1. Naʻe anga-fēfē hono fakaivia ʻa e kau lotu ʻa e ʻOtuá ʻi he kuonga muʻá?

 ʻI HE Folofola ʻa e ʻOtuá ʻoku faʻa fakamatalaʻi ai ʻa e kau tangata faitōnungá ʻoku nau mālohi. Ka naʻa mo e faʻahinga mālohi taha ʻiate kinautolú naʻe ʻikai ke nau ongoʻi mālohi maʻu pē. Ko e fakatātaá, ʻi he ngaahi tuʻunga ʻe niʻihi naʻe ongoʻi ʻe Tuʻi Tēvita naʻá ne “mālohi hangē ha moʻungá,” ka ʻi he ngaahi tuʻunga kehe naʻá ne “hoko ai ʻo mate he ilifiá.” (Saame 30:7) Neongo ko Samisoni naʻá ne mālohi anga-kehe ʻi hono fakaivia ia ʻe he laumālie ʻo e ʻOtuá, naʻá ne ʻiloʻi ka ʻikai ha mālohi mei he ʻOtuá, te ne “hoko ʻo vaivai [peá ne] hangē pē ko e kotoa ʻo e kau tangata kehé.” (Fkm. 14:​5, 6; 16:17) Ko e kau tangata faitōnunga ko ení naʻa nau hoko ʻo mālohi koeʻuhí pē ko Sihova naʻá ne foaki ange iá.

2. Ko e hā naʻe pehē ai ʻe he ʻapositolo ko Paulá naʻá ne vaivai mo mālohi fakatouʻosí? (2 Kolinitō 12:​9, 10)

² Ko e ʻapositolo ko Paulá naʻá ne ʻiloʻi naʻa mo ia tonu naʻá ne fiemaʻu ʻa e mālohi meia Sihová. (Lau ʻa e 2 Kolinitō 12:​9, 10.) Hangē ko e tokolahi ʻo kitautolu, naʻe fāinga ʻa Paula mo e mahamahakí. (Kal. 4:​13, 14) ʻI he taimi ʻe niʻihi, naʻá ne fāinga foki ke fai ʻa e meʻa totonú. (Loma 7:​18, 19) Pea ʻi he taimi ʻe niʻihi naʻá ne loto-moʻua mo ongoʻi taʻepauʻia. (2 Kol. 1:​8, 9) Neongo ia, ʻi he taimi naʻe vaivai ai ʻa Paulá, naʻá ne hoko ʻo mālohi. Anga-fēfē? Naʻe ʻoange ʻe Sihova kia Paula ʻa e mālohi naʻe ʻikai ke ne maʻú. Naʻá ne ʻai ʻa Paula ke ne mālohi.

3. Ko e hā ʻa e ongo fehuʻi te tau tali ʻi he kupu ko ení?

³ ʻOku talaʻofa ʻe Sihova te ne ʻai foki mo kitautolu ke tau mālohi. (1 Pita 5:10) Ka heʻikai lava ke tau ʻamanekina ke maʻu ʻa e mālohi ko iá ʻo taʻefai ha feinga mei heʻetau tafaʻakí. Ke fakatātaaʻí, ko e mīsini ʻo ha meʻalele ʻoku lava ke ne ʻai ia ke ngaʻunu ki muʻa. Kae kehe, kuo pau ke ʻi ai ha fakaʻuli ke ne moloki ʻa e penisiní ke lava ʻo lele ki ha feituʻu. ʻI he tuʻunga meimei tatau, ko Sihova ʻokú ne mateuteu ke ʻomai ʻa e mālohi ʻoku tau fiemaʻú, ka  kuo pau ke tau fou ʻi he ngaahi sitepu ke maʻu ʻaonga mei ai. Ko e hā kuo tokonaki ʻe Sihova ke ʻai kitautolu ke mālohí? Pea ko e hā ʻoku fiemaʻu ke tau faí kae lava ke tau maʻu ʻa e mālohi ko iá? Te tau maʻu ʻa e tali ki he ongo fehuʻi ko ení ʻaki ʻa e lāulea ki he founga naʻe fakaivimālohiʻi ai ʻe Sihova ʻa e toko tolu ʻi he Tohi Tapú—ko e palōfita ko Sioná, Mele ko e faʻē ʻa Sīsuú, pea mo e ʻapositolo ko Paulá. Te tau toe sio foki ki he founga ʻoku hokohoko atu ai hono fakaivimālohiʻi ʻe Sihova ʻene kau sevāniti ʻi he ʻaho ní ʻi he ngaahi founga meimei tatau.

4. ʻE lava fēfē ke tau maʻu ʻa e mālohi meia Sihová?

⁴ Ko e founga ʻe taha ʻe lava ke tau maʻu ai ʻa e mālohi meia Sihová ko e fakaofiofi kiate ia ʻi he lotu. ʻI he tali ki heʻetau ngaahi lotú, ʻe lava ke foaki mai ʻe Sihova “ʻa e mālohi ʻoku mahulu atu ia ʻi he tuʻunga anga-mahení.” (2 Kol. 4:7) ʻE lava ke toe fakaivimālohiʻi foki kitautolu ʻi he taimi ʻoku tau lau ai ʻene Folofolá pea fakalaulauloto ki ai. (Saame 86:11) Ko e pōpoaki ʻa Sihova kiate kitautolu ʻi he Tohi Tapú “ko e koto mālohi.” (Hep. 4:12) ʻI he taimi ʻokú ke lotu ai kia Sihova pea lau ʻene Folofolá, te ke maʻu ai ʻa e mālohi ʻokú ke fiemaʻu ke hoko ʻo kātakí, tauhi maʻu hoʻo fiefiá pe ke fakahoko ha vāhenga-ngāue faingataʻa. Fakatokangaʻi ʻa e founga naʻe fakaivimālohiʻi ai ʻe Sihova ʻa e palōfita ko Sioná.

5. Ko e hā naʻe fiemaʻu ai ʻe he palōfita ko Sioná ʻa e mālohí?

⁵ Naʻe fiemaʻu ʻe he palōfita ko Sioná ʻa e mālohi. Naʻá ne hola mei ha vāhenga-ngāue faingataʻa naʻe ʻoange kiate ia ʻe Sihova. Ko hono olá, naʻe meimei mole ʻene moʻuí ʻi ha fuʻu afā mālohi pea naʻá ne tuku ke ʻi he tuʻunga fakatuʻutāmaki mo e moʻui ʻa hono kaungāfolaú. ʻI hono lī ia mei he vaká, naʻá ne iku ai ki ha feituʻu naʻe teʻeki ke ne ʻi ai ki muʻa—ko e loto kete fakapoʻuli ʻo ha fuʻu ika. ʻOkú ke pehē naʻe fēfē ʻa e ongoʻi ʻa Sioná? Naʻá ne pehē te ne mate ai? Naʻá ne fifili pe kuo liʻaki nai ia ʻe Sihova? Kuo pau pē naʻe ongoʻi loto-moʻua lahi ʻa Siona.

6. Makatuʻunga ʻi he Siona 2:​1, 2, 7, ko e hā naʻá ne fakaivimālohiʻi ʻa Siona lolotonga ʻene ʻi he loto kete ʻo ha ika?

⁶ Ko e hā naʻe fai ʻe Siona ke maʻu ai ʻa e mālohi ʻi he feituʻu lōngonoa mo maomaonganoa ko iá? Naʻá ne lotu. (Lau ʻa e Siona 2:​1, 2, 7.) Neongo naʻá ne talangataʻa kia Sihova, naʻe tuipau ʻa Siona ʻe fanongo ʻa Sihova ki heʻene lotu anga-fakatōkilalo mo fakatomalá. Naʻe toe fakakaukauloto ʻa Siona ki he Folofolá. Ko e hā ʻoku tau lea pehē aí? Ko ʻene lotú, ʻoku hiki ʻi he Siona vahe 2, ʻoku ngāueʻaki ai ʻa e ngaahi lea mo e kupuʻi lea tatau ʻoku hā ʻi he Sāmé. (Ko e fakatātaá, fakafehoanaki ʻa e Siona 2:​2, 5 mo e Saame 69:1; 86:7.) ʻOku hā mahino naʻe ʻiloʻi lelei ʻe Siona ʻa e ngaahi veesi ko iá. Pea ʻi heʻene fakalaulauloto ki ai lolotonga ʻene faingataʻaʻiá, naʻá ne tuipau ai ʻe tokoniʻi ia ʻe Sihova. Ki mui ai, naʻe fakafoki ʻa Siona ki he fonua mōmoá, pea naʻá ne mateuteu ke tali pea fakahoko ʻene vāhenga-ngāue hokó.—Siona 2:10–3:4.

7-8. Naʻe anga-fēfē hono maʻu ʻe ha tokoua ʻe taha ʻi Taiuani ʻa e mālohí lolotonga hono ngaahi ʻahiʻahí?

⁷ Ko e faʻifaʻitakiʻanga ʻa Sioná ʻe lava ke ne tokoniʻi kitautolu ʻi he taimi ʻoku tau foua ai ʻa e ngaahi ʻahiʻahi kehekehe. Ko e fakatātaá, ko Luming, b ko ha tokoua ʻi Taiuani, ʻokú ne fekuki mo e ngaahi mahamahaki mafatukituki. Tānaki atu ki aí, naʻe pau ke ne kātekina mo e fakafepaki anga-fakamālohi mei he fāmilí koeʻuhi ko ʻene tui kia Sihová. ʻOkú ne maʻu ʻa e mālohi meia Sihova fakafou ʻi he lotu mo e ako. “ʻI he taimi ʻe niʻihi, ʻi he malanga hake ʻa e ngaahi palopalemá,” ko ʻene leá ia, “ʻoku ou loto-moʻua tōtuʻa ʻo ʻikai lava ke u maʻu ha nonga feʻunga ke fakahoko ai ʻeku ako fakafoʻituituí.” Ka ʻoku ʻikai ke ne foʻi. “ʻUluakí, ʻoku ou lotu kia Sihova,” ko ʻene leá ia. “Hokó, ʻoku ou tui ʻeku meʻa fanongó pea fanongo ki heʻetau ngaahi hiva ʻo e  Puleʻangá. ʻI he taimi ʻe niʻihi, ʻoku aʻu ʻo u hiva leʻo-siʻi ia kae ʻoua ke u nonga hifo. Pea toki kamata leva ʻeku akó.”

⁸ Kuo fakaivimālohiʻi ʻe he ako fakafoʻituituí ʻa Luming ʻi he ngaahi founga taʻeʻamanekina. Ko e fakatātaá, lolotonga ʻene fakaakeake mei ha tafa lahi, naʻe tala ange ʻe ha neesi kiate ia koeʻuhí ko e siʻisiʻi hono sela toto kulokulá, ʻe fiemaʻu ke ne huhu toto. Ko e pō ki muʻa ke fai hono tafá, naʻe lau ʻe Luming ʻa e talanoa fekauʻaki mo ha tuofefine naʻe fakahoko kiate ia ʻa e tafa tatau. Naʻe tōlalo ange ʻa hono sela toto kulokulá ʻiate ia; neongo ia, naʻe ʻikai ke ne tali ha huhu toto pea naʻe malava ke ne toe sai. Ko e hokosia ko iá naʻá ne fakaivimālohiʻi ʻa Luming ke nofoʻaki faitōnunga.

9. Kapau kuo fakavaivaiʻi koe ʻe ha ʻahiʻahi, ko e hā ʻe lava ke ke faí? (Sio foki ki he fakatātaá.)

⁹ Lolotonga ha ʻahiʻahi, kuó ke ongoʻi loto-moʻua tōtuʻa nai ke fakahaaʻi mahino atu ho tuʻungá ʻi he lotu? Pe ʻokú ke ongoʻi fuʻu vaivai ke ako? Manatuʻi ʻoku mahinoʻi haohaoa ʻe Sihova ho tuʻungá. Ko ia naʻa mo hoʻo fai ha lotu faingofua, ʻe lava ke ke fakapapauʻi te ne foaki atu kiate koe ʻa e meʻa tofu pē ʻokú ke fiemaʻú. (ʻEf. 3:20) Kapau ko hoʻo mamahi fakaesinó pe fakaeongó ʻokú ne ʻai ke faingataʻa kiate koe ke lautohi mo ako, te ke feinga nai ke fanongo ki he ngaahi hiki-leʻo ʻo e Tohi Tapú pe ko e ʻū tohi Fakatohitapú. Te ke ʻiloʻi foki ʻoku ʻaonga ke fanongo ki he taha ʻo ʻetau ngaahi hivá pe sio ʻi ha vitiō ʻi he jw.org. ʻI he lotu kia Sihova pea kumi ki he talí ʻi he ngaahi tokonaki fakalaumālie ʻokú ne ʻai ke ke ala maʻú, ʻokú ke fakaafeʻi ai ia ke ne ʻai koe ke ke mālohi.

10. ʻOku anga-fēfē hono fakaivimālohiʻi kitautolu ʻe hotau fanga tokoua mo e fanga tuofāfine Kalisitiané?

¹⁰ ʻE lava ke ngāueʻaki ʻe Sihova ʻa hotau fanga tokoua mo e fanga tuofāfine Kalisitiané ke fakaivimālohiʻi kitautolu. ʻE lava ke nau “hoko ko ha matavai ʻo e fakafiemālie lahi” ʻi heʻetau fehangahangai mo ha ʻahiʻahi pe fāinga ke fakahoko ha vāhenga-ngāue faingataʻa. (Kol. 4:​10, 11) ʻOku tautefito ʻetau fiemaʻu ʻa e ngaahi kaumeʻá ʻi he lolotonga ʻa e “taimi faingataʻá.” (Pal. 17:17) ʻI he taimi ʻoku tau ongoʻi vaivai aí, ko hotau kaungālotú ʻe lava ke nau tokoniʻi fakaesino, fakaeongo mo fakalaumālie kitautolu. Fakakaukau ki he founga naʻe maʻu ai ʻe Mele, faʻē ʻa Sīsuú, ʻa e mālohi mei he niʻihi kehé.

11. Ko e hā naʻe fiemaʻu ai ʻe Mele ʻa e mālohí?

¹¹ Naʻe fiemaʻu ʻe Mele ʻa e mālohi. Fakakaukau  atu kuo pau pē naʻá ne ongoʻi lōmekina hili ʻene maʻu ha vāhenga-ngāue mafatukituki mei he ʻāngelo ko Kepalelí. Naʻe teʻeki ke ne mali; neongo ia, te ne hoko ʻo feitama. Naʻe ʻikai haʻane taukei ʻi hono ʻohake haʻane fānau tonu, ka naʻe teu ke ne tokangaʻi ʻa e kiʻi tamasiʻi te ne hoko ko e Mīsaiá. Pea koeʻuhi naʻe teʻeki ke mohe ʻa Mele mo ha tangata, ʻe anga-fēfē haʻane fakamatalaʻi kotoa eni ki he tangata naʻá ne teu mali mo iá, ʻa Siosifa?—Luke 1:​26-33.

12. Fakatatau ki he Luke 1:​39-45, naʻe anga-fēfē hono maʻu ʻe Mele ʻa e mālohi naʻá ne fiemaʻú?

¹² Naʻe anga-fēfē hono maʻu ʻe Mele ʻa e mālohi naʻá ne fiemaʻu ke fakahokoʻaki ʻa e vāhenga-ngāue anga-kehe mo mafatukituki ko ení? Naʻá ne kumi ha tokoni mei he niʻihi kehé. Ko e fakatātaá, naʻa ne kole kia Kepaleli ke ne ʻoange ha fakamatala lahi ange fekauʻaki mo e vāhenga-ngāué. (Luke 1:34) Taimi nounou pē mei ai, naʻá ne fononga ki he “feituʻu moʻungaʻiá” ki ha kolo ʻo Siuta ke ʻaʻahi ki hono kāinga ko ʻIlisapesi. Ko e fononga ko iá naʻe tuha moʻoni mo e feingá. Naʻe fakaongoongoleleiʻi ʻe ʻIlisapesi ʻa Mele pea naʻe fakamānavaʻi ia ʻe Sihova ke ne vahevahe atu ha kikite fakalototoʻa fekauʻaki mo e tama teʻeki fanauʻi ʻa Melé. (Lau ʻa e Luke 1:​39-45.) Naʻe pehē ʻe Mele ko Sihova “kuó ne fakahoko ha ngaahi ngāue māfimafi ʻaki hono toʻukupú.” (Luke 1:​46-51) Naʻe fakaivimālohiʻi ʻe Sihova ʻa Mele ʻo fakafou ʻia Kepaleli mo ʻIlisapesi.

13. Naʻe anga-fēfē hono fakapaleʻi ha tuofefine ʻi Polivia ki heʻene kole tokoni ki he kaungālotú?

¹³ Hangē ko Melé, te ke lava foki ʻo maʻu ʻa e mālohi mei he kaungālotú. Ko Dasuri, ko ha tuofefine ʻi Polivia, naʻá ne fiemaʻu ha mālohi pehē. Naʻe ʻiloʻi ko ʻene tamaí naʻá ne maʻu ha mahaki fakatupu mate pea ʻi hono fakatokoto ʻi falemahakí, naʻe loto-lelei ʻa Dasuri ke tokangaʻi ia. (1 Tīm. 5:4) Naʻe ʻikai ke faingofua maʻu pē ia. ʻOkú ne pehē, “ʻI he taimi lahi naʻá ku ongoʻi ʻo hangē heʻikai lava ke u kei hokohoko atú.” Naʻá ne kole ki ha tokoni? ʻI he kamatá naʻe ʻikai ke ne fai pehē. “Naʻe ʻikai ke u loto ke fakahohaʻasi ʻa e fanga tokouá,” ko ʻene fakamatalá ia. “Naʻá ku fakaʻuhinga, ‘Ko Sihova te ne ʻomai ʻa e tokoni ʻoku ou fiemaʻú.’ Ka naʻá ku toki fakatokangaʻi ʻi hono fakamavaheʻi au mei he niʻihi kehé, naʻá ku feinga ke fakaleleiʻi toko taha pē ʻeku ngaahi palopalemá.” (Pal. 18:1) Naʻe fili ʻa Dasuri ke tohi ki ha niʻihi hono ngaahi kaumeʻá pea fakamatala kiate kinautolu hono tuʻungá. “ʻOku ʻikai lava ke u fakamatalaʻi ʻa e lahi hono fakaivimālohiʻi au ʻe hoku ngaahi kaungā-Kalisitiane ʻofeiná,” ko ʻene leá ia. “Naʻa nau ʻomai ʻa e meʻakai ki he falemahakí pea vahevahe mai ʻa e ngaahi veesi Tohi Tapu fakafiemālie. Ko ha meʻa lelei ia ke ʻiloʻi ʻoku ʻikai ke tau tuēnoa. ʻOku tau kau ki he fāmili tokolahi ʻo Sihová—ko ha fāmili ʻoku nau loto-lelei ke tokoniʻi koe, tangi fakataha mo koe, pea faitau fakataha mo koe.”

14. Ko e hā ʻoku totonu ai ke tau tali ʻa e tokoni mei he kau mātuʻá?

¹⁴ Ko e founga ʻe taha ʻoku tokonaki mai ai ʻe Sihova ʻa e mālohí ko e kau mātuʻá. Ko e ngaahi meʻaʻofa kinautolu ʻokú ne ngāueʻaki ke fakaivimālohiʻi mo fakaivifoʻou koe. (ʻAi. 32:​1, 2) Ko ia ʻi he taimi ʻokú ke ongoʻi loto-moʻua aí, vahevahe hoʻo ngaahi hohaʻá ki he kau mātuʻá. ʻI heʻenau ʻoatu ha tokoní, tali loto-houngaʻia ia. Ko Sihova ʻe lava ke ne ʻai koe ke ke mālohi, fakafou ʻiate kinautolu.

15. Ko e hā ʻa e ʻamanaki ʻoku koloaʻaki ʻe he kotoa ʻo e kau Kalisitiané?

¹⁵ Ko ʻetau ʻamanaki makatuʻunga ʻi he Tohi Tapú ʻe lava ke ne fakafonu kitautolu ʻaki ʻa e mālohi. (Loma 4:​3, 18-20) ʻI he tuʻunga ko e kau Kalisitiane, ʻoku tau maʻu ʻa e ʻamanaki mahuʻinga ko e moʻui taʻengatá—tatau ai pē pe ʻi he palataisi ʻi he māmaní pe ʻi he Puleʻanga fakahēvaní. ʻOku fakaivimālohiʻi kitautolu ʻe  heʻetau ʻamanakí ke kātekina ʻa e ngaahi ʻahiʻahí, malangaʻi ʻa e ongoongo leleí, pea fakahoko ʻa e vāhenga-ngāue kehekehe ʻi he fakatahaʻangá. (1 Tes. 1:3) Ko e ʻamanaki tatau naʻá ne fakaivimālohiʻi ʻa e ʻapositolo ko Paulá.

16. Ko e hā naʻe fiemaʻu ai ʻe he ʻapositolo ko Paulá ʻa e mālohí?

¹⁶ Naʻe fiemaʻu ʻe Paula ʻa e mālohi. ʻI heʻene tohi ki he kau Kolinitoó, naʻá ne fakahoa ʻa ia tonu ki ha ipu ʻumea vaivai. Naʻe “lōmia” ia, “hēhētuʻu,” “fakatangaʻi,” pea “lī . . . ki lalo.” Ko ʻene moʻuí naʻe aʻu ʻo ʻi he tuʻunga fakatuʻutāmaki. (2 Kol. 4:​8-10) Naʻe hiki ʻe Paula ʻa e ngaahi lea ko iá ʻi heʻene fononga fakamisinale hono tolú. Ka naʻe ʻikai nai ke ne ʻiloʻi ʻi he taimi ko iá, ko ʻene faingataʻaʻiá naʻe teʻeki ke ʻosi. Te ne fehangahangai mo e anga-fakamālohi ʻa ha fuʻu kakai, puke ia, ko ha vaka tūkia pea mo e tuku pilīsone.

17. ʻI he fehoanaki mo e 2 Kolinitō 4:​16-18, ko e hā naʻá ne fakaivimālohiʻi ʻa Paula ke kātekina ʻa e ngaahi ʻahiʻahí?

¹⁷ Naʻe maʻu ʻe Paula ʻa e mālohi ke kātekina ʻaki ʻa e tokangataha ki heʻene ʻamanakí. (Lau ʻa e 2 Kolinitō 4:​16-18.) Naʻá ne tala ange ki he kau Kolinitoó neongo kapau naʻe “fakaʻaʻau ke mole atu” hono sino fakakakanó, heʻikai te ne fakaʻatā ia ke ne fakalotosiʻiʻi ia. Naʻe tokangataha ʻa Paula ki hono kahaʻú. Ko ʻene ʻamanaki ke moʻui taʻengata ʻi hēvaní naʻe “mātuʻaki lahi faufaua ange” ia, ʻo tuha mo ha faʻahinga mamahi pē naʻá ne hokosia. Naʻe fakalaulauloto ʻa Paula ki he ʻamanaki ko iá, pea ko e olá, naʻá ne ongoʻi naʻe “fakafoʻou ia ʻi he ʻaho ki he ʻaho.”

18. Kuo anga-fēfē hono fakaivimālohiʻi ʻe he ʻamanakí ʻa Tihomir mo hono fāmilí?

¹⁸ Ko Tihomir, ko ha tokoua ʻi Pulukālia, ʻokú ne maʻu ʻa e mālohi mei heʻene ʻamanakí. ʻI he ngaahi taʻu siʻi kuo maliu atú, ko hono tokoua siʻisiʻí, ʻa Zdravko, naʻá ne mate ʻi ha fakatuʻutāmaki ʻi he halá. ʻI he hili ha vahaʻa taimi mei ai, naʻe fāinga ʻa Tihomir mo e mamahi lahi. Ke fekuki mo iá, ko ia mo hono fāmilí naʻa nau sioloto atu pe ʻe fēfē ʻa e toetuʻú. ʻOkú ne pehē: “Ko e fakatātaá, ʻoku mau lāulea ki he feituʻu te mau fetaulaki ai mo Zdravko, ko e meʻakai te mau ngaahi maʻaná, ko hai ʻe fakaafeʻi ki hono talitali ia ʻi heʻene toetuʻu maí, pea mo e meʻa te mau tala ange kiate ia fekauʻaki mo e ngaahi ʻaho fakaʻosí.” ʻOku pehē ʻe Tihomir ko e tokangataha  ki heʻenau ʻamanakí ʻokú ne fakaivimālohiʻi hono fāmilí ke nau hanganaki kātekina pea ke hanganaki tatali ki he taimi ʻa Sihova ke fokotuʻu mai ai hono tokouá.

19. Ko e hā ʻe lava ke ke fai ke fakaivimālohiʻi hoʻo ʻamanakí? (Sio foki ki he fakatātaá.)

¹⁹ ʻE lava fēfē ke ke fakaivimālohiʻi hoʻo ʻamanakí? Ko e fakatātaá, kapau ʻokú ke maʻu ʻa e ʻamanaki ke moʻui taʻengata ʻi he māmaní, lau ʻa e fakamatala ʻi he Tohi Tapú fekauʻaki mo e Palataisí pea fakalaulauloto ki ai. (ʻAi. 25:8; 32:​16-18) Fakakaukauloto atu ki he tuʻunga ʻe ʻi ai ʻa e moʻuí ʻi he māmani foʻoú. Sioloto atu ʻokú ke ʻi ai. Ko hai ʻokú ke sio ki aí? Ko e hā ʻa e ngaahi ongo ʻokú ke fanongo ki aí? ʻOku fēfē hoʻo ongoʻí? Ke tokoni ki hoʻo siolotó, vakai ki he fakatātā ʻi heʻetau ʻū tohí ʻoku hā ai ʻa e Palataisí pe sio ʻi ha vitiō hiva, hangē ko e Māmani Foʻou Teu ke Hoko Maí, Kuo Vavé Ni Mai pe Sioloto Atu ki ha Taimi. Kapau ʻoku tau tauhi maʻu ʻi hotau ʻatamaí ʻa e ʻamanaki ki he māmani foʻoú, ko ʻetau ngaahi palopalemá ʻe hoko ʻo “fakataimi pē mo maʻamaʻa.” (2 Kol. 4:17) Ko Sihova te ne ʻai koe ke ke mālohi, fakafou ʻi he ʻamanaki kuó ne ʻoatu kiate koé.

20. Naʻa mo e taimi ʻoku tau ongoʻi vaivai aí, ʻe lava fēfē ke tau maʻu ʻa e mālohí?

²⁰ Naʻa mo e taimi ʻoku tau ongoʻi vaivai aí, “ʻi he ʻOtuá te tau maʻu ai ʻa e mālohí.” (Saame 108:13) Kuo ʻosi tokonaki atu ʻe Sihova ʻa e meʻa ʻokú ke fiemaʻu ke maʻu ai ʻa e mālohi meiate iá. Ko ia ʻi he taimi ʻokú ke fiemaʻu ai ha tokoni ke fakahoko ha vāhenga-ngāue, ke kātekina ha ʻahiʻahi pe ke tauhi maʻu hoʻo fiefiá, fakaofiofi kia Sihova ʻi he lotu tōtōivi pea kumi ki heʻene tatakí fakafou ʻi he ako fakafoʻituituí. Tali ʻa e fakalototoʻa mei ho fanga tokoua mo e fanga tuofāfine Kalisitiané. Tauhi hoʻo ʻamanakí ke māʻalaʻala mo moʻoni ʻi hoʻo fakakaukaú. Pea te ke ‘fakaivimālohiʻi ai koe ʻaki ʻa e mālohi kotoa ʻo fakatatau ki he māfimafi lāngilangiʻia ‘o e ʻOtuá koeʻuhí ke mou kātekina ʻa e meʻa kotoa pē ʻi he kātaki mo e fiefia.’—Kol. 1:11.