ʻOku ʻI Ai ha ʻOtua ʻOku Tokanga Mai?

1, 2. (a) Ko e ngaahi fehuʻi ʻoku ʻomai ʻi he palakalafi ʻuluaki ko e niʻihi ia kuo ke ʻekeʻi? (e) Ko e hā e ngaahi tuʻunga ʻoku ne ueʻi ʻa e kakai ke nau ʻekea e ngaahi fehuʻi ni?

 KAPAU ʻoku moʻui ʻa e ʻOtua, ko e hā kuo ne kei tuku ai ʻa e ngaahi meʻa fakamanavahē ke hoko ki he kakai ʻi he tukuʻau mai ʻo e hisitolia? Kapau ʻoku ne matuʻaki tokanga mai kiate kitautolu, ko e hā ʻoku ne kei fakangofua ai ʻa e kovi mo e faingataʻa ke hoko atu?

² Ko e faʻahinga he feituʻu kotoa pe ʻoku nau fakakaukau ki ai ʻoku nau fehuʻia ʻa e ngaahi fehuʻi ni. Pea ʻoku ʻi ai hono ʻuhinga lelei, koeʻuhi he kuo laui senituli ʻa e feʻao ʻa e tangata mo e faingataʻaʻia lahi tupu mei he ngaahi tau fakalilifu, nounou fakameʻatokoni, masiva, faihia mo e mahamahaki. Pehē foki ki hono toe fakatupu ʻe he fakamaau taʻe totonu mo e fakamalohi ʻa e loto mamahi. Ko e fakatuʻutamaki hangē ko e ngaahi tāfea mo e ngaahi mofuike. ʻI heʻene hoko maʻu pe, ʻoku faingataʻaʻia ai pe ʻa e kakai taʻehalaia taʻe ʻi ai haʻanau kovi. ʻOku fakamoʻoniʻi ʻe he ngaahi meʻa ni kotoa ʻoku ʻikai tokanga mai ʻa e ʻOtua ia ki he meʻa ʻoku hoko mai kia kitautolu? ʻOku ʻi ai ha toe ʻamanaki moʻoni ki ha māmani e lelei ange, ha māmani ʻe malava ke tau moʻui fiefia ai he māmani, ʻo ʻataa mei he ngaahi faingataʻa kotoa ko ʻeni?

3. Ko e hā hono ʻuhinga ʻoku taau ai ke tau malava ke maʻu ʻa e ngaahi tali ki he ngaahi fehuʻi ni?

³ Ko e ngaahi fehuʻi pehē ni ʻoku fiemaʻu ha ngaahi tali moʻoni, ha ngaahi tali fakafiemalie. Ka ʻoku ʻikai pe ha tali moʻoni, pe fakafiemalie, ke fakahā, “Ko e finangalo pe ia ʻo e ʻOtua ke tau faingataʻaʻia,” pe, “Ko e ngaahi meʻa ia ʻoku ʻikai ke tau malava mahinoʻi.” Kapau naʻe ngaohi ʻe he ʻOtua ʻa e ʻuniveesi fakaofo ni ʻi he fokotuʻutuʻu fakaofo pehē, kuo pau pe ke ʻi ai ʻene ʻuhinga lelei ki he maveuveu ʻa e faʻahinga ʻo e tangata. Pea ʻe ʻikai nai ke tokanga mai ʻa e Tokotaha Fakatupu ki heʻene tangata naʻa ne ngaohi ke fakahā mai kia kitautolu ʻa e ʻuhinga kuo ne kei fakangofua ai ʻa e kovi? ʻE ʻikai totonu nai ke fakaleleiʻi ʻa e ngaahi tuʻunga kovi ni ʻi ha taimi kuo ne tukupā kapau kuo ne maʻu  ʻa e mafai ke fai ia? Ko ha tamai ʻofa te ne fai ia ki heʻene fanau kapau te ne malava. Ko ia ai ko e malohi taha, poto taha, te ne fai pehē ʻa e tokotaha Fakatupu ki heʻene fanau fakaemāmani.

KO HAI TE NE TALI LELEI TAHA?

4. Ko hai ʻoku ʻi he tuʻunga lelei taha ke fakahā kiate kitautolu ʻa e ʻuhinga ʻoku kei fakangofua ai ʻe he ʻOtua ʻa e kovi?

⁴ Ko hai te ne tali lelei taha ʻa e ngaahi fehuʻi kau ki hono fakangofua ʻe he ʻOtua ʻa e kovi? Sai, kapau kuo talatalaakiʻi koe fekauʻaki mo ha kovi, te ke fiemaʻu ʻa e kakai ke nau fanongo pe ki he meʻa kuo lea ki ai ʻa e kakai kehe fekauʻaki mo e meʻa ko ia? Pe te ke fiemaʻu ke ke lea koeʻuhi ko koe ke maʻa ʻa e meʻa ko ia ki he ʻatamai ʻo e faʻahinga ʻoku matuʻaki fie ʻilo ki ai? Ko ia ʻoku tukuakiʻi ʻa e ʻOtua ʻi hono fakangofua ʻo e kovi. Koeʻuhi ko ia ʻoku ne ʻafioʻi lelei taha ʻa e ʻuhinga ʻoku ne kei fakangofua ai ʻa e meʻa ko ia, meʻa ni ʻe ʻikai totonu ke tuku pe kiate ia ke folofola maʻa na? Ko e sio ki he ngaahi tali mei he tangata ʻe ʻikai ʻaupito fakafiemalie, koeʻuhi ʻoku fepaki maʻu pe ʻenau ngaahi fakakaukau fekauʻaki mo e ngaahi meʻa ni.

5. ʻOku totonu ke fai ha tui ko e ʻOtua naʻa ne faʻu ʻa e Tohitapu? (2 Pita 1:21; Hapakuke 2:2)

⁵ Ko e fē meʻa ʻoku tokonaki mai ai ʻe he ʻOtua ʻa e ngaahi tali? ʻOku taha mātē pē ʻa e tupuʻanga ʻoku taukaveʻi ai ʻa e mafimafi ʻo e tokotaha Fakatupu ke fakahā mai ia kia kitautolu ʻa e ʻuhinga mo e ngaahi meʻa kuo hoko. Ko e tupuʻanga ko ia ko e Tohitapu, ʻa ia ʻoku pehē: “Ko e potu Folofola kotoa pe ne fakamanava mei he ʻOtua.” (2 Timote 3:16) a ʻOku totonu ke ʻoua ʻe fai ha ofo ʻi he meʻa ni, koeʻuhi kapau ʻoku maʻu ʻe he ʻOtua ʻa e mafimafi ke fakatupu ʻa e ʻuniveesi fakaofo ni, tā te ne malava ke hoko ko e tokotaha faʻu tohi. Ko e faʻahinga ʻo e tangata ʻoku ne malava noa pē ke fakaʻasi mai ʻa e ngaahi ongo mo e ngaahi fakakaukau, pehē ki he ngaahi fakatātā, ʻi he ngaahi peau taʻe hāmai ʻo e ongo ki hoʻo letiō pe televisone. Ko ia ʻe ʻikai hoko ia ko ha ngāue lahi ki he ʻOtua mafimafiʻia ke fakaʻasi ʻene ngaahi  fakakaukau ki he kau tangata tohi tui malohi pea ʻafio ki ai ke nau hiki totonu kotoa ʻa e ngaahi meʻa ni. Ko hono ʻuhinga ia ne lea ʻaki ai ʻe he ʻapositolo ko Paula mo e falala moʻoni: “ʻI hoʻo mou tali ʻa e folofola ongo telinga-ʻa ia naʻe fakafofonga ʻiate kimautolu, ka ko e meʻa ʻa e ʻOtua-fakafetaʻi naʻe ʻikai ko e lea ʻa e tangata naʻa mou maʻu, ka ko e folofola ʻa e ʻOtua, he ko ia matē pe.”​—1 Tesalonaika 2:13.

6. Ko e hā hono fuoloa ʻo e hisitolia ʻo e Tohitapu, pea ko e hā e fakamatala ʻoku ne tokonaki mai maʻatautolu? (Luke 1:​1-4; fakatokangaʻi mo Luke 3:​23-38)

⁶ Mahalo kuo teʻeki te ke sio koe ki he Tohitapu. Ko ia ʻe mahuʻinga ke ke ʻiloʻi ʻoku ʻi ai ʻa e kakato taha, ʻo e fakamatala fakahisitolia ki he moʻui ʻi he ʻaho ni. Ko hono moʻoni, ko ha tangata tohi hisitolia he ʻuluaki senituli, ko Luke, ko ha toketā fakafaitoʻo, naʻa ne malava ke fakatotoloʻi ʻa e hokohoko ʻo e tupuʻanga ʻo Sisu ʻo Nasaleti he taʻu ʻe fā afe ʻo e hisitolia, ʻo māmālie, mei he hingoa ki he hingoa, ʻo aʻu kotoa ki he ʻuluaki tangata. Koeʻuhi ko e lave ʻa e Tohitapu ki he fuofua kamataʻanga ʻo e moʻui ʻa e tangata, ʻoku ne fakahā mai ai kia kitautolu ʻa e tokotaha ke tukuakiʻi ki ai ʻa e kovi, ʻuhinga ne fakangofua ai ʻe he ʻOtua, mo e founga ʻe toe fakaleleiʻi ʻaki ʻa e meʻa ko ia.

ʻE TUKUAKIʻI ʻA E ʻOTUA?

7. ʻI hono fai ha ngaahi hala, ko hai ʻoku totonu ke tukuakiʻi?

⁷ Kapau ne fai ʻe ha taha kehe ha hia, ʻe anga fēfē hoʻo ongoʻi kapau ʻe tukuakiʻi koe ia ki ai? Te ke fakakaukau ʻoku taʻe totonu ʻaupito ʻa e meʻa ni. He ko e fiemaʻu ʻa e fakamaau ke tautea ʻa e halaia pea ke fakaʻataa ʻa e tonuhia mei hono tukuakiʻi. Kapau ʻe taʻetokangaʻi ʻe ha tokotaha fakaʻuli meʻalele ha fakaʻilonga ʻi he manga hala pea hoko ki ai ha fakatuʻutamaki, ʻoku ʻikai ko e kovi ia ʻa e lao. Kapau ʻe faʻa kai ha taha pea ne puke ai tupu mei heʻene kai lahi, ʻoku ʻikai ko ha kovi ia ʻa e tokotaha faama ʻa ia naʻa ne tō ʻa e meʻakai. Ka, neongo hono akonakiʻi lelei, ha kiʻi tangata ʻoku ne liʻaki ʻa ʻapi, taʻetokaʻi ʻa e ngaahi faleʻi lelei ʻene tamai pea ne tō ai ki ha faingataʻa, heʻikai ke tukuakiʻi ai ʻa  e tamai ia. Ko e hā ke tukuakiʻi ai ʻa e Tamai fakahevani ko e ʻOtua, ʻi he faihala ʻa e faʻahinga ʻo e tangata? Meʻa ni ʻoku ʻikai totonu ke fai ʻa e tukuakiʻi ki he feituʻu naʻe tupu mei ai ʻa e meʻa ko ia​—ki he faʻahi halaia?

8. Ko e hā ha ʻuhinga fehangahangai ʻoku hā kapau ʻoku tau tukuakiʻi ʻa e ʻOtua ki he meʻa ʻoku kovi?

 ⁸ Pehē foki, ʻoku ʻi ai mo e meʻa ke fai ki ai ʻa e fakakaukau. Kapau ʻoku tau tukuakiʻi ʻa e ʻOtua ki he  ngaahi meʻa ni hangē ko e fiekaia mei he nounou fakameʻatokoni, ko hai te tau fakaongoongo leleiʻi ki he ngaahi konga fonua mahu mo e ngaahi ngoueʻanga ʻakaufua ʻa ia ʻoku ne ʻomai ʻa e ngaahi ututaʻu mahu tafea ʻi he ngaahi fonua lahi? Kapau ʻoku tukuakiʻi ʻa e ʻOtua ki he mahamahaki, ko hai te tau fakaongoongo leleiʻi ki he ngaahi founga fakamoʻui fakaofo ʻo e sino? Kapau ʻoku tau tukuakiʻi ʻa e ʻOtua ki he ngaahi feituʻu masiva ʻi he kolo, ko hai te tau fakaongoongo leleiʻi ki he ngaahi moʻunga matamatalelei, ngaahi anovai maʻa, ngaahi matalaʻiʻakau fakaʻofoʻofa mo e ngaahi ʻakau? ʻOku mahino, kapau ʻoku tau tukuakiʻi ʻa e ʻOtua ki he ngaahi faingataʻa ʻi he māmani pea hili ia pea toe fakaongoongo leleiʻi pe ia koeʻuhi ko e ngaahi meʻa lelei ʻi he māmani, ʻoku fepakituʻu. Ko e ʻOtua ʻofa heʻikai te ne poupouʻi fakatouʻosi ʻa e lelei mo e kovi ʻi he taimi tatau pē.

9. ʻOku totonu ke pehē ʻoku mate ʻa e ʻOtua koeʻuhi pe ko e faihala ʻa e tangata? (Aisea 45:18)

⁹ Ko e pehē ko ia ʻoku ʻikai moʻui ʻa e ʻOtua ʻoku tupu ai pe ʻa e palopalema ʻo kovi ange. ʻO ʻi ai foki mo e tui ko e māmani ia mo hono ngaahi faʻunga ki he moʻui naʻe hoko noa mai pe ia ʻo taʻetokaʻi ai ʻa e ngaahi tefitoʻi moʻoni. Ko hono moʻoni ko e māmani kuo fakanaunauʻi lelei mamaʻo ange ia ke tokoniʻi mo fakatolonga ʻa e moʻui ʻi ha faʻahinga fale pe, he ko e fale kotoa pe kuo pau pe ne ʻi ai hano tokotaha tā mape poto mo hono tufunga foki. Fēfē hake ai ʻa e palanite fakaʻofoʻofa ni mo hono ngaahi faʻunga tokoni mo fakatolonga ki he moʻui hangē ko e ʻea, fonua mo e vai? ʻOku fakahā totonu mai ʻe he Tohitapu: “Seuke ʻilonga ha ʻapi, kuo pau naʻe langa ʻe ha taha; pea ko ia naʻa ne langa ʻa e meʻa kotoa pe ko e ʻOtua.” (Hepelu 3:4) Moʻoni, ʻoku pehē ʻe he kakai ʻe niʻihi ko e ʻuhinga ʻoku faihala ai ʻa e tangata he kuo mate ʻa e ʻOtua. Kae kehe, ʻoku tatau pe ʻeni mo ha pehē he fai kovi ʻa e kakai ʻoku nofo ʻi ha ngaahi fale koeʻuhi he naʻe ʻikai ha taha tā mape ia pe ko ha tufunga ʻo e ngaahi fale ko ia. ʻE toe tatau pē mo ha pehē koeʻuhi ʻoku faihala ha taha naʻe ʻikai haʻane tamai.

10. Ko fē feituʻu kuo pau ke toka ki ai ʻa e konga lahi ʻo e tukuakiʻi ʻo e kovi?

¹⁰ Ko hai, ʻe tukuakiʻi ki he ngaahi meʻa kovi fakamanavahē  kuo hoko ki he famili ʻo e tangata? Ko e konga lahi ʻo e tukuakiʻi kuo pau ke fai pe ia ki he kakai pe. Ko e talangataʻa mo e siva ʻa e ʻamanaki ʻoku ne fakatupunga ʻa e faihia. Ko e polepole mo e siokita ʻa e tangata ʻoku hoko ai ʻa e maumau ʻo e nofo mali, tāufehiʻa mo e laulanu fakaematakali. Ko e hala mo e taʻe tokanga ʻa e tangata ʻoku tupu ai ʻa e ʻuli mo e anga taʻetaau. Ko e lotofieʻeiki mo e loto kē ʻa e tangata ʻoku tupu ai ʻa e ngaahi tau; pea ʻi he kui ʻa e ngaahi puleʻanga fakakatoa ʻo muimui he kau taki fakapolitikale ki he ngaahi tau ko ʻeni, pea kuo pau leva ke nau kau ʻi hono tukuakiʻi ki he faingataʻa. Ko e fiekaia mo e masiva ʻoku hoko tupu mei he taʻe tokanga mo e manumanu ʻa e tangata. Fakakaukau ange: ko e māmani he taimi ni kuo nau fakamoleki ʻo laka hake he paʻanga ʻe $200 piliona he taʻu taki taha ki he ngaahi naunau tau. Kapau ʻe fakamoleki  totonu kotoa ʻeni ki he tō pea mo hono tufaki tatau ʻo e meʻakai pea fetongi mo e ngaahi fale ʻoku motuʻa mo kovi, fakakaukau ange ki he meʻa ʻoku malava ke fai ʻaki!

11. Koeʻuhi ko e lotu ʻa e kau faifekau maʻa e kau tau honau ngaahi puleʻanga, ʻe tukuakiʻi ʻa e ʻOtua ki he ngaahi tau ʻa e kau tau ko ia? (Aisea 1:15; Palovepi 28:9)

¹¹ Heʻikai ke tukuakiʻi ʻa e ʻOtua ki he fai meʻa hala ʻi he hingoa ʻo e lotu. Hangē ko ʻeni, ko e lotu ʻa e kau faifekau ʻo kole ʻa e tapuaki ʻa e ʻOtua ki he ngaahi tau ʻo honau ngaahi puleʻanga. Ko ia ʻoku nau fai maʻu pe ʻa e meʻa ni, neongo ʻoku ʻi he ongo tafaʻaki fehangahangai, ʻo tamateʻi pe ʻe he kau sotia honau faʻahinga he faʻahi ʻe taha ʻi he lotu tatau pe! Heʻikai malava ke tukuakiʻi ʻa e ʻOtua ia, koeʻuhi he ʻoku ne taʻofi ʻa e meʻa ʻoku nau fai, pea ne pehē ko e faʻahinga ʻoku nau tauhi moʻoni kiate ia kuo pau ke nau ‘feʻofaʻaki.’ (Sione 13:​34, 35) Kapau ʻoku ʻikai ke nau maʻu ʻa e ʻofa ko ʻeni, ʻoku folofola mai leva ʻe he ʻOtua ʻoku nau “hangē ko Keini ʻa ia ko e tupu mei he fili, ʻo ne tamateʻi hono tokoua.” (1 Sione 3:​10-12) Ko e tamateʻi ʻo e kakai ʻi he huafa ʻo e ʻOtua, pe ʻoku fai ʻi he lolotonga ʻo ha fakatotolo fakapuleʻanga ki he ʻuhinga ʻo ha angatuʻu pe fai he lolotonga ʻo e tau, ʻoku tatau pe ia mo e ngāue fuoloa ki hono feilaulau ʻaki ʻa e fanau ki he ngaahi ʻotua loi, ʻa e meʻa ʻoku pehē ʻe he ʻOtua Mafimafiʻia naʻe ‘ʻikai te ne tuʻutuʻuni pea naʻe ʻikai ake ia ʻi hono loto.’​—Selemaia 7:31.

12. Ko e hā hono ʻuhinga ʻoku ui ʻi he Tohitapu ʻa e kau faifekau fakalotu ko e “kau malualoi”? (Mātiu 15:​7-9)

¹² Ko e kaunoa fakapolitikale ʻa e kau faifekau, poupouʻi ʻa e ngaahi tau, mo e ngaahi akonaki loi ʻo pehē ko e ʻOtua ʻoku tupu ai ʻa e faingataʻa ki he māmani, pe ko e pehē ko ia ʻoku ne tutu ʻa e kakai ʻi he afi kakaha taʻengata ko heli, ʻoku taukovi ʻeni ki he faʻahinga faʻa fakakaukau, mo e ʻOtua. Ko e kau taki lotu ko ia ʻoku nau akoʻi mo fai ʻa e ngaahi meʻa ko e fakafepaki ki he ʻOtua ʻoku ui kinautolu ko e “kau malualoi” ʻi he Folofola ʻa e ʻOtua, ʻa ia ʻoku toe pehē ai kia kinautolu: “He ʻoku mou tatau tofu pe mo e ngaahi fonualoto kuo vali hina, ʻa ia ʻoku matamatalelei ʻi tuʻa nai, ka ʻi loto ʻoku fokotuʻuniu ai ʻa e hui ʻo e pekia mo e ngaahi fakalielia kehekehe. Pehe ʻakimoutolu foki; ʻi tuʻa ʻoku mou ha ki he kakai ko e kau maʻoniʻoni, ka ʻi loto ʻoku mou pito ʻi  he maʻoniʻoni loi mo e maumau lao.” (Mātiu 23:​27, 28) Ko hono moʻoni, naʻe pehē ʻe Sisu ki he kau taki lotu malualoi: “Ko e tamai kuo mou tupu mei ai ko e Tevolo.”​—Sione 8:44.

13. (a) ʻE tukuakiʻi ʻa e ʻOtua ʻi he faihala ʻa e tangata, pehē ki he kau taki lotu? (e) Ko ia ai, ko e hā mo ha toe fehuʻi ke ʻeke?

¹³ ʻIkai, heʻikai ke tukuakiʻi ʻa e ʻOtua ia ki he ngaahi kovi ʻoku fai pe ʻe he tangata. Pea heʻikai tukuakiʻi ia ki he ngaahi tapuaki hala kuo fai ʻe he kau faifekau ʻa ia ʻoku taku ʻoku nau tauhi ʻa e ʻOtua kae hili ia ʻoku ʻikai ke nau lea ʻaki ʻa e moʻoni pe fai ki ai. Sai, ka, naʻe ʻi ai ha meʻa e hala fekauʻaki mo e founga naʻe ngaohi ai ʻe he ʻOtua ʻa e faʻahinga ʻo e tangata? Naʻa ne tuku ki he faʻahinga ʻo e tangata ha kamataʻanga kovi?

KO E KAMATAʻANGA HAOHAOA

14. Fakamatalaʻi ʻa e kamataʻanga ne tuku ʻe he ʻOtua ki he ʻuluaki ongo matuʻa? (Senesi 1:​26-31; 2:​7-9, 15)

¹⁴ ʻI he lau ʻe ha taha ʻa e ongo ʻuluaki vahe ʻo e tohi Senesi 1-2, ʻoku hā mahino ʻi he taimi naʻe ngaohi ai ʻe he ʻOtua ʻa e tangata mo e fefine naʻa ne tuku kinaua ʻi ha kamataʻanga haohaoa. Naʻa ne ngaohi kinaua ʻi he sino mo e ʻatamai haohaoa, ke ʻoua naʻa uesia kinaua ʻe he mahamahaki mo e mate. Ko hona ʻapi naʻe fakaʻofoʻofa, hangē ha ngoue matalaʻiʻakau fakaʻofoʻofa, konga fonua lahi mo maʻuiʻui pea pehē ki he ngaahi ʻakau fua. Naʻe ʻikai siva ai ha meʻa. Ko hono fakakatoa, naʻe mahu ʻaupito. Pehē foki, ne tuku ʻe he ʻOtua ki heʻetau ʻuluaki matuʻa ha ngāue mahuʻinga mo e ngaahi taumuʻa fakalanga lotofiefia. Naʻa ne tuʻutuʻuni kia kinaua ke fakalahi ʻa e ngaahi tuʻunga fakapalataisi ko ia ki māmani katoa. ʻI he ʻalu ʻa e taimi ʻe tokoni kia kinaua he meʻa ni ha fanau haohaoa tokolahi te na fakatupu. Ko ia, ke hoko ʻa e famili ʻo e tangata ko ha kakai haohaoa, ʻo nofoʻi ʻa e palataisi fakamāmani, pea moʻui fiefia ʻo taʻengata, pea moʻulaloa foki ki ai mo e fanga manu.

15. Ko e hā hono ʻuhinga ʻo e tangata haohaoa, pea ko e hā e meʻa ʻoku ʻikai ʻuhinga ki ai?

¹⁵ Ka ko e hā ne tafoki ai ʻa e ngaahi meʻa ni ʻo fakatuʻutamaki? Naʻe hoko ia koeʻuhi naʻe ʻikai fakatupu ʻe he ʻOtua ia ʻa e tangata ʻi he haohaoa he kamataʻanga? ʻIkai,  ʻoku ʻikai ko e meʻa ia, koeʻuhi ʻoku pehē ʻe Teutalonome 32:4 ko e ʻOtua ʻoku, “Haohaoa ʻene ngāue.” Kae kehe, ko e tangata haohaoa naʻe ʻikai ʻuhinga ia ne ʻilo ʻe he ʻuluaki ongo matuʻa ʻa e meʻa kotoa pe, pe malava ke fai ʻa e meʻa kotoa pe, pe taʻe malava ke fai ha meʻa ʻoku hala. Naʻa mo e ngaahi meʻa moʻui haohaoa ʻoku ʻi ai honau ngaahi fakangatangata. Hangē ko ʻeni, ʻoku ʻi ai ʻa e ngaahi fakangatangata fakaesino. Kapau ʻe ʻikai ke na kai meʻakai inu vai pea mānava ʻaki ʻa e ʻea te na mate. Pe ko haʻana fai ha meʻa ke maumauʻi ai ʻa e lao ʻo e kalāvite ʻaki ha puna mei ha feituʻu maʻolunga pea pehē te na taʻe lavea. ʻIkai ke ngata ai, naʻa na maʻu mo e ngaahi fakaengatangata fakaeʻatamai. ʻO hā mahino, naʻe lahi ʻa e meʻa ke ako ʻe ʻAtama mo ʻIvi, koeʻuhi naʻe ʻikai ke na taukei. Ka neongo e lahi e meʻa te na ʻilo, heʻikai ke lahi ia he ʻilo ʻo hona tokotaha Fakatupu. Ko ia, neongo ʻena haohaoa, ka naʻa na ngata pe he siakale ʻo e tangata. Ko hono ʻai mahino ʻo e haohaoa naʻe ʻuhinga pe naʻa na kakato ʻo ʻikai ha mele ʻi hona faʻunga fakaesino mo e fakaeʻatamai.

16. ʻI loto he ngaahi fakangatangata fē naʻe vaheʻi ke ngāueʻi lelei taha ai ʻa e tangata? (1 Pita 2:16)

¹⁶ ʻIkai ke ngata ai, naʻe ngaohi ʻe he ʻOtua ʻa e tangata ke ngāue angatonu tauʻataina, ʻo ʻikai tataki ʻaki pe ʻa e ʻilo fakaenatula, hangē ko ia ʻoku ʻi he fanga manu. Pea ko hono moʻoni ʻoku ke mahuʻingaʻia ʻi he faʻahinga tauʻataina ni. ʻE ʻikai te ke fiemaʻu ha taha ke ne fai tuʻutuʻuni kia koe, he momeniti kotoa ʻi hoʻo moʻui, ki ha meʻa ʻoku totonu ke ke fai. Kae kehe, ko e tauʻataina ko ia naʻe ʻikai maʻataʻatā pe, ke pehē ne taʻe ʻi ai ha ngaahi fakangatangata, ka naʻe pau pe ke ʻi ai hono felaveʻi. Naʻe pau ke fai ia ʻi loto he ngaahi fakangatangata ʻo e ngaahi lao ʻa e ʻOtua. Ko e ngaahi lao lelei ko ʻeni ne siʻi pe pea faingofua, ke ne fakataumuʻa pe ke maʻu fakakatoa ʻe he famili ʻo e tangata ʻa e fiefia lahi taha. Ne fakahāhāʻi ʻa e ʻofa ʻa e ʻOtua ʻi heʻene folofola kia kinautolu ke nau tauhi ʻene lao, koeʻuhi naʻa ne ʻafioʻi ko e ʻapasia ki he ngaahi lao ko ia te ne ʻomai kia kinautolu ʻa e meʻa ʻe ʻaonga taʻengata. Ko e taʻe ʻapasia ki he ʻOtua mo ʻene lao te ne uesia ʻenau moʻui fiefia. ʻE ʻikai te ne ʻomai ha meʻa lelei. Ko hono moʻoni, te ne ʻomai ʻa e fakatuʻutamaki,  koeʻuhi naʻe fakatokanga ʻe he ʻOtua kia ʻAtama mo ʻIvi kapau te na liʻaki ia kuo pau ke na “mate moʻoni.” (Senesi 2:17) Ko ia ke kei maʻu ʻa e moʻui, naʻe ʻikai fiemaʻu pe ke ngata heʻena kai ʻa e meʻakai, inu e vai mo mānava ʻaki ʻa e ʻea, ka ke tataki kinaua ʻe he ʻOtua mo ʻene ngaahi lao.

17. Ko e hā mo e toe ʻuhinga mahuʻinga ki he ʻuhinga ʻoku kei fiemaʻu ai ʻa e tangata ke fakafalala ki he ʻOtua? (Sāme 146:3; Selemaia 17:​5-9)

¹⁷ ʻOku toe ʻi ai mo e ʻuhinga matuʻaki mahuʻinga heni ʻe taha ki he ʻuhinga ne fiemaʻu ai ʻetau ʻuluaki ongo matuʻa ke kei fakafalala ki he ʻOtua. Ko e ʻuhinga he ko e tangata naʻe ʻikai fakatupu ke pule ki heʻene ngaahi ngāue lava meʻa tauʻataina mei he ʻOtua. Naʻe ʻikai foaki ʻe he ʻOtua ia kia kinaua ʻa e totonu pe ko e mafai ke fai pehē. Hangē ko e lau ʻa e Tohitapu: “ʻOku ʻikai ʻi he tangata hono hala. ʻOku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) Ko e ʻuhinga ia ʻoku fanongonongo mai ai ʻe he Tohitapu: “Ko ia ʻoku falala ki hono ʻatamai ʻoʻona ko ia ʻa e vale.”​—Palovepi 28:26.

NE ANGA FĒFĒ KAMATA ʻA E KOVI?

18. Ko e hā e meʻa ne fehalaaki ʻi he ʻetau ʻuluaki ongo matuʻa? (Semisi 1:​14, 15; Sāme 36:9)

¹⁸ ʻAki ha kamataʻanga lelei pehē ni, ko e hā e meʻa ne hala? Ko ʻeni: ko ʻetau ʻuluaki ongo matuʻa, ʻAtama mo ʻIvi, naʻa na  ngāue halaʻaki ʻena tauʻataina ke na fili. Naʻa na fiemaʻu pe ʻena founga kae ʻikai ʻi he fakaongo ki he tuʻutuʻuni ʻa e ʻOtua. Ko hono moʻoni, naʻe fakakaukau ʻa e fefine ia te na “hangē ko e ʻOtua, ʻo ʻilo ʻa e lelei mo e kovi.” (Senesi 3:5) Naʻa na fiemaʻu ke na fakapapauʻi ʻa e meʻa naʻe tonu mo e meʻa naʻe hala, fakatuʻunga ʻi heʻena fakakaukau pe. Naʻe ʻikai te na tomuʻa sio ki he tuʻutamaki lahi ʻe hoko mei he fakakaukau ni. Ka ko e meʻa ia ne hoko, koeʻuhi ‘ʻoku ʻikai ʻaupito loi ʻa e ʻOtua.’ (Taitusi 1:2) ʻI heʻena mavahe mei he tuʻutuʻuni ʻa e ʻOtua, ko e meʻa ia ne hoko, ʻi ha ʻuhinga lahi, hangē ko e meʻa ko ia ʻe hoko ʻi haʻo toʻo ʻa e palaki ʻo ha ī ʻuhila. ʻI hono tuʻusi mei hono malohi ʻanga ʻa ia ko e ʻuhila, ʻe māmālie hifo pe ʻa e ī pea tuʻu ʻaupito. Tatau tofu pe, ʻi he mamaʻo ʻa e ʻuluaki ongo matuʻa mei he Tupuʻanga ʻo e moʻui, ko e ʻOtua ko Sihova, naʻa na fakaʻau pe ki he kovi pea na mate, hangē pe ko ia ne fakatokanga ki ai ʻe he ʻOtua ʻe hoko kia kinaua.

19. Ko e hā e ʻuhinga ne fanauʻi taʻehaohaoa mai ai pe ʻa e faʻahinga ʻo e tangata? (Loma 5:12)

¹⁹ Koeʻuhi ko ʻetau ʻuluaki ongo matuʻa naʻa na angatuʻu ki he ʻOtua ki muʻa pea na maʻu fanau, ne hoko ai pe ʻa e taʻehaohaoa ki muʻa pea toki fanauʻi ʻena ʻuluaki tama. Ne hoko ʻa ʻAtama mo ʻIvi hangē ha sipinga ʻikai ke haohaoa. Ko e meʻa kotoa pe ne fakatupu meia kinaua ne ʻikai haohaoa foki. Ko e meʻa pe ia naʻa na foaki ki heʻena fanau ʻa ia ʻoku nau maʻu he ʻaho ni​—ko e ngaahi sino mo e ʻatamai taʻehaohaoa. Naʻe ʻikai ke nau kei haohaoa koeʻuhi naʻa nau mavahe mei he Tupuʻanga ʻa ia ʻoku ne tokoniʻi mo fakatolonga ʻa e haohaoa mo e moʻui, ko e ʻOtua ko Sihova. Ko ia ʻi heʻene fekauʻaki mo e meʻa ʻoku lea ki ai ʻa e Tohitapu ʻia Loma 5:​12, ko e tokotaha kotoa pe kuo fanauʻi ʻi he angahala, ʻo puke, taʻu motuʻa pea mate. Pea heʻikai ke tukuakiʻi ʻa e ʻOtua ʻi he meʻa ni. ʻOku pehē ʻe Teutalonome 32:5: “Kuo nau fai kākā ki ai talaʻehai ko ʻene fanau, ko honau mele pe.” Pea ʻia Koheleti 7:29 ʻoku hā ai: “Naʻe ngaohi ʻa e tangata ʻe ʻElohimi ko e tonusika; ka kuo feingaʻi ʻe he faʻahinga ko ia ha faliunga lahi.”

20. Anga fēfē hono uesia ʻe ha faihala ʻa ha kiʻi kakai tokosiʻi ha fuʻu kakai tokolahi?

 ²⁰ Ka ʻoku totonu ke fai pe ʻe he toko ua ʻa e talangataʻa pea fua ai pe ʻe he tokotaha kotoa ʻa e mamahi? Sai, ʻoku tau ʻiloʻi ko e taʻetokanga ʻa ha tangata pe ʻe taha ʻi hano fai ha kiʻi meʻa ʻi ha langa ʻo ha fale ka ʻoku fekauʻaki mo e maluʻanga ʻe hoko ai ha fakatuʻutamaki ʻo mole ai ha moʻui ʻa ha kakai tokolahi. Ko e taʻetokanga ki ha ngāue pehē ʻi ha ʻā-maka tāpuni vai ʻe hoko ai ʻone pā pea tāfea ʻo tupu ai ha  maumau lahi. Ko ha ngāue hala pe ʻe taha ʻa ha taki ʻoku ne fakaava ai ʻa e founga ki he hokohoko ʻa e faihala ʻa ha puleʻanga, ʻo uesia lahi ai ʻa e laui miliona ʻo e kakai. ʻI he famili, kapau ʻe ʻai ʻe he tamai mo e faʻe ha fili fehalaaki‘ ʻe faingataʻaʻia ʻena fanau. Ne fai ʻe heʻetau ʻuluaki ongo matuʻa ʻa e fili kovi. Ko hono ola ē, ko e tō kotoa ʻa e famili ʻo e tangata ki he fakatuʻutamaki mo e taʻehaohaoa.

21. Ko e hā e ʻuhinga ne fakahoko ai ʻe he ʻOtua ʻa e tautea mate pea ne anga fēfē hono toe fakahā mai ʻene ʻaloʻofa?

²¹ Koeʻuhi ne kau ai e lao ʻa e ʻOtua, pea pehē ki heʻene angatonu, ʻe ʻikai te ne tukuange ʻa e maumau lao ke hoko atu taʻe fakamalohiʻi ʻa e lao ko ia. Ko e hā e fakaʻapaʻapa ʻe fai ʻe he kakai kiate ia pe ki heʻene lao kapau naʻe ʻikai te ne fai ha meʻa ki ai? Te tau fakaʻapaʻapa ki he kau taki he ʻaho ni ʻoku ʻikai te nau tauhi ʻa e ngaahi lao pe ʻanautolu, pe ʻoku nau fakangofua pe ʻe nautolu ha kakai makehe ke maumauʻi ʻa e lao ko ia taʻe ʻi ai ha tautea ke fai ki ai? Ko ia, ne fakahoko ʻe he ʻOtua ʻene tautea ki he talangataʻa, ʻa ia ko e mate. Ka naʻa ne faimesi pe ʻo fakangofua ʻa e ʻuluaki ongo matuʻa ke maʻu haʻana fanau, ʻa ia ʻoku totonu ke hounga kiate kitautolu, he ka ne ʻikai ia ne ʻikai ʻaupito fanauʻi mai kitautolu. Pea, neongo ʻoku tau taʻehaohaoa kotoa tupu mei he tō ʻa ʻAtama mo ʻIvi, ʻikai ʻoku tau fiemaʻu ke tau moʻui kae ʻikai ke mate?

22. Mo toe hai ko e tupuʻanga lahi taha ia ʻo e kovi? (Mātiu 4:​1-11; Efeso 6:12)

²² Te tau pehē ko e kovi naʻe tupu kotoa pe mei he faʻahinga ʻo e tangata? ʻIkai, ʻoku lahi e meʻa fekauʻaki mo ia. Naʻe ngaohi ʻe he ʻOtua ʻa e ngaahi meʻa moʻui ʻatamai poto ʻa ia naʻe ʻikai fakangatangata ki he tangata. Ne ʻosi ʻi ai pe mo hono ngaahi foha ʻatamai poto tokolahi kehe ʻi hevani, ko e ngaahi meʻa moʻui fakalaumalie. ʻI he toe ngāue angatonu tauʻataina mo kinautolu, te nau toe kei anganofo pe ki he ngaahi lao totonu mo lelei ʻa e ʻOtua ka nau moʻui. Kae kehe, ne fakakaukau ʻa e taha ia ʻo e ngaahi meʻa  moʻui fakalaumalie ko ʻeni ʻi he ngaahi fakakaukau hala. Pea ʻi he taimi ʻoku fakakaukau ai ha taha ʻi ha meʻa ʻoku hala, ʻoku ne tafunaki ai ki he tuʻunga te ne fai ai ʻa e meʻa hala naʻa ne fakakaukauʻi. Ko ia ne pehē mo e meʻa moʻui fakalaumalie ko ʻeni. Naʻa ne langa hake ʻa e fie ongoongo ʻiate ia ki he faʻahinga tuʻunga ʻo ne ʻai ai ia ke ne poleʻi ʻa e ngaahi ngāue ʻa e ʻOtua. Naʻa ne fakahā ki he uaifi ʻo ʻAtama, ko ʻIvi, te na talangataʻa ki he ʻOtua pea lolotonga ia, naʻa ne pehē, “ʻE ʻikai ʻaupito te mo mate.” (Senesi 3:4) Naʻa ne fehuʻia ʻena fiemaʻu ke fakatuʻunga pe mei he Tupuʻanga ʻa e hokohoko atu ʻo e moʻui mo e fiefia. Ko hono moʻoni, naʻa ne fakahā kia kinaua ko e talangataʻa te ne fakaleleiʻi moʻoni ʻa e ngaahi meʻa kotoa kia kinaua, ʻo ne ʻai kinaua ke tatau mo e ʻOtua. Ko ia naʻa ne fakatālafiliʻi ʻa e moʻoni ʻa e ʻOtua. Pea ʻi he tālafili ki he ngaahi lao ʻa e ʻOtua, naʻa ne fakatoka ai ʻa e fakataʻetaʻetui ki he founga pule ʻa e ʻOtua​—ʻi he totonu ʻa e ʻOtua ke pule. Ko ia ne ui ai ko Setane, ʻa ia ʻoku ʻuhinga ko e tokotaha angatuʻu, mo e Tevolo, ʻa ia ʻoku ʻuhinga ko e tokotaha lauʻikovi loi.

KO E HĀ ʻOKU NE KEI TOLONGA FUOLOA AI?

23, 24. Ko e hā ʻoku fiemaʻu ai ha taimi ke fakaleleiʻi ai ʻa e ngaahi tuʻunga he māmani?

²³ Koeʻuhi ko e malohi lahi ange ʻa e ʻOtua, naʻa ne malava pe ke fakamaʻa ʻa e tangata mo e laumalie angatuʻu ʻi he kamataʻanga. Ka ʻe ʻikai malava ke fakaleleiʻi fakaʻaufuli ai ʻa e ngaahi meʻa ni. Ko e hā hono ʻuhinga? Koeʻuhi naʻe ʻikai ko e malohi ia ʻo e ʻOtua naʻe poleʻi. Ko e meʻa fakaʻulungaanga ne malanga hake. Pea ko e meʻa mahuʻinga ʻaupito naʻe pehē ni: ʻE ola lelei ʻa e founga ʻo e angatuʻu? ʻE malava ʻe he pule ʻoku ne liʻaki ʻa e ʻOtua ʻo ʻomai ha ngaahi meʻa ʻaonga mo lelei ʻoku tolonga ki he famili fakakatoa ʻo e tangata? ʻE lelei ange pule ʻa e ʻOtua ki he kakai, pe ʻe lelei ange pule ʻa e tangata? Ko e ʻOtua, ʻi heʻene poto, ʻoku ne ʻafioʻi e meʻa ni, mo ha toe kī kehe ʻe malanga hake, ʻe ʻi ai pe taimi ke fakaleleiʻi ai. Ko ia kuo ne tuku ai ha taimi pau ki he tangata ʻa e faingamalie feʻunga ʻānoa ke aʻu ai ki he tumutumu ʻo ʻenau ngaahi lava meʻa fakapolitikale, fakasosiale, fakaengāue mo e fakaesaienisi.

²⁴ Ko e vahaʻa taimi ko ia ʻoku ʻikai ko ha ngaahi ʻaho pe ko ha ngaahi taʻu siʻi pe. ʻE fai ia ʻi ha ngaahi  toʻutangata lahi ke tali mo fakahāhāʻi ke ʻoua ʻe toe ʻi ai ha talaʻa. Ko e ngaahi hopo ʻoku fai ia ʻo laulau uike pe laulau mahina neongo ko ha toko ua pe ʻoku kau ki ai. Ko e ngaahi meʻa lahi fakatuʻutamaki kau ki he pule ʻa e ʻOtua ʻoku fiemaʻu ha tali kakato, ʻikai ko ha fakaleleiʻi fakakonga pe. ʻI he founga ni ko e fakaleleiʻi ko ia ʻo e ngaahi meʻa ni heʻikai toe fiemaʻu ke toe hoko ia ʻi ha taimi he kahaʻu. ʻOku ʻikai tali ʻe he ʻOtua ʻofa ke fakaleleiʻi fakakonga pe. Pea ʻoku tau fiefia ke hoko pehē ʻa e meʻa ni, koeʻuhi ko e faʻahinga fakalelei pe ʻeni ʻe taha te ne fakaava ʻa e hala ki he melino mo e maluʻanga taʻengata maʻa e famili fakaeʻuniveesi kotoa pe ʻo e ʻOtua, ʻi hevani pea mo māmani.

25. Neongo e fakalakalaka fakamatelie, kuo ʻomai nai ʻe he tauʻataina ʻa e tangata mei he ʻOtua ʻa e melino mo e fiefia moʻoni?

²⁵ Taʻu nai ʻe 6,000 kuo ʻosi talu mei he ʻuluaki hoko ʻa e ngaahi meʻa ni. Ko e hā e meʻa kuo hoko ko e ola ʻo e tauʻataina mei he pule ʻa e ʻOtua? Ko e faʻahinga puleʻanga kotoa pe, ngaahi fokotuʻutuʻu fakaesosiale kotoa pe, faʻahinga founga fakaʻikanomika kotoa pe, pea mo e ngaahi lotu fakaesiasi kotoa pe ne nau ʻahiʻahiʻi. Kae hala  ʻatā ha meʻa kuo ne ʻomai ʻa e melino moʻoni, maluʻanga, moʻui fuoloa mo e fiefia. ʻE polepole ha taha ʻi he fakalakalaka fakamatelie hili ia hono toʻo ʻe he Tau ʻa Māmani II ʻa e moʻui ʻe nimangofulu miliona? Ko ha fakalakalaka ia ke ʻave ʻa e tangata ki he mahina, ʻi he ngaahi loketi tatau pe kuo fokotuʻu ai ʻa e ngaahi meʻa tau niukilia ke ne fakaʻauha ʻa e faʻahinga ʻo e tangata, pea lauiteau miliona e kakai he māmani ʻoku nau faingataʻaʻia tupu mei he fiekaia mo e masiva ʻi he taimi tatau pe ne ʻaʻeva holo ai e kau tangata he mahina? Ko e hā ha lelei ʻi hano maʻu ha fale mo e ngaahi faingamalie lahi kae mavahevahe ʻa e ngaahi famili ia ʻi ha ngaahi taʻefefiemalieʻaki, tupulaki e ngaahi vete mali, manavahē ki he faihia ʻi he ngaahi kaungāʻapi takatakai ʻoku mafola, tupulaki ʻa e ʻuli mo e nofo masiva, laui miliona e taʻemaʻu ngāue he taimifaingataʻafakaʻikanomika,taimiʻokuhokoai ʻa e fakamaveuveu, ngaahi tau fakapuleʻanga mo e tō ʻa e ngaahi puleʻanga ʻa ia ʻoku hoko fakataʻu ʻo ne uesia ʻa e founga moʻui mo e ʻapi ʻo e tangata?

26. Ko e hā e meʻa kuo ha mei he vahaʻa taimi kuo tuku mai fekauʻaki mo e tauʻataina ʻa e tangata mei he ʻOtua? (Sāme 127:1)

²⁶ Ko hono moʻoni ne lave ki ai ʻa e Sekelitali Pule ʻo e Puleʻanga Fakatahataha ko Kurt Waldheim: “Neongo e fakalakalaka fakamatelie, naʻe ʻikai lahi ange ʻa e ongoʻi taʻemalu ia ʻa e moʻui ʻa e tangata ʻi ha taimi hangē ko ia ʻoku ʻi ai he ʻaho ni.” b ʻOku toe pehē ʻe he tohi ko e Environmental Ethics: “Ko e tangata naʻe ngaohi ke mānava he ʻea ʻoku maʻa, inu mo fiefia ʻi he vai maʻa, pea fiemalie ʻi he meʻa fakaofo ʻoku hoko mei hono ngaahi ʻātakai, kuo ne liliu hono ʻātakai pea ne ʻilo ʻa e ʻikai ke ne malava ngaohi ia ʻo liliu ke ʻaonga ki he meʻa kehe. ʻOku ne teuteu pe hono fakaʻauha ʻoʻona.” c Ko hono moʻoni ko e kei fakangofua fuoloa ʻo e kovi ke fakahāhā ki he tokotaha taau kotoa pe ko e tangata naʻe ʻikai  ngaohi mo ha malava ke ne tataki pe ʻene ngaahi ngāue ke malava taʻekau ai ʻa e ʻOtua. Pea kuo fakamoʻoniʻi ko e taʻu ʻeni ʻe ono afe ʻo e taʻemalava ʻa e faʻahinga ʻo e tangata, hala ʻatā ha taha te ne malava ke tafoki hake pe ʻo tukuakiʻi ʻa e ʻOtua ʻi hono taʻetuku mai ha taimi feʻunga. Ko e taimi kuo vaheʻi kuo ʻosi feʻunga ʻānoa pe ia ke fakamoʻoniʻi ko e angatuʻu ki he ʻOtua kuo hoko ko ha fakamamahi lahi.

VAVE NI KE FAKANGATA ʻA E KOVI

27. ʻOku fēfē hono lahi ʻo e liliu kuo ʻi ai ʻa e taumuʻa ʻa e ʻOtua? (Palovepi 2:​21, 22; Loma 16:20)

²⁷ Ko e fiemaʻu lahi ʻa e famili ʻo e tangata ko ha liliu ke lelei ange. Ko hono moʻoni, ʻoku tau fiemaʻu ha founga foʻou. Hangē ko ia ne lave ki ai ʻa e sioloki ko Eric Fromm, ko e ngaahi founga kovi ʻi he kakai ne mei malava ke fakatonutonu “kapau ne fetongi ʻa e founga kotoa ne lele mai he taʻu ʻe 6,000 ʻo e hisitolia kuo maliu atu ʻaki ha tefitoʻi lao kehe.” d Ko ʻeni tofu pe e meʻa kuo ʻi he fakakaukau ʻa e ʻOtua! ʻI he ʻosi ʻa e taimi kuo ne vaheʻi, kuo tukupā ʻe he ʻOtua ke fakaʻauha kotoa ʻa e ngaahi meʻa ʻo e tuʻu anga kovi ni, mo e faʻahinga ʻoku nau leleiʻia ai. “Ko e kau angahala te ne fakaʻauha.”​—Sāme 145:20.

28. Ko e hā hono ui ʻi he Tohitapu ʻa e taimi ko ʻeni ʻoku tau moʻui ai, pea ko e hā hono ʻuhinga? (2 Timote 3:​1-5, 12, 13; Mātiu 24:​3-14)

²⁸ ʻE hoko ʻeni ʻafē? Vave ni ʻaupito, koeʻuhi ʻoku fakahā mai ʻe he Folofola ʻa e ʻOtua ko e ngaahi faingataʻa taʻe hano tatau ko ia kuo ne uesia ʻa e famili ʻo e tangata talu mei he fuofua tau lahi he 1914 ʻoku hoko ia ko e fakaʻilonga papau ʻo ia ʻoku ui ʻi he Tohitapu “ko e kuonga fakamui.” Naʻe tomuʻa fakahā pe ʻe he Tohitapu ʻi he “kuonga fakamui” ʻe tau ʻa e māmani, tupulaki e faihia, fiekaia, mahamahaki, taʻe anganofo ʻa e tokolahi, tafoki mei he tui ki he ʻOtua, lotu malualoi mo e hē mei he  moʻoni, pea mo e toe ngaahi meʻa kehe. ʻE hangē tofu pe ʻeni ko e ngaahi laine ʻo ha fakaʻilonga nima, ʻa hono fakapapauʻi ko hotau toʻutangata ni ʻe fakaʻosi ai ʻe he ʻOtua ʻa e ngaahi tuʻunga kovi ni. Ne kikiteʻi ʻe Sisu ko hotau taimi te tau mamata ki he ngataʻanga ʻo e ngaahi meʻa ʻo e tuʻu ko ʻeni he māmani.

29. Anga fēfē ʻetau ʻilo kuo vave ke fakangata ʻa e tuʻu ko ʻeni?

²⁹ Naʻe toe lave ʻa Sisu ʻo fekauʻaki mo e toʻutangata ko ia naʻa nau sio he kamataʻanga ʻo e “kuonga fakamui” ʻi he 1914: “He ko au e, ʻoku ou tala atu, ʻe ʻikai ʻaupito mole ʻa e toʻutangata ko ʻeni, kaeʻoua ke hoko ʻa e ngaahi meʻa ko ia kotoa pe.” (Mātiu 24:34) ʻOku ʻuhinga ʻeni ki he kakai ko ia naʻa nau moʻui ʻi he kamata ʻa e Tau ʻa Māmani I he 1914 ʻe kei moʻui honau niʻihi ke fakamoʻoniʻi ʻa e ngataʻanga ʻo e tuʻu lolotonga ni. Ko e toʻutangata ko ia ʻo e Tau ʻa Māmani I kuo nau fuʻu motuʻa ʻaupito he taimi ni, pea ko e fakamoʻoni pau ia ko e ngataʻanga ʻo e kovi kuo vave ni ʻaupito ke hoko.

30. Ko e hā ʻe hoko ki he ngaahi founga pule kotoa ʻa e tangata ʻoku lolotonga lele ʻi he māmani? (Sefanaia 3:8; Aisea 1:28)

³⁰ ʻI he hoko mai ʻa e ngataʻanga, ʻe fakahāhā ʻe he ʻOtua hono mafimafiʻia ʻo ne fakaleleiʻi fakahangatonu ʻa e ngaahi meʻa ʻa e tangata. Katoa ʻa e ngaahi founga fakafepaki ʻa e tangata kiate ia ʻe fakaʻauha. ʻOku lea ʻa e kikite ʻa Taniela vahe 2, veesi 44, fekauʻaki mo ʻeni: “Ka ʻi he taimi ʻo e ngaahi tuʻi ko ia, ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe. Ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.” (Revised Standard Version) ʻI hono toʻo kotoa ʻo e ngaahi founga fakaloto mamahi ʻa e tangata,  ʻe kakato leva ʻa e pule ʻa e ʻOtua ki he kotoa ʻo e foʻi māmani.

31. Ko e hā e puleʻanga kuo tokonaki ʻe he ʻOtua maʻa e faʻahinga kotoa ʻo e tangata? (Mātiu 6:​9, 10)

³¹ Ko ia, ʻe ngāueʻaki ʻe he pule ʻa e ʻOtua ha puleʻanga foʻou, ko e puleʻanga fakahevani, ko e puleʻanga ʻo e ʻOtua. Ko e puleʻanga ia naʻe ʻai ʻe Sisu ko e tefitoʻi ʻuhinga ʻo ʻene akonaki. Pea naʻa ne tomuʻa fakahā ko ʻeni pe ʻa e puleʻanga te ne puleʻi ʻa e māmani katoa ʻi he taimi totonu. Koeʻuhi ko e Puleʻanga ʻe pule mei hevani, ʻo tataki ʻe he ʻOtua, ʻe ʻikai hano toe faingamalie ke fakameleʻi ʻe ha faʻahinga siokita ʻo e tangata. Ko ia ko e mafai fakaepule ʻe foki kiate ia ʻoku haʻana totonu, ʻi hevani, mo e ʻOtua. Fekauʻaki mo e pule ʻa e ʻOtua ki he māmani, ko ʻene talaʻofa ʻoku pehē “ʻe ako faitotonu ʻa e nofo māmani.” (Aisea 26:9) ʻE ʻikai toe takihalaʻi ha taha he lotu loi, ʻa ia ʻe ʻikai ha toe meʻa pehē. Ko e faʻahinga kotoa pe ʻe moʻui ai ʻe akoʻi ʻaki ʻa e moʻoni fekauʻaki mo e ʻOtua mo ʻene ngaahi taumuʻa, koeʻuhi ʻi he ʻuhinga kakato taha, “he ʻe fonu ʻa māmani ʻi he ʻiloʻi ʻo Sihova, ʻo hangē ko e mafola ʻa e vai ʻi he tahi.”​—Aisea 11:9.

KO HA FOKOTUʻUTUʻU FOʻOU ANGATONU

32. He malumalu ʻo e pule ʻa e puleʻanga ʻo e ʻOtua, ko e hā hono lahi ʻo e melino ʻe ʻi ai? (Aisea 2:​2-4)

³² He malumalu ʻo e pule ʻa e puleʻanga ʻo e ʻOtua, ʻe tupulaki ai ha sosaieti foʻou ʻo e tangata, ko ha sosaieti faʻu ʻaki ʻa e kakai anga fakaeʻotua. ʻI he fokotuʻutuʻu foʻou ko ʻeni, ko e tokanga lahi ʻa e ʻOtua kiate kitautolu ʻe fakahāhā ʻaki ia ʻa e meʻa te ne fai. Ko e meʻa ʻe taha, heʻikai toe fai ha tau ke ne maumauʻi ʻa e melino mo e fiefia ʻa e tangata. Ko e hā ʻe ʻikai ai? Koeʻuhi ko ia kotoa pe ʻe hao atu he ngataʻanga ʻo e māmani kovi ko ʻeni kuo ʻosi ako ʻekinautolu ʻa e ngaahi founga ʻo e melino, koeʻuhi kae maʻu ʻe he sosaieti foʻou ʻo e tangata ha kamataʻanga melino. Hili ia, ko ia kotoa pe ʻoku haʻu pe moʻui ʻi he fokotuʻutuʻu foʻou ko ia te nau hokohoko atu ke maʻu ʻa e ako tatau ʻi hono fai ʻo e finangalo ʻo e ʻOtua.  Ko e ʻuhinga ia ʻe pau ai ʻa e fakahoko ʻo e talaʻofa ʻa e Tohitapu ko e ʻOtua “ʻoku ne lolololo ʻa e ngaahi tau ʻo aʻu ki he ngataʻanga ʻo māmani.” (Sāme 46:​8, 9) ʻE anga fēfē e kakato ʻa e melino ko ia? ʻOku pehē ʻe he Folofola fakaekikite ʻa e ʻOtua: “Ka e maʻu ʻa e fonua ʻe he faʻa kataki; pea te nau fiefiaʻi ʻi he melino lahi.”​—Sāme 37:11.

33. ʻE liliu ʻa e māmani ki he tuʻunga fēfē?

³³ Kae ʻumaʻā, ko e faʻahinga ko ia ʻe moʻui ʻi he fokotuʻutuʻu foʻou te nau liliu ʻa e māmani ko e palataisi ʻa ia naʻe fuofua taumuʻa ki ai ʻa e ʻOtua. Ko ha ngāue fakafiemalie maʻa e faʻahinga ʻo e tangata! Pea ʻi hono toe ʻomai ʻo e palataisi, ʻe malava leva ke fiefia kakato ʻa e kakai he ngaahi anovai, ngaahi vaitafe mo e ngaahi ʻoseni; ko e ngaahi tafungofunga, ngaahi moʻunga, ngaahi tokalelei mo e ngaahi teleʻa; ko e ngaahi matalaʻiʻakau  fakaʻofoʻofa, ngaahi ngoue mo e ʻulu ʻakau; pehē ki he fanga manu anga lelei. Heʻikai toe ʻi ai ha nounou fakameʻatokoni, he “kuo foaki ʻe he kelekele hono fua; ʻe tapuakiʻi kitautolu ʻe ʻElohimi ko hotau ʻOtua.” ʻIo, “ʻe mafola mai ʻa e uite ʻi he fonua; ʻi he tumutumu ʻo e ngaahi moʻunga ʻe hake ai.”​—Sāme 67:6; 72:16.

34. Ko e hā mo e fakamoʻui fakaesino ʻe fakahoko?

³⁴ ʻI he melino fuoloa fakataha mo e lahi ʻo e meʻakai ʻe maʻu ai ʻa e moʻui lelei longomoʻui. Koeʻuhi naʻe ngaohi  ʻe he ʻOtua ʻa e tangata, ʻoku ne ʻafioʻi lelei ange ʻe ia ʻi ha toketa ʻa e meʻa totonu ke fai ki hono fakamoʻui ʻo e heke, fakaʻā ʻo e kui mo e tuli ke fanongo, mo e founga ki hono fakangata kotoa ʻo e mahamahaki, taʻu motuʻa pea mate. Ko e mafai ʻo e ʻOtua ke fai ʻeni naʻe fakahāʻi ia ʻe Sisu Kalaisi ʻi ha fakaʻilonga, pe ʻi ha fakafuofua siʻisiʻi pe ʻi he taimi naʻe ʻi māmani ai. ʻOku fakahā mai kia kitautolu ʻe he Tohitapu: “Pea ʻalu atu kiate ia ha ngaahi fuʻu kakai, ʻo nau omi mo kinautolu ha niʻihi naʻe pai, pea mo ha tokolahi naʻe puke kehe, ʻo nau laku kinautolu ki he vaʻe ʻo Sisu, pea ne fakamoʻui kinautolu. Pea ofo ai ʻa e kakai, heʻenau sio ki he noa ʻoku lea, mo e pai ʻoku moʻui mo e heke ʻoku ʻeveʻeva, mo e kui ʻoku ā.”​—Mātiu 15:​30, 31.

35, 36. ʻE anga fēfē ha maʻu ʻe he kakai kuo mate ʻa e faingamalie ke moʻui ʻi he fokotuʻutuʻu foʻou ʻa e ʻOtua? (Sione 5:​28, 29; Luke 7:​11-15)

³⁵ Naʻe lave ʻa Sisu ki he Palataisi fakaemāmani ʻi heʻene lea ki he tangata ko ia naʻe tautau fakataha mo ia: “Te ke ʻi Palataisi mo au.” (Luke 23:43) Ka ne mate ʻa e tangata ia ko ia. Ko ia ʻe anga fēfē ke ne ʻi Palataisi ai? ʻAki e toe tokonaki fakaofo ʻa ia ʻoku ne fakahāʻi ʻa e lahi ʻo e tokanga mai ʻa e ʻOtua​—ko e toetuʻu mei he mate. ʻOku pehē ʻe he Tohitapu ʻia Ngāue 24:15: “ʻE faifai pea hoko ha toetuʻu ʻa e angatonu mo e angahala fakatouʻosi.”  ʻI māmani, ne fokotuʻu ʻe Sisu e kakai mate ke fakahāhāʻi ʻa e mafai ʻo e ʻOtua ke fai ia he malumalu ʻo e pule ʻo hono puleʻanga.

³⁶ ʻOku faingataʻa ke ke tui ki he toetuʻu? Ka neongo ia naʻa mo e taimi ni ʻoku malava ke ke sio ʻi he ngaahi polokalama televisone ki he kakai kuo fuoloa ʻenau mate. ʻOku ke fanongo ki honau leʻo, sio heʻenau ngaahi ngāue pea ʻiloʻi ai honau ngaahi ʻulungaanga. Kapau ʻoku malava noa pe ʻe he tangata hono tauhi ʻa e ngaahi meʻa pehē ʻi he ngaahi tepi televisone, huanoa hake ʻa e ʻOtua ʻoku Poto-Taha ke tauhi ʻi heʻene manatu ʻa e fakaʻilonga fakaikiiki ʻo e anga mo e tōʻonga ʻo e tangata takitaha te ne finangalo lelei ke toe fokotuʻu. Ko e meʻa ʻeni kuo ne ʻosi fai, pea te ne fokotuʻu hake ʻa e kau mate pehē ke toe moʻui. ʻI he founga ni, ʻe kau mo kinautolu he maʻu ʻo e faingamalie ke moʻui fiefia ʻi he fokotuʻutuʻu foʻou ʻa e ʻOtua. Pea ʻi hono fakangeʻesi ʻo e ngaahi faʻitoka, mo hono fakamoʻui ʻo e kakai mei he puke tukufakaholo, taʻu motuʻa mo e mate, pea ko e ʻOtua “te ne folofua ʻa mate ʻo taʻengata.” (Aisea 25:8) Ko ia, ʻe malava moʻoni ʻa e kakai ke moʻui taʻengata!

37. Ko e hā kuo pehē ai ko e ʻOtua te ne fakaleleiʻi lahi ange ha faʻahinga mamahi pe kuo maʻu ʻe he kakai?

 ³⁷ ʻAki hono puleʻanga, ʻe liliu kakato ai ʻe he ʻOtua ʻa e tuʻunga kovi ko ia kuo fuoloa mai! Kotoa ʻo aʻu ki ʻitaniti te ne fakahāhā ai ʻene tokanga lahi mai kia kitautolu ʻaki hono huaʻi hifo e ngaahi tapuaki ʻe mole ke mamaʻo haʻa ne faʻu ha faʻahinga meʻa ki ha mamahi ʻa ia kuo tau maʻu ʻi he kuo hili. Ko e ngaahi faingataʻa ko ia kuo tau aʻusia ʻi he tuʻu lolotonga ko ʻeni ʻe mangalongalo atu ia, kapau te tau toe tokanga ke fakamanatuʻi kotoa ia. He ko e talaʻofa ʻeni ʻa e ʻOtua: “He vakai, ʻoku ou fakatupu ha ngaahi langi foʻou [ko e puleʻanga fakahevani foʻou ki he faʻahinga ʻo e tangata] mo ha fonua foʻou [sosaieti ʻo e tangata angatonu]; pea ʻe ʻikai manatua ʻo e ʻuluaki, pea ʻe ʻikai te nau hake ʻi he loto ʻo ha taha. Ka mou fiefia mo tomeʻe ʻo taʻengata, ʻi he meʻa ʻoku ou fakatupu.” (Aisea 65:​17, 18) ʻI he ngaahi tapuaki molumalu ko ia ʻoku hanganaki mei muʻa, ʻoku malava ke ke sio ai ki he ʻuhinga ʻoku pehē ai ʻe he Tohitapu ko e ʻOtua “te ne holoholo ʻa e loʻimata kotoa pe mei honau mata.” Ko e hā ʻe ʻikai ai? He “ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia. Kuo mole ʻa e ngaahi meʻa muʻa.”​—Fakaha 21:4.

TOKANGA MAI ʻA E ʻOTUA​—ʻOKU TAU PEHĒ?

38. Ko e faʻahinga kakai fēfē ʻoku fiemaʻu ʻe he ʻOtua ʻi heʻene fokotuʻutuʻu foʻou? (Sāme 37:​37, 38)

³⁸ Ko hono moʻoni ʻe vave ni ke fakangata ʻe he ʻOtua ʻa e kovi pea ʻomai ha fokotuʻutuʻu foʻou fakaʻofoʻofa ʻo fakahāʻi ai ʻoku ne matuʻaki tokanga mai kia kitautolu. Ka ʻoku tau tokanga kiate ia? Kapau ʻoku tau fai pehē, ʻoku fiemaʻu ke tau fakahāhāʻi ia. Ko e hā e meʻa kuo pau ke tau fai? ʻOku pehē ʻe he Tohitapu: “Pea ʻoku fakaʻaʻau ke mole ʻa māmani mo ʻene holi ʻaʻana, ka ko ia ʻoku ne fai ʻa e finangalo ʻo e ʻOtua ʻoku ne nofo maʻu ʻo taʻengata.” (1 Sione 2:17) Ko e faʻahinga kakai ʻoku fiemaʻu ʻe he ʻOtua ʻi heʻene fokotuʻutuʻu foʻou ko e faʻahinga ʻoku nau fai hono finangalo mo anga nofo ki heʻene pule angatonu.  Ko e faʻahinga kakai ia te nau tauhi ʻene ngaahi lao pea tokoni ki hono ngaohi ʻo e “fonua foʻou” ko ha feituʻu lelei ke nofo ai. Ko e kakai ʻoku fakafepaki ki he pule ʻa e ʻOtua te nau hoko pe ko e kau fakatupu kovi, ko ia heʻikai ke fakangofua kinautolu ke nofo ai.

39. Kapau ʻoku ke fie moʻui taʻengata, ko e hā e fekumi kuo pau ke ke fai? (Palovepi 2:​1-6)

³⁹ ʻOku ke fiemaʻu ke moʻui ʻi he fokotuʻutuʻu foʻou angatonu ʻa e ʻOtua? Ko e ʻuluaki meʻa leva ke fai ke ako ʻa e ngaahi meʻa ʻoku fiemaʻu ʻe he ʻOtua ki he moʻui. Ko e meʻa ʻoku fuʻu lahi ke fai? Kapau ʻe foaki atu ha ʻapi fakaʻofoʻofa hangē ha paʻake, taʻetotongi, meʻa ni ʻe ʻikai ke ke fakamoleki ha taimi ke vakaiʻi pe anga fēfē ke ke taau? Ko e Folofola ʻa e ʻOtua ʻoku fuʻu lelei ange​—ko e moʻui taʻengata ʻi ha palataisi he māmani​—kapau ʻoku tau fekumi ke ʻilo pe ko e hā hono finangalo kia kitautolu pea fai leva ia. ʻOku pehē ʻe he Tohitapu: “Pea ko ʻeni ia ʻa e moʻui taʻengata, ke nau fai ke ʻilo koe ko e ʻOtua moʻonia pe taha, pea mo Sisu ne ke fekau mai.”​—Sione 17:3.

40. Ko e hā ha toe ngaahi meʻa ʻaonga ʻoku ʻomai ʻe he Tohitapu he taimi ni? (2 Timote 3:​16, 17)

⁴⁰ Ko e ako mei he Tohitapu te ne toe ʻoatu kiate koe mo ho famili ʻa e tataki fakapotopoto ʻoku ʻaonga lahi ki he moʻui fakaʻaho ʻi he ngaahi taimi faingataʻa ni. Kae ʻumaʻa, ʻoku ne ʻomai ʻa e melino moʻoni ki he fakakaukau, koeʻuhi he ʻoku ne fakahā mai ʻa e ʻuhinga ʻoku kei kovi ai ʻa e ngaahi tuʻunga ni pea pehē ki he meʻa ʻoku hanganaki mai mei he kahaʻu. Mahuʻinga taha, te ne fakaivia koe ke tupulaki hoʻo ʻofa moʻoni ki he ʻOtua, pea hā “te ne hanga ʻo totongi kiate kinautolu ʻoku kumi hakili kiate ia.”​—Hepelu 11:6.

41 Ko e hā e tokoni ʻe tokonaki maʻataʻata ʻe he kau Fakamoʻoni ʻa Sihova maʻau?

⁴¹ ʻE fiefia lahi ʻa e kau Fakamoʻoni ʻa Sihova mo fie foaki tauʻataina honau taimi ke tokoniʻi koe ke lahi ange  hoʻo ako fekauʻaki mo e ngaahi tokonaki ʻa e ʻOtua ki heʻene fokotuʻutuʻu foʻou. Pehē foki ki ha ngaahi fehuʻi kehe kau ki he ʻOtua mo e Tohitapu. ʻE fiefia ʻa e kau Fakamoʻoni ʻa Sihova ke talanoa mo koe ʻi ho ʻapi, ʻi hoʻo Tohitapu pe ʻaʻau. ʻIkai ke muimui ʻi ha ʻalunga pea ko ha founga tauʻataina pe fakafalala ʻi he fakakaukau ʻa e tangata taʻehaohaoa, ʻe takiekinaʻi ʻaki koe ia ʻa e fakamatala lelei taha ʻoku maʻu he ʻaho ni. Ko ia, ʻi he kei toe ʻa e taimi ʻoku fekauʻi koe ke fai ʻa e meʻa ʻoku akonekina mai ʻe he Folofola ʻa e ʻOtua ʻo pehē: “Ko ia mou fakavaivaiʻi kimoutolu ʻi he lalo nima mafimafi ʻo e ʻOtua, . . . he ʻoku ne mamahiʻi kimoutolu.”​—1 Pita 5:​6, 7.

[Fakamatala ʻi lalo]

[Fehuʻi ki he Ako]

[Saati ʻi he peesi 22]

(Ki he konga tohi kuo fokotuʻu kakato, sio ki he tohi)

KATOA ʻI HE TOʻUTANGATA PE TAHA

1914

Tau ʻa e Māmani

Honge Lahi

Mahamahaki Fakaʻauha

Malohi Faihia

ʻUliʻi ʻo e Māmani

Ngataʻanga ʻo e Tuʻu ko ʻEni

[Fakatātā ʻi he peesi 6]

Kapau ʻe tukuakiʻi ʻa e masiva mo e ʻuli ʻa e tangata ki he ʻOtua . . .

[Fakatātā ʻi he peesi 7]

. . . Ko hai ke fakaongoongo leleiʻi ʻi he fakaʻofoʻofa ʻo e māmani pea mo hono ngaahi konga fonua mahu?

[Fakatātā ʻi he peesi 9]

Ko e māmani ne fakanaunauʻi lelei mamaʻo ia ke tokoniʻi mo fakatolonga ʻa e moʻui, ʻi ha faʻahinga fale pe

[Fakatātā ʻi he peesi 9]

Koeʻuhi ko e fale kotoa pe ne ʻi ai hano tufunga, huanoa ai ʻa e māmani ʻoku lahi ange!

 [Fakatātā ʻi he peesi 13]

ʻOku fakahā ʻe he Tohitapu ko e taumuʻa ʻa e ʻOtua ke ngaohi ʻa e māmani fakakatoa ko ha ngoue fakaʻofoʻofa, ko e palataisi, ke fiefia taʻengata ai ʻa e tangata

[Fakatātā ʻi he peesi 14]

ʻI he tuʻusi ha ī mei hono malohiʻanga ʻa ia ko e ʻuhila, ʻe māmālie hifo pe pea tuʻu. Tatau tofu pe, ʻi he mavahe ʻa e faʻahinga ʻo e tangata mei he ʻOtua, ko hono ola pe ko e fakaʻau ke kovi ange

[Fakatātā ʻi he peesi 16]

Ko hono taʻetokangaʻi ʻo ha kiʻi meʻa maluʻi siʻisiʻi, ʻe malava ke holo ha fuʻu ʻā maka tapuni vai lahi. ʻI he maumauʻi ʻe he ʻetau ʻuluaki ongo matuʻa ʻa e lao ʻa e ʻOtua, ne kamata ai ʻa e hoko mai ʻa e kovi mo faingataʻa

[Fakatātā ʻi he peesi 19]

Ko ha meʻa fakaefakamaauʻanga ʻoku fai ia ʻo laulau uike neongo ko ha toko ua pe ʻoku kau ki ai. Ko e ngaahi meʻa ʻoku kau ki he pule ʻa e ʻOtua kuo pau ke fakangata fakaʻaufuli ia, ʻo taʻengata, pea ʻoku fiemaʻu ʻeni ha taimi ʻoku lahi ange

[Fakatātā ʻi he peesi 24]

Heʻikai toe ʻi ai ha tau ʻi he fokotuʻutuʻu foʻou ʻa e ʻOtua, koeʻuhi ʻoku ne “fakaʻosi ʻa e ngaahi tau”

[Fakatātā ʻi he peesi 25]

He ʻikai toe faingataʻaʻia ʻa e faʻahinga ʻo e tangata ʻo tupu mei he fiekaia

[Fakatātā ʻi he peesi 25]

ʻE fakafua lahi ʻa e māmani ʻi he tapuaki ʻa e ʻOtua

[Fakatātā ʻi he peesi 26]

Ko e kakai motuʻa ʻe toe foki ʻo talavou mo longomoʻui pea moʻui lelei

[Fakatātā ʻi he peesi 27]

Ko e kau mate kotoa pe kuo tauhi ʻi he manatu ʻa e ʻOtua ʻe toe fakafoki ke moʻui pea feohi fakataha mo honau ʻofaʻanga

 [Fakatātā ʻi he peesi 29]

He malumalu ʻo e pule ʻa e puleʻanga ʻo e ʻOtua, ʻe hoko ʻa e moʻui ʻo fiefia pehē ni ʻo lahi ange ia ʻi haʻa ne fakatupu ha faingataʻa hangē ko ia ʻoku tau aʻusia he taimi ni

[Fakatātā ʻi he peesi 31]

Kapau kuo mole atu ʻa e ngaahi meʻa fakafiemalie he ʻātakai ʻo e moʻui, ʻikai te ke fiemaʻu ke ke ʻilo ʻa e founga ke ke taau ai? ʻOku tau mamaʻo ange ʻa e fokotuʻutuʻu foʻou ʻa e ʻOtua ʻa e meʻa te ne ʻomai, ka kuo pau ke ʻi ai e taimi ke ako ai ke ke taau