• TAʻU FĀʻELEʻI: 1963

• FONUA TUPUʻANGA: PILITĀNIA

• HISITŌLIA: MAʻU HA NGĀUE ONGOONGOA

KO HOKU KUOHILÍ:

Naʻe fanauʻi au ʻi Croydon, ʻi he faka-Tonga ʻo Lonitoní, ko e fika ono ʻi he fānau ʻe toko hiva. Ko ʻeku ongo mātuʻá naʻá na haʻu mei he motu ʻi he Kalipiané ko Sā. Viniseni. Ko ʻeku faʻeé naʻe kau ki he siasi Metotisí. Naʻe ʻikai ke u mahuʻingaʻia ʻi he ako fekauʻaki mo e ʻOtuá, neongo naʻe ʻikai lava ke fakalato ʻeku holi ke maʻu ha ʻilo. ʻI he tutuku ʻa e akó naʻá ku faʻa nofo ʻi ha veʻe ano vai, ʻo lau ʻa e ngaahi tohi lahi naʻá ku maʻu mei he laipelí.

ʻI ha ngaahi taʻu hili ʻeku nofo mei he akó, naʻá ku ʻiloʻi naʻá ku loto ke tokoni ki he kakai fiemaʻu tokoní. Naʻe kamata ke u ngāue mo e faʻahinga naʻe tukuhāusiá pea mo e faʻahinga naʻe faingataʻaʻia fakaesino mo fakaeako. Ko ia naʻá ku toʻo ha koosi ʻi he ʻunivēsití fekauʻaki mo e saienisi ʻo e moʻuí. Hili ʻeku maʻu tohi fakamoʻoni akó, naʻá ku fiefia ʻi he hikihiki holo ʻi he ngaahi lakanga tuʻu-ki-muʻa pea naʻe fakaʻaʻau ke lakalakaimonū ʻeku moʻuí. ʻI hoku tuʻunga ko ha tokotaha faifaleʻi tauʻatāina mo e tokotaha fakatotolo ki he moʻuí, ko e meʻa pē naʻá ku fiemaʻu ki he ngāué ko e lepitopu mo e ʻInitaneti. Naʻá ku fefolauʻaki ʻi ha laui uike pea nofo ʻi hoku hōtele manakó, fiefia ʻi he ngaahi ʻātakai fakaʻofoʻofá, pea ngāueʻaki ʻa e ngaahi kaukauʻanga vai mafaná mo e fale fakamālohisinó ke u kei fiti pē. Naʻá ku pehē pē ko e moʻuí ia. Ka naʻe ʻikai pē mole meiate au ʻeku hohaʻa ki he faʻahinga naʻe lōmekiná.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

ʻI he laui taʻu naʻá ku fifili, ‘Ko e hā ʻoku tau ʻi heni aí, pea ko e hā ʻa e taumuʻa ʻo e moʻuí?’ Ka naʻe ʻikai pē ke u feinga ke maʻu ʻa e talí mei he Tohi Tapú. ʻI he ʻaho ʻe taha ʻi he 1999, naʻe ʻaʻahi mai hoku tehiná ʻa Margaret, naʻá ne hoko ko ha taha ʻo e Kau Fakamoʻoni ʻa Sihová pea mo hono kaungāmeʻa Fakamoʻoni, ʻa ia naʻá ne fakahāhā ʻa e mahuʻingaʻia fakafoʻituitui ʻiate au. Naʻá ku loto ke ako Tohi Tapu mo e kaungāmeʻa hoku tokouá, ka naʻe tuai ʻeku fakalakalaká, he ko ʻeku ngāué mo ʻeku founga moʻuí naʻá ne toʻo ʻa e lahi taha hoku taimí.

ʻI he faʻahitaʻu māfana ʻo e 2002, naʻá ku hiki ki he tonga-hihifo ʻo ʻIngilaní. Naʻe hoko atu ʻeku ako mataʻitohí ʻi he fakatotolo ki he moʻuí mo e taumuʻa ke maʻu hoku toketaá. Naʻá ku kamata ke maʻu maʻu pē ʻa e fakataha ʻi he Fale Fakatahaʻanga fakalotofonuá mo ʻeku kiʻi tamasiʻí. Neongo naʻá ku fiefia ʻi he ako māʻolunga angé, ko ʻeku ako ʻa e Tohi Tapú naʻá ne ʻomai ʻa e mahino lahi ange ki he ngaahi palopalema ʻi he moʻuí mo e fakaleleiʻangá. Naʻá ku fakapapauʻi ʻa e moʻoni ʻo e lea ʻi he Mātiu 6:​24, ʻa ia ʻoku pehē ai heʻikai lava ke ke ngāue fakatamaioʻeiki ki ha ʻeiki ʻe toko ua. Ko haʻo fili pē ki he ʻOtuá pe ko e koloá. Naʻá ku ʻiloʻi kuo pau ke u fai ha fili fekauʻaki mo e meʻa ke fakamuʻomuʻa ʻi heʻeku moʻuí.

ʻI he taʻu ki muʻá, naʻá ku faʻa kau ki ha kulupu ako Tohi Tapu ʻi ʻapi ʻa ia naʻe ako ai ʻe he Kau Fakamoʻoní ʻa e tohi Is There a Creator Who Cares About You? * Naʻá ku tuipau ko hotau Tokotaha-Fakatupú pē ʻa Sihova ʻokú ne maʻu ʻa e fakaleleiʻanga ki he ngaahi palopalema ʻa e faʻahinga ʻo e tangatá. Ka ʻi he ʻunivēsití naʻe akoʻi mai ai ko e moʻuí naʻe ʻikai ke kaunga ki ai ʻa e tui ki ha Tokotaha-Fakatupu. Naʻá ku ʻita lahi. Hili ha māhina ʻe ua, naʻá ku liʻaki ʻeku ako ʻi he ʻunivēsití pea fili ke vaheʻi ha taimi lahi ange ki he ngaahi meʻa fakalaumālié.

Ko e konga Tohi Tapu naʻá ne ueʻi au ke liliu ʻeku founga moʻuí ko e Palōveepi 3:​5, 6: “Falala kia Sihova ʻaki ho lotó kotoa, pea ʻoua naʻá ke falala ki hoʻo mahino pē ʻaʻaú. ʻI he kotoa ho ngaahi ʻalungá, tokanga kiate ia, pea te ne fakatonutonu ho ngaahi halá.” Ko e ako fekauʻaki mo hotau ʻOtua ʻofá naʻe fakakoloa ange ia ʻi ha koloa fakamatelie pē mo ha tuʻunga te u maʻu kapau naʻá ku maʻu hoku toketaá. Ko e lahi ange ʻeku ako fekauʻaki mo e taumuʻa ʻa Sihova ki he māmaní mo e ngafa ʻo Sīsū ʻi hono feilaulauʻi ʻene moʻuí maʻa kitautolú, ko e lahi ange ia ʻeku holi ke fakatapui ʻeku moʻuí ki hotau Tokotaha-Fakatupú. Naʻá ku papitaiso ʻi ʻEpeleli 2003. Hili iá naʻá ku kamata ke fakafaingofuaʻi ʻeku moʻuí.

FOUNGA ʻO ʻEKU MAʻU ʻAONGÁ:

Ko ʻeku kaumeʻa mo Sihová ʻoku mahuʻinga taʻehanotatau. Kuó u maʻu moʻoni ʻa e nonga ʻi loto mo e fiefia ʻi heʻeku ʻiloʻi iá. Kuó u toe hokosia foki ʻa e fiefia lahi ʻi he feohi mo hoku kaungālotu moʻoni ki he ʻOtuá.

Ko ʻeku vivili ki he ʻiló ʻoku hokohoko atu hono fakalato ʻe he meʻa ʻoku ou ako ʻi he Tohi Tapú mo e ngaahi fakataha faka-Kalisitiané. ʻOku ou fiefia ʻi hono vahevahe ʻeku tuí ki he niʻihi kehé. Ko ʻeku ngāué ia, ko e ngāue ʻoku ou tokoniʻi moʻoni ai ʻa e kakaí, ke nau maʻu ʻa e moʻui lelei ange ʻi he taimí ni pea maʻu ʻa e ʻamanaki fakaofo ʻo e moʻui ʻi he māmani foʻoú. Talu mei Sune 2008, kuó u kau ki he ngāue fakafaifekau taimi-kakató, pea ʻoku ou fiefia mo fiemālie ange he taimí ni ʻi ha toe taimi ki muʻa. Kuó u maʻu ʻa e taumuʻa moʻoni ʻo e moʻuí, pea ʻi he meʻá ni ʻoku ou houngaʻia moʻoni kia Sihova.

• TAʻU FĀʻELEʻI: 1973

• FONUA TUPUʻANGA: ʻAOSITULIA

• HISITŌLIA: TOKOTAHA PELEPAʻANGA

KO HOKU KUOHILÍ:

Naʻá ku tupu hake ʻi he kiʻi kolo ko Braunau, ʻi ʻAositulia. Ko e feituʻu naʻe tuʻumālie pea hāhāmolofia ke ʻasi ai ha faihia. Ko hoku fāmilí naʻe Katolika pea naʻe ʻohake au ʻi he lotu ko iá.

Naʻe hoko ha meʻa ʻi heʻeku kei siʻí ʻo uesia lahi ai au. ʻI he 1984, ʻi heʻeku taʻu 11, ʻoku ou manatuʻi ʻeku vaʻinga soka mo ha taha hoku ngaahi kaungāmeʻa ofí. ʻI he efiafi pē ko iá, naʻá ne mate ʻi ha fakatuʻutāmaki ʻi ha meʻalele. Ko e mole hoku kaumeʻá naʻá ne uesia lahi moʻoni au. ʻI he laui taʻu hili ʻa e fakatuʻutāmakí, naʻá ku fifili pe ko e hā ʻoku hoko kiate kitautolu ʻi he taimi ʻoku tau mate aí.

ʻI heʻeku nofo mei he akó, naʻá ku ngāue fakaʻuhila. Neongo naʻá ku tōʻongaʻaki ʻa e pelepaʻangá pea peti ki ha ngaahi paʻanga lahi ʻaupito, naʻe ʻikai pē ke u faingataʻaʻia fakapaʻanga au. Naʻá ku toe fakamoleki foki ʻa e taimi lahi ʻi he sipotí pea manako ki he ngaahi fasi ngatūtuú. Ko e moʻuí ko e hulohula pē mo e tuli paati. Naʻá ku tuli ki he mālié, moʻui taʻetaau ka naʻá ku ongoʻi ko e koto ngeʻesi pē.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

ʻI he 1995, naʻe tukituki mai ʻi he matapaá ha Fakamoʻoni taʻumotuʻa peá ne ʻomai ha tohi ʻa ia naʻe fakamatala ai ki he tali ʻa e Tohi Tapú ki he fehuʻi, Ko e hā ʻoku hoko ʻi he maté? Ko e mate fakamamahi ʻa hoku kaungāmeʻa kei siʻí naʻá ne kei fakahohaʻasi pē au, ko ia naʻá ku toʻo ʻa e tohí. Naʻe ʻikai ngata pē ʻeku lau ʻa e vahe fekauʻaki mo e maté ka ko e tohí kakato!

Ko e meʻa naʻá ku laú naʻá ne tali ʻeku ngaahi fehuʻi fekauʻaki mo e maté. Ka naʻá ku ako ʻa e meʻa lahi ange. Koeʻuhi naʻe ʻohake au ko ha Katolika, ko ʻeku tuí naʻe fakatefito ʻia Sīsū. Kae kehe, ko ʻeku ako fakamātoato ʻa e Tohi Tapú naʻá ne tokoniʻi au ke u fakatupulekina ha kaumeʻa vāofi mo e Tamai ʻa Sīsuú, ko Sihova ko e ʻOtuá. Naʻá ku fakaofoʻia ke ʻiloʻi ko Sihova ʻoku ʻikai ke ne fufū hono tuʻunga totonú mo mamaʻo ka ʻokú ne fakaeʻa ʻa ia tonu ki he faʻahinga ʻoku nau kumi kiate iá. (Mātiu 7:​7-​11) Naʻá ku ako ko Sihova ʻoku ʻi ai ʻene ngaahi ongoʻi. Naʻá ku toe ako foki ʻokú ne fai maʻu pē ki heʻene leá. Naʻe taki atu ai au ke u mahuʻingaʻia loloto ʻi he ngaahi kikite Fakatohitapú pea ke sivisiviʻi ʻa e anga hono fakahoko iá. Ko e meʻa naʻá ku ʻiloʻí naʻe fakaivimālohiʻi ai ʻeku tui ki he ʻOtuá.

Naʻe vave ʻeku ʻiloʻi ko e Kau Fakamoʻoni pē ʻa Sihová naʻa nau mahuʻingaʻia moʻoni ʻi hono tokoniʻi ʻa e kakaí ke nau mahinoʻi ʻa e Tohi Tapú. Naʻá ku fakaʻilongaʻi ʻa e ngaahi konga Tohi Tapu naʻe lave ki ai ʻi he ʻū tohi ʻa e Kau Fakamoʻoní peá u vakai ki ai ʻi heʻeku Tohi Tapu Katoliká. Ko e lahi ange ʻeku fekumí, ko e lahi ange ia ʻeku ʻiloʻi kuó u maʻu ʻa e moʻoní.

Ko ʻeku ako ʻa e Tohi Tapú naʻá ku ʻiloʻi ai naʻe ʻamanekina mai ʻe Sihova ke u moʻui ʻo fakatatau ki heʻene ngaahi tuʻungá. ʻI heʻeku lau ʻa e ʻEfesō 4:​22-​24, naʻe lava ai ke u sio ki he fiemaʻu ke u huʻi atu hoku “angaʻitangata motuʻá,” ʻa ia naʻe fakafuo ʻe hoku “ʻalunga fakaeʻulungaanga ki muʻá” pea naʻe pau ke u “kofuʻaki ʻa e angaʻitangata foʻou ʻa ia naʻe fakatupu ʻo fakatatau ki he finangalo ʻo e ʻOtuá.” Ko ia naʻá ku siʻaki ʻeku founga moʻui taʻetāú. Naʻá ku toe sio foki ki he fiemaʻu ke tuku ʻa e pelepaʻangá, koeʻuhi ko e tōʻonga ko iá ʻokú ne fakaʻaiʻai ʻa e tuli ki he meʻa fakamatelié mo e mānumanú. (1 Kolinitō 6:​9, 10) Naʻá ku ʻiloʻi ke fai ʻa e ngaahi liliu ko iá, naʻe pau ke tuku ʻeku feohi mo hoku ngaahi kaungāmeʻa motuʻá pea kumi ki ha ngaahi kaungāmeʻa foʻou ʻa ia naʻa mau maʻu ʻa e tui tatau.

Naʻe faingataʻa ke fai ʻa e ngaahi liliu ko iá. Ka naʻe kamata ke u maʻu ʻa e fakatahá mo e Kau Fakamoʻoní ʻi he Fale Fakatahaʻangá pea kamata ke maʻu mo e ngaahi kaungāmeʻa foʻou ʻi he fakatahaʻanga fakalotofonuá. Naʻe hokohoko atu foki ʻeku ako fakamātoato ʻa e Tohi Tapú fakafoʻituitui. Ko e ngaahi sitepu ko iá naʻe taki atu ai ke u liliu ʻa e ngaahi fasi naʻá ku fanongo ki aí, feʻunuʻaki ʻeku ngaahi taumuʻa ʻi he moʻuí, pea fakamaʻa hoku fōtunga hāmaí. ʻI he 1995, naʻá ku papitaiso ko e taha ʻo e Kau Fakamoʻoni ʻa Sihová.

FOUNGA ʻO ʻEKU MAʻU ʻAONGÁ:

ʻOku ou maʻu he taimí ni ha vakai mafamafatatau ki he paʻangá mo e koloa fakamatelié. Ki muʻá naʻá ku faʻa ʻita tōlili, ka ko eni kuo siʻisiʻi ange ʻeku ʻitá. ʻOku ʻikai foki ke u toe loto-moʻua tōtuʻa ki he kahaʻú.

ʻOku ou fiefia ʻi he hoko ko ha konga ʻo ha kulupu fakavahaʻapuleʻanga ʻo e kakai ʻoku nau tauhi kia Sihova. ʻI honau haʻohaʻongá ʻoku ou sio ki he kakai ʻoku nau fāinga mo e ngaahi palopalema ka ʻoku nau kei tauhi faitōnunga pē ki he ʻOtuá. ʻOku ou fiefia lahi ʻi he taimí ni ʻi hono fakamoleki ʻa e kotoa hoku taimí mo e iví, ʻo ʻikai ke fakalato ʻeku ngaahi holí, ka ʻi he lotu kia Sihova pea fai ʻa e meʻa lelei maʻá e kakaí.

• TAʻU FĀʻELEʻI: 1963

• FONUA TUPUʻANGA: ʻINGILANI

• HISITŌLIA: TAʻEFIEMĀLIE ʻI HE MOʻUÍ

KO HOKU KUOHILÍ:

Naʻe fanauʻi au ʻi ʻIngilani, ka ʻi heʻeku taʻu fitú, naʻe hiki homau fāmilí ki ʻAositelēlia. Naʻa mau nofo ʻi he Matāfonua Koulá, ko ha feituʻu taki mamata ʻi Kuinisilani, ʻAositelēlia. Neongo naʻe ʻikai tuʻumālie homau fāmilí, naʻe kei maʻu pē ʻemau ngaahi fiemaʻú.

Neongo ʻa e tuʻunga fakafiemālie naʻe ʻohake ai aú, naʻe ʻikai pē ke u fiefia. Naʻá ku taʻefiemālie ʻi he moʻuí. Ko ʻeku tamaí ko ha tokotaha inu tōtuʻa. Naʻe ʻikai ke u fuʻu ʻofa ʻiate ia, koeʻuhí pē ko ʻene inú pea mo e anga ʻene fakafeangai ki heʻeku faʻeé. Ka naʻá ku toki ʻiloʻi ki mui ʻa e ngaahi meʻa naʻá ne hokosia ʻi heʻene sōtia ʻi Malaya, ʻo u toki mahinoʻi ai ʻa e ʻuhinga naʻá ne tōʻonga pehē aí.

Naʻe kamata ke u inu tōtuʻa lolotonga ʻeku ʻi he kolisí. ʻI heʻeku taʻu 16, naʻá ku nofo mei he akó peá u hū ʻo sōtia. Naʻe kamata ke u ʻahiʻahiʻi ʻa e faitoʻo kona tapú pea naʻe maʻunimā au ʻe he tapaká. Naʻe hoko foki ʻa e ʻolokaholó ko ha fakanonga kiate au. Naʻá ku ʻalu mei he inu tōtuʻa ʻi he fakaʻosinga uiké ki he inu ʻi he ʻaho kotoa pē.

ʻI heʻeku taʻu hongofulu tupu lahí pea mo ʻeku taʻu 20 tupu siʻí, naʻe kamata ke u fehuʻia ʻa e ʻi ai ʻa e ʻOtuá. ‘Kapau ʻoku ʻi ai moʻoni ha ʻOtua,’ ko ʻeku fakaʻuhingá ia, ‘ko e hā ʻokú ne fakaʻatā ai ʻa e kakaí ke nau faingataʻaʻia pea maté?’ Naʻe aʻu ʻo u hiki ʻa e maau ʻo tukuakiʻi ʻa e ʻOtuá ki he kotoa ʻo e fulikivanu ʻi he māmaní.

Naʻá ku mavahe mei he sōtiá ʻi hoku taʻu 23. Hili iá, naʻá ku fai ʻa e ngaahi ngāue kehekehe pea aʻu ʻo u folau ki muli ʻi ha taʻu ʻe taha, ka naʻe halaʻatā ha meʻa ke ne fakanonga ʻeku loto-mafasiá. Naʻe ʻikai haʻaku holi ʻe taha ke fokotuʻu ha ngaahi taumuʻa pe aʻusia ha meʻa. Naʻe ʻikai pē ha meʻa ia ʻe fakamānako kiate au. Ko e taumuʻa ʻo hono maʻu ha ʻapi, maʻu ha ngāue lelei, pea mo ha hiki lakangá naʻe hā ngali taʻeʻuhinga kotoa ia. Ko e meʻa pē naʻe “fakanonga” kiate aú ko e inu ʻolokaholó mo e fanongo ki he ngaahi fasí.

ʻOku ou manatu ki he mōmeniti tofu pē naʻá ku maʻu ai ʻa e holi mālohi ke maʻu ha taumuʻa ʻi he moʻuí. Naʻá ku ʻi Pōlani, ʻo ʻaʻahi ki he kemi fakamamahi ʻiloa ʻi Auschwitz. Naʻá ku lau fekauʻaki mo e ngaahi anga-fakamamahi naʻe fakahoko aí. Ka ʻi heʻeku ʻi ai tonú pea vakai ki he lahi ʻo e kemí, naʻe ongo moʻoni ia kiate au. Naʻe ʻikai lava ke u makupusi ʻa e malava ke anga-fakamamahi peheʻi fau ha tangata ki ha tangata. ʻOku ou manatuʻi ʻeku lue takai ʻi he kemí mo e loʻimataʻia, ʻo pehē, ‘Ko e hā hono ʻuhingá?’

FOUNGA HONO LILIU ʻE HE TOHI TAPÚ ʻEKU MOʻUÍ:

ʻI he 1993, ʻi heʻeku foki mei mulí, naʻe kamata ke u lau ʻa e Tohi Tapú ʻi he fekumi ki he talí. Taimi nounou mei ai, naʻe tukituki mai ha ongo Fakamoʻoni ʻa Sihova ʻi hoku matapaá pea fakaafeʻi au ki ha fakataha-lahi naʻe fai ʻi ha sitētiume ofi mai. Naʻá ku ʻalu ki ai.

Naʻá ku ʻosi ʻalu ki he sitētiume ko iá ʻi ha ngaahi māhina ki muʻa ki ha feʻauhi, ka naʻe faikehekehe lahi ia mo e fakataha-lahi ko ení. Ko e Kau Fakamoʻoní naʻa nau anga-lelei mo teunga maau, pea ko ʻenau fānaú naʻa nau talangofua. Pea naʻá ku ʻohovale ʻi he meʻa naʻá ku sio ki ai ʻi he kai hoʻataá. Ko e laui ngeau ʻo e Kau Fakamoʻoni naʻa nau kai ʻi he malaʻe vaʻingá, ka ʻi heʻenau foki ki honau nofoʻangá, naʻe ʻikai ke u sio ki ha laʻi veve ʻe taha ʻi he malaʻé! Hiliō he meʻa kotoa, ko e kakai ko ení naʻe hā ngali naʻa nau ongoʻi fiemālie mo nonga​—ko ha meʻa naʻe talu ʻeku fakaʻamua. ʻOku ʻikai ke u manatuʻi ʻe au ha meʻa mei he ngaahi malanga naʻe fakahoko ʻi he ʻaho ko iá, ka ko e tōʻonga ʻa e Kau Fakamoʻoní naʻe maongo tuʻuloa kiate au.

ʻI he efiafi ko iá, naʻá ku fakakaukau ki hoku kāsini naʻá ne lau ʻa e Tohi Tapú pea ako ki he ngaahi lotu kehé. ʻI he ngaahi taʻu ki muʻá, naʻá ne tala mai naʻe pehē ʻe Sīsū ʻe lava ke ke ʻiloʻi ʻa e lotu moʻoní ʻi hono fuá. (Mātiu 7:​15-​20) Naʻá ku fakakaukau ʻoku totonu ke u vakaiʻi ʻa e meʻa ʻokú ne ʻai ʻa e Kau Fakamoʻoní ke nau mātuʻaki kehé. Ko e fuofua taimi ia ʻi heʻeku moʻuí ke u ongoʻi fakatuʻamelie mo ʻi ai ha ʻamanaki.

ʻI he uike hokó, naʻe toe foki mai ʻa e ongo Fakamoʻoni naʻá na fakaafeʻi au ki he fakataha-lahí. Naʻá na tuʻuaki mai ha ako Tohi Tapu ʻa ia naʻá ku tali. Naʻe kamata foki ke u maʻu ʻa e ngaahi fakataha faka-Kalisitiané mo kinaua.

ʻI heʻeku ako ʻa e Tohi Tapú, naʻe liliu fakaʻaufuli ai ʻa e anga ʻeku vakai ki he ʻOtuá. Naʻá ku ʻiloʻi naʻe ʻikai ko ia naʻá ne fakatupunga ʻa e fulikivanú mo e faingataʻaʻiá pea ʻokú ne mamahi ʻi he faikovi ʻa e kakaí. (Sēnesi 6:6; Saame 78:40, 41) Naʻá ku fakapapauʻi ke feinga ke ʻoua ʻaupito naʻá ku fakalotomamahiʻi ʻa Sihova. Naʻá ku loto ke ʻai hono lotó ke fiefia. (Palōveepi 27:11) Naʻá ku tuku ʻeku inu tōtuʻá mo e ifi tapaká, pea siʻaki ʻa e moʻui taʻetāú. ʻI Maʻasi 1994, naʻá ku papitaiso ko e taha ʻo e Kau Fakamoʻoni ʻa Sihová.

FOUNGA ʻO ʻEKU MAʻU ʻAONGÁ:

ʻOku ou fiefia mo fiemālie moʻoni. ʻOku ʻikai ke u toe hanga ki he ʻolokaholó ko ha fakaleleiʻanga ki heʻeku ngaahi palopalemá. ʻI hono kehé, kuó u ako ke lī ʻeku kavengá kia Sihova.​—Saame 55:22.

ʻI he taʻu ʻe hongofulu kuo maliu atú, kuó u mali mo ha Fakamoʻoni hoihoifua ko Karen, pea ʻoku ʻi ai mo hoku ʻofefine-ua ko Nella. ʻOku mau fiefia fakataha ʻi hono fakamoleki ʻa e lahi taha homau taimí ʻi he ngāue fakafaifekau faka-Kalisitiané, ʻo tokoniʻi ʻa e kakaí ke nau ako ʻa e moʻoni fekauʻaki mo e ʻOtuá. Mālō ia pea faifai ange ʻo ʻi ai ʻa e taumuʻa ʻeku moʻuí.