubre 20, 2019

Pinalibutan ng mga pulis ang isang campsite sa lunsod ng Norilsk. Mahigit 50 Saksi ang idinitine
Oktubre 26, 2019

Inaresto si Aleksandr at ikinulong sa pretrial detention center
Enero 21, 2020

Pinalaya si Aleksandr matapos makulong nang halos tatlong buwan
Pebrero 19, 2020

Si Aleksandr ay inilagay sa listahan ng mga ekstremista at hindi niya puwedeng gamitin ang pera niya sa bangko
Mayo 6, 2021

Inakusahan si Stepan ng pakikipagsabuwatan kay Aleksandr. Kasama sa “mga krimen” na nagawa niya ay pananalangin at pangangaral

Profile

Aleksandr Polozov

Ipinanganak: 1970 (Torzhok, Tver Region)

Maikling Impormasyon: Mahilig sa hockey at swimming noong kabataan. Nagtrabaho sa emergency rescue services. Napangasawa si Svetlana noong 1998. Mahilig silang magbisikleta at magbiyahe

Nagpa-Bible study sa mga Saksi ni Jehova noong mga 1990’s. Nabautismuhan noong 1995

Personal na mga Komento

Paano ka tinulungan ni Jehova habang nasa kulungan ka?

Pagkatapos ng unang interogasyon ko, dinala ako sa isang selda. . . . Tinanong ako ng kasama ko sa selda kung bakit ako nakulong. Sinabi ko na nakulong ako dahil sa pananampalataya ko sa Diyos. . . . Sinabi niya: “Tingnan mo ang nasa ilalim ng mesa.” Pagtingin ko, may dalawang Bibliya sa ilalim ng mesa. Hindi ako makapaniwala! . . . Sa unang araw ko pa lang, may kopya na ako ng Salita ng Diyos. Nagpapasalamat ako kay Jehova sa kakaibang paraan ng pagtulong niya.

Paano nakatulong sa iyo ang mga kapatid?

Hindi ko mailarawan ang pampatibay at suporta na natanggap ko mula sa mga kapatid. Isang umaga na napakalamig, binati ako ng mga kapatid ng palakpakan habang inihahatid ako mula sa kulungan papunta sa korte. Pagkatapos, noong 6:00 ng gabi, nagpalakpakan na naman sila habang ibinabalik ako sa kulungan sakay ng isang sasakyan. Napakahalaga noon para sa akin, at malaking patotoo ’yon.

Stepan Shevelev

Ipinanganak: 1982 (Maslyanino, Novosibirsk Region)

Maikling Impormasyon: Nagtatrabaho bilang cable splicer. Napangasawa si Oksana noong 2013. Mahilig silang magbasa at magbiyahe

Noong 1996, nag-Bible study ang nanay at kapatid na babae ni Stepan. Kahit hindi nila tinanggap ang katotohanan, nagsimulang mag-study si Stepan at nagustuhan niya ang mga turo ng mga Saksi ni Jehova. Napatibay siyang malaman na kayang baguhin at pagandahin ng Bibliya ang buhay ng mga tao. Nabautismuhan noong 2001

Personal na mga Komento

Paano nakatulong sa inyong mag-asawa ang regular na pag-aaral ng Bibliya at pagsamba?

Talagang mahalaga sa amin ang pampamilyang pagsamba. Noon pa man, pumili kami ng isang espesipikong araw para dito, at hindi namin hinahayaang may makahadlang sa aming pampamilyang pagsamba. Dahil diyan, nagtitiwala ako na mapapanatiling matibay ng asawa ko ang pananampalataya niya. Sinisikap ko ding gawing kawili-wili ang pagbabasa ko ng Bibliya. Halimbawa, isang taon kong binasa ang Bibliya mula sa simula hanggang sa dulo. Sumunod, binasa ko ito ayon sa pagkakasunod-sunod. Pagkatapos, pinagsama-sama ko ang mga aklat ayon sa mga manunulat nito, at iba pa. Kaya hindi boring ang pagbabasa ko ng Bibliya, at nakakakita ako ng pamilyar na mga ideya sa bagong anggulo.

Paano nagbago ang saloobin mo sa mga umuusig sa iyo?

Tinulungan ako ni Jehova na ituring sila gaya ng pagturing niya sa kanila. Nauunawaan naming mag-asawa na kadalasan, mga karaniwang tao lang sila at ginagawa lang nila ang trabaho nila. May mga problema din silang pinagdadaanan at kailangan nila ang napakagandang pag-asa na ibinabahagi natin.

Nagtitiwala tayo na patuloy na tutulungan ni Jehova ang mahal nating mga kapatid na tapat at ‘patuloy pa rin sa paghabol’ sa katuwiran sa kabila ng pag-uusig.—Hukom 8:4.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE