NAKA wɛ akavusha onto ɔmɔtshi lokayɛ ngandji, kete wɛ la wɔ akakoke monga l’ɔkɛyi, ndjaoka opoko ndo wɛ akakoke ndjaoka oko wɛ bu l’ekimanyielo. Ondo wɛ akoke nkɛlɛ, akayaɛndja onongo kana akoke wɔma. Ondo wɛ akayambola dia kana aki ohomba wɛ ntetemala nsɛna.

Eya dia monga l’ɔkɛyi halembetshiya di’onto ekɔ la wɔdu. Dui sɔ mɛnyaka dia wɛ akokaka onto ayɛ ngandji k’efula. Ko onde wɛ koka nkondja ekimanyielo koshika dia ndɔshana l’ɔkɛyi w’efula wele la yɛ?

Kaanga mbakoka kandji kayɛ mɛnama oko hatoshilaki, wɛ koka nkondja ekimanyielo lo alako wayela anɛ:

ƆSA ETENA KA NDELA

Yoho yonga anto l’ɔkɛyi ndo etena kɔsawɔ dia monga l’ɔkɛyi ntshikitana. Koko, ndela koka kokitshɛkitshɛ kandji kokayɛ. Vanessa, lakatatɛkɛtshi l’etatelo mbutaka ɔnɛ: “Lakalangaka ndela tsho dia nkitshakitsha kandji kaki la mi.” Sofía, lakavusha kosɛnde ka womoto la shashimoya mbutaka ɔnɛ: “Dimi mbokaka kandji efula etena kakanyiyami dui sɔ, ekɔ oko onto lafola ndo lasola mpota kambɔtɛma. Kaanga mbele kandji mongaka efula, dui sɔ kimanyiyaka dia mpota nkɔnɔ.”

 TƐ ANTO AKINA WOHO WAYAOKAYƐ

Ekɔ mɛtɛ dia lo tena dimɔtshi wɛ mbeyaka nkombola dia monga wɛmɛ. Koko, ɔkɛyi ekɔ wotsho wahayakoke wɛmɛ mɛmba. Jared lele l’ɛnɔnyi dikumi l’esambele lakavusha she mbutaka ɔnɛ: “Lakatɛ anto akina woho wakamayaokaka. Hafɔnya dia lakatɛ anto woho wakamayaokaka tshɛ lo tshɛ, koko laki l’ɔngɛnɔngɛnɔ l’ɔtɛ wakamawatɛ awui akɔ.” Janice, lakatatɛkɛtshi lo sawo dia ntondo mɛnyaka wahɔ okina wakandakondja, nde mbutaka ɔnɛ: “Nsawola l’anto akina mbishaka esambelo k’efula. Lakoke di’anto wakashihodiaka woho wakamayaokaka ndo dimi kombikikɛka dui sɔ dimɛ.”

ETAWƆ EKIMANYIELO

Dɔkɔtɛlɛ dimɔtshi mbutaka ɔnɛ: “Naka anto wele l’ɔkɛyi mbisha angɛnyi ndo ewotɔ awɔ diaaso dia mbakimanyiya kam’avushawɔ, kete ayoleka monga dui dia wɔdu dia vɔ ntetemala mbikikɛ ɔkɛyi awɔ ndo mbotondoya.” Tɛ angɛnyi ayɛ kɛnɛ kakokawɔ nsala dia kokimanyiya; vɔ nangaka kokimanyiya, koko mbeyaka monga ko haweye kɛnɛ keyɛ l’ohomba.​—Tokedi 17:17.

YASUKANYA LA NZAMBI

Tina mbutaka ɔnɛ: “Etena kakamavusha omɛmi la hemɔ ka kansɛrɛ la shashimoya, dimi kokoka ndjaɛkɛ le nde nto, laasɔ lakahombe mbitɛka Nzambi akambo tshɛ! Lakatatɛ mbɔlɔmba ekimanyielo lushi tshɛ. Nzambi akakimanyiya lo yoho yahamakoke mbita.” Tarsha, laki l’ɛnɔnyi 22 etena kakavu nyango mbutaka ɔnɛ: “Wadielo wa Bible wa lushi la lushi aki tshondo y’esambelo le mi. Wadielo ɔsɔ wakakimanyiyaka dia nkondja dui dimɔtshi di’ekeketshelo dia nkana la diɔ yimba.”

ONGA OKO ONTO LƐNA WOHO WASALEMA EOLWELO

Tina tetemalaka mbita ɔnɛ: “L’etatelo, elongamelo ka eolwelo kosambami, nɛ dia laki l’ohomba w’omɛmi ndo ana waki l’ohomba wa shɛwɔ l’etena kɛsɔ. Koko, kakianɛ l’ɔkɔngɔ w’ɛnɔnyi ɛnɛi, laya la mbetawɔ l’elongamelo kɛsɔ. Elongamelo kɛsɔ sukɛkami. Lekɔ lo nkanyiya etena kayomowɛna nto ndo dui sɔ mbishakami wɔladi ndo ɔngɛnɔngɛnɔ!”

Ondo aha mbala kakɔ ɔtɔi mbayoshila ɔkɛyi wele la yɛ. Aha la taamu, kɛnɛ kakahomana la Vanessa koka kokeketsha. Nde mbutaka ate: “Wɛ mbeyaka mfɔnya dia wɛ hayaokaki dimɛna pondjo, koko yema yema ɔkɛyi wele la yɛ koka nkitakita.”

Lembetɛ dia kaanga mbele lakiyɛ la ngandji aya bu, ekɔ ohomba wɛ ntetemala nsɛna. Diɛsɛ l’ekimanyielo ka la ngandji kaki Nzambi, wɛ koka ntetemala monga la lɔngɛnyi la dimɛna efula ndo lɔsɛnɔ lele l’oyango. Ndo keema edja, Nzambi ayolola wanɛ wakavu. Nde nangaka dia wɛ ndjokumbatanɛ la lakiyɛ la ngandji nto. L’etena kɛsɔ, lonyangu lele l’otema ayɛ layoshila pondjo pondjo!