Ko Sihova ko e ʻOtuá ʻa e Matavai ʻo e moʻuí. (Saame 36:9) ʻIkai nai ʻoku feʻungamālie, he ko e ʻOtua tatau pe te ne toe fakafoki ʻa e moʻuí ki he faʻahinga naʻe maté? ʻOku fakapapauʻi mai ʻe he Tohi Tapú te ne fakahoko eni ʻi he kahaʻú. (Lau ʻa e Ngāue 24:15) Ka ko e hā te ne fakahoko ai ení?

Ko e muʻaki taumuʻa hotau Tokotaha Fakatupú ki he tangatá ke moʻui taʻengata ʻi he māmaní. (Sēnesi 1:31; 2:15-17) Ko e meʻa tofu pē eni ʻokú ne finangalo ki he tangatá. ʻOkú ne mamahi ʻi he vakai ki he ngaahi meʻa ʻoku tau fekuki mo iá—ko e moʻui ʻoku fonu ʻi he mamahi pea taimi nounou pē.—Lau ʻa e Siope 14:1, 14, 15.

Naʻe fakatupu ʻe he ʻOtuá ʻa e tangatá ke nofo ʻi hēvaní? ʻIkai. Naʻe fakatupu ʻe he ʻOtuá ʻa e kau ʻāngeló ke nofo ʻi hēvani. Naʻá ne fakatupu ʻa e tangatá ke nofo ʻi he māmaní. (Sēnesi 1:28; Siope 38:4, 7) ʻI he meʻa ko iá, fakakaukau atu ki he faʻahinga naʻe fokotuʻu ʻe Sīsuú. Naʻá ne fakafoki mai ʻa e kakaí ke moʻui ʻi heni ʻi he māmaní. ʻE pehē pē, ko e tokolahi taha ʻe fokotuʻu mai ke moʻui he māmaní ʻi he kahaʻú.—Lau ʻa e Sione 5:28, 29; 11:44.

Kae kehe, ko e ʻOtuá te ne fili ha niʻihi ke moʻui ʻi hēvani, ʻa ia te nau maʻu ʻa e ngaahi sino laumālie. (Luke 12:32; 1 Kolinitō 15:49, 50) Ko e faʻahinga te nau moʻui ʻi hēvaní te nau pule fakataha mai mo Kalaisi ki he māmaní.—Lau ʻa e Fakahā 5:9, 10.