Hɔsɛya 5:1-15
-
Kilombo le Efrayimɛ ndo leJuda (1-15)
5 “Nyu ɛlɔmbɛdi,+ nyolonge,Nyu luudu l’Isariyɛlɛ le, nyodje yimba,Nyu luudu la nkumekanga le, nyohokame,Nɛ dia kilombo mendanaka la nyu;Dikambo nyu nyekɔ djonga le MizipaNdo ɔtɛyi le Tabɔra.+
2 Wanɛ watakɔ mboka* wamboyatambiya tshavu* lo odiakanelo,Ndo dimi lekɔ lo mbahɛmɔla* vɔ tshɛ.
3 Dimi mbeyaka Efrayimɛ,Ndo Isariyɛlɛ hashɛmi oma le mi.
Nɛ dia wonya ɔnɛ, Efrayimɛ le, wɛ ambosala kinumba k’efula;*Isariyɛlɛ amboyadja mindo.+
4 Etsha awɔ hawowasha diaaso dia nkalola le Nzambi kawɔ,Nɛ dia yimba ya kinumba* yekɔ l’atei awɔ;+Ndo vɔ haweye Jehowa.
5 Otako w’Isariyɛlɛ wamboshikikɛ lo dikambo diande;*+Isariyɛlɛ la Efrayimɛ wambotakana lo munga kawɔ,Ndo Juda ambotakana kaamɛ la wɔ.+
6 Vɔ wakatshu la ɛkɔkɔ awɔ ndo la ngɔmbɛ yawɔ dia toyanga Jehowa,Koko vɔ kokoka mbotana.
Nde akamɔ oma le wɔ.+
7 Vɔ wambokesa Jehowa,+Nɛ dia waya ambutshi w’apami w’ana w’ase wedja.
Kakianɛ ngɔndɔ kɛmɔtshi kayowashila* vɔ la tenyi diawɔ di’okitɔ.*
8 Nyode wɔɔndjɔ+ la Ngibɛa, dimama la Rama!+
Nyode kioko ya ta la Bɛtɛ-Avɛna+ l’ɔkɔngɔ ayɛ, wɛ Bɛnjamina!
9 Efrayimɛ le, wɛ ayonga ɛngɔ ka wɔnɔnyi lo lushi la dilanya.+
Dimi lambewoya mɛtɛ kɛnɛ kayosalema l’atei wa waoho w’Isariyɛlɛ.
10 Ewandji wa la Juda wekɔ oko wanɛ wasɛkɔla olelo.+
Dimi layotshola odudu ami le wɔ oko ashi.
11 Efrayimɛ ambɔhɛnyahɛnyama, ambominɔma la kilombo,Nɛ dia nde akayashikikɛ dia ndjela ɔndɔshi+ ande.
12 Ɔnkɔnɛ, dimi laki oko loombo le EfrayimɛNdo oko ɛhɔndɛlɔ le luudu la Juda.
13 Etena kakɛnyi Efrayimɛ hemɔ kande, Juda mpota kande,Efrayimɛ akatshu le Asuriya+ ndo akatome akɛndji le nkumekanga ka woke.
Koko nde komonga l’akoka wa kɔkɔnɔla,Ndo kokoka nkɔnɔla mpota kayɛ.
14 Nɛ dia dimi layonga oko ɔsɔngɔ wa ntambwɛ le Efrayimɛ,Ndo oko ntambwɛ ka wolo* le luudu la Juda.
Dimi dimɛ layatshatsha ko layotshɔ;+Dimi layowaɛmba ndo ndooko onto layowatsha.+
15 Dimi layotshɔ ndo layokalola lo dihole diami polo lam’ayowodiɛnɛ la etombelo w’onongo awɔ,Ndo oma laasɔ, vɔ wayoyanga kɛtshi*+ kami.
Etena kayowonga lo sui, vɔ wayonyanga.+
Nɔtɛ ka l'ɛse ka dikatshi
^ Kana “atɔmbɔki.”
^ Kana “wamboyasha tshɛ.”
^ Kana “dimi layowasha dilanya.”
^ Kana “ambosala awui wa mindo wa dieyanelo; amboyasha lo kinumba.”
^ Kana “awui wa mindo; loseka mfɔ ka mfɔ.”
^ Tshɛk., “lo elungi kande.”
^ Kana ondo “Vɔ wayɔlɛma l’edja ka ngɔndɔ ɔtɔi.”
^ Kana “dikambɔ.”
^ Kana “ɔsɔngɔ wa ntambwɛ wele l’alɛfulɛfu.”
^ Tshɛk., “elungi.”
