Yoonge ya demba
Bible bu dibuku di’aseka enganga. Koko, tɔ kekɔ l’atɔndɔ wakoka kokimanyiya dia monga la yoonge ya dimɛna. Tende atɔndɔ amɔtshi wa lo Bible wakoka kokimanyiya dia monga la yoonge ya dimɛna.
KOKƐ DEMBA DIAYƐ
TƆNDƆ DIA LO BIBLE: “Ndooko pami kahetsha demba diande hita, koko nde dileshaka ndo dilɔngɔsɔlaka.”—Ɛfɛsɔ 5:29.
KƐNƐ KALEMBETSHIYA DUI SƆ: Tɔndɔ sɔ tokeketshaka dia nsala kɛnɛ tshɛ kakokaso nsala dia nkokɛ yoonge yaso. Alapɔlɔ ɔmɔtshi mɛnyaka dia ekakatanu efula wendana la yoonge ndjaka oma lo ɛsɔnwɛlɔ wasala onto lo lɔsɛnɔ. Diakɔ diele, naka sho nsala ɛsɔnwɛlɔ w’ɛlɔlɔ, kete dui sɔ koka tokimanyiya dia monga la yoonge ya dimɛna.
KƐNƐ KAKOKAYƐ NSALA:
-
Oleelo. Wɛ pombaka ndɛka mbo ya ndɛ y’amɛna ndo nɔka ashi efula.
-
Sotshasotshaka demba. Kamba olimu wa l’emunyi koka kokimanyiya dia monga la yoonge ya dimɛna, oyadi ɛnɔnyi akɔna wele la yɛ kana elelo wele la yɛ l’ɔtɛ wa hemɔ kayɛ kahakɔnɔ. Ase nkumbo, angɛnyi ndo adɔkɔtɛlɛ koka kosha alako ndo kokeketsha dia sotshasotshaka demba, koko wɛmɛ mbahomba nsala dui sɔ!
-
Lalaka efula. Onto lahalale efula l’etena k’otale koka ndjotata wolo. Anto hawolale efula, nɛ dia vɔ sɔnaka dia nsala awui akina wonya wahombawɔ ndala. Koko, naka wɛ nsɔna dia ndalaka efula, kete wɛ ambɔsɔna dia monga la lɔsɛnɔ loleki dimɛna.
TSHIKA MBEKELO YA KƆLƆ
TƆNDƆ DIA LO BIBLE: “Nyɛsɔ toyaɛdia oma lo mindo tshɛ ya demba ndo ya yimba.”—2 Kɔrɛtɔ 7:1.
KƐNƐ KALEMBETSHIYA DUI SƆ: Tayonga la yoonge ya dimɛna naka sho nsɔna diaha nnɔ didjoyadjoya dia wolo, ɛnyɛlɔ mfɔka keyama oko kiɔkɔ ya hemɔ ndo nyɔi k’anto efula.
KƐNƐ KAKOKAYƐ NSALA: Shikikɛ datɛ dimɔtshi diayoyotshika nnɔ dinɔnɔ ndo fundadiɔ lo alamanaka ayɛ. La ntondo ka datɛ sɔ koka, nkadja mfɔka, kandji ndo dinɔnɔ dikina diele la yɛ. Ewɔ tanema l’ahole wele anto wele la mbekelo ka nnɔ diangɔ sɔ. Tɛ angɛnyi ndo ase nkumbo kayɛ dia wɛ ambɔsa yɛdikɔ yaha nnɔ dinɔnɔ sɔ dia vɔ kokimanyiya.
ATƆNDƆ AKINA WA LO BIBLE
Wɛ koka nkondja kɔpi kɛmɔtshi ka Bible lo mɛnana l’Ɛmɛnyi wa Jehowa wa lo ngelo kanyu
TOYADJAKE LO WAALE.
“Naka wɛ amboka luudu l’oyoyo, kodje ndo lokombo lo ɔtɛ wa luudu, diaha wɛ mbela onongo wa dikila lo luudu layɛ, nɛ dia onto ɔmɔtshi mbeyaka nkɔ oma lɛkɔ.”—EOHWELO K’ƐLƐMBƐ 22:8.
AHEMƐ NKƐLƐ KAYƐ.
“Onto lahoke nkɛlɛ esadi ekɔ la shɛnɔdi y’efula, koko onto lele bu la solo dia lotutsha kɛnɛmɔlaka enginya kande.”—TOKEDI 14:29.
TONGAKE KANGA DESHI.
“Tongake . . . l’atei wa wanɛ wayasha efula lo deshi.”—TOKEDI 23:20.
Enda ndo lo...
EMƆ!
Mboka k’ɔngɛnɔngɛnɔ—Yoonge ya demba ya dimɛna ndo ekikelo
Onde hemɔ koka shishɛ onto ɔngɛnɔngɛnɔ?
