Samuele wa Ntlha 7:1-17
7 Ka jalo, banna ba Kiriathe-jearime ba ne ba tla mme ba tsaya Letlole la ga Jehofa ba le isa kwa ntlong ya ga Abinadabe+ mo thoteng, mme ba ne ba dira gore morwawe e bong Eliasare a nne boitshepo gore a dise Letlole la ga Jehofa.
2 Go tloga ka letsatsi le Letlole le neng la tla kwa Kiriathe-jearime ka lone, go ne ga feta dingwaga di le 20. Ka nako eo, batho botlhe ba Iseraele ba ne ba simolola go boela kwa go* Jehofa.+
3 Go tswa foo, Samuele o ne a raya batho botlhe ba Iseraele a re: “Fa e le gore lo boela kwa go Jehofa ka pelo ya lona yotlhe,+ tlosang medimo e sele+ le ditshwantsho tsa ga Ashethorethe+ mo go lona, mme lo direle Jehofa ka pelo yotlhe e bile lo direle ene fela,+ mme o tla lo golola mo seatleng sa Bafilisitia.”+
4 Foo Baiseraele ba ne ba tlosa Bobaale le ditshwantsho tsa ga Ashethorethe mme ba direla Jehofa fela.+
5 Morago ga moo, Samuele o ne a re: “Phuthelang Baiseraele botlhe kwa Misepa+ mme ke tla lo rapelela kwa go Jehofa.”+
6 Ka jalo, ba ne ba phuthegela kwa Misepa, mme ba ne ba ga metsi ba bo ba a tshela fa pele ga ga Jehofa e bile ba ne ba itima dijo mo letsatsing leo.+ Ba ne ba bua jaana ba le koo: “Re leofetse Jehofa.”+ Mme Samuele o ne a simolola go nna moatlhodi+ wa Baiseraele kwa Misepa.
7 E rile Bafilisitia ba utlwa gore Baiseraele ba ne ba phuthegetse kwa Misepa, babusi ba Bafilisitia+ ba ne ba ya go tlhasela Baiseraele. Fa Baiseraele ba utlwa seo, ba ne ba tshoga ka ntlha ya Bafilisitia.
8 Ka jalo, Baiseraele ba ne ba raya Samuele ba re: “O se ka wa kgaotsa go rapela Jehofa, Modimo wa rona, gore a re thuse+ le gore a re golole mo seatleng sa Bafilisitia.”
9 Foo Samuele o ne a tsaya kwanyana e e anyang a bo a e ntsha e le setlhabelo se se fisiwang se se feletseng+ se se yang kwa go Jehofa; mme Samuele o ne a rapela Jehofa a kopela Baiseraele thuso, mme Jehofa o ne a mo araba.+
10 Fa Samuele a ntse a ntsha setlhabelo se se fisiwang, Bafilisitia ba ne ba atamela go tla go tlhabana le Baiseraele. Jaanong Jehofa o ne a dira gore go nne le modumo o mogolo wa maru+ mo letsatsing leo, o ne a tlhakatlhakanya Bafilisitia,+ mme ba ne ba fenngwa fa pele ga Baiseraele.+
11 Foo banna ba Iseraele ba ne ba tswa kwa Misepa ba bo ba lelekisa Bafilisitia mme ba ne ba ba kgemetha go ya go fitlha kwa borwa jwa Bethe-kara.
12 Go tswa foo, Samuele o ne a tsaya leje+ a le tlhoma fa gare ga Misepa le Jeshana mme a le bitsa Ebenesere,* ka gonne o ne a re: “Go tla go fitlha jaanong Jehofa o ntse a re thusa.”+
13 Ka jalo, Bafilisitia ba ne ba fenngwa, mme ba ne ba se ka ba boela gape mo nageng ya Iseraele;+ mme fa Samuele a sa ntse a tshela, Jehofa ga a ka a letla Bafilisitia gore ba tlhasele Baiseraele.+
14 Gape metse e Bafilisitia ba neng ba e gapile mo bathong ba Iseraele e ne ya busediwa Baiseraele, go simologa kwa Ekerone go ya kwa Gathe, mme ba ne ba boelwa ke naga ya bone go tswa mo seatleng sa Bafilisitia.
Gape go ne ga nna le kagiso fa gare ga Baiseraele le Baamore.+
15 Samuele o ne a tswelela a atlhola Baiseraele botshelo jotlhe jwa gagwe.+
16 Ngwaga le ngwaga o ne a etela Bethele,+ Gilegala+ le Misepa,+ mme o ne a atlhola Baiseraele mo mafelong ano otlhe.
17 Le fa go ntse jalo, o ne a tle a boele kwa Rama,+ ka gonne ntlo ya gagwe e ne e le koo, gape o ne a atlhola Baiseraele gone koo. O ne a agela Jehofa sebeso teng koo.+
