Lipoti la Apharazgi a Ufumu

Wanguziŵa Chifukwa cho Yehova Wakutilenge

YESU watiziziŵa mbereri zaki. (Yohane 10:14) Munthu waguzikiya mugulu la Akhristu asani walongo kuti we ndi mtima wamampha ndipuso watanja chimangu ndi urunji. Nge mo venge ndi munthukazi munyaki wa ku Belgium, Yesu watovya munthu waviyo kuti waziŵi chifukwa cho Yehova wakutilenge. Vwisiyani nkhani ya munthukazi mwenuyu:

“Pa nyengu yo Akaboni aku Yehova agong’osanga pachisasa, ndipu ndasuzgika maŵanaŵanu ukongwa ndipu ndakhumbanga kujibaya. Ndingukondwa ukongwa kuvwa achindikonkhoske kuti masuzgu nga mucharu chakutama ichi ngamalengi. Kweni vingundikondwesa cha kuvwa kuti Chiuta ndiyu wangamalisengi. Ndinguleka kuluta kutchalitchi vyaka 8 vo vajumpha chifukwa ndinguguŵa ndi vinthu vachinyengu vo ndawonanga kwenuku. Chinanga kuti venga viyo, ndinguwona kuti vo Akaboni akambanga vauneneska ndipu ndinguwamu kuti vingachitika cha kuja kwambula Chiuta.

“Ntchachitima kuti Akaboni ŵati andiyende kwa maulendu ngamanavi, tinguleka kuwonana. Ndingwamba kujiwona kuti nde wambula kwenere. Ndakweŵanga mapaketi ngaŵi nga foja pa zuŵa, kweniso ndingwamba kugwiriskiya ntchitu munkhwala wakutimbanyizga wongu. Ndingwamba kuchita vamizimu chifukwa ndakhumbanga kukambiskana ndi agogu anthulumi wo akufwa. Kweni kuchita venivi kunguchitiska kuti viŵanda viyambi kundiyukiya ndi usiku, ndipu ndachitanga mantha ukongwa! Ivi vinguchitika kwa myezi ndithu. Mazulu ngengosi asani ndakumbuka pe kuti ndingonengemu ndija munyumba, ndachitanga mantha uheni.

“Zuŵa linyaki ndinguŵanaŵana kuti ndinyolopu waka malundi. So ndingusankha kuti ndiyendi nthowa yinyaki kuleka yo ndayanjanga kwenda. Ndichiyenda ndingufika pafupi ndi malu nganyaki po penga ntchitu yikulu yakuzenga. Ndinguzizwa ndati ndawona kuti pe ŵanthu anandi. Ndati ndafika pafupi, ndinguwona kuti Mbakaboni aku Yehova ndipu azenga Nyumba ya Ufumu. Ndingukumbuka Akaboni wo azanga kunyumba kwangu ndipu ndinguŵanaŵana kuti vingaja umampha ukongwa asani pacharu chosi ŵanthu angaja nge ŵanthu ŵenaŵa.

“Ndakhumbisiskanga kuti mphanyi Akaboni anguza so kunyumba ndipu ndingukambiskana ndi ŵanthu wo agwiranga ntchitu pamalu ngenanga. Ndingupemphera kwaku Chiuta, ndipu pati pajumpha mazuŵa 10, munthu yuwa wanguza pakwamba kunyumba, wanguza so. Iyu wangundipempha kuti tilutirizgi kusambira Bayibolu, ndipu ndinguzomera. Nyengu yeniyo, iyu wangundidaniya ku maunganu ku Nyumba ya Ufumu. Ndingukana cha. Vo ndinguchiwona, venga va chiwiyi kwa ama! Kwa nyengu yitali ndafufuzanga ŵanthu wo atanjana ndipuso akondwa. Pa nyengu iyi ndinguŵasaniya!

“Pavuli paki, ndingwamba kuluta ku maunganu ngosi. Pati pajumpha masabata ngatatu, ndinguleka kukweŵa. Ndingutaya mabuku ngangu ngakukwaskana ndi kusanda nyenyezi kweniso ndingutaya vimbali va sumu zasataniki vo ndenga navu. Ndingujivwa kuti ndayamba kutelemuka mumanja mwa viŵanda. Ndingunozga vinthu pa umoyu wangu mwakukoliyana ndi fundu za mu Bayibolu. Pati pajumpha myezi yitatu, ndingwamba kupharazga uthenga wamampha. Pati pajumpha myezi 6, ndingubatizika. Ndipu pati pajumpha mazuŵa ngaŵi kutuliya po ndingubatizikiya, ndingwamba upayiniya wakovya.

“Nditimuwonga ukongwa Yehova chifukwa cha vamampha vosi vo wandichitiya. Sonu ndiziŵa chifukwa cho Chiuta wakutilenge. Hinya, zina laku Yehova nkhanyumba kakuthopoka kakukho ko ndikubisamamu kuti ndivikiliriki. (Nthanthi 18:10) Nditijivwa nge yo wakulembaku buku la Salimo pa nyengu yo walembiyanga Salimo 84:10 kuti: ‘Kuja zuŵa limoza mumabalaza nginu nkhwamampha ukongwa kuluska kuja mazuŵa 1,000 kumalu nganyaki! Ndasankha kuma pakhomu la nyumba yaku Chiuta wangu Mumalu mwakuja mumahema nga ŵanthu aheni.’”

Munthukazi wa mtima wamampha uyu wakusaniya likondwa. Munthu weyosi wa mtima wamampha yo wafufuza Yehova, nayu wangasaniya likondwa.