Kātaki ‘o fakamatala mai angé ki he taimi na‘á ke kei si‘i aí.

Na‘e fanau‘i au ‘i ‘Ītali ‘i he 1943. Na‘á ku tupu hake mo hoku fanga tokouá mo e fanga tuofāfiné ‘i ha ki‘i kolo na‘e ngāue ai ‘eku tamaí ko ha tokotaha ngoue mo tufunga. Na‘e ohi hake kimautolu ‘e he ongo mātu‘á ke hoko ko ha kau lotu Katolika fa‘ifa‘itaki‘anga lelei.

Ko e hā na‘á ke loto ai ke ke hoko ko ha pātelé?

‘I he‘eku kei si‘í, na‘á ku sai‘ia he fanongo ki he kau pātele ‘i he siasí. Na‘á ku manako he fanongo ki honau le‘ó, pehē foki ‘i he sio ki he‘enau ngaahi ouau lotu fakato‘oalotó. Ko ia, na‘á ku fakapapau‘i ke hoko ko ha pātele. ‘I he‘eku ta‘u 13, na‘e fakahū au ‘e he‘eku fa‘eé ki ha ‘apiako ako nofo-ma‘u ‘a ia na‘e teu‘i ai ‘a e tamaiki tangatá ki he kaha‘ú, ko ha ako fakalahi ange ke hoko ko ha pātele.

Na‘e kau ki ai hono ako ‘a e Tohi Tapú?

‘Ikai. ‘I he‘eku ta‘u 15, na‘e ‘omai ‘e ha taha ‘o ‘eku kau faiakó ha tatau ‘o e ngaahi Kōsipelí​—ko e fakamatala fakahisitōlia ia ki he mo‘ui mo e ngāue fakafaifekau ‘a Sīsuú—​pea na‘á ku toutou lau ia. ‘I he‘eku ta‘u 18, na‘á ku ‘alu ki Loma ke ako ‘i he ngaahi ‘univēsiti na‘e pule‘i ‘e he tu‘i tapú. Na‘á ku ako ai ‘a e lea faka-Latina, faka-Kalisi, hisitōlia, filōsofia, saikolosia, mo e teolosia. Neongo na‘a mau lau ma‘uloto le‘o-lahi ‘a e ngaahi veesi mei he Tohi Tapú pea fanongo ki hono lau ‘a e Tohi Tapú ‘i he ngaahi malanga he Sāpaté, na‘e ‘ikai ‘uhinga iá na‘a mau ako ai ‘a e Tohi Tapú.

Na‘á ke hoko ko ha taki ‘i he seminālió. Na‘e kau ki ai ‘a e faiako?

Ko ‘eku ngāué na‘e fakatefito pē ‘i he ngaahi me‘a faka‘ōfisí. Ka na‘á ku toe faiako foki ‘i ha ngaahi kalasi fekau‘aki mo e ngaahi akonaki mei he Kosilio Vatikano Hono Uá.

Ko e hā na‘e kamata ai ke ke veiveiua ‘i he siasí?

Ko e me‘a ‘e tolu na‘á ne ‘ai au ke u veiveiuá. Na‘e kau ‘a e siasí ki he ngaahi me‘a fakapolitikalé. Na‘e fakangofua pē ‘a e tō‘onga ta‘etaau ia ‘a e kau pātelé mo e kau ngāué. Pea na‘e ‘i ai ‘a e ngaahi akonaki faka-Katolika ‘e ni‘ihi na‘e ‘ikai ke hā ngali totonu. Ko e fakatātaá, ‘e lava fēfē ke tautea‘i ta‘engata ‘e ha ‘Otua ‘ofa ‘a e kakaí hili ‘a e maté? Pehē foki, ‘oku loto mo‘oni ‘a e ‘Otuá ke tau toutou lea‘aki ‘a e ngaahi lotú mo ha losalio ‘o tu‘o lauingeau? *

Ko e hā na‘á ke faí?

Na‘á ku lotu ki ha tataki ‘i he tangi-‘a-lo‘imata. Na‘á ku toe fakatau mai foki mo ha tatau ‘o e Jerusalem Bible ‘a e Katoliká, ‘a ia na‘e toki pulusi ‘i he lea faka-‘Ītalí, pea kamata ke lau ia. Ka, ‘i ha pongipongi Sāpate ‘e taha lolotonga ‘eku hu‘i atu hoku teungá hili ‘a e Misá, na‘e ha‘u ha ongo tangata ki he seminālió. Na‘á na fakafe‘iloaki mai kinaua ko ha ongo Fakamo‘oni ‘a Sihova. Na‘a mau talanoa ‘o laka hake ‘i ha houa ‘e taha fekau‘aki mo e Tohi Tapú pea mo e me‘a ‘oku lea‘aki ai fekau‘aki mo e ngaahi faka‘ilonga ‘o e lotu mo‘oní.

Na‘e anga-fēfē ho‘o vakai ki he ongo ‘a‘ahí?

Na‘á ku sai‘ia ‘aupito ‘i he‘ena tuipaú mo e faingofua ko ia ‘ena kumi ‘a e ngaahi vēsí ‘i ha tatau Katolika ‘o e Tohi Tapú. Ki mui aí, na‘e kamata ke ‘a‘ahi mai mo ha toe Fakamo‘oni ‘e taha, ko hono hingoá ko Mario. Na‘á ne anga-kātaki mo faitōnunga​—‘i he pongipongi Tokonaki kotoa pē, na‘á ne fakatatangi mai ‘a e fafangu ‘o e seminālió ‘i he hoko ‘a e hivá, neongo ‘a e ‘uhá pe la‘aá.

Na‘e anga-fēfē vakai ‘a e toenga ‘o e kau pātelé ki he ngaahi ‘a‘ahi ko iá?

Na‘á ku fakaafe‘i kinautolu ke kau mai ki he‘emau ngaahi fetalanoa‘akí, ka na‘e ‘ikai ke nau fakakaukau ‘oku mahu‘inga ke ako ‘a e Tohi Tapú. Kae kehe, na‘á ku sai‘ia ‘aupito au ia ‘i he ako Tohi Tapú. Na‘á ku ako ‘a e ngaahi me‘a fakaofo, hangē ko e ‘uhinga ‘oku kei faka‘atā ai ‘e he ‘Otuá ‘a e koví mo e faingata‘á​—ko ha me‘a na‘e fuoloa ta‘u mai ‘eku fa‘a fifili fekau‘aki mo ia.

Na‘e feinga ho kau takí ke nau ta‘ofi koe mei hono ako ‘a e Tohi Tapú?

‘I he 1975, na‘á ku toutou ‘a‘ahi ki Loma ke fakamatala‘i ‘eku ngaahi fakakaukaú. Na‘e feinga hoku kau takí ke liliu ‘eku fakakaukaú, ka na‘e ‘ikai ha taha ia te ne ngāue‘aki ‘a e Tohi Tapú. Faai atu pē, ‘i Sanuali 9, 1976, na‘á ku faitohi ki Loma ‘o fakahaa‘i ange ‘oku ‘ikai ke u toe hoko ko ha tokotaha lotu Katolika. Hili ha ‘aho ‘e ua mei ai, na‘á ku mavahe mei he seminālió pea heka ‘i ha lēlue ke ma‘u ‘a ‘eku fuofua fakataha mo e Kau Fakamo‘oni ‘a Sihová, ‘a ia ko ha ‘asemipilī na‘e kau ai ha ngaahi fakataha‘anga kehekehe. Ko e me‘a kotoa na‘e kehe ia mei he me‘a na‘á ku anga ki aí! Na‘e ‘i ai ‘a e Tohi Tapu ‘a e tokotaha Fakamo‘oni taki taha pea na‘a nau muimui ki he kau malangá ‘i he‘enau lāulea ki ha ngaahi kaveinga kehekehe.

Na‘e anga-fēfē vakai ho fāmilí fekau‘aki mo e me‘a kotoa ko ení?

Ko e tokolahi ‘o kinautolu na‘a nau fakafepaki‘i kakaha au. Neongo ia, na‘á ku toki ‘ilo‘i, ko e taha ‘i hoku fanga tokouá na‘á ne ako Tohi Tapu mo e Kau Fakamo‘oní ‘i Lombardy, ko ha feitu‘u ‘i he fakatokelau ‘o ‘Ītalí. Na‘á ku ‘alu ke sio kiate ia, pea na‘e tokoni‘i au ‘e he Kau Fakamo‘oni ‘i aí ke ma‘u ha ngāue mo ha feitu‘u ke u nofo ai. Ki mui ange ‘i he ta‘u ko iá, na‘á ku papitaiso ai ko e taha ‘o e Kau Fakamo‘oni ‘a Sihová.

‘Okú ke faka‘ise‘isa?

‘Ikai ‘aupito! Kuo faifai ange peá u ongo‘i ofi mo‘oni ki he ‘Otuá, koe‘uhi ko e me‘a ‘oku ou ‘ilo‘i fekau‘aki mo iá ‘oku makatu‘unga ia ‘i he Tohi Tapú, kae ‘ikai ko e filōsofia pe talatukufakaholo ‘a e siasí. Pea ‘oku lava ke u ako‘i ‘a e ni‘ihi kehé ‘i he tuipau mo e loto-mo‘oni.