WEKELO 13
Lokumu l’ɔlɔlɔ lakɔna lendana la ɛtɛmwɛlɔ?
1. Onde ɛtɛmwɛlɔ tshɛ wekɔ amɛna?
Lo ɛtɛmwɛlɔ tshɛ, anto wele l’etema w’ɛlɔlɔ wekɔ. Mbeya dia Nzambi mɛnaka anto asɔ ndo ndjakiyanyaka dikambo diawɔ ekɔ lokumu l’ɔlɔlɔ. Koko lonyangu ko, as’ɛtɛmwɛlɔ efula ndjakimɔka l’awui wa kɔlɔ. (2 Koreto 4:3, 4; 11:13-15) Lo ndjela alapɔlɔ watomba lo waa tojurnalɛ, ɛtɛmwɛlɔ ɛmɔtshi ndjatambiyaka l’awui wa terɔrismɛ, kana wa mana dioho dimɔtshi di’anto oshiki. Vɔ ndjatambiyaka nto l’awui w’ata ndo mbeyanaka l’ana w’akɛnda la wolo. Awui asɔ nyangiyaka mɛtɛ wanɛ wele la mbetawɔ le Nzambi!
As’ɔtɛmwɛlɔ wa mɛtɛ tombolaka Nzambi, koko as’ɛtɛmwɛlɔ wa kashi mbonyangiyaka. Ɛtɛmwɛlɔ wa kashi mbetshaka awui wahatumbi oma lo Bible. Vɔ mbetshaka nto awui wa kashi lo kɛnɛ kendana la Nzambi ndo la wanɛ wakavu. Koko Jehowa nangaka di’ekambi ande mbeya akambo wa mɛtɛ wendana la nde.
2. Lokumu l’ɔlɔlɔ lakɔna lendana la ɛtɛmwɛlɔ?
Diɛsɛ ko Nzambi hakesama oma le ɛtɛmwɛlɔ wasɛma dia vɔ mbolangaka etena kele vɔ nangaka andja waki Satana. (Jakoba 4:4) Ɔtɛkɛta wa Nzambi mbelɛka ɛtɛmwɛlɔ tshɛ wa kashi ɔnɛ ‘Babilɔna ka woke.’ Babilɔna aki osomba w’edjedja wa lɛnɛ akatatɛ ɛtɛmwɛlɔ wa kashi l’ɔkɔngɔ wa Mvula k’elola ka lo nshi ya Nɔa. Ɔnkɔnɛ, kem’edja Nzambi ayanga ndanya la shashimoya tshɛ ɛtɛmwɛlɔ wa kashi wakesa ndo wasoya anto.
Lokumu l’ɔlɔlɔ lokina lɔ lɔnɛ. Jehowa hohɛ anto w’etema ɛlɔlɔ wambodiangana l’atei w’ɛtɛmwɛlɔ wa kashi wa l’andja w’otondo. Nde ekɔ lo nkotola anto asɔ lo mbaetsha akambo wa mɛtɛ.
3. Kakɔna kahomba anto w’etema ɛlɔlɔ nsala?
Ɔtɛmwɛlɔ wa mɛtɛ wekɔ lo nsala di’anto monga kâmɛ
Jehowa ndjakiyanyaka dikambo di’anto walanga kɛnɛ kele mɛtɛ ndo kɛnɛ kele ɔlɔlɔ. Nde mbâkeketshaka dia vɔ ntomba oma l’ɛtɛmwɛlɔ wa kashi. Wanɛ woka Nzambi ngandji mbetawɔka dia nsala etshikitanu l’oyango wa mbɔngɛnyangɛnya.
Lo ntambe ka ntondo, etena kakoke anto w’etema ɛlɔlɔ lokumu l’ɔlɔlɔ lakâsambisha apɔstɔlɔ, vɔ wakalietawɔ l’ɔngɛnɔngɛnɔ tshɛ. Jehowa akawaetsha dia vɔ nsɛna yoho ya lɔsɛnɔ y’oyoyo, y’ɔngɛnɔngɛnɔ, yele la oyango ndo la elongamelo. Vɔ wekɔ ɛnyɛlɔ k’ɔlɔlɔ le so ɛlɔ kɛnɛ, nɛ dia vɔ waketawɔ lokumu l’ɔlɔlɔ lo nkitsha Jehowa lo dihole dia ntondo lo nsɛnɔ yawɔ.
Jehowa nongolaka wanɛ watomba oma l’ɛtɛmwɛlɔ wa kashi ko ndja lo nkumbo kande k’atɛmɔdi wa mɛtɛ. Naka wɛ mbetawɔ leeta l’ɔlɔlɔ laki Jehowa lɔsɔ, kete wɛ ayokoma ɔngɛnyi ande, ayɔtɔ lo nkumbo k’oyoyo ndo koludi la ngandji k’atɛmɔdi wa Jehowa ndo wɛ ayokondja lɔsɛnɔ la pondjo.
4. Ngande wayêla Nzambi ɔngɛnɔngɛnɔ lo nkɛtɛ k’otondo?
Elanyelo ka lo nshi yayaye k’ɛtɛmwɛlɔ wa kashi ekɔ lokumu l’ɔlɔlɔ. Elanyelo kɛsɔ kayotshungola anto wa l’andja w’otondo oma lo shɔkɔ. Ɛtɛmwɛlɔ wa kashi hawongaki nto pondjo dia minganyiya anto kana mbidja diatɔnelo lam’asawɔ. Anto tshɛ wayonga l’ɔtɛmwɛlɔ wa Nzambi ɔtɔi ka mɛtɛ.
