Na‘e fiema‘u ‘i he Lao ‘a Mōsesé ki ha tangata na‘e fakakaukau ke vete mali ke ne ‘omai ha tohi vete fakalao. Na‘e ta‘ofi ‘e he me‘á ni ‘a hono motuhi fakavave ‘o e ngaahi nofo malí. Kae kehe, ‘i he taimi ‘o Sīsuú, na‘e ‘ai ‘e he kau taki lotú ke faingofua ‘a e vete malí. Na‘e lava ke vete‘i ‘e he kakai tangatá honau ngaahi uaifí ‘i ha fa‘ahinga ‘uhinga pē. (nouti ako ‘i he nwtsty ‘o e Mk. 10:4, 11) Na‘e fakahanga ‘e Sīsū ‘a e tokangá ki he mo‘oni‘i me‘a ko e nofo malí na‘e fakamafai‘i mo fokotu‘u ‘e Sihova. (Mk. 10:2-12) ‘E hoko ha husepāniti mo ha uaifi ko e “kakano pē taha” ‘i ha ha‘i tu‘uloa. Ko e makatu‘unga Fakatohitapu pē ‘e taha ki he vete malí, fakatatau ki he fakamatala ‘a Mātiú, ko e “fehokotaki fakasino ta‘etāú.”—Māt. 19:9.

‘I he ‘ahó ni, ‘oku vakai ‘a e kakai tokolahi ki he nofo malí, ‘o ‘ikai hangē ko Sīsuú, kae hangē ko e vakai ki ai ‘a e kau Fālesí. ‘I he hoko ha palopalema, ‘oku fakavave ‘a e fa‘ahinga ‘i he māmaní ke vete mali. ‘I he tafa‘aki ‘e tahá, ko e ngaahi hoa mali Kalisitiané, ‘oku nau vakai fakamātoato ki he‘enau fuakava malí pea feinga ke iku‘i ‘a e ngaahi faingata‘á ‘i hono ngāue‘aki ‘a e ngaahi tefito‘i mo‘oni ‘a e Tohi Tapú. Hili ‘a e sio ‘i he vitiō ‘Oku Fakafā‘ūtaha‘i ‘e he ‘Ofá mo e Faka‘apa‘apá ‘a e Fāmilí, tali ‘a e ngaahi fehu‘í ni:

• ‘E lava fēfē ke ke ngāue‘aki ‘a e Palōveepi 15:1 ‘i ho‘o nofo malí, pea ko e hā ‘oku mahu‘inga aí?

• ‘E lava fēfē ke ke faka‘ehi‘ehi mei he ngaahi palopalemá ‘i hono ngāue‘aki ‘a e Palōveepi 19:11?

• Kapau ‘oku meimei movete ho‘o nofo malí, ‘i he ‘ikai fakakaukau, ‘‘Oku totonu ke u vete mali?’ ko e hā ‘a e ngaahi fehu‘i ‘oku totonu ke ke fakakaukau ki aí?

• ‘E lava fēfē ke ke hoko ko ha husepāniti pe ko ha uaifi lelei ange ‘i hono ngāue‘aki ‘a e Mātiu 7:12?