Yeremiya 15:1-21
15 Pavuli paki, Yehova wangundikambiya kuti: “Chinanga Mozesi ndi Samuyeli angama pa masu pangu,+ ndingaŵachitiya lisungu cha ŵanthu yaŵa. Atuzgepu pa masu pangu. Aleki akengi.
2 Ndipu asani atikufumba kuti, ‘Tiluti pani?’ uŵakambiyi kuti, ‘Yehova wakamba kuti:
“Yo watenere kufwa ndi mulili wakubaya, wafwi ndi mulili wakubaya!
Yo watenere kufwa ndi lipanga, wafwi ndi lipanga!+
Yo watenere kufwa ndi nja, wafwi ndi nja!
Ndipu yo watenere kutoleke ku ukapolu, watoleke ku ukapolu!”’+
3 “‘Ndazakuŵatumiya masoka nganayi,’*+ Yehova ndiyu wakamba, ‘lipanga kuti liŵabayi, agalu kuti aŵakwekweti, viyuni vamude kweniso vinyama vamudondu kuti viŵamezi ndi kuŵananga.+
4 Ndipu ndiŵasambusengi chinthu chakuchitiska mantha ku maufumu ngosi nga pacharu chapasi+ chifukwa cha vinthu vo Manasi, mwana waku Hezekiya, fumu ya ku Yuda, wanguchita mu Yerusalemu.+
5 Ndiyani yo wakulengiyengi lisungu, yiwi Yerusalemu,Ndiyani yo wakuchitiyengi chitima,Ndipuso ndiyani yo walekengi kufumba umoyu waku?’
6 ‘Wandileka,’ Yehova ndiyu wakamba.+
‘Ulutirizga kundilazgiya msana.*+
Ndikutambasuliyengi janja langu ndi kukunanga.+
Ndavuka kukuchitiya lisungu.
7 Ndazakuŵawulusa ndi chifoloku mumageti nga mucharu cho.
Ndazamubaya ŵana ŵawu.+
Ndazamunanga ŵanthu ŵangu,Chifukwa chakuti akana kuweku ku nthowa zawu.+
8 Vyoko vawu vazamuja vinandi ukongwa pa masu pangu kuluska mchenga wa munyanja.
Ndazamukuza ndi wakubaya yo wazakuŵayukiya msana pakati, wazamuyukiya ama ndi anyamata.
Ndazamuchitiska kuti chimtimbaheka kweniso mantha viŵawiyi mwamabuchibuchi.
9 Munthukazi yo wangubala ŵana 7, wazinduka;Iyu wasuzgika kututa.
Lumwi laki lasere kweche msana,Ndipu walengeseka ndi kuchita soni.’*
‘Ŵanthu amanavi wo ajaku pakati pawuNdiŵaperekengi ku lipanga pa masu pa arwani ŵawu,’ Yehova ndiyu wakamba.”+
10 Soka kwaku ini, yimwi ama, chifukwa mukubala ini,+Munthu yo charu chosi chilimbana nayu ndi kupindana nayu.
Ndikubwerekesapu vinthu cha pamwenga kubwereka vinthu.Kweni wosi atinditemba.
11 Yehova wakamba kuti: “Ndikuteŵetiyengi nadi kuti ndikuchitiyi vinthu vamampha;Nditondekengi cha kukuwovya pa nyengu ya soka,Pa nyengu yo ukumana ndi masuzgu chifukwa cha arwani ŵaku.
12 Kumbi walipu yo wangavikita chisulu,Chisulu chakutuliya kunkhondi* kweniso mkuŵa?
13 Vinthu vaku kweniso chuma chaku ndazakuvipereka kwa arwani ŵaku,+Ndazakuŵapaska vawezi, chifukwa cha maubudi ngaku ngosi muvigaŵa vaku vosi.
14 Ndazakuvipereka kwa arwani ŵakuKuti aluti navu kucharu cho utichiziŵa cha.+
Pakuti ukali wangu wabuska motu,Ndipu ukole kuti ukuwotcheni.”+
15 Muziŵa, yimwi Yehova,Ndikumbukeni ndi kundiŵanaŵaniya.
Weziyani nduzga ŵanthu wo atinditombozga.+
Mungazomerezanga cha kuti ndimali chifukwa chakuti mukwiya liŵi cha.
Ziŵani kuti ndinyozeka chifukwa chaku yimwi.+
16 Mazu nginu ngangusanirika, ndipu ndingungarya;+Ndipu mazu nginu nganguja chinthu chakuzayiya ndipuso chakukondwesa mumtima mwangu,Chifukwa ndadanika ndi zina linu, yimwi Yehova, Chiuta wa mizinda.
17 Ndija cha pakati pa ŵanthu akuzaya ndi kukondwa nawu.+
Ndija pakundija chifukwa chakuti janja linu le paku ini,Pakuti mwandizaza ndi ukali.*+
18 Ntchifukwa wuli urwirwi wangu ulutiriya ndipuso chilonda changu ntchambula kuchizgika?
Chikana kuchizgika.
Kumbi mujengi nge chisimi chakupusisaCho chingathembeka cha?
19 Mwaviyo, Yehova wakamba kuti:
“Asani uweriyengi kwaku ini, mbwenu ndikuyanjengi,Ndipu umengi pa masu pangu.
Asani upatuwengi vinthu vakuzirwa ku vinthu vambula ntchitu,Ujengi nge mulomu wangu.*
Ŵanthu azamung’anamukiya kwaku yiwi,Kweni yiwi wazamung’anamukiyaku cha kwaku yiwu.”
20 “Ndikuchitiskengi kuti uje mpanda wamkuŵa wakukho ku ŵanthu yaŵa.+
Azamulimbana nawi,Kweni azakukuthereska cha,+Pakuti ini nde nawi, kuti ndikutaski ndi kukupozomoska,” Yehova ndiyu wakamba.
21 “Ndipu ndazakukutaska mu janja la muheniKweniso ndazakukuwombo pa chikufi cha munthu wankhaza.”
Mazu Ngam'mphata
^ Yapa pangafwatulikiya so kuti, “vyeruzgu vinayi.”
^ Yapa pangafwatulikiya so kuti, “Ulutirizga kwenda chavuli.”
^ Yapa pangafwatulikiya so kuti, “Ndipu lalengeseka ndi kuchita soni.”
^ Anyaki akamba kuti, “kumpotu.”
^ Pamwenga kuti, “ndi uthenga wa kuchenya.”
^ Pamwenga kuti, “Ulongorongi mumalu mwaku ini.”
