Noong Enero 24, 2021, ang mga video ng Ang Bibliya—Ang Ebanghelyo Ayon kay Mateo ay inilabas sa Zimbabwe Sign Language (ZSL). Si Brother Taurai Mazarura, isang miyembro ng Komite ng Sangay sa Zimbabwe, ang naglabas nito sa isang nakarekord na programa.

Tuwang-tuwa ang 401 mamamahayag ng mga kongregasyon na gumagamit ng ZSL na matanggap ang release na ito. Nananabik na silang gamitin ang aklat ng Mateo sa kanilang personal na pag-aaral ng Bibliya pati na sa ministeryo.

Dahil sa pandemic, naging mas mahirap para sa mga tagapagsalin ng ZSL ang proyektong ito. Karaniwan na, dinadalaw nila ang mga deaf para masiguro nila na ang mga sign na ginagamit nila sa pagsasalin ay madaling maintindihan. Pero hindi nila ito magawa bilang pagsunod sa mga restriksiyon dahil sa COVID-19. Kaya gumamit ang mga tagapagsalin ng mga videoconferencing tool para makausap pa rin ang mga deaf. Dahil dito, nakakagawa sila ng mga video na madaling naiintindihan ng lahat ng deaf sa Zimbabwe.

Sinabi ni Brother John Hunguka, isang miyembro ng Komite ng Sangay sa Zimbabwe: “Ang paglalabas ng aklat ng Mateo ang simula ng proyekto ng mga Saksi ni Jehova na isalin ang buong Bibliya sa ZSL. Tinatayang aabot nang 10 taon bago ito matapos.”

Makikita sa proyektong ito na mahal ni Jehova ang lahat ng tao. Masaya tayo sa pagpapalang ito at napapakilos tayo nito na maging mas masigasig sa pangangaral ng “walang-hanggang mabuting balita . . . sa bawat bansa at tribo at wika at bayan.”—Apocalipsis 14:6.