Mbeya woho wa nkamba la falanga
Anto efula wakakitshakitsha ekakatanu awɔ wendana la falanga lo nkamba l’atɔndɔ wa lo Bible.
KONGƐ AKAMBO DIMƐNA
TƆNDƆ DIA LO BIBLE: “Asangwelo wa kanga etete konyaka mɛtɛ lo otondoyelo, koko wanɛ tshɛ wasala akambo la esasesase wayonga wola ndooko onyake.”—Tokedi 21:5.
KƐNƐ KALEMBETSHIYA DUI SƆ: Wɛ pombaka nsala ekongelo kɛmɔtshi ndo oma laasɔ, yashikikɛ dia kiyela. Ɔnkɔnɛ, nsala ekongelo kayɛ dimɛna ntondo ka wɛ nkamba la falanga yayɛ. Eya dia ondo wɛ hatokoka nsomba ɛngɔ tshɛ kakombolayɛ. Diakɔ diele, nkamba la falanga yayɛ la lomba.
KƐNƐ KAKOKAYƐ NSALA:
-
Totshupake falanga otshupatshupa. Sala listɛ la diangɔ tshɛ diele la yɛ ohomba ndo oma laasɔ, lɔnga falanga lo ndjela ohomba l’ohomba. Nshikikɛ lofulo la falanga layokamba la yɛ lo ɛngɔ l’ɛngɔ. Naka ɛngɔ kɛmɔtshi kamboleka mbɔsa falanga efula oleki nyɛ yakayakongɛ, kete ɔsa falanga yotoyosomba ɛngɔ kekina, ko wɛ kokanya lo falanga shɔ. Ɛnyɛlɔ, naka wɛ ambokamba la falanga efula oleki nyɛ yakayakongɛ dia mbidja esasɛ lo mututu, kete wɛ koka mbɔsa falanga yakayombe dia nsala dui dikina diele bu ohomba efula, ɛnyɛlɔ falanga ya ntshɔ lo rɛstora.
-
Ewɔ mbɔsa abasa wele bu ohomba. Naka kokaka, ewɔ mbɔsa abasa. Lo dihole dia nsala dui sɔ, omba falanga dia nsomba diangɔ diele la yɛ ohomba. Lo wedja efula, anto sombaka diangɔ lo mbɔsa abasa, mbuta ate vɔ mbɔsaka diangɔ ko ndjofuta l’ɔkɔngɔ. Naka onto hafutshi dibasa sɔ l’etena kahombama, kete nde ayoyofuta la wahɔ. Dia mbewɔ dui sɔ, ayoleka dimɛna nde mfuta falanga tshɛ l’ekomelo ka ngɔndɔ.
Wekelo ɔmɔtshi mɛnyaka di’etena kɔsa anto abasa, vɔ ndjolekaka nshisha falanga efula. Naka wɛ ekɔ la falanga lo bankɛ, kete nkamba la yɔ la lomba tshɛ.
EWƆ WAONGA WA KƆLƆ
TƆNDƆ DIA LO BIBLE: “Kanga nɛndɛ hafuse lo nshi ya tshitshi, ko nde ayoyɔlɔmbana lo nshi ya dinela etena kende ndooko la ɛngɔ.”—Tokedi 20:4.
KƐNƐ KALEMBETSHIYA DUI SƆ: Nɛndɛ koka nkonya onto dia monga wola. Diakɔ diele, ekɔ ohomba nkamba olimu l’etete ndo nkamba la falanga yayɛ la lomba tshɛ dia yɔ ndjokokimanyiya l’ehomba w’otsha la ntondo.
KƐNƐ KAKOKAYƐ NSALA:
-
Kambaka olimu efula. Naka wɛ nkamba olimu l’etete ndo monga onto lɛkɛwɔ otema, kete owandji ayɛ w’olimu ayokɔngɛnangɛna ndo nde ayokotshika l’olimu.
-
Onga la losembwe. Tovake owandji ayɛ. Naka wɛ mbiva, kete dui sɔ diayolanya lokumu layɛ ndo ayonga wolo dia wɛ ndjokondja olimu okina.
-
Tongake la lokaki. Naka wɛ ndjashaka tena tshɛ paka dia ndeka nkondja falanga, kete dui sɔ mbeyaka ndjolanya yoonge yayɛ ndo diɔtɔnganelo diasayɛ l’anto akina. Eya diaha falanga mboleki ohomba lo lɔsɛnɔ.
ATƆNDƆ AKINA WA LO BIBLE
Adia Bible l’Ɛtɛrnɛtɛ, tɔ tanemaka lo jw.org l’ɛtɛkɛta nkama
TOSHISHAKE FALANGA NDO WENYA AYƐ DIA NDJASHA LO MBEKELO YA KƆLƆ.
“Ombidjɔki wa wanu ndo kanga lɔtɔmɔ wayonga wola, onyingonyingo wa djɔ wayɔlɔtsha onto emusu w’ahɔndɔ.”—TOKEDI 23:21.
TOLEKAKE NDJAKIYANYA DIKAMBO DIA FALANGA.
“Nyotshike ndjakiyanya dikambo dia nsɛnɔ yanyu nyate: Ayotɔlɛ na? Kana ayotɔnɔ na? Kana lo dikambo di’alemba anyu nyate: Ayotɔlɔta na?”—MATEO 6:25.
TONGAKE L’ƆKƆMIYA.
“Kanga ɔkɔmiya kombolaka ɔngɔnyi, aha la mbeya dia nde ayonga wola.”—TOKEDI 28:22.
