Mado: Lekɔ lo takahɛ anto tshɛ wa l’ɛtshi kaso ka nkɛtɛ traktɛ kɛnɛ. Tɔ kekɔ l’ɔtɛ a dui ɔnɛ Onde wɛ nangaka mbeya akambo wa mɛtɛ? Kayɛ tɔ kɛnɛ.

Sɔfina: Laasɔ akambo w’ɔtɛmwɛlɔ mbofundjiwɔ lɔkɔ?

Mado: Eelo. Lo ambola asamalo wofundjiwɔ lo lohoso anɛ, diakɔna dialangayɛ sho—

Sɔfina: Ohotokemala yema. Wɛ ekɔ lo mbetsha wenya ayɛ wetshetsha dia nsawola la mi.

Mado: Lande na katayɛ ngasɔ?

Sɔfina: Kɛnɛ kele lanɛ ele, dimi bu la mbetawɔ le Nzambi.

Mado: Kawɔ losaka. Lambɔngɛnangɛna woho wamboyombutɛ kɛnɛ kele l’otema ayɛ. Koko dimi nte kombole yema, onde ngasɔ mbokoyokanyiyaka nshi tshɛ?

Sɔfina: Ndooko, lakatshɔka l’ɔtɛmwɛlɔ lam’akimi leke dikɛnda. Koko aya edja kemi handjotshɔ.

Mado: Lamboka kɛnɛ katayɛ. Lam’alangɛ lokombo lami Mado. Ko wɛ lokombo layɛ?

Sɔfina: Lokombo lami Sɔfina.

Mado: Lambɔngɛnangɛna efula dia keya Sɔfina.

Sɔfina: Ndo dimi lawɔ.

Mado: Sɔfina le, dimi handje ndjoketawoya wetshelo wa l’ɔtɛmwɛlɔ ami la wolo. Koko dimi nte kombole yema. Onde ekɔ dui dimɔtshi dia laande diakayokokonya dia wɛ mfɔnya ɔnɛ Nzambi bu?

Sɔfina: Eelo, mama akasale aksida lo mutuka ambeta ɛnɔnyi 17.

Mado: Ande kandji lee! Onde nde akokala waale?

Sɔfina: Eelo, demba diande diakɔlɛ oma ko lushi lɔsɔ.

Mado: Dui sɔ pombaka kosha paa k’efula mɛtɛ.

Sɔfina: Katɛ asɔ mbediɔ. Kɛsɔ mbatshindja wɔɔngɔ, ndo dimi ndjambolaka ɔnɛ naka Nzambi ekɔ, lande na kakandetawɔ dia dui dia ngasɔ komɛmi? Lande na ketawɔ Nzambi dia sho diɛnɛka l’asui nganɛ?

Mado: Sɔfina le, bu kɔlɔ wɛ ndjambola. Etena kasowaso, bu kɔlɔ ndjambola lande na kasowaso nɛ dia kaanga anto wa kɔlamelo wakasɛnaka lo nshi yakafundamaka Bible wakayambola dimbola sɔ.

Sɔfina: Takota mɛ!

Mado: Wate hɛ. Layanga kɛnya ɛnyɛlɔ kɛmɔtshi k’oma lo Bible.

Sɔfina: Ɔmɛnya lam’alangɛ.

Mado: Ɛsɔ tende ambola wakoke ɔprɔfɛta Habakuka Nzambi. Ambola akɔ tanemaka lo Habakuka, tshapita 1, divɛsa 2 ndo 3 diata ɔnɛ: “Edja ndu kaandi ayumulela ekimanyelu, ku we hambukela? Dimi lambukulelela dia akambu wa ngala, keli we hatushimbela? Dikambu kuna diamenyaye uhedia, ndu diamenyaye kolo?” Onde ambola asɔ hawɔfɔnɛ la wanɛ wayaokayɛ?

Sɔfina: Eelo vɔ fɔnaka mɛtɛ.

Mado: Nzambi kopangwɛ Habakuka lo woho wakandawoke ambola asɔ, ndo nde kombotɛ ɔnɛ nde bu la mbetawɔ ka wolo.

Sɔfina: Dimɛna dia mamba ss.

Mado: Bible mbutaka dia Nzambi mɛnaka asui watokomɛ ndo nde ndjakiyanyaka dikambo diaso.

 Sɔfina: Alangayɛ mbuta na Mado?

Mado: Ohenda ɛnyɛlɔ kɛnɛ kofundami lo Etumbelu 3:7. Wɛ mbeyaka mbadia divɛsa sɔ lam’alangɛ.

Sɔfina: Lambadia ɔnɛ: “[Jehowa] akati ati: Dimi lambena asui a wudja ami weli l’Edjibitu. Lambuka tukuku tawo t’alelu, dikambu dia embuledi watâsuyaka. Lambeya ndu toshoko tawo.”

Mado: Losaka lo wadielo ayɛ. Lo ndjela divɛsa nɛ, onde Nzambi mɛnaka woho wasowa ekambi ande?

Sɔfina: Ɛɛ, ekɔ oko ngasɔ mbokami.

Mado: Ndo nde hakomɛ tsho lo mbeya kɛnɛ keta. Ohenda etenyi k’ekomelo ka divɛsa diomayɛ la mbadia. Nzambi mbutaka ate: “Lambeya ndu toshoko tawo.” Onde Nzambi kahayakiyanya dikambo di’anto ndo kanganyi etale la wɔ kokaka mbuta ɛtɛkɛta wa ngasɔ?

Sɔfina: Ndooko lushi ɔtɔi.

Mado: Nzambi mɛnaka asui aso ndo nde nyangaka etena kadiɛnɛso l’asui.

Sɔfina: Ɔsɔku mbediɔ.

Mado: La dui sɔ lo yimba, ɛsɔ tende woho wakayaoke Nzambi etena kakasowaka anto. Dui diakɔ tanemaka lo Isaya 63:9. Etenyi ka ntondo ka divɛsa sɔ mbutaka ɔnɛ: “L’atei [w’]asui awo tshe, ndi akasuwi kame la wo.” Shi laasɔ sho kokaka mbuta ɔnɛ Nzambi akanyange l’ɔtɛ wakasowaka ekambi ande?

Sɔfina: Ngasɔ mbokami.

Mado: Kɛnɛ kele mɛtɛ ele, Nzambi ndjakiyanyaka efula dikambo diaso, ndo nde halange sho nsowa. Nde nyangaka etena kanyangaso.

Mado: La ntondo ka sho nkakitɔna, dimi nte takote dikambo nɛ.

Sɔfina: Ɛɛ, ndooko kɔlɔ.

Mado: Tende kɛnɛ ketsha Bible lo dikambo dia wolo wele la Nzambi lo Jeremiya 10:12. Wɛ mbeyaka mbadia divɛsa sɔ lam’alangɛ.

Sɔfina: Lambadia ɔnɛ: “[Nzambi] kakatungi kete la wulu andi, ndi kakashikike andja la yimba yandi. Ndi kakakokola ulungu la ewu kandi.”

Mado: Losaka efula. Ohɛsɔ tokane yimba la divɛsa sɔ. Shi Nzambi aki la wolo w’efula wa nde ntonga andja ɔnɛ ndo diangɔ tshɛ dia lɔkɔ?

Sɔfina: Eelo.

Mado: Ko naka Nzambi akakambe la wolo ande dia ntonga diangɔ tshɛ diɛnaso, shi mbokɛmaka dia nde ekɔ la wolo wa dilɔmbɔla?

Sɔfina: Ekɔ ngasɔ.

Mado: Ohɛsɔ tonyomɔtɛkɛta dia mama kayɛ kakasale aksida. Lande na kanyangayɛ etena kawɛnayɛ asowa?

Sɔfina: Nɛ dia dimi mbookaka ngandji oko wende mama kami.

Mado: Losaka efula. Ko otondonga wɛ ekɔ l’akoka wa mbɔkɔnɔla ɛlɔ kɛnɛ, totoyosala dui sɔ?

Sɔfina: Lotodisala.

Mado: Dimɛna efula! Bible mbetshaka dia Nzambi mɛnaka asui aso, ndjakiyanyaka dikambo diaso ndo nde ekɔ la wolo wahadjama anya. Shi laasɔ sho kokaka mbuta ɔnɛ Nzambi ekɔ la ndjakimɛ k’efula lo woho wahandatakomiya asui wadiɛnɛso la wɔ polo ndo ɛlɔ kɛnɛ?

Sɔfina: Dimi kombeyaka dia ngasɔ mbediɔ ss.

Mado: Laasɔ, shi Nzambi ekɔ l’ɛkɔkɔ w’eshika wahandatakomiya asui ɛlɔ kɛnɛ? *

Sɔfina: Umm, dimi fɔnyaka dia ekɔ ngasɔ.

Mado: Lekɔ lo mboka di’oko telefɔnɛ kayɛ kekɔ lo ndela, laasɔ aya mbala kekina mbayotoyɔkɛtshanya dui sɔ.

Sɔfina: Losaka efula, layokokongɛ. *