Lakole l’osomba wa Alicante, lo lɛkɛ la ɛstɛ k’Espagne. Nkumbo kami kakahandjɔ tshɛ lo tshɛ, diakɔ diele oko wakimi ɔlɔngɔlɔngɔ laketshaka wenya ami efula lo toshinga. Luudu lami laki suke la dihole dimɔtshi dialɔngɔsɔlawɔ waa pinɛ. Lɛkɔ mbakamatɔtɔka ɔngɛnyi dimi la José María ɔmɔtshi la l’atei w’ase olimu waki lɛkɔ. Nde akikɔ onto laki l’osalosalo lakambidjaka yimba woho wakahombe ase nkumbo kami hita salɛmi. Lo tena dia paa, nde akikɔ oko ɔnangɛmi la pɛtɛ pɛtɛ, mbuta ate ɔngɛnyi wa mɛtɛ kaanga mbakandambolɛ ɛnɔnyi 20.

José María akatatɛ mbeka Bible kaamɛ l’Ɛmɛnyi wa Jehowa. Dimi koka mbuta dia nde akalangaka Afundelo ndo mbala efula nde akakahanaka la mi akambo wa mɛtɛ wa lo Bible. Lakohokamɛka la dilɛmiɛlɔ tshɛ, koko dimi kondjashaka mɛtɛ lo kɛnɛ kakandataka. Lakikɔ ɔlɔngɔlɔngɔ w’ɛnɔnyi dikumi l’ɛmɔtshi ndo lakikɔ l’awui efula wa nsala. Koko dimi lakahombe nsala etshikitanu.

Dimi halange ndo ntɛkɛta efula dikambo dia aksida wakamasale. Kɛnɛ kakokami mbuta ko lakikɔ enginya ndo komonga la yewo. Lo lushi ɔtɔi lɔsɛnɔ lami l’otondo lakatshikitana tshɛ lo tshɛ. Oma lo monga ɔlɔngɔlɔngɔ w’ɛnɔnyi dikumi wakikɔ la wolo, lakayokashimɔ laya la ɛkɔmɔ lo lopitadi. Akikɔ dui dia wolo dia dimi mbetawɔ woho wakamakome. Lakatetemala ndjambola nte: ‘Onde ekɔ wahɔ ɔmɔtshi dia onto nsɛna?’

José María akaye dia ndjomenda ndo aha la ntshimbatshimba nde akakongɛ dia Ɛmɛnyi wa Jehowa wa lo etshumanelo ka lo ngelo kakiso ndjaka ndjomenda la lopitadi. Woho wakawayaka mbala la mbala dia ndjomenda akananda otema ami. Lam’ele lakongaka la wɔ kaamɛ, lakayotatɛ mbeka Bible. Lakashola mɛtɛ lo kɛnɛ kendana la ɔkɔkɔ wasowa anto ndo wavɔwɔ ndo lande na katshika Nzambi dia awui wa kɔlɔ komɛ anto. Lakayeya nto alaka waki Nzambi wendana la nshi yayaye, mbuta ate etena kayolola nkɛtɛ k’otondo l’anto wele kokele ndo kele ndooko onto layota ate: ‘Lekɔ la hemɔ.’ (Isaya 33:24) Ɔsɔ mbaki mbala kami ka ntondo lo lɔsɛnɔ lami ka dimi monga l’elongamelo ka diambo.

Etena kakamatombe oma lo lopitadi, lakatatɛ mpama esadi esadi lo wekelo ami wa Bible. Lo nkamba la kɔsa k’etshimbi, lakatshɔka ndo lo nsanganya mɔtshi y’Ɛmɛnyi wa Jehowa ndo lakatatɛ ndjasha l’olimu awɔ w’esambishelo. Lo Ngɔndɔ ka dikumi l’ɔtɔi 5, 1988 lele la ɛnɔnyi 20, mbakamalongola batisimu l’ashi lo dihole dia laande diakawalɔngɔsɔla. Jehowa Nzambi akankimanyiya dia dimi monga l’ekanelo k’ɔlɔlɔ. Ko laasɔ, kakɔna kakamahombe nsala dia mɛnya lowando lami?

Dimi lakayashikikɛ diaha ɛkɔmɔ kami shimbami dia nsala kɛnɛ tshɛ kakamakoke nsala l’olimu wa Jehowa. Lakalange mpama. (1 Timɔte 4:15) L’etatelo, komonga dui dia wɔdu nɛ dia nkumbo kami kakatatɛ ndɔshana la dietawɔ diami di ’oyoyo. Koko lakikɔ l’asekami ambetawudi, wanɛ waki anangɛmi ndo akadiyɛmi wa lo nyuma. Vɔ wakasale la wolo dia kimanyiyami diaha dimi mpandja kaanga losanganya ɔtɔi ndo dia dimi mbisha lonya l’olimu w’esambishelo.

Koko lam’akatetaka nshi, akayɛnamaka dia dimi pombaka nyanga esakelo ka laande, mbuta ate esakelo ka wonya tshɛ. L’ɔkɔngɔ wa eyangelo efula, lakayotanaka dihole dimɔtshi dia dimɛna diasakɛwɔ akanga wa dikɔmɔ l’osomba wa Valencia, lo kilɔmɛtrɛ 160  lo nɔrdɛ ka Alicante. Lɛsɔ mbakamayodjasɛka lo pondjo.

Kaanga mbakimi paka lo mbeto la hemɔ, lakayashikikɛ dia ntetemala kambɛ Jehowa. Lakɔshi falanga yami yashawɔ akanga wa dikɔmɔ ndo dikimanyielo dikina ko lakasombe ɔrdinatɛrɛ ko lakakitsha suke la mbeto kami. Lakasombe ndo telefɔnɛ. Nshi nyɛ, la pindju tshɛ ɔnɛ lasakɛ pɛtshɛkami ɔrdinatɛrɛ ndo telefɔnɛ. Dimi kambaka la ehomɔ kɛmɔtshi kakitshami lo lowanga lami dia dimi nkamba l’ɔrdinatɛrɛ. Lekɔ nto la yangɔ mɔtshi yele oko tshenyi y’osongo yakimɛmi l’onyɔ. Yangɔ shɔ kimanyiyakami dia dimi mfunda alɛta lo klavie ndo dia mbidja numɛlɔ lo telefɔnɛ.

Ngande wakakimayiya awui wa tshulatshula asɔ? Ntondotondo, vɔ wakambisha diaaso dia mbɔtɔ lo sitɛ kaso ka jw.org ndo oma laasɔ lo BIBLIOTHÈQUE EN LIGNE Watchtower. Dihomɔ sɔ mɛtɛ diekɔ ohomba efula le mi. Tena efula lekɔ lo mbetsha wenya efula lushi tshɛ lo mbeka ndo lo nsala eyangelo lo ekanda walembetshiya Bible dia dimi ntetemala la mbeka akambo wendana la Nzambi ndo waonga ande wa diambo. Ndo etena tshɛ kayaokami ompoko ndo kakɔmɔmi yema, ɛngɔ kɛmɔtshi ka lo sitɛ keketshakami.

Ɔrdinatɛrɛ ami kimanyiyakami dia dimi ndjela ndo mbisha lonya lo nsanganya ya lo etshumanelo. Dimi koka mbisha kɔmatɛrɛ, nsala alɔmbɛlɔ, mbisha asawo ndo kaanga mbadia Tshoto y’Etangelo etena kambishawɔ ɔkɛndɛ. Kaanga kele hakoke ntshɔ lɛnɛ asalema nsanganya shɔ, lekɔ lo ndjaoka dia lekɔ onto ɔmɔtshi la l’etshumanelo.

Monga la telefɔnɛ ndo l’ɔrdinatɛrɛ kimanyiyakami nto dia dimi ndjasha efula l’olimu w’esambishelo. Kɛnɛ kele mɛtɛ ele, dimi bu l’akoka wa ntshɔ l’esambishelo ka lo luudu la luudu oko wasala Ɛmɛnyi wa Jehowa efula. Koko kɛsɔ hashimbe dia dimi nsambisha. Lekɔ lo nkamba la dihomɔ diemi l’akoka l’oyango wa nkahana l’anto akina mbetawɔ kami. Lo mɛtɛ, dimi ngɛnangɛnaka asawo wa lo telefɔnɛ woho w’anyanya diakɔ diele, dikumanyi dia lo etshumanelo kaso wakanɔmbɛ dia dimi nɔmbɔlaka esambishelo ka lo telefɔnɛ. Esambishelo kɛsɔ kekɔ ohomba efula djekoleko le ase etshumanelo wanɛ wodjashi lo mvudu l’ɔtɛ wewɔ bu l’akoka wa ntomba oma lo mvudu yawɔ.

 Koko lɔsɛnɔ lami hendana paka l’awui wa tshulatshula ato. Lushi tshɛ, angɛnyi ami wa ngandji ndjaka dia ndjomenda. Vɔ ndjaka l’ewotɔ awɔ ndo anto akina wayasha lo Bible. Mbala efula vɔ nɔmbakami dia dimi nɔmbɔla ɔkɛtshanyelo kaamɛ la wɔ. Lo waaso amɔtshi, ase nkumbo ndjaka dia ndjomenda ndo vɔ nɔmbakami dia dimi nsala lawɔ Ɔtɛmwɛlɔ wa lo nkumbo wa la dikɔlɔ. Dimi ngɛnangɛnaka efula etena kadjasɛ ana w’akɛnda suke la mi ndo kambitɛwɔ lande na kokawɔ Jehowa ngandji.

Dimi ngɛnangɛnaka efula nongola anto waya ndjomenda. Mbala efula luudu lami ndolaka l‘anto efula, mbuta ate angɛnyi waya ndjomenda oma laa suke ndo oma l’etale. Oko wakokanyu nkanyiya, ngandji ka ngasɔ kimanyiyaka wanɛ wasakɛ lo dihole diemi. Lushi tshɛ, dimi kaloyaka Jehowa losaka lo woho wakandetawɔ dia dimi monga lo nkumbo k’onto l’ɔnango kɛsɔ.

Wonya tshɛ wambisha onto mɔyɔ ndo wamimbolande ate demba ngande, dimi mbokadimolaka ɔnɛ: “Dimi ɔnɛ, lekɔ lo ntetemala ndɔsha.” Lo mɛtɛ, dimi mbeyaka diaha dimɛ oto mbele lo ta sɔ. Oyadi akambo akɔna waakomɛ, Akristo tshɛ wekɔ lo ndɔ ta, mbuta ate “ta di’ɔlɔlɔ dia mbetawɔ.” (1 Timɔte 6:12) Kakɔna kakakimanyiya dia dimi ntetemala ndɔ ta sɔ l’edja ka ɛnɔnyi efula? Lushi tshɛ lekɔ lo nɔmba ndo lekɔ lo nkaloya Jehowa losaka lo woho wakandambisha lɔsɛnɔ lele la oyango. Ndo dimi salaka la wolo dia ndjasha lo yoho yakoka dia kambɛ Jehowa ndo lo ntetemala mbika washo lo elongamelo kele la ntondo kaso.

Mbala efula, dimi kanaka yimba lo dikambo dia andja w’oyoyo ndo woho wayomotolawɔ ndo wayomotofumbɔfumbɔ nto. L’etena kɛmɔtshi, lakasalaka shɛkɛsɛkɛ lo kɛnɛ kendana la lowango dimi la ɔngɛnyi ami wa dimɛna José María ladiɛnɛ la paa ka muyɛkɛ. Lakawombola dimi nte: “Akɔna ayotodja otshumba?” Nde akakadimola ate: “Aha paka onto todja otshumba. Kɛnɛ kele mɛtɛ ele, lo paradiso tayotolawɔ.”

Komonga dui dia wɔdu le mi dia dimi ntondoya l’ɔtɛ wa ɛkɔmɔ kele la mi. Dimi mbeyaka dia etena kakimi l’ɛnɔnyi dikumi l’ɛmɔ, lakasale dui dimɔtshi di’enginya diakambela etombelo wa kɔlɔ efula. Koko lekɔ la lowando nɛ dia Jehowa kookalɛmi. Nde akambisha diangɔ efula, mbuta ate nkumbo ka woke ka lo nyuma, lɔsɛnɔ, ɔngɛnɔngɛnɔ waya lo nkimanyiya anto akina ndo elongamelo ka diambo kendana la nshi yayaye. Naka dimite mbute lo tshena pe lo etelo ɔtɔi, kete dimi koka mbuta nte Jehowa akambisha efula oleki ndo kɛnɛ kakamakoke nkondja.