“Ko e potu Folofola kotoa pē kuo fakamānava‘i ia ‘e he ‘Otuá.”​—2 Tīmote 3:16, Liliu Tohi Tapu Māmani Fo‘oú.

Tali fakafiemālie ki he ngaahi fehu‘i mahu‘inga ‘i he mo‘uí.​—Palōveepi 2:1-5.

Tataki falala‘anga ki he mo‘ui faka‘ahó.​—Saame 119:105.

‘Amanaki mo‘oni ki he kaha‘ú.​—Loma 15:4.

‘Io, ‘i he ‘uhinga ‘e tolu:

• Fakaofo ‘ene feongoongoí. Na‘e hiki ‘a e Tohi Tapú ‘i ha vaha‘a taimi ko e ta‘u ‘e 1,600 ‘e he fa‘ahinga kehekehe ‘e toko 40 nai. Ko e tokolahi taha ‘o kinautolú na‘e ‘ikai ‘aupito ha‘anau fe‘ilongaki. Neongo ia, ‘oku feongoongoi ‘a e tohí ni kotoa ‘i ha fo‘i kaveinga tefito pē ‘e taha!

• Kau hiki-tohi faitotonu. Ko e kau hiki-tohi ‘o e māmaní ‘oku hā ngali ‘oku nau fakavave ke fūfuu‘i ‘a e ngaahi ‘ulungia ‘a honau kakaí. ‘I hono kehé, na‘e hiki faitotonu ‘e he kau hiki Tohi Tapú fakatou‘osi ‘a ‘enau ngaahi fehālaaki ‘anautolú pea mo honau pule‘angá.—2 Kalonikali 36:15, 16; Saame 51:1-4.

• Falala‘anga ‘a hono ngaahi kikité. Na‘e tomu‘a tala ‘e he Tohi Tapú ‘i ha ta‘u ia ‘e 200 nai ki mu‘a ‘a hono faka‘auha ‘o Pāpilone ko ha kolo ‘i he kuonga mu‘á. (‘Aisea 13:17-22) Na‘e ‘ikai ngata pē ‘i hono fakahaa‘i ai ‘a e founga ‘e tō ai ‘a Pāpiloné ka na‘a mo e hingoa ‘o e tokotaha te ne ikuna‘i iá!—‘Aisea 45:1-3.

Na‘e lahi mo e ngaahi kikite kehe ‘i he Tohi Tapú na‘e toe fakahoko ia ‘o a‘u ki he fakaikiiki si‘i tahá. Kae ‘ikai ko e me‘a ia te tau ‘amanekina mei he Folofola ‘a e ‘Otuá?—2 Pita 1:21.