Lokumu l’ɔlɔlɔ lata ɔnɛ anto wayɔsɛna pondjo pondjo lanɛ la nkɛtɛ tanemaka lo Bible. (Osambu 37:29) Bible kekɔ la tobukubuku 66. Nzambi akakambe l’apami 40 wa kɔlamelo dia kifunda. Abuku atanu w’etatelo wakafundama oma le Mɔsɛ ambeta ɛnɔnyi oko 3 500. Dibuku di’ekomelo diakafundama oma le ɔpɔstɔlɔ Joani ambeta ɛnɔnyi ndekana 1 900. Tokanyi taki onto akɔna takafunde afundji wa Bible? Nzambi akakambe la nyuma k’ekila dia sambiyɛ afundji wa Bible kɛnɛ kakawahombe mfunda. (2 Samuele 23:2) Vɔ wakafunde tokanyi taki Nzambi, koko aha takiwɔ hita. Ɔnkɔnɛ, Jehowa mbele Kiɔkɔ ya Bible.—Adia 2 Timote 3:16; 2 Petero 1:20, 21.

Sho mbeyaka dia Bible ndja oma le Nzambi nɛ dia tɔ mbutaka lo yoho ya shikaa akambo wayosalema lo nshi yayaye. Ndoko onto lakoka nsala dui sɔ. (Jashua 23:14) Paka Nzambi Kanga-Wolo-Tshɛ mbakoka mbeya l’eshikikelo tshɛ akambo wayosalema lo nshi yayaye.—Adia Isaya 42:9; 46:10.

Dibuku dioye oma le Nzambi pombaka mɛtɛ ntshikitana l’abuku akina, ndo ngasɔ mbediɔ. Miliyara ya Bible yambokahanyema lo ɛtɛkɛta nkama. Kânga mbayatɔ edja, awui wa lo Bible mbɔtɔnɛka l’awui wa siansɛ. Ndo nto, tokanyi takafunde afundji wa Bible 40 asɔ hatɔlɔshana. * Lâdiko dia lâsɔ, Bible mɛnyaka hwe dia Nzambi ekɔ ngandji ndo tɔ kekɔ la wolo wa ntshikitanya nsɛnɔ y’anto lo yoho ya dimɛna efula. Akambo asɔ mbetawoyaka miliyɔ y’anto  dia Bible kekɔ Ɔtɛkɛta wa Nzambi.—Adia 1 Tesalonika 2:13.

Bible ndekaka tɛkɛta dia lokumu l’ɔlɔlɔ lendana la sangwelo dioludi la ngandji diele la Nzambi lo dikambo di’anto. Tɔ mɛnyaka woho wakashisha anto diɛsɛ dia nsɛna lo paradiso ka la nkɛtɛ l’etatelo k’ɔkɔndɔ w’anto ndo woho wayokoma nkɛtɛ paradiso nto.—Adia Enyelo 21:4, 5.

Ɔtɛkɛta wa Nzambi, Bible wekɔ nto la ɛlɛmbɛ, atɔndɔ ndo l’alako. Ndo nto, Bible kekɔ la bɛnyɛlɔ diɛnya kɛnɛ kakasalɛka Nzambi anto ndo bɛnyɛlɔ sɔ tɛnyaka woho w’onto wele Nzambi. Ɔnkɔnɛ, Bible kokaka kokimanyiya dia wɛ mbeya Nzambi. Tɔ mɛnyaka woho wakokayɛ nkoma ɔngɛnyi ande.—Adia Osambu 19:7, 11; Jakoba 2:23; 4:8.

Biukubuku nyɛ yayokokimanyiya dia wɛ nshihodia Bible lo nkamba la toho tâmɛ takakambe la Yeso. Nde akashilaka divɛsa ɔtɔi ɔtɔi ndo ‘akâlembetshiyaka.’—Adia Luka 24:27, 45.

Ndoko awui wakoka tosha ɔngɛnɔngɛnɔ ko mbɛdima l’ɔngɛnɔngɛnɔ watosha lokumu l’ɔlɔlɔ l’oma le Nzambi. Koko anto amɔtshi hawetawɔ lokumu l’ɔlɔlɔ lɔsɔ ndo akina hawolange lihokamɛ. Koko awui asɔ hawohombe kɔkɔmɔla. Eya ɔnɛ elongamelo kele la yɛ dia nkondja lɔsɛnɔ la pondjo nemanɛka la ewo kayoyokondja lo dikambo dia Nzambi.—Adia Joani 17:3.