Mpokoso koka monga la shɛngiya le onto tshɛ. Bible mbutaka ɔnɛ: “Aha wanɛ wadja lowango mbatodjaka nshi tshɛ otshumba, aha akanga wa wolo mbalɛndja ta, nɛ dia nɛ dia tena ndo awui wa shashimoya mbakomɛka vɔ tshɛ.” (Ondaki 9:11) Ɛtɛkɛta ɛsɔ mendanaka ndo la ɛlɔngɔlɔngɔlɔ l’esekaseka wanɛ wadiɛnɛ la mpokoso. Ngande walɔshanawɔ la dui sɔ? Tɔsɛdingole bɛnyɛlɔ dihende.

•  REBEKAH

•  CORDELL

 Ambutshi ami wakadiake diwala etena kakimi l’ɛnɔnyi 14.

 Dimi koshihodia di’ambutshi ami wambodiaka diwala, lakataka dia papa aki l’ohomba wa nde monga ndamɛ lo tshanda mɔtshi. Nde akokaka mama ngandji, lande na kakokande mbotshika? Lande na kahombawɔ kalɛmi?

 Aki tshondo y’okakatanu le mi dia nsawola l’anto akina dikambo sɔ. Takamakombolaka kanyiya dui sɔ. Lakongaka la nkɛlɛ, koko l’etena kakɔ kaamɛ dimi koshihodiaka kɛnɛ kakamakanyiyaka. Lakayotatɛka ndjakiyanya ndo laki l’okakatanu wa ndala djɔ.

 Mama akavu la hemɔ ka kasɛrɛ lam’akimi l’ɛnɔnyi 19. Nde aki ɔngɛnyi ami woleki tshɛ dimɛna.

 Odiakelo wa diwala di’ambutshi ami akatshindjaka wɔɔngɔ efula, koko nyɔi ka mama mbakayolekaka mbishami paa. Takamakoke mbohɛ dui sɔ. Lakanyomoleka monga l’okakanu dia ndala ndjɔ ndo lakatetemala monga l’okiyanu.

 L’etena kɛsɔ, lakatane awui amɔtshi wakakimanyiya efula. Ɛnyɛlɔ, Tokedi 18:1 tɔhɛmɔlaka lo waale waya lo ndjanganya l’anto kina, ɔnkɔnɛ, lakasale la wolo dia nkamba la dako sɔ.

 Ndo nto, oko wemi Ɔmɛnyi wa Jehowa, dimi salaka la wolo dia mbadia ekanda aso walembetshiya Bible wankeketsha. Les jeunes s’interrogent. Réponses pratiques ekɔ dibuku diakakimanyiya efula etena kakadiake ambutshi ami diwala. Lo yoho ya laande, dimi mbohɔka dia lakadia tshapita mɔtshi ya lo Vɔlimɛ 2 yele l’ɔtɛ a dui ɔnɛ: “Puis-je être heureux dans une famille monoparentale?”

 Divɛsa dimɔtshi l’atei w’avɛsa walekami nanga wakakimanyiya l’etena k’okiyanu ekɔ nɛ Mateo 6:​25-34. Lo divɛsa dia 27, Yeso akambola ate: “Onto akɔna l’atei anyu akoka nkotsha kubita a 1 lo otale wa lɔsɛnɔ lande l’ɔtɛ wayakiyanyande?”

 Awui wa kɔlɔ tokomɛka sho tshɛ, koko lakakondja wetshelo oma l’ɛnyɛlɔ ka mama dia woho watondoyaso ekakatnu akɔ kele dui di’ohomba. Kaanga mbakandadiɛnɛka la paa koye oma l’odiakelo awɔ wa diwala, la hemɔ kahakɔnɔ kakandatataka, nde aki paka l’ekanelo k’ɔlɔlɔ ndo mbetawɔ kande le Nzambi kakatetemala monga wolo polo l’ekomelo. Hambohɛki pondjo kɛnɛ tshɛ kakandambetsha lo dikambo dia Jehowa.

 Dui diakana la diɔ yimba: Ngande wakoka wadielo wa Bible ndo w’ekanda walembetshiya Bible kokimanyiya etena katomba mpokoso?​—Osambo 94:19.

 Papa akavu etena kakimi l’ɛnɔnyi 17. Nyɔi kandeaki dui diakaleke mbishami paa lo lɔsɛnɔ. Lakakɔmɔ hakoke.

 Takametawɔ dia mɛtɛ papa kambovɔ, ndo aha nde kolashishawɔ ko mbokomba dra. Lakataka nte: ‘Nde ayemɔ loyi.’ Lakayaokaka ompoko.

 Dimi l’ase nkumbo kaso tekɔ Ɛmɛnyi wa Jehowa ndo ase etshumanelo kaso wakatokimanyiya hakoke etena kakavu papa. Vɔ wakatelaka mbo ya ndɛ, wakatelɛka lawakawɔ ndo waki etena tshɛ suke suke la so, aha tsho oma l’etatelo, koko l’edja k’efula. Le mi, ekimanyielo kawɔ aki djembetelo yɛnya dia Ɛmɛnyi wa Jehowa kele Akristo wa mɛtɛ.​—Joani 13:35.

 2 Kɔrɛtɔ 4:​17, 18 ekɔ divɛsa diakakimanyiya hakoke. Diɔ mbutaka ɔnɛ: “Kaanga mbele asui wekɔ wa lo tshanda mɔtshi tsho ndo bu wa wolo, vɔ tokimanyiyaka dia monga la lotombo lele woke woke alɔ talekaka mpama ndo lɔ tshikalaka pondjo, etena kakaso washo aha lo diangɔ diɛnama, koko lo diangɔ diahɛnama. Nɛ dia diangɔ diɛnama diekɔ dia lo tshanda mɔtshi tsho, koko diangɔ diahɛnama tshikalaka pondjo.”

 Divɛsa di’ekomelo diakambisha wolo efula. Asui wa woho wakamavusha papa waki wa lo tshanda mɔtshi tsho, koko alaka wa Nzambi wekɔ wa pondjo. Nyɔi ka papa akambisha diaaso dia nkana yimba lo woho wakambami la lɔsɛnɔ lami ndo akakimanyiya dia ntshikitanya eyango ami.

 Dui diakana la diɔ yimba: Ngande wakoka awui wa homana layɛ kokimanyiya dia wɛ nyomɔsɛdingola eyango wakayadjɛ lo lɔsɛnɔ layɛ?​—1 Joani 2:17.