Fakapipiko? Pe fakaivifo‘ou? ‘E fēfē ho‘o lau Tohi Tapú? Ko e lahi tahá ‘oku makatu‘unga ia mei ho‘o founga lautohí. Tau vakai angé ki he me‘a ‘e lava ke ke fai ke fakamānako mo fakafiefia ange ai ho‘o lautohí.

Fili ha liliu Tohi Tapu alafalala‘anga ‘i onopooni. Kapau te ke lau ‘a e fakamatalá ‘oku ‘i ai ha ngaahi fo‘i lea motu‘a mo faingata‘a ke mahino‘i ‘e ngalingali he‘ikai te ke fiefia ke lau ia. Ko ia kumi ha Tohi Tapu ‘oku ngāue‘aki ai ‘a e lea ‘oku faingofua ke mahino‘i ‘a ia ‘e a‘u ki ho lotó. Neongo ia, ‘i he taimi tatau ‘oku totonu ke sivisivi‘i fakalelei pe ‘oku tonu ‘a e liliú. *

Ngāue‘aki ‘a e tekinolosia ‘i onopōní. ‘I he ‘ahó ni ‘oku ‘ikai ngata pē hono ma‘u ‘a e Tohi Tapú ‘i ha takainga tohi, tatau ‘osi pulusi ka ‘oku toe ma‘u ia ‘i ha tatau faka‘ilekitulōnika. Ko e ngaahi Tohi Tapu ‘e ni‘ihi ‘oku lava ke lau ia ‘i he ‘initanetí pe hiki ia ki he komipiutá, tepiletí pe ngaahi telefoni to‘oto‘ó ke lau fakafo‘ituitui ia. ‘Oku ‘i ai ha ngaahi founga fo‘ou ‘o kau ai ‘a e ngaahi me‘angāue ko ení ‘a ia ‘oku lava ai ke vave ho‘o vakai‘i ‘a e ngaahi veesi kehe ‘i he Tohi Tapú ‘i ha kaveinga tatau pe na‘a mo hano fakahoa ‘o e ngaahi liliu kehé. Kapau ‘okú ke sai‘ia ange ke fanongo pē ki ai kae ‘ikai lau, ‘oku toe ala ma‘u ‘a e Tohi Tapú ‘i ha tatau kuo hiki-le‘o. ‘Oku sai‘ia ‘a e kakai tokolahi ke fanongo ki ai lolotonga ha‘anau fefononga‘aki, fai e foó pe fai ha fa‘ahinga ngāue ‘oku kei lava pē ke fanongo ki ai. Ko e hā ‘oku ‘ikai ke ke ‘ahi‘ahi‘i ai ‘a e founga ‘oku fe‘ungamālie mo koé?

Ngāue‘aki ‘a e ngaahi me‘angāue ki he ako Tohi Tapú. Ko e ngaahi me‘angāue ki he ako Tohi Tapú  ‘oku lava ke ne tokoni‘i koe ke ma‘u ‘aonga lahi ange ai ‘i ho‘o lautohí. ‘Oku ‘i ai ha ngaahi mape ‘i he ngaahi fonua ‘i he Tohi Tapú, ‘a ia ‘oku lava ke ne tokoni‘i koe ke ke ‘ilo‘i ‘a e feitu‘u ‘i he Tohi Tapú ‘okú ke laú pea ‘ai ke mo‘oni ange kiate koe ‘a e ngaahi me‘a ‘oku hoko aí. Ko e ngaahi kupu ‘o hangē ko ia ‘oku ‘i he makasini ko ení pe ko ia ‘i he “Bible Teachings” ‘i he uepisaiti jw.org, ‘oku lava ke ne tokoni‘i koe ke ke ‘ilo‘i ‘a e ‘uhinga ‘o e ngaahi konga lahi ‘i he Tohi Tapú.

Fulifulihi ho‘o founga lautohí. Kapau ‘okú ke lau ‘a e Tohi Tapú mei he takafi ‘e tahá ki he‘ene ‘osi ‘e hā ngali fakapipiko, ko e hā ‘oku ‘ikai ‘ai ai ke fakamānako ange ho‘o lautohí ‘aki ‘a e kamata lau ‘a e konga ‘oku fakamānako taha kiate koé? Kapau ‘okú ke loto ke ‘ilo‘i ‘a e kakai ‘iloa ‘i he Tohi Tapú, ‘e lava ke ke kamata ‘i hono lau ‘a e ngaahi vahe ‘oku fekau‘aki mo kinautolú. ‘Oku ‘i ai ha sīpinga ‘e ua ‘oku ‘asi ‘i he puha, “ Fekumi ke ‘Ilo‘i ‘a e Kakai ‘i he Tohi Tapú.” Pe mahalo nai te ke sai‘ia ke lau ‘a e Tohi Tapú fakafou ‘i ha ngaahi kaveinga pe ko ha ngaahi me‘a na‘e hoko hokohoko. Ko e hā ‘oku ‘ikai ‘ahi‘ahi‘i ai ha taha ‘o e ngaahi foungá ni?