Samuele wa Ntlha 8:1-22
8 Fa Samuele a ne a setse a tsofetse, o ne a tlhoma bomorwawe gore ba nne baatlhodi ba Iseraele.
2 Leina la ga morwawe wa leitibolo e ne e le Joele, mme leina la wa bobedi e le Abija;+ e ne e le baatlhodi kwa Beere-sheba.
3 Mme bomorwawe ga ba a ka ba tsamaya mo ditseleng tsa gagwe; ba ne ba leka go nna le madi ka boferefere,+ ba ne ba amogela pipamolomo+ e bile ba ne ba sa atlhole ka tsela e e siameng.+
4 Fa nako e ntse e tsamaya, bagolwane botlhe ba Iseraele ba ne ba phuthega mmogo mme ba tla kwa go Samuele kwa Rama.
5 Ba ne ba mo raya ba re: “O setse o tsofetse mme bomorwao ga ba tsamaye mo ditseleng tsa gago. Jaanong re tlhomele kgosi gore e re atlhole jaaka ditšhaba tse dingwe tsotlhe.”+
6 Mme seno ga se a ka sa itumedisa* Samuele, fa ba ne ba re: “Re tlhomele kgosi gore e re atlhole.” Foo Samuele o ne a rapela Jehofa,
7 mme Jehofa o ne a raya Samuele a re: “Reetsa sengwe le sengwe se batho bano ba se go bolelelang; ka gonne ga ba a gana wena, mme ba ganne nna gore ke nne kgosi ya bone.+
8 Ba dira fela jaaka ba ile ba dira go tloga mo letsatsing la fa ke ne ke ba ntsha kwa Egepeto go fitlha mo letsatsing leno; ba nna ba ntlogela+ ba ya go direla medimo e mengwe,+ mme ke sone se ba se dirang mo go wena.
9 Jaanong ba reetse. Le fa go ntse jalo, o ba tlhagise o tiisitse; o ba bolelele se kgosi e e tla ba busang e tla nnang le tshwanelo ya go se dira.”
10 Ka jalo, Samuele o ne a bolelela batho ba ba neng ba mo kopa gore a ba tlhomele kgosi mafoko otlhe a ga Jehofa.
11 O ne a re: “Tseno ke dilo tse kgosi e e tla lo busang e tla nnang le tshwanelo ya go di dira:+ O tla tsaya bomorwaalona+ a bo a ba tsenya mo dikareng tsa gagwe+ a ba dira masole a gagwe a a tsamayang ka dipitse,+ mme bangwe ba bone ba tla tshwanelwa ke go siana fa pele ga dikara tsa gagwe.
12 Mme o tla itlhomela baokamedi ba ba okamelang dikete+ le baokamedi ba ditlhopha tsa masome a matlhano,+ mme bangwe ba bone ba tla mo lemela,+ ba tla roba thobo ya gagwe+ e bile ba tla mo direla dibetsa tsa ntwa le didirisiwa tsa dikara tsa gagwe.+
13 O tla tsaya bomorwadialona gore e nne ba ba tlhakanyang ditlôlô,* ba ba apayang le ba ba besang senkgwe.+
14 O tla tsaya tse di di gaisang tsotlhe mo masimong a lona, mo masimong a lona a morara* le mo masimong a lona a motlhware+ mme o tla di naya batlhanka ba gagwe.
15 O tla tsaya sa bolesome sa masimo a lona a dijo tsa ditlhaka le masimo a lona a morara, mme o tla se naya badiredibagolo ba ba mmerekelang le batlhanka ba gagwe.
16 Mme o tla tsaya batlhanka ba lona, malata a lona, metlhape ya lona e e e gaisang yotlhe le ditonki tsa lona, mme o tla di dirisa mo tirong ya gagwe.+
17 O tla tsaya sa bolesome sa matsomane a lona,+ mme lo tla nna batlhanka ba gagwe.
18 Letsatsi le tla tla le lo tla goang lo lela ka ntlha ya kgosi e lo e itlhophetseng,+ mme gone Jehofa ga a kitla a lo araba mo letsatsing leo.”
19 Le fa go ntse jalo, batho ba ne ba gana go reetsa se Samuele a neng a se ba bolelela mme ba ne ba re: “Nnyaa, re batla go busiwa ke kgosi.
20 Gore re tle re tshwane le ditšhaba tse dingwe tsotlhe, mme kgosi ya rona e tla re atlhola e bo e re etelela pele e bile e tla tlhabana dintwa tsa rona.”
21 Fa Samuele a sena go utlwa mafoko otlhe a batho, o ne a a boeletsa Jehofa a reeditse.
22 Jehofa o ne a raya Samuele a re: “Ba reetse, mme o tlhome kgosi gore e ba buse.”+ Go tswa foo, Samuele o ne a raya batho ba Iseraele a re: “A mongwe le mongwe wa lona a boele kwa motseng wa gagabo.”
Dintlha Tse di Kwa Tlase
^ Seheb., “seno se ne se le bosula mo matlhong a ga.”
^ Kgotsa “ba ba dirang dinkgisamonate.”
^ Kgotsa “diterebe; moretlwa.”