Ko e Tohi Tapú ‘oku ‘ikai ko ha tohi anga-maheni pē ia. ‘Oku ‘i ai ‘a e fale‘i mei hotau Tokotaha-Fakatupú. (2 Tīmote 3:16) ‘Oku lava ke ‘aonga lahi kiate kitautolu ‘a e ngaahi pōpoaki ‘i aí. Ko e mo‘oni, ‘oku pehē ‘e he Tohi Tapú: “Ko e folofola ‘a e ‘Otuá ‘oku mo‘ui pea ko e koto mālohi.” (Hepelū 4:12) ‘Oku ‘i ai hono mālohi ke fakalelei‘i ‘etau mo‘uí ‘i ha founga tefito ‘e ua—‘omai ‘a e tataki ki he‘etau mo‘ui ‘i he ‘aho taki taha ‘i he taimí ni pea tokoni‘i kitautolu ke ‘ilo‘i ‘a e ‘Otuá mo ‘ene ngaahi tala‘ofá.—1 Tīmote 4:8; Sēmisi 4:8.

Fakalelei‘i ho‘o mo‘uí he taimí ni. ‘Oku lava ke tokoni ‘a e Tohi Tapú ki he ngaahi me‘a fakafo‘ituitui mafatukitukí. ‘Oku ‘omai ‘a e fale‘i ‘aonga ‘o fekau‘aki mo e ngaahi me‘á ni.

•   Vaha‘angatae mo e ni‘ihi kehé.​—‘Efesō 4:31, 32; 5:22, 25, 28, 33.

• Mo‘ui lelei fakaeongo mo fakaesino.​—Saame 37:8; Palōveepi 17:22.

• Fakamahu‘inga‘i ‘a e ngaahi ‘ulungaanga tāú.​—1 Kolinitō 6:9, 10.

• Tu‘unga faka‘ekonōmiká.​—Palōveepi 10:4; 28:19; ‘Efesō 4:28. *

Ko ha ongo me‘a mali kei talavou ‘i ‘Ēsia na‘á na hounga‘ia lahi ‘i he mahu‘inga ‘o e ngaahi fale‘i ‘i he Tohi Tapú. Hangē ko ha ngaahi hoa mali fo‘ou ‘oku nau fāinga ‘i he‘enau fe‘unuaki honau anga‘itangatá ke hoa mo e anga‘itangata ‘a e tokotaha ‘e tahá pea hoko ‘o fetu‘utaki tau‘atāina. Ka na‘a nau kamata ke ngāue‘aki ‘a e me‘a na‘a nau lau ‘i he Tohi Tapú. Ko e hā ‘a e olá? Ko ha husepāniti ko Vicent, ‘okú ne pehē: “Ko e me‘a na‘á ku lau ‘i he Tohi Tapú na‘e tokoni ia ke u fekuki mo e ngaahi palopalema ‘i he‘ema nofo malí ‘i ha founga anga-‘ofa. Ko e mo‘ui ‘o fehoanaki mo e Tohi Tapú kuó ne ‘omai kia kimaua ha mo‘ui fakafiefia.” Ko hono uaifí ko Annalou, na‘á ne loto-tatau: “Ko hono lau ‘a e ngaahi fa‘ifa‘itaki‘anga ‘i he Tohi Tapú na‘e tokoni‘i kimaua. ‘I he taimí ni ‘oku ou ongo‘i fiefia mo nonga ‘i he‘ema nofo malí pea mo ‘ema ngaahi taumu‘a ‘i he mo‘uí.”

Hoko ‘o ‘ilo‘i ‘a e ‘Otuá. Tuku kehe ‘ene fakamatala ‘o fekau‘aki mo e nofo malí, na‘e toe pehē ‘e Vicent: “Ko hono lau ‘a e Tohi Tapú, ‘oku ou ofi ange ai kia Sihova ‘i ha toe taimi ki mu‘a.” Ko e me‘a na‘e fakatokanga‘i ‘e Vicent na‘e fakahangataha ki ha me‘a mahu‘inga—​‘a ia ko e Tohi Tapú ‘oku lava ke ne tokoni‘i koe ke ‘ilo‘i ‘a e ‘Otuá. ‘I hono fai ení, ‘oku ‘ikai ngata pē ho‘o ma‘u ‘aonga mei he‘ene fale‘í ka ‘oku toe lava heni ke ke ‘ilo‘i ai ia ko ha kaume‘a. Pea te ke sio ai ‘okú ne fakahaa‘i ‘a e ngaahi fakaikiiki ki ha kaha‘u ‘oku lelei ange, ko ha taimi ‘oku lava ke ke fiefia ‘i he “mo‘ui mo‘oní”—​‘a ia ‘e tu‘uloa. (1 Tīmote 6:19) Ko e me‘a eni ‘oku ‘ikai ha toe tohi ia te ne ‘omai.

Kapau ‘okú ke fokotu‘utu‘u ke lau ‘a e Tohi Tapú pea hokohoko atu, te ke lava mo koe ‘o ma‘u ‘aonga—​‘i hono fakalelei‘i ho‘o mo‘uí he taimí ni pea hoko ‘o ‘ilo‘i ‘a e ‘Otuá. Kae kehe, ‘i ho‘o lau ‘a e Tohi Tapú, ‘e lahi nai ha ngaahi me‘a te ke fehu‘ia. Pea kapau te ke fai pehē, manatu‘i ‘a e fa‘ifa‘itaki‘anga lelei ‘a e ‘ōfisa ‘Itiopeá ‘a ia na‘e mo‘ui ‘i he ta‘u ‘e 2,000 kuohilí. Na‘á ne ‘eke ha ngaahi fehu‘i lahi fekau‘aki mo e Tohi Tapú. ‘I he ‘eke ange pe na‘á ne mahino‘i ‘a e me‘a na‘á ne laú, na‘á ne tali: “‘E lava fēfē ke faifai ange peá u ‘ilo‘i, ‘o ka ‘ikai ‘i ai ha taha ke ne tataki au?” * Na‘á ne tali leva ha tokoni mei ha tokotaha na‘e ‘osi taau ko ha faiako Tohi Tapu, ko Filipe, ko e ākonga ia ki mu‘a ‘a Sīsū. (Ngāue 8:30, 31, 34) ‘I he founga meimei tatau, kapau ‘okú ke sai‘ia ke ‘ilo lahi ange ki he Tohi Tapú, ‘oku mau fakaafe‘i koe ke fakafonu ha foomu kole ‘i he ‘initanetí ‘i he www.pr418.com pe tohi ki he tu‘asila ofi taha ‘oku hā ‘i he makasini ko ení. Te ke lava foki ‘o fetu‘utaki ki he Kau Fakamo‘oni ‘a Sihova ‘oku ofi atu kia koé pe ‘a‘ahi ki he Fale Fakataha‘anga ‘i ho feitu‘ú. Fēfē ke lau e Tohi Tapú pea tuku ia ke ne tataki ho‘o mo‘uí ki ha tu‘unga ‘oku lelei angé?