• TAʻU FĀʻELEʻI: 1941

• FONUA TUPUʻANGA: PENINI

• HISITŌLIA: MALI TOKOLAHI, FAKAFEPAKI KI HE KAU FAKAMOʻONI ʻA SIHOVÁ

KO HOKU KUOHILÍ:

Ko ʻeku haʻu mei Cotonou, ko ha kolo lahi ʻi Penini. Naʻe ʻohake au ko ha Katolika ka naʻe ʻikai ke u maʻu lotu maʻu pē. Ko e kau Katolika tokolahi ʻi he feituʻu naʻá ku nofo aí naʻa nau maʻu ʻa e ngaahi uaifi tokolahi, he ko e mali tokolahí naʻe fakalao ʻi he taimi ko iá. Naʻe faai atu pē ʻo u mali mo e kau fefine ʻe toko fā.

ʻI he hoko ha liukava ʻi he 1970 tupú, naʻá ku fakakaukau ʻe ʻaonga ki homau fonuá. Naʻá ku poupou kakato ki he liukavá pea kau ki he politikí. Ko e kau liukavá naʻe ʻikai ke nau saiʻia ʻi he Kau Fakamoʻoni ʻa Sihová koeʻuhí ko e Kau Fakamoʻoní naʻa nau nofoʻaki tuʻu-ʻatā mei he meʻa fakapolitikalé. Naʻá ku kau ʻi he faʻahinga naʻa nau fakatangaʻi ʻa e Kau Fakamoʻoní. ʻI he taimi naʻe fakafoki ai ʻa e kau misinale Fakamoʻoní mei he fonuá ʻi he 1976, naʻá ku fakapapauʻi heʻikai ʻaupito ke nau toe foki mai.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

Naʻe ngata ʻa e liukavá ʻi he 1990. Naʻá ku ʻohovale ʻi he toe ʻasi ʻa e kau misinale Fakamoʻoní. Naʻe kamata ke u fakakaukau mahalo ʻoku kau ʻa e ʻOtuá mo e kakai ko ení. ʻI he taimi ko iá, naʻá ku hiki ki ha ngāue ʻe taha. Ko e taha ʻi hoku ngaahi kaungāngāue foʻoú ko ha Fakamoʻoni, pea naʻe kamata ke ne vahevahe ʻene tuí. Naʻá ne fakahaaʻi mai ha veesi Tohi Tapu ʻoku fakamatalaʻi ai ko Sihova ko e ʻOtua ʻo e ʻofa mo e fakamaau totonu. (Teutalōnome 32:4; 1 Sione 4:8) Ko e ongo ʻulungaanga ko iá naʻe maongo kiate au. Naʻá ku loto ke ako lahi ange fekauʻaki mo Sihova, ko ia naʻá ku tali ke ako ʻa e Tohi Tapú.

Naʻe kamata leva ke u maʻu ʻa e ngaahi fakataha ʻa e Kau Fakamoʻoni ʻa Sihová. Naʻe maongo kiate au ʻa e ʻofa moʻoni naʻá ku sio ki aí​—naʻe ʻikai ha māvahevahe fakamatakali pe ko ha fakatuʻutuʻunga fakasōsiale. Ko e lahi ange ʻeku feohi mo e Kau Fakamoʻoní, ko e hā mahino ange ia ko e kau muimui moʻoni kinautolu ʻo Sīsū.​—Sione 13:35.

Naʻá ku fili kapau ʻoku ou loto ke u tauhi kia Sihova, ʻe fiemaʻu ke u mavahe mei he Siasi Katoliká. Naʻe ʻikai ko ha sitepu faingofua ia, he naʻá ku ilifia ki he fakakaukau mai ʻa e niʻihi kehé. Hili ha taimi fuoloa mo e tokoni ʻa Sihová, naʻá ku tafunaki ʻa e loto-toʻa pea mavahe mei he siasí.

Naʻe toe ʻi ai mo ha liliu lahi naʻe fiemaʻu ke u fai. Naʻá ku ako mei he Tohi Tapú ʻoku ʻikai tali ʻe he ʻOtuá ʻa e mali tokolahí. (Sēnesi 2:​18-​24; Mātiu 19:​4-6) ʻI heʻene vakaí, ko hoku mali ʻuluakí pē naʻe fakalaó. Ko ia naʻá ku lēsisita ʻa e mali ko ení pea tuku ange hoku ngaahi uaifi kehé, ʻo fokotuʻutuʻu ke tokangaʻi ʻenau ngaahi fiemaʻu fakamatelié. ʻI he faai atu ʻa e taimí, ko e toko ua ʻi hoku ngaahi uaifi ki muʻá naʻá na hoko ko e Fakamoʻoni ʻa Sihova.

FOUNGA ʻO ʻEKU MAʻU ʻAONGÁ:

Neongo ʻoku kei Katolika pē hoku uaifí, ʻokú ne fakaʻapaʻapaʻi ʻeku fili ke tauhi kia Sihová. ʻOkú ma fakatou ongoʻi kuó u hoko ko ha husepāniti lelei ange.

Naʻá ku fakakaukau ki muʻa ʻe lava ke u tokoni ki he lelei homau koló fakafou ʻi he politikí, ka ko e ngaahi feinga ko iá ko e koto kulanoa moʻoni. ʻI he taimí ni ʻoku ou sio ko e Puleʻanga ʻo e ʻOtuá ʻa e fakaleleiʻanga pē taha ki he palopalema ʻa e faʻahinga ʻo e tangatá. (Mātiu 6:9, 10) ʻOku ou houngaʻia kia Sihova ʻi heʻene fakahaaʻi mai ʻa e founga ke maʻu ai ha moʻui fiefia moʻoni.

• TAʻU FĀʻELEʻI: 1977

• FONUA TUPUʻANGA: PELĒSILA

• HISITŌLIA: FAIFEKAU PENITEKOSI

KO HOKU KUOHILÍ:

Naʻe ʻohake au ʻi he tuʻa kolo ʻo Itu, ʻi São Paulo. Ko e tafaʻaki ko eni ʻo e koló naʻe ʻiloa ʻi he faihiá.

Naʻá ku mātuʻaki anga-fakamālohi mo ʻulungaanga taʻetaau. ʻIkai ko ia pē, naʻá ku kau ʻi hono feʻaveʻaki holo ʻo e faitoʻo kona tapú. ʻI he faai atu ʻa e taimí, naʻá ku ʻiloʻi ko ha moʻui pehē te u iku atu ai ki pilīsone pe ko faʻitoka, ko ia naʻá ku tuku ange ia. Naʻá ku kau leva ki he Siasi Penitekosí, pea faai atu pē ʻo u hoko ko ha faifekau.

Naʻá ku ongoʻi ʻe lava moʻoni ke u tokoni ki he kakaí fakafou ʻi heʻeku ngāue mo e siasí. Naʻe aʻu ʻo u fakamafola mo ha polokalama fakalotu ʻi he letiō ʻa e koló pea naʻá ku ʻiloa ai ʻi he feituʻú. Neongo ia, naʻe faai atu pē ʻo u tui ko e siasí, fakalūkufua, naʻe ʻikai ke nau hohaʻa fekauʻaki mo e lelei ʻa hono kau mēmipá​—ʻo aʻu ki he ʻikai ke nau fuʻu hohaʻa ke fakalāngilangiʻi ʻa e ʻOtuá. Naʻá ku ongoʻi ko e taumuʻa pē ʻa e siasí ke tānaki paʻanga. Naʻá ku fili ke mavahe mei he siasí.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

ʻI he kamata ke u ako ʻa e Tohi Tapú mo e Kau Fakamoʻoni ʻa Sihová, naʻe lava ke u sio ʻi he taimi pē ko iá naʻa nau kehe mei he ngaahi siasi kehé. Naʻe ʻi ai ha meʻa ʻe ua naʻe maongo kiate au. ʻUluakí, ko e Kau Fakamoʻoni ʻa Sihová ʻoku ʻikai ke nau talanoa pē fekauʻaki mo e ʻofa ki he ʻOtuá mo e kaungāʻapí; ʻoku nau fakahāhā ia. Uá, ʻoku ʻikai ke nau kau ʻi he politikí pe taú. (ʻAisea 2:4) Ko e moʻoniʻi meʻa ʻe ua ko iá naʻá ne fakatuipauʻi au kuó u maʻu ʻa e lotu moʻoní​—ʻa e hala ʻefiʻefi ʻoku taki atu ki he moʻui taʻengatá.​—Mātiu 7:​13, 14.

Naʻá ku ʻiloʻi kapau naʻá ku loto ke fakahōifuaʻi ʻa e ʻOtuá, naʻe pau ke u fai ʻa e ngaahi liliu lahi. Naʻe fiemaʻu ke u tokanga lahi ange ki hoku fāmilí. Naʻe toe fiemaʻu ke u anga-fakatōkilalo ange. Naʻe ʻikai faingofua ke u fai ʻa e ngaahi liliu naʻe fiemaʻú, ka ʻi he tokoni ʻa Sihová, naʻá ku lavameʻa. Naʻe maongo ki hoku uaifí ʻa e ngaahi liliu ko ení. Naʻá ne ʻuluaki kamata ako ʻa e Tohi Tapú ʻiate au, ka ʻi he taimi ko ení naʻe vave ange ʻene fakalakalaká. ʻIkai fuoloa mei ai naʻá ma fakatou ʻiloʻi ʻokú ma loto ke hoko ko ha ongo Fakamoʻoni ʻa Sihova. Naʻá ma papitaiso ʻi he ʻaho tatau.

FOUNGA ʻO ʻEKU MAʻU ʻAONGÁ:

Naʻá ku fiefia mo hoku uaifí ʻi hono tokoniʻi ʻema fānau ʻe toko tolu ke nau fakatupulekina ha kaumeʻa vāofi mo Sihova. ʻOku mau hoko ko ha fāmili fiefia. ʻOku ou fakamālō kia Sihova ʻi heʻene tohoakiʻi mai au ki he moʻoni ʻoku maʻu ʻi heʻene Folofolá, ʻa e Tohi Tapú. ʻOkú ne liliu moʻoni ʻa e moʻui ʻa e kakaí! ʻOku ou fakamoʻoniʻi tonu ia.

• TAʻU FĀʻELEʻI: 1957

• FONUA TUPUʻANGA: ʻAOSITELĒLIA

• HISITŌLIA: TUPU HAKE ʻI HA ʻĀTAKAI FAKAMAMAHI

KO HOKU KUOHILÍ:

Naʻá ku tupu hake ʻi Newcastle, Niu Sau Uele. Ko e lahi taha au ʻi ha fānau ʻe toko fitu naʻe fanauʻi ki ha tamai anga-fakamālohi mo ʻolokahōlika pea mo ha faʻē anga-fakamālohi. Naʻe ngaohikovia fakaesino au ʻe heʻeku faʻeé mo leakovia. Naʻá ne toutou tala mai ko ha tokotaha kovi au pea ʻe fakamamahiʻi au ʻi he afi ʻo helí. Ko e ngaahi fakamanamana ko iá naʻá ne ʻai au ke u manavahē.

Ko e ngaahi lavea ʻi hono tā au ʻe heʻeku faʻeé naʻá ne faʻa ʻai ke u liʻaki ako. ʻI heʻeku taʻu 11, naʻe ʻave au mei heʻeku ongo mātuʻá pea ʻuluaki tuku ʻi ha fale ʻa e puleʻangá pea ʻave au ki mui ai ki ha ʻapi tāupoʻou. ʻI heʻeku taʻu 14, naʻá ku hola mei he ʻapi tāupoʻoú. Naʻe ʻikai ke u toe fie foki ki ʻapi, ko ia naʻá ku nofo ʻi he ngaahi veʻehala ʻo Kings Cross, ʻi he tuʻa kolo ʻo Senē.

Lolotonga ʻeku nofo ʻi he ngaahi veʻehalá, naʻá ku ngāueʻaki ʻa e faitoʻo kona tapú, inu ʻolokaholó, sio ʻi he ʻata fakalieliá pea mo e tōʻonga paʻumutu. Naʻe ʻi ai ha meʻa naʻe hoko naʻá ku mātuʻaki ilifia ai. Naʻá ku nofo ʻi ha feleti ʻo ha pule naitikalapu. ʻI he efiafi ʻe taha, naʻe haʻu ha ongo tangata kiate ia. Naʻá ne fekau ke u ʻalu ki loki, ka naʻe lava ke u fanongo atu ki heʻenau fetalanoaʻakí. Naʻe fokotuʻutuʻu ʻe he pule naitikalapú ke fakatau au ki he ongo tangata ko ení. Naʻe ʻai ke nau fūfuuʻi au ʻi ha vaka uta koloa pea ʻave ki Siapani ke u ngāue ʻi ha pā. Naʻá ku ilifia lahi, ʻo u puna mei he falefakatoló, peá u hola ʻo kumi tokoni.

Naʻá ku fetaulaki mo ha tangata naʻá ne ʻaʻahi mai ki Senē, pea naʻá ku fakamatala ange hoku tuʻungá, ʻo ʻamanaki te ne ʻomai ha paʻanga. ʻI hono kehé, naʻá ne fakaafeʻi au ki he feituʻu naʻá ne nofo aí koeʻuhí ke u lava ʻo kaukau pea kai. Ka naʻe ʻikai ke u toe mavahe mei ai. ʻI ha taʻu ʻe taha mei ai, naʻá ma mali.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

ʻI heʻeku kamata ako ʻa e Tohi Tapú mo e Kau Fakamoʻoni ʻa Sihová, naʻá ku hokosia ʻa e ngaahi ongoʻi kehekehe. Naʻá ku ʻita ʻi hono ʻiloʻi ko Sētane ʻa e tupuʻanga ʻo e koví; naʻe faʻa akoʻi mai kiate au ko e ʻOtuá ʻokú ne ʻai ke tau faingataʻaʻiá. Naʻá ku ongoʻi nonga moʻoni ʻi heʻeku ako ʻoku ʻikai ke ne tauteaʻi ʻa e kakaí ʻi he afi ʻo helí, ko ha akonaki naʻá ne ʻai ke u manavahē talu ʻeku tupu hake.

Naʻe maongo kiate au ʻa e anga hono fakaʻatā ʻe he Kau Fakamoʻoní ʻa e Tohi Tapú ke ne tākiekina ʻenau ngaahi filí kotoa. Naʻa nau moʻuiʻaki ʻenau tuí. Ko ha tokotaha anga-faingataʻa au, kae tatau ai pē pe ko e hā ʻa e meʻa naʻá ku leaʻaki pe faí, naʻe fakafeangai mai ʻa e Kau Fakamoʻoní ʻi he ʻofa mo e fakaʻapaʻapa.

Ko e meʻa naʻá ku fāinga lahi taha mo iá ko e ongoʻi ʻoku ʻikai haku mahuʻingá. Naʻá ku ongoʻi taʻetaau, pea ko e ngaahi ongoʻi ko ení naʻá ku fāinga mo ia ʻi ha taimi fuoloa hili ʻeku papitaiso ko ha Fakamoʻoni ʻa Sihová. Naʻá ku ʻiloʻi ʻoku ou ʻofa kia Sihova, ka naʻá ku tuipau heʻikai ʻaupito lava ke ne ʻofa ʻi ha taha hangē ko aú.

Ko ha liliuʻanga ki heʻeku moʻuí naʻe hoko ia ʻi ha taʻu ʻe 15 nai hili ʻeku papitaisó. Lolotonga ha malanga ʻi he Fale Fakatahaʻanga ʻo e Kau Fakamoʻoni ʻa Sihová, naʻe lave ʻa e tokotaha-malangá ki he Sēmisi 1:​23, 24. Naʻe fakahoa ʻi he ongo veesi ko iá ʻa e Folofola ʻa e ʻOtuá ki ha sioʻata ʻa ia ʻe lava ke tau sio ai kiate kitautolu ʻo hangē ko e vakai mai ʻa Sihova kiate kitautolú. Naʻe kamata ke u fifili pe ko e meʻa naʻá ku sio ki ai ʻiate aú naʻe kehe ia mei he meʻa naʻe vakai mai ki ai ʻa Sihová. ʻI he kamatá, naʻá ku talitekeʻi ʻa e fakakaukau foʻou ko ení. Naʻá ku kei ongoʻi pē ʻoku ʻikai ke u tuha moʻoni mo e ʻofa ʻa Sihová.

ʻI ha ngaahi ʻaho siʻi mei ai, naʻá ku lau ha konga Tohi Tapu naʻá ne liliu ʻeku moʻuí. Ko e ʻAisea 1:​18, ʻa ia ʻoku pehē ai ʻe Sihova: “Mou omi ke tau fakamahino ʻa e ngaahi meʻá. . . . Neongo ʻoku hangē hoʻomou angahalá ko ha tupenu kula ʻahoʻahó, ʻe ʻai ia ke hinehina ʻo hangē ko e sinoú.” Naʻá ku ongoʻi ʻo hangē ia naʻe lea mai ʻa Sihova kiate au, ʻo pehē: “Haʻu, Vicky, ke ta fakamahino ʻa e ngaahi meʻá. ʻOku ou ʻiloʻi koe, ʻoku ou ʻiloʻi hoʻo ngaahi angahalá, ʻoku ou ʻafioʻi ho lotó​—pea ʻoku ou ʻofa ʻiate koe.”

Naʻe ʻikai malava ke u mohe ʻi he pō ko iá. Naʻá ku kei veiveiua pē pe ʻe lava ʻa Sihova ke ʻofa ʻiate au, ka naʻe kamata ke u fakakaukau ki he feilaulau huhuʻi ʻa Sīsuú. Fakafokifā pē, naʻá ku fakakaukau ki he kātaki fuoloa ko ia ʻa Sihova ʻiate aú, ʻo fakahaaʻi mai ʻene ʻofá ʻi he ngaahi founga lahi. Ka ko eni ʻoku ou tala ange ʻe au kiate ia: “Ko hoʻo ʻofá ʻoku ʻikai lahi feʻunga ia ke aʻu mai kiate au. Ko e feilaulau ʻa ho ʻAló ʻoku ʻikai feʻunga ia ke ne ʻufiʻufi ʻeku angahalá.” Naʻe hangē ia naʻá ku talitekeʻi ʻa e huhuʻi naʻe tokonaki mai ʻe Sihová. Kae mālō mo ʻeku fakalaulauloto ko eni ki he meʻaʻofa ʻo e huhuʻí, naʻe kamata ai ke u ongoʻi ʻoku ʻofaʻi au ʻe Sihova.

FOUNGA ʻO ʻEKU MAʻU ʻAONGÁ:

ʻOku ou ongoʻi maʻa, longomoʻui mo kakato. Ko ʻeku nofo malí kuo lelei ange, pea ʻoku ou fiefia ʻi he lava ke u ngāueʻaki ʻeku ngaahi hokosiá ke tokoniʻi ʻa e niʻihi kehé. ʻOku ou ongoʻi ofi ange kia Sihova ʻi he taimí ni.

• TAʻU FĀʻELEʻI: 1974

• FONUA TUPUʻANGA: LŪSIA

• HISITŌLIA: MANAKO ʻI HE FASI NGATŪTŪ

KO HOKU KUOHILÍ:

Naʻe fāʻeleʻi au ʻi Votkinsk, ko e feituʻu ia naʻe fāʻeleʻi ai ʻa e tokotaha faʻu hiva ʻiloa ko Pyotr Ilich Tchaikovsky. Naʻe masiva homau fāmilí. Naʻe lahi ʻa e ngaahi ʻulungaanga lelei ʻeku tamaí, ka naʻá ne ʻolokahōlika, ko ia naʻe ʻi ai maʻu pē vālau ʻi homau ʻapí.

Naʻe ʻikai ke fuʻu loko sai ʻeku akó, pea ʻi he faai atu ʻa e ngaahi taʻú, naʻá ku vakai naʻá ku māʻulalo ange ʻi he niʻihi kehé. Naʻe kamata ke u fakamavaheʻi au pea ʻikai ke u toe falala ki he niʻihi kehé. Ko e ʻalu ki he akó naʻe fakalotomafasia moʻoni. Ko e fakatātaá, ʻi he taimi naʻe fiemaʻu ai ke u fai ha fakamatala, naʻe ʻikai ke u faʻa malava ke fakamatalaʻi naʻa mo e ngaahi meʻa faingofua naʻe malava ke u fakamatalaʻi ʻi he ngaahi taimi kehé. ʻI he ʻosi ʻeku kuleiti valú, naʻe pehē ʻi heʻeku līpōtí: “ʻIkai ke lahi ʻa e lea ʻokú ne ʻiló, ʻikai malava ke ne fakahaaʻi ʻene ngaahi fakakaukaú.” Ko e ngaahi lea ko iá naʻá ne ʻai ke u loto-siʻi pea ʻai ke toe lahi ange ʻeku ongoʻi taʻeʻaongá. Naʻe kamata ke u fifili fekauʻaki mo e taumuʻa ʻeku moʻuí.

ʻI heʻeku taʻu hongofulu tupú, naʻe kamata ke u inu ʻolokaholo. ʻI he kamatá, naʻe ʻai au ʻe he inú ke u ongoʻi lelei. Ka ʻi heʻeku inu tōtuʻá, naʻe fakahohaʻasi au ʻe hoku konisēnisí. Naʻe taumuʻavalea ʻeku moʻuí. Naʻe kamata ke u ongoʻi loto-mafasia lahi ange, ʻi he taimi ʻe niʻihi naʻe ʻikai ke u mavahe mei ʻapi ʻi ha ngaahi ʻaho. Naʻe kamata ke u fakakaukau ki he taonakitá.

ʻI heʻeku taʻu 20, naʻe ʻi ai ha meʻa foʻou naʻá ne ʻomi ha nonga fakataimi kiate au. Naʻá ku ʻiloʻi ʻa e fasi ngatūtuú. Naʻá ku ongoʻi iviiviʻia ʻi he fasí pea fekumi ki he faʻahinga naʻa nau fanongo ki aí. Naʻá ku fakaloloa hoku ʻulú, fana hoku telingá, pea ʻai vala hangē ko e kau hiva naʻá ku saiʻia aí. Faai atu pē, naʻá ku hoko ʻo ʻaiʻainoaʻia mo anga-fefeka, ʻo faʻa kē mo hoku fāmilí.

Naʻá ku fakakaukau ko e fanongo ki he fasi ngatūtuú te ne ʻai ke u fiefia, ka naʻe ʻikai ke pehē ia. Naʻe ʻai ai ke toe kehe ange ʻeku tōʻongá! Pea ʻi he taimi naʻá ku ʻiloʻi ai naʻe fai ʻe he kau hiva ʻiloa naʻá ku saiʻia aí ha kovi, naʻá ku ongoʻi naʻa nau lavakiʻi au.

Naʻe kamata ke u toe fakakaukau lahi ange ki he taonakitá. Ko e meʻa pē naʻá ne taʻofi aú ko e fakakaukau atu ki hono uesia ai ʻeku faʻeé. Naʻá ne ʻofa lahi ʻiate au, pea naʻá ne fai ʻa e ngaahi meʻa lahi maʻaku. Naʻe fakamamahi ʻa e meʻá ni. Naʻe ʻikai ke u toe fie moʻui, ka naʻe ʻikai lava ke u toʻo ʻeku moʻuí.

Naʻe kamata ke u lau ha tohi talanoa faka-Lūsia ke u hanganoa ai. Ko e talanoa ʻe taha naʻe fekauʻaki mo ha helo naʻá ne ngāue ʻi ha siasi. Fakafokifā pē naʻá ku ongoʻi ha holi mālohi ke fai ha meʻa maʻá e ʻOtuá pea maʻá e niʻihi kehé. Naʻá ku lilingi atu hoku lotó ki he ʻOtuá ʻi he lotu, ko ha meʻa naʻe teʻeki ke u fai ki muʻa. Naʻá ku kole ki he ʻOtuá ke ne fakahaaʻi mai ʻa e founga ke u maʻu ai ha moʻui mohu taumuʻa. Lolotonga ʻa e lotu ko iá, naʻá ku ongoʻi nonga makehe. Ka naʻe toe makehe ange ʻa e meʻa naʻe hoko atu aí. ʻI ha houa pē ʻe ua mei ai, naʻe tukituki mai ʻi he matapā ha taha ʻo e Kau Fakamoʻoni ʻa Sihová pea tuʻuaki mai ha ako Tohi Tapu. Naʻá ku tui ko e tali eni ki heʻeku lotú. Ko e fuofua ʻaho ia ʻo ha moʻui foʻou mo fakafiefia kiate au.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

Neongo naʻe mātuʻaki faingataʻa, naʻá ku liʻaki ʻa e meʻa kotoa naʻá ku maʻu naʻe fekauʻaki mo e fasi ngatūtuú. Neongo ia, naʻe ʻi hoku ʻatamaí ʻa e fasí ʻi ha taimi fuoloa. ʻI ha taimi pē naʻá ku lue atu ai ʻi ha feituʻu naʻe tā ai ʻa e fasi ko iá, naʻá ku fakakaukau ʻi he taimi pē ko iá ki hoku kuohilí. Naʻe ʻikai ke u loto ke fio ʻa e ngaahi manatu tamaki ko iá mo e ngaahi meʻa lelei naʻe kamata ke tō loloto ʻi hoku ʻatamaí mo e lotó he taimi ní. Ko ia naʻá ku fakaʻehiʻehi maʻu pē mei he ngaahi feituʻu ko iá. Pea ʻi he taimi pē naʻá ku hehema ai ke fakakaukau ki he kuohilí, naʻá ku lotu tōtōivi. Ko hono fai iá naʻe tokoniʻi ai au ke u hokosia ʻa e “nonga ʻa e ʻOtuá ʻa ia ʻoku fakalaka atu ʻi he mahino kotoa pē.”​—Filipai 4:7.

ʻI heʻeku ako ʻa e Tohi Tapú, naʻá ku ʻiloʻi ai ko e kau Kalisitiané ʻoku nau maʻu ʻa e fatongia ke vahevahe ʻenau tuí ki he niʻihi kehé. (Mātiu 28:​19, 20) Naʻá ku tui moʻoni heʻikai ʻaupito lava ke u fai ia. ʻI he taimi tatau, ko e ngaahi meʻa foʻou naʻá ku akó naʻe ʻomai ai kiate au ʻa e fiefia lahi mo e nonga ʻi loto. Naʻá ku ʻiloʻi naʻe fiemaʻu ʻe he niʻihi kehé ke nau ako foki ʻa e ngaahi moʻoni ko ení. Neongo ʻeku manavasiʻí, naʻe kamata ke u talanoa ki he niʻihi kehé fekauʻaki mo e meʻa naʻá ku akó. ʻI heʻeku talanoa ki he niʻihi kehé fekauʻaki mo e Tohi Tapú naʻá ku ʻohovale ʻi hono fakalahi ai ʻeku loto-maʻú. Naʻe toe ʻai ai ke faiaka loloto ange ʻa e ngaahi tui foʻou ko ení ʻi hoku lotó.

FOUNGA ʻO ʻEKU MAʻU ʻAONGÁ:

ʻOku ou maʻu ha nofo mali fiefia ʻi he taimí ni pea maʻu mo e fiefia ʻi hono tokoniʻi ʻa e tokolahi ke nau ako fekauʻaki mo e Tohi Tapú, ʻo kau ai hoku tuofefiné mo ʻeku faʻeé. Ko e tauhi ki he ʻOtuá pea tokoniʻi ʻa e niʻihi kehé ke ako fekauʻaki mo iá kuó ne ʻomai kiate au ha moʻui mohu ʻuhinga.