Mukanda w’oma le Olui-walɔmbɔla
Anangɛso l’akadiyɛso wa ngandji,
Lo numɛlɔ katɔ ka ntondo ka Ngɔndɔ ka ntondo 1, 2008, Tshoto y’Etangelo y’anto tshɛ yakatatɛ totondjɛ asawo w’amɛna efula waki l’ɔtɛ a dui ɔnɛ: “Tokoya mbetawɔ kawɔ.” Ntatɛ oma l’etena kɛsɔ, wakatotondjɛka sawo di’oyoyo ɔtɔi oma l’ɔkɔngɔ wa ngɔndɔ shato tshɛ dikambo di’ɔngɛnɔngɛnɔ aso.
Shɛngiya yakɔna yakonge l’asawo asɔ le ambadi na? L’ɔkɔngɔ wa nde nshidiya mbadia sawo diakendanaka la Maata, kadiyɛso kɛmɔtshi akafunde ate: “Lakatondɔ la tɔɔla lam’akamadia sawo nɛ dikambo lekɔ oko nde. Dimi kombolaka mbala tshɛ kambɛ anto akina ndo nkamba olimu efula, koko tena dimɔtshi dimi mbohɛka di’ekɔ ohomba momuya yema ndo monga kaamɛ la angɛnyi.” Osekaseka ɔmɔtshi wele l’ɛnɔnyi 15 akate lo kɛnɛ kendana l’ɔkɔndɔ waki Ɛsta ate: “Dui diakamangɛnangɛna ele sho kokaka nkombola dia monga l’ahɔndɔ efula, djekoleko ahɔndɔ weke katomba. Sho pombaka ndjalɛnga dimɛna, koko hatohombe ntamb’elelo.” Nde akakotsha ate: “Jehowa ndjakiyanyaka dikambo dia lonto laso la l’etei k’otema.” Ndo kadiyɛso kekina akanandema efula la sawo diakendanaka la ɔpɔstɔlɔ Petero. Nde akafunde ate: “Lakangɛnangɛna ɔkɔndɔ ɔsɔ woho w’anyanya lam’akamawadia. Lakonge oko onto lakikɔ lawɔ! Lakakambe l’awoki ami dia nshihodia kɛnɛ kalanga avɛsa nembetshiya.”
Kɛnɛ kakafunde ambadi asɔ ndo ambadi akina efula dia mɛnya lowando lawɔ lo asawo asɔ shikikɛka mɛtɛ ka kɛnɛ kakafunde ɔpɔstɔlɔ Pɔɔlɔ deko aha nɛ ate: “Nɛ dia akambo tshɛ wakafundama lo nshi y’edjedja wakafundama dia tosha wetshelo.” (Rɔmɔ 15:4) Eelo, Jehowa akasale di’ɛkɔndɔ ɛsɔ fundama lo Bible dia tosha wetshelo w’eshika. Sho tshɛ kokaka nkondja wetshelo oma l’ɛkɔndɔ akɔ, oyadi ɛnɔnyi akɔna wele la so.
Tambonyokeketsha la ngandji tshɛ dia nyu mbadia dibuku nɛ aha la ntshimbatshimba. Nyodidje l’ekongelo k’Ɔtɛmwɛlɔ wa lo nkumbo ndo nyeye di’ana wayodingɛnangɛna efula! Etena kayodiekama lo Wekelo wa Bible wa l’etshumanelo, tanyohandjake kaanga lomingu ɔtɔi. Nyoyatshungwe etena ndo nyadia dibuku nɛ ɔkɔkɛ ɔkɔkɛ. Nyokambe la yimba ndo l’awoki anyu. Nyoyaoke oko wakayaoke anto wɔtɛkɛtshiwɔ lɔkɔ, ndo nyonge oko anto wɛna kɛnɛ kakawɛnyi. Nyɛdike kɛnɛ kakawasale la ntondo k’awui wakaakomɛ la kɛnɛ kotonyosala la ntondo k’awui akɔ.
Tambɔngɛnangɛna efula dia kahana kaamɛ la nyu awui wa lo dibuku nɛ. Tambolongamɛ dia diɔ diayonga tshondo yɔtshɔkɔ le nyu ndo le nkumbo yanyu. Nyeye dia sho nyokaka ngandji ndo tambonyokombolɛ kɛnɛ tshɛ kele ɔlɔlɔ,
Olui-walɔmbɔla w’Ɛmɛnyi wa Jehowa