Jairo akotɔ la hemɔ kelɛwɔ infirmité motrice cérébrale, mbuta ate hemɔ k’ekolo l’anya yɔɔ. * Diakɔ diele, nde bu l’akoka wa sutshasutsha tenyi efula dia demba diande. Wɔɔngɔ ande bu l’akoka wa nkamba kaamɛ la demba diande, diakɔ diele ekolo ndo anya ande sokasokaka aha la nde mbeya. Tena dimɔtshi, woho wadidima Jairo la shashimoya mongaka l’etombelo wa kɔlɔ le nde. Kaanga anto wonga suke la nde mongaka lo waale naka hawongi la yewo. Lonyangu ko, mbala efula anya ndo ekolo ande nɛmbaka wonya wende lo kɔsa kande k’etshimbi ndo nde honge l’akoka wa nshimba waale ɛsɔ.

Jairo aki la paa k’efula etena kakandayolaka. Lam’akinde la ngɔngɔ shato, nde akatatɛ nkɔ tɔshɔkɛ takokonyaka diaha mbeya ndooko dui. Mbala efula mama akawokukutɛka wolo efula ndo akalawɔka la nde otsha lo lopitadi afɔnya ɔnɛ nde ambovɔ.

L’ɔtɛ wakawokukutɛka mama ndo wa hemɔ kɛsɔ, weka waki Jairo wakaseketana l’etena kɛmɔtshi. Lam’akinde l’ɛnɔnyi 16, nde akaseketana lokende ndo akalɔmbama dia nsala epaso wa wolo efula lo lokende, lo pɛlɔhɛlɔ ndo lo weka wa lo basɛ. Laakohɔ woho wakalelaka Jairo otsho tshɛ l’ɔtɛ wa paa kaki la nde.

Paa k’efula kaki la Jairo akawokonya dia mendɛka paka le anto akina dia mbokotshɛ ehomba ande wa lushi la lushi, ɛnyɛlɔ mbolesha, mbɔlɔtsha ahɔndɔ ndo mboshanya lo mbeto. Lushi tshɛ mama la papa mbakawosalɛka awui asɔ. Kaanga mbaki Jairo l’ohomba w’ekimanyielo lushi tshɛ, ambutshi aso wakawoholaka mbala tshɛ ɔnɛ, dia nde nsɛna nde hahombe mendɛ paka le anto ato koko ndo le Nzambi.

Ambutshi aso wekɔ Ɛmɛnyi wa Jehowa ndo wakadiɛka Jairo ɛkɔndɔ wa lo Bible ntatɛ lam’akinde eke ashashi. Vɔ wakeyaka ɔnɛ, lɔsɛnɔ ndekaka monga dimɛna etena kele onto la diɔtɔnganelo la Nzambi. Jairo akatetemala diɛnɛ la hemɔ kande, koko nde akayonga l’elongamelo k’oshika ka lo nshi yayaye. Koko, vɔ wakayambolaka dia kana Jairo koka nshihodia akambo wa mɛtɛ wa lo Bible.

Lushi lɔmɔtshi etena kaki Jairo dikɛnda, papa akawombola ate: “Lam’alangayɛ Jairo, onde wɛ hakoke mbutɛmi dui dimɔtshi?” Oma laasɔ nde akakotsha ate: “Naka mɛtɛ wɛ mbokakami ngandji, kete wɛ ayombutɛ dui dimɔtshi!” Etena  kakɔsɛngasɛngaka papa dia mbotɛ kaanga tshɛkɛta tshɔi, Jairo akakɛdia asɔyi. Lam’akandahembaka dia mbuta woho wakandayaokaka, paka londjo la woho wakandasalaka la wolo dia ntɛkɛta mbakokɛmaka. Papa akanyange l’ɔtɛ wakandakonya Jairo dia ndela. Koko, kɛnɛ kakasale Jairo akɛnya dia nde akoke kɛnɛ kakawotɛ papa. Okakatanu waki la nde ele, nde komonga l’akoka wa ntɛkɛta.

Edja efula la ntondo, ambutshi aso wakɛnyi dia lo tena dimɔtshi, washo wa Jairo mamiyaka esadi esadi oko onto lalanga mbuta tokanyi ndo nsaki yande. Aki dui dia lonyangu efula le Jairo l’ɔtɛ wele mbala tshɛ, anto kombokaka kɛnɛ kakandataka. Koko, etena kakeye ambutshi aso tolembetelo takasalaka Jairo la washo ko mbosha kɛnɛ kende l’ohomba, elungi ka Jairo kaki l’ɔngɛnɔngɛnɔ wonya tshɛ. Ɔsɔ mbaki yoho yande ya mbuta ɔnɛ losaka.

Onganga ɔmɔtshi wasakɛ anto wele l’okakatanu wa ntɛkɛta akatotɛ ate, dia nsawola la nde dimɛna, sho pombaka memɛ anya akɔ ahende etena kawokaso dimbola diahombande nkadimola ɔnɛ eelo kana bu. Lonya l’omi nembetshiyaka eelo, ndo la lɔmɔsɔ keema. Diakɔ diele, nde akakokaka mbuta kɛnɛ kakandakombolaka lo nshikikɛ washo lo lonya lahombama.

Mbala shato l’ɔnɔnyi, Ɛmɛnyi wa Jehowa salaka nsanganya ya weke ndo nyemba y’anto pokamɛka asawo w’oma lo Bible washama. Mbala tshɛ, Jairo akangɛnangɛnaka etena kakawashaka sawo diendana l’anto wayanga batizama. Lushi lɔmɔtshi etena kaki Jairo l’ɛnɔnyi 16, papa akawombola ate: “Jairo onde wɛ nangaka batizama?” Mbala kakɔ ɔtɔi nde akende lo lonya l’omi laki papa dia mɛnya ɔnɛ nde ekɔ la nsaki ka ntakola nna sɔ. Oma laasɔ, papa akakotsha ate: “Onde wɛ akatshike dɔkɔlɔkɔ le Nzambi lo dɔmbɛlɔ dia mbokambɛka pondjo pondjo?” Mbala kɛsɔ nto, Jairo akende lo lonya l’omi laki papa. Akokɛma hwe dia Jairo akayakimɔ le Jehowa.

L’ɔkɔngɔ wa nkɛtshanya mbala efula awui wendana la Bible, akɛnama nto hwe dia Jairo amboshihodia kitshimudi ya batisimu k’Okristo. Diakɔ diele lo 2004, nde akasha okadimwelo lo dimbola dioleki ohomba diahawatawokaka ɔnɛ: “Onde wɛ amboyakimɔ le Nzambi dia tshaka lolango lande?” Jairo akasha okadimwelo wa dimbola sɔ lo mbalɛ l’olongo. Yoho shɔ mbakandatayakonge dia ndjokadimola ɔnɛ, eelo. Lam’akinde l’ɛnɔnyi 17, nde akabatizama dia monga Ɔmɛnyi wa Jehowa.

Lo 2011, wakatanɛ Jairo ehomɔ k’oyoyo ka sawolaka l’anto, mbuta ate ɔrdinatɛrɛ wakɛndakɛnda l’ekimanyielo ka woho wamamiya onto sso. Ehomɔ kɛsɔ kɛndakɛndaka lo ndjela woho weteta ɔna sso diande dia mbokimanyiya dia mpɛtsha ikɔnɛ wele lo ɔrdinatɛrɛ. Etena kamamiyande kana kakande washo tɛɛ lo ikɔnɛ ɔmɔtshi, ekɔ oko onto lambokamba  la suri dia klikɛ lo ɔrdinatɛrɛ. Ɔrdinatɛrɛ ɔsɔ wekɔ la dibaya diele la tolembetelo tele didjidji dia tɔtɛkɛta kana ditelo dia nkimanyiya Jairo dia sawolaka l’anto akina. Etena katɔlɔnganyande sso diande lo djembetelo mɔtshi, ɔrdinatɛrɛ salaka dia losango lofundami mbokɛma lo lɔtɛkɛta.

Lo yɛdikɔ yakatalekaka Jairo mfudia eokelo k’awui wa lo Bible, mbakatalekaka nsaki kande ka nkimanyiya anto akina lo nyuma mfula. Mbala efula, etena kakatasalaka wekelo wa Bible wa lomingu la lomingu wa lo nkumbo, nde akɛwɛwaka amenda ndo enda ɔrdinatɛrɛ ande. Ɔsɔ ekɔ yoho ya mboholami ɔnɛ dimi pombaka mfunda kɔmatɛrɛ kɛmɔtshi dia nde tokisha lo etenyi ka ambola la ekadimwelo ka lo nsanganya yaso y’Akristo ya l’etshumanelo.

Lo nsanganya, nde nyangaka la solo dia lotutsha tshɛ l’ɔrdinatɛrɛ ande dia klikɛ lo ikɔnɛ wahombama ndo oma laasɔ, ko dui diande diakadjama l’eshinga mbokɛma le anto tshɛ. Woho wamɔnamɔnande wonya tshɛ keketshaka ase etshumanelo. Alex, ɔngɛnyi wa Jairo ɔmɔtshi mbutaka ate: “Dimi mambiyamaka mbala tshɛ etena kokami kɔmatɛrɛ yendana l’awui wa lo Bible yasha Jairo.”

Jairo kambaka nto la washo ande dia nsambisha anto akina awui wendana la dietawɔ diande. Yoho mɔtshi yasalande dui sɔ, ele lo klikɛ osato ɔmɔtshi wɛnya ekambɔ kɛmɔtshi kele la nyama ndo anto wa lo waoho tshɛ wasɛna lo wɔladi. Etena kahɛtshande osato ɔsɔ, dui dia l’ɔrdinatɛrɛ ande mbutaka ɔnɛ: “Bible toshaka elongamelo k’ɔnɛ, nkɛtɛ kayonga paradiso lɛnɛ ahatonga hemɔ ndo nyɔi nto, Ɛnyɛlɔ 21:4.” Naka ampokami ande wambɛnya nsaki, nde klikɛka dihole dikina lo ɔrdinatɛrɛ ande diata ɔnɛ: “Onde wɛ nangaka mbeka Bible kaamɛ la mi?” Dui dia diambo ko, tshɛso ka pami aketawɔ dia vɔ ntatɛ mbeka. Ekɔ dui di’ɔngɛnɔngɛnɔ efula dia mɛna Jairo etsha tshɛso kɛsɔ Bible ɔkɔkɛ ɔkɔkɛ ndo Ɔmɛnyi wa Jehowa okina ele kaamɛ la nde. Kɛnɛ koleki tshɛ ɔlɔ ko, tshɛso ka pami kɛsɔ akabatizama lo Losanganya la rɛjiɔ lakasalema la Madrid lo Ngɔndɔ k’enanɛi, 2014.

Embetsha waki Jairo wekɔ lo mɛna woho wayashande tshɛ le Nzambi. Rosario lele onganga wasakɛ anto wele l’okakatanu dia ntɛkɛta mbutaka ɔnɛ: “Naka layonga la nkanyi ya monga l’ɔtɛmwɛlɔ lushi lɔmɔtshi, kete Ɔmɛnyi wa Jehowa mbahombami monga. Lambɛna dia diɛsɛ la mbetawɔ kande, Jairo aya la lɔsɛnɔ lele l’oyango wa mɛtɛ kaanga mbende l’okakatanu wa wolo.”

Mbala tshɛ, Jairo mongaka l’ɔngɛnɔngɛnɔ etena kawadiɛmi daka dia lo Bible diata ɔnɛ: “Akanga a tshumbi wayulimbolimbo uku peli la kanga lumi ayimba esambu.” (Isaya 35:6) Kaanga mbakɔmɔnde lo tena dimɔtshi, mbala efula nde mongaka la tokanyi t’amɛna. Dui sɔ diekɔ ngasɔ nɛ dia l’ekimanyielo ka Nzambi ndo k’angɛnyi ande w’Akristo, nde ekɔ la lɔsɛnɔ. Woho wɛnande akambo la sso di’ɔlɔlɔ ndo mbetawɔ ka wolo kele la nde, shikikɛka ɔnɛ nkambɛ Jehowa kimanyiyaka onto lele la lɔsɛnɔ loludi l’ekakatanu dia monga la lɔsɛnɔ lele l’oyango.