Paul lele omi ndo papa ka nkumbo ka ana ahende mbutaka ate: “Lamakatadɛka diangɔ eshinga lushi tshɛ lo wodja aso, diangɔ dia ndɛ diakayokoma oshinga wolo bɛɛ ndo diɔ kɔɔmɛnamaka. Takemalaka l’ɛnɔngɔ wenya efula, koko mbala efula diangɔ dia ndɛ diakashilaka la ntondo ka sho nkoma lɛnɛ akidiɔ. Anto efula wakakome wɛɔndju w’efula l’ɔtɛ wa ndjala ndo akina wakakɔka la lohohe la ndjala lo toshinga. Eshinga wa diangɔ wakayodɛka lo waa miliyɔ, oma laasɔ lo waa miliyara. L’ekomelo, falanga ya lo wodja aso yakashile nɛmɔ. Lakashisha kɔntɛ kami ka lo bankɛ, akuta ami w’asiransɛ, ndo wa pasiɔ.”

Paul akeyaka ɔnɛ dia nkumbo kande shimbamɛ, nde akahombe nkamba la ‘lomba l’oshika.’ (Tukedi 3:21) Nde mbutaka ate: “Dimi lakakambaka olimu w’awui wa kura, koko lakasalaka olimu tshɛ wakamakokaka ntana oyadi kɛnɛ tshɛ kakawakokaka futami. Anto amɔtshi wakafutaka diangɔ dia ndɛ kana dia la ngelo. Naka wambofuta etamba ɛnɛi wa savɔ, lakakambaka l’ehende ko nsondja ekina. L’ekomelo, lakayokondjaka ana wa nkɔkɔ 40. Etena kakakome nkɔkɔ shɔ weke, lakayisondja ndo lakasombe nkina 300. L’ɔkɔngɔ diko, lakayengɔnyaka nkɔkɔ 50 la saki hiende ya ofushi w’ahɔhɔ ya kilɔ 50. Diɛsɛ la saki shɔ, lakalesha nkumbo kami ndo nkumbo nkina efula l’etena k’otale.”

Paul akeyaka dia dui dioleki ohomba diakoka onto tshɛ nsala ele ndjaɛkɛ le Nzambi. Etena kakitanyiyaso kɛnɛ katɔlɔmba Nzambi, nde tokimanyiyaka. Lo kɛnɛ kendana la nkondja diangɔ diele ohomba lo lɔsɛnɔ, Yeso akate ate: “Nyotshike ndjakiyanya lo dikambo dia kɛnɛ kayonyɔlɛ ndo kɛnɛ kayonyɔnɔ, nɛ dia . . . Shɛnyu mbeyaka dia nyekɔ l’ohomba wa diangɔ sɔ tshɛ.”—Luka 12:29-31.

Lonyangu ko, Satana lele otunyi wa woke waki Nzambi ekɔ lo ntshutshuya anto efula wa l’andja ɔnɛ dia vɔ ndeka ndjasha lo kɛnɛ kendana l’ehomba wa l’emunyi. Anto ndjakiyanyaka amboleka lo kɛnɛ kendana l’ehomba awɔ ndo vɔ salaka la wolo dia nkondja diangɔ diele vɔ bu mɛtɛ l’ohomba. Anto efula mbɔsaka abasa ndo vɔ mɛnaka paa efula nɛ dia ‘ɔsɔmbi ekɔ mfumbe k’ɔsɔndjanyi.’—Tukedi 22:7.

 Anto amɔtshi mbɔsaka tɛdikɔ ta kɔlɔ. Paul mbutaka ate: “Anto efula tshikaka nkumbo yawɔ ndo angɛnyi awɔ dia toyanga woho wa monga la lɔsɛnɔ la dimɛna lo wodja okina. Amɔtshi monɔka otsha lo wedja ekina aha la mikanda wawasha lotshungɔ ndo lɛkɔ hawototanaka olimu. Tena efula, vɔ ndjashɛka oma le apulushi ndo ndalaka lo toshinga. Vɔ hawosha Nzambi diaaso dia mbakimanyiya. Koko tamboyashikikɛ dia tokomɛ ekakatanu wendana l’ekondjelo kaamɛ oma l’ekimanyielo ka Nzambi.”

Paul tetemalaka mbuta ɔnɛ: “Yeso akate ate: ‘Tanyoyakiyanyake pondjo dikambo dia loyi, nɛ dia loyi ayonga la ekiyanu alɔ. Lushi la lushi lekɔ l’ekakatanu alɔ.’ Diakɔ diele, dɔmbɛlɔ diami dia lushi la lushi aki dia Nzambi tosha ‘mbo ya ndɛ ya lushi l’ɛlɔ’ l’oyango wa sho nsɛna. Ndo Nzambi mɛtɛ akasale dui sɔ oko wakate Yeso. Aha mbala tshɛ mbakatakondjaka kɛnɛ kakatakombolaka. Mbala kɛmɔtshi, lakɔtɔ l’ɔnɔngɔ dia tosomba diangɔ dia ndɛ aha la mbeya kɛnɛ kakawasondjaka. Etena kakamakome laawɔ, lakɛnyi dia akikɔ yaourt (mbuta ate woho ɔmɔtshi wa diangɔ dia ndɛ di’okayi diasalawɔ l’abɛlɛ). Koko, dimi halange yaourt. Koko lam’ele yaourt ekɔ diangɔ dia ndɛ, takayile l’otsho ɔsɔ. Lekɔ la lowando le Nzambi nɛ dia lo etena kɛsɔ tshɛ nkumbo kami kondala pondjo la ndjala.” *

“Ɛlɔ kɛnɛ, taya la yema y’ekondjelo. Koko lo menda kɛnɛ kakatokomɛ, takashihodia dia dui dioleki ohomba dia ntondoya ekiyanu ele ndjaɛkɛ le Nzambi. Jehowa * ayotokimanyiyaka nshi tshɛ l’edja tshɛ kayotosalaka lolango lande. Takɛnyi mɛtɛ k’ɛtɛkɛta wa lo Osambu 34:8 wata ɔnɛ: ‘Nyɔlɛtɛ ko nyayɛna dia Jehowa ekɔ ɔlɔlɔ; ɔngɛnɔngɛnɔ le onto layashɛ le nde.’ Etombelo wele la dui sɔ ele, taya bu la wɔma wa mpomana l’ekakatanu wendana l’ekondjelo.

Kakianɛ, tamboshihodia hwe dia kɛnɛ kele anto l’ohomba dia nsɛna ekɔ diangɔ dia ndɛ, koko aha olimu kana falanga. Tekɔ lo kongɛ l’asolo walomɔlomɔ etena kayokotshama daka diaki Nzambi diata ɔnɛ: ‘Mbo ya ndɛ yayoyala efula la nkɛtɛ.’ Etena kakatakonge etena kɛsɔ, ‘naka tekɔ la mbo ya ndɛ, ahɔndɔ wa ndɔta ndo dihole dia mbishɛ ɔtɛ, tɔngɛnɛngɛnɛ la diangɔ sɔ.’ Sho kondjaka ekeketshelo oma lo ɛtɛkɛta wa lo Bible w’ɔnɛ: ‘Tanyongake la ngandji ka falanga, koko nyɔngɛnangɛnake la kɛnɛ kele la nyu. Nɛ dia Nzambi akate ate: ‘Dimi hakotshikaki ndo hakokalɛki pondjo. Diakɔ dieso la dihonga di’efula dia mbuta ɔnɛ: ‘Jehowa kele okimanyedi ami, dimi hatoka wɔma.’’” *

Ekɔ ohomba monga la mbetawɔ ka mɛtɛ dia ‘nkɛndakɛnda la Nzambi’ oko wasala Paul nde la nkumbo kande. (Etatelu 6:9) Oyadi tekɔ lo mpomana l’ekakatanu wendana l’ekondjelo nshi nyɛ kana sho koka ndjohomana la wɔ lo nshi y’otsha la ntondo, ɛnyɛlɔ kaki Paul ka mbetawɔ ndo lomba l’oshika toshaka wetshelo w’ohomba efula.

Ko kayotota naka ekakatanu wa lo nkumbo wekɔ lo tela ekiyanu?