Bayibolu Lisintha Ŵanthu

KUMBI ntchinthu wuli cho chinguchitiska munthu munyaki yo wangusambizikapu uneneska ndi apapi ŵaki kuti wawere kwaku Yehova? Kumbi wachinyamata munyaki wanguchita wuli kuti wasaniyi munthu yo wakhumbisiskanga kuti wamuwonengi nge awisi? Ŵerengani nkhani iyi kuti muvwi vo yiwu angukamba.

“Ndakhumbikanga kuwere kwaku Yehova.”—ELIE KHALIL

NDIKUWA MU: 1976

CHARU CHO NDIKUWIYA: CYPRUS

MBIRI YANGU: NDENGA MWANA WAKUSELERE NDI VACHARU

UMOYU WANGU WAKALI: Ndikuwiya ku Cyprus kweni ndikukuliya ku Australia. Apapi ŵangu Mbakaboni aku Yehova, ndipu anguyesesa kundisambiza kuti ndiyanjengi Yehova ndipuso Mazu ngaki Bayibolu. Kweni ndati ndakwanisa vyaka va m’ma 13, ndingwamba kugaruka. Ndathaŵanga munyumba ndi usiku kuti nkhakumani ndi achinyamata anyangu. Tabanga magalimotu kweniso tachitanga vinthu vinandi vakutimbanyizga.

Pakwamba, ndachitanga vinthu venivi mwakubisa chifukwa ndawopanga kuguŵisa apapi ŵangu. Kweni pavuli paki, mantha ngangundimaliya. Ndingwamba kuchita vinthu ndi ŵanthu arara ukongwa wo amuyanjanga cha Yehova, ndipu ndingwamba kutole mijalidu yawu. Pakumaliya, ndingukambiya apapi ŵangu kuti nditivikhumba so cha vachisopa vawu. Yiwu anguyesesa kundiwovya mwakuzikira, kweni ndingupumisa mbavi pamwa. Apapi ŵangu anguguŵa ukongwa.

Ndati ndatuwapu panyumba, ndingwamba kugwiriskiya ntchitu munkhwala wakutimbanyizga wongu. Mwakuti ndingufika mpaka pa kulima kweniso kugulisa chamba. Ndajanga umoyu wakutayiliya ukongwa ndipu kanandi ndasanirikanga mumabala. Ndasweranga so cha kukwiya. Asani munyaki wakamba pamwenga wachita chinthu cho chandiguŵisa, ndatoromanga uheni, ndipu kanandi ndatukanga ŵanthu ndipuso kuŵapuma. Ndingakamba waka kuti ndachitanga chechosi cho ndingukanizgika nge Mkhristu.

MO BAYIBOLU LINGUSINTHIYA UMOYU WANGU: Ndingwamba kwanjana ndi munthu munyaki yo nayu wagwiriskiya ntchitu munkhwala wakutimbanyizga wongu. Munyangu mwenuyu awisi angutayika iyu weche munamana ukongwa. Kanandi tachezanga mpaka usiku ukongwa. Ndipu nyengu zinyaki asani ticheza, wafwatukanga ndipu wandikambiyanga mo waŵasoŵiyanga awisi. Chifukwa cha vo ndingusambira ndichikuwa, ndingusanirika kuti ndayamba kumukambiya za chiyuka kweniso kumukonkhoske kuti Yesu wanguyuskapu akufwa ndipu wakulayizga kuti wachitengi so venivi pambula kuswera yapa. (Yohane 5:28, 29) Ndamukambiyanga kuti: “Yeruzgiya kuti utiŵawona so ada ŵaku. Tosi tingazija mu Paradayisu pacharu kwamuyaya.” Venivi vingumufika pamtima ukongwa munyangu.

Nyengu zinyaki iyu wayambisanga nkhani zakukwaskana ndi mazuŵa ngakumaliya kweniso chisambizu chakuti kwe achiuta atatu. Ini ndatonga Bayibolu laki ndipu ndamulongonga malemba ngo ngakonkhoska uneneska wakukwaskana ndi Yehova Chiuta, Yesu ndipuso mazuŵa ngakumaliya. (Yohane 14:28; 2 Timote 3:1-5) Asani ndikambiskana ndi munyangu vakukwaskana ndi Yehova, ndasanirikanga kuti nani ndayamba kumuŵanaŵaniya ukongwa Yehova.

Kamana ndi kamana, mbewu za uneneska wa mu Bayibolu zo zenga mumtima mwangu, zo apapi ŵangu anguyesesa mwanthazi kupanda, zingwamba kubuka. Mwakuyeruzgiyapu, nyengu zinyaki asani nde kumaphwandu ndi anyangu ndipu ndigwiriskiya ntchitu munkhwala wakutimbanyizga wongu, ndasanirikanga kuti mbwe ndayamba kuŵanaŵana vakukwaskana ndi Yehova. Anyangu anandi akambanga kuti atanja Chiuta, kweni mijalidu yawu yakoliyananga cha ndi venivi. Ndinguwamu kuti nditenere kuchita vinthu mwakupambana ndi yiwu. Ndinguwona kuti ndakhumbikanga kuwere kwaku Yehova.

Kweni kuziŵa waka vakwenere kuchita, kupambana ukongwa ndi kuvichita nadi. Vinthu vinyaki venga vambula kusuzga kusintha. Mwakuyeruzgiyapu, ndingusuzgika cha kuleka kugwiriskiya ntchitu munkhwala wakutimbanyizga wongu. Ndinguleka so kuchitiya limoza vinthu ndi anyangu kweniso ndingwamba kusambira Bayibolu ndi mura mumpingu.

Kweni vinthu vinyaki venga vakusuzga kusintha. Mwakuyeruzgiyapu, ndasuzgikanga kuwuko mtima. Nyengu yinyaki vawonekanga nge kuti ndisintha, mbwenu ndayamba so. Ndajichitiyanga chitima asani venivi vachitika ndipu ndajiwonanga kuti nde wakutondeka. Ndati ndaguŵa chifukwa cha venivi, ndingupempha mura yo ndasambiranga nayu Bayibolu kuti wandiwovyi. Iyu wachitanga nani vinthu mwalisungu kweniso mwakuzikira nyengu zosi ndipu wandichiskanga ukongwa. Nyengu yinyaki, iyu wanguŵerenga nkhani mu Chigongwi cha Alinda yo yakonkhoskanga kukhumbika kwa kuleka kutaya mtima. * Tingukambiskana vo ndingachita asani ndakwiya. Kamana ndi kamana, fundu za mu nkhani yeniyi kweniso kupemphera kwaku Yehova, vingundiwovya kuti ndiwukongi mtima. Pakumaliya, ndingubatizika mu April 2000, kuti ndije Kaboni waku Yehova. Apapi ŵangu angukondwa ukongwa.

MO NDAYANDULIYA: Sonu nde ndi chimangu cha mumtima kweniso njuŵi yituŵa, chifukwa ndiziŵa kuti ndikuleka kunanga liŵavu langu ndi munkhwala wakutimbanyizga wongu ndipuso mijalidu yabwekabweka. Ndikondwa ukongwa asani ndichita chechosi, kaya nde kuntchitu, ndaluta ku maunganu ngachikhristu pamwenga ndipumuwa. Veviyo chifukwa ndiwona vinthu mwakwenere.

Nditimuwonga ukongwa Yehova chifukwa wakundipaska apapi wo angundiluwa cha. Ndikumbuka so mazu ngaku Yesu ngo ngasanirika pa Yohane 6:44, ngakuti: “Palivi munthu yo wangaza kwaku ini kwambula kuti Ada wo akundituma amuguza.” Ndikondwa ukongwa kuti ndikuwere kwaku Yehova chifukwa chakuti iyu wakundiguziya so kwaku iyu.

“Ndakhumbisiskanga kusaniya ada.”—MARCO ANTONIO ALVAREZ SOTO

NDIKUWA MU: 1977

CHARU CHO NDIKUWIYA: CHILE

MBIRI YANGU: NDAMBANGA SUMU ZAVIWAWA UKONGWA

UMOYU WANGU WAKALI: Ndikuleleka ndi ama pe, ndipu tajanga mutawuni ya Punta Arenas. Tawuni iyi njakukondwesa ukongwa ndipu ye kuchigaŵa cho chiziŵika kuti Strait of Magellan, ku South America. Ada ndi ama angupatukana pa nyengu yo ndenga ndi vyaka vinkhondi. Chifukwa cha venivi, ndajivwanga kuti nde wakujowoleka ndipu ndakhumbisiskanga kusaniya ada.

Ama asambiranga Bayibolu ndi Akaboni aku Yehova, ndipu anditonga asani aluta ku maunganu ku Nyumba ya Ufumu. Kweni ini ndakhumbangaku cha, sonu kanandi pakuluta ndasuzganga munthowa kuti andiweze kunyumba. Ndati ndafika vyaka 13, ndinguleke limu kukaku.

Pa nyengu iyi ndaziyanjanga ukongwa sumu ndipu ndinguwona kuti nde ndi lusu lakumba. Ndichifika vyaka 15, ndambanga sumu zaviwawa ukongwa mumabala ndipuso mumaphwandu ngakupambanapambana. Chifukwa cha lusu langu, ndingwamba kuchita vinthu ndi ŵanthu akumba sumu akutchuka. Ndingwamba kusambira kumba sumu pasukulu yinyaki. Ndati ndakwanisa vyaka 20, ndingusamiya ku Santiago, ku likulu la charu chidu kuti nkhasazgiyeku masambiru. Pa nyengu iyi, ndambanga mbwenu sumu zaviwawa limoza ndi mabandi ngakupambanapambana.

Pa nyengu yosi iyi ndajivwanga mbwenu kuti ndisoŵeka chinthu chinyaki pa umoyu. Kuti ndiluweku maŵanaŵanu ngenanga, ndamwanga moŵa kweniso ndagwiriskiyanga ntchitu munkhwala wakutimbanyizga wongu. Ndachitanga venivi ndi ŵanthu wo ndambanga nawu sumu ndipu ndaŵawonanga nge abali ŵangu. Ndenga munthu wakusuzga, ndipu munthu kundiwona waka waziŵanga venivi. Ndavwalanga malaya ngafipa pe, ndenga ndi vimwembi kweniso sisi langu lenga litali ndipu linguja kamanavi kufika muchiwunu.

Chifukwa cha nkharu yangu, ndapumananga waka ndi ŵanthu ndipuso ndamangikanga pafupipafupi. Zuŵa linyaki moŵa we mumutu, ndinguyukiya gulu la ŵanthu wo agulisanga munkhwala wakutimbanyiza wongu wo atisuzganga. Ŵanthu yaŵa angundidupuwa uheni mwakuti angufyo njekeyu zangu.

Kweni vinthu vo ŵanthu wo ndaŵawonanga kuti mbanyangu ukongwa anguchita, ndivu vingundiŵaŵa ukongwa. Zuŵa linyaki ndingubowozga kuti kwa vyaka vinandi, chibwezi changu chabulanga so ndi munyangu ukongwa. Anyangu wosi aziŵanga venivi, kweni wosi andibisanga. Vingundipweteka mtima!

Ndinguwere ku Punta Arenas, ndipu ndingwamba kugwira ntchitu yakusambiza kumba kweniso ndambanga chipangizu chinyaki cha nge gitala. Ndingulutirizga so kumba sumu zaviwawa ndi mabandi. Ndingukumana ndi msungwana munyaki wakutowa ukongwa zina laki Sussan, ndipu tingwamba kujaliya limoza. Zuŵa linyaki Sussan wanguziŵa kuti ini ndigomezga vakupambana ndi anyina pa nkhani ya chisambizu chakuti kwe achiuta atatu. Iyu wangundifumba kuti, “Sonu kumbi uneneska ndi nuwu?” Ndingumuka kuti ndiziŵa kuti chisambizu chakuti kwe achiuta atatu ntchaboza, kweni ndingamulongo cha mu Bayibolu po pakulembeka venivi. Ndinguti kweni ndiziŵa ŵanthu wo angamuwovya. Ndingumukonkhoske kuti Akaboni aku Yehova angamulongo uneneska wa mu Bayibolu. Pavuli paki ndinguchita vinthu vo ndinguleka kali ukongwa. Ndingupemphera kwaku Chiuta kuti watiwovyi.

Pati pajumpha mazuŵa ngamanavi, ndinguwona munthu munyaki yo ndingusimikiza kuti watenere kuja Kaboni waku Yehova. Chinanga kuti wawonekiyanga limu kuti wachita mantha chifukwa cha mo ndawonekiyanga, kweni wangundimuka mwaulemu mafumbu ngakukwaskana ndi maunganu ku Nyumba ya Ufumu. Yapa ndinguziŵa kuti Chiuta wandimuka pempheru langu. Ndinguluta ku Nyumba ya Ufumu kweni ndinguja kuvuli kuti ŵanthu aleki kundiziŵa. Kweni ŵanthu anandi angwamba kundikumbuka. Yiwu angundilondere umampha ndipu andivumbatiyanga mwachanju, mwakuti ndingujivwa kuti nde wakuvikilirika ukongwa. Venga nge kuti ndawere kunyumba. Ndati ndawona munthu yo wandisambizanga Bayibolu ndeche mwana, ndingumupempha kuti wayambi so kusambira nani.

MO BAYIBOLU LINGUSINTHIYA UMOYU WANGU: Zuŵa linyaki ndinguŵerenga lemba la Nthanthi 27:11, lo likamba kuti: “Wamwana wangu, uje wazeru ndipu ukondwesi mtima wangu.” Ndingukondwa ukongwa kuziŵa kuti munthu yo ngwakusika, wangakondwesa Mlengi wa chilengedu chosi. Yapa ndinguwamu kuti Yehova ndiyu Ada wo ndakhumbisiskanga pa umoyu wangu!

Ndinguwona kuti ndikhumbika kukondwesa Ada ŵangu akuchanya. Kweni kwa vyaka vinandi ndenga kapolu wa munkhwala wakutimbanyizga wongu ndipuso moŵa. Ndinguvwisa vo Yesu wangukamba pa Mateyu 6:24 kuti, “Palivi munthu yo wangateŵete mabwana ngaŵi.” Lemba la 1 Akorinto 15:33 lingundiwovya ukongwa kuti ndisinthi. Lemba ili likamba kuti: “Kwanjana ndi ŵanthu aheni kunanga nkharu yamampha.” Ndinguwona kuti ndingafiska cha kusintha mijalidu yiheni asani ndilutirizgengi kuluta kumalu ngo ndayanjanga ndipuso kucheza ndi anyangu wo achitanga mijalidu yeniyi. Yapa Bayibolu lingundipaska ulongozgi wakuvwika umampha. Ndakhumbikanga kuchitapu kanthu kuti ndifwatuki ku vinthu vakuguŵiska venivi.—Mateyu 5:30.

Chifukwa chakuti ndayanjanga ukongwa kumba, vingundisuzga ukongwa kuti ndileki kumba ndipuso kuvwisiya sumu zaviwawa. Kweni abali mumpingu angundiwovya kuti ndifiski kuchita venivi. Ndinguleka kumwa ukongwa moŵa ndipuso kugwiriskiya ntchitu munkhwala wakutimbanyizga wongu. Ndingumeta sisi, mwembi ndipuso ndinguleka kuvwala vifipa pe. Ndati ndakambiya Sussan kuti ndikhumba kumeta sisi, wanguzizwa ukongwa mwakuti wapenjenga kuziŵa vo ndichita ku Nyumba ya Ufumu. Iyu wangukamba kuti, “Ndikengi namwi kuti nkhawoni vo vichitika ku Nyumba ya Ufumu!” Vo wanguchiwona vingumufika pamtima mwakuti nayu wangwamba kusambira Bayibolu. Pati pajumpha nyengu, ini ndi Sussan tingutorana mwadangu. Mu 2008, tosi tingubatizika ndi kuja Akaboni aku Yehova. Tingukondwa ukongwa kuti tosi tingwamba kuteŵete Yehova limoza ndi ama ŵangu.

MO NDAYANDULIYA: Ndikufwatuka kucharu cho chipereka likondwa laboza ndipuso ko kusanirika mabwezi ngachinyengu. Ndeche kuziyanja sumu, kweni sonu ndisankha. Ndigwiriskiya ntchitu chakuwoniyapu changu kuti ndiwovyi ŵanthu a mubanja lidu ndipuso ŵanthu anyaki, ukongwa achinyamata. Ndipenja kuŵawovya kuziŵa kuti vo charu ichi chipereka viwoneka vakukopa, kweni pakumaliya vosi vija “vakunkhandu”—Afilipi 3:8.

Sonu ndikusaniya mabwezi ngakugomezgeka mumpingu wachikhristu mo mwe chanju ndi chimangu. Ndipu kuluska vosi, kundere pafupi ndi Yehova, kwandiwovya kuti ndisaniyi Ada.

[Mazu ngamumphata]

[Fundu yikulu]

“Ndikuwere kwaku Yehova chifukwa chakuti iyu wakundiguziya so kwaku iyu”