Jesu Kristo—Ino Nguni?

“NOBABA bantu ibatali Banakristo banji balasyoma kuti Wakali mwiiyi mupati alimwi musongo. Ncobeni wakali muntu ulaa mpuwo kwiinda muntu woonse wakaponede.” (The World Book Encyclopedia) Ino “Nguni” oyo? Ngu Jesu Kristo sikutalisya Bunakristo. Sena mulimuzi? Sena kuli mbwaabujatikizya buumi bwanu?

Imilimo ya Jesu ililembedwe mu Bbaibbele mumabbuku aakaindi aayitwa kuti Makani Mabotu. Ino makani aaya ngamasimpe buti? Naakamana kwaalangisisya, sikwiiya zyaciindi uuzizilwe kapati Will Durant wakalemba kuti: “Ikwaamba kuti mbantu buyo basyoonto muzyalani lyomwe bakalipungila zyamuntu singuzu uukwelelezya boobu uujisi bukkale busumpukide boobu alimwi amuzeezo uukulwaizya wabunyina inga aba maleele aagambya kwiinda oonse aalembedwe mu Makani Mabotu.”

Nokuba boobo, Jesu Kristo tazizilwe pe atuulunzuma twabantu ba Kujwe alimwi akumbi buyo. Balakonzya kabasyoma kuti wakaliko aciindi cimwi pesi tabasyomi kuti kuli mbwaajatikizya buumi bwabo. Ibamwi baamba kuti tatweelede akumubikkila maanu Jesu akaambo kazintu nzyobacita aabo balyaamba kuti mbaasikumutobela. Bamwi mucisi ca Japan baamba kuti ‘bakalosya bbomba lyalunyonyooko kapati mumunzi wa Nagasaki imuli Banakristo banji kwiinda minzi yoonse ili mucisi ca Japan.’

Pele sena inga mwapa mulandu kumusilisi akaambo kakuciswa kwamulwazi iwatatobela malailile aamusilisi? Peepe. Kwaciindi cilamfwu iba Kristendomu baasulaika malailile aa Jesu aambobanga bamanizya mapenzi aabo abuzuba abuzuba. Aboobo muciindi cakumukaka Jesu akaambo kabaabo baambwa kuti Mbanakristo, sena inga tamukonzyi kwiiya makani aajatikizya nguwe nywebo lwanu? Amulange mu Bbaibbele mulibonene mbwabede Jesu ambwakonzya kucinca buumi bwanu.

Wakalailila Luyando

Jesu Kristo wakali mwiiyi mupati wakali kukkala ku Palestini myaka iitandila ku 2,000 yainda. Ibwana bwakwe tabuzizilwe kapati. (Matayo caandaano ca 1 a 2; Luka caandaano ca 1 a 2) Naakasisya myaka iili 30 yakuzyalwa, Jesu wakatalika mulimo wakwe ‘wakulungulula bwini.’ (Johane 18:37; Luka 3:21-23) Basikulemba bansiku bone ibakalemba zyabuumi bwa Jesu bakabikkila maanu kapati kumulimo wakwe wakukambaukila buleya mumyaka yotatwe yamamanino njaakakkala ano ansi.

Ciindi naakali kucita mulimo wakwe, Jesu wakaambila basikwiiya bakwe cintu cigwasya kulwana mapenzi aindene–indene mubuumi bwabo. Ino eeco cakali cintu nzi? Lwakali luyando. Mumakani aakwe aazizilwe kapati ategwa Mulumbe waa Cilundu, Jesu wakayiisya basikwiiya bakwe mbobakeelede kutondezya luyando kubeenzinyina. Wakaamba kuti: “Nkaambo kaako zintu zyoonse zili buti nzimuyanda kuti bantu bamucitile, anywebo amubacitile nzizyonya.” (Matayo 7:12) Eyi njiisyo yiitwa kuti Mulawo Mubotu Wabukkale. “Bantu” mbaakali kwaamba Jesu awa babikkilizya boonse basinkondonyina muntu. Mumakani aaya ngoonya wakaamba kuti: “Amuyande basinkondonyoko, amubakombele bamupenzya.” (Matayo 5:44) Sena luyando luli boobu talukonzyi kumana bunji bwamapenzi ngotujisi sunu? Musololi waba Hindu Mohandas Gandhi mbwaakali kuyeeya oobo. Wakamvwugwa kaamba kuti: “Ciindi toonse [twazitobela] njiisyo zyakaambwaa Kristo mu Mulumbe waa Cilundu ooyu, tunooamanide kale mapenzi . . . aanyika yoonse mbwiizulwa.” Njiisyo zya Jesu zyaluyando ikuti naa zyatobelwa, imapenzi ngotujisi oonse alakonzya kumana.

Luyando Lwakwe Wakalutondezya

Jesu wakalikucita nzyaakali kuyiisya. Wakabikka ziyanda bamwi ambele, izyakwe zyakaboola munsi akutondezya luyando mbolubede. Ibuzuba bumwi Jesu abasikwiiya bakwe bakajisi bubi kugwasya bantu banji cakuti bakabula aciindi cakulya. Jesu wakabona kuti basikwiiya bakwe bakali kuyandika kuti ‘balyookezye aniini,’ aboobo bakaunka kubusena bwakumbali kutakwe bantu. Pele nkamu yabantu yakabaindila kusika aboobo bakali kubalindila. Ino nomwakacita buti nomwakali muciimo ca Jesu? Elyo Jesu “wakabafwida luzyalo” nkabela “wakatalika kubaiisya makani manji.” (Marko 6:30-34) Olu luzyalo ndwakalaalo lwakamucitya kuti ayandisisye kugwasya bamwi.

Jesu wakabagwasya munzila zinji bantu kunze lyakubayiisya zintu zyakumuuya. Wakabagwasya munzila yakumubili. Mucikozyanyo, wakasanina baalumi basika ku 5,000 (kutabalilizya banakazi abana) ibakali kumuswiilila kusikila kumangolezya. Kuciindi cimwi alimwi wakasanina bantu basika ku 4,000. Iciindi cakusaanguna wakabelesya mikamu iili musanu atuswi tobile, icabili wakabelesya mikamu iili ciloba kubikkilizya atuswi tuce. (Matayo 14:14-21; 15:32-38; Marko 6:35-44; 8:1-9) Sena akali maleele? Ee, wakali sikucita maleele.

Jesu alimwi wakaponya abantu banji bacisidwe. Wakaponya boofwu, abalemene, abasicinsenda alimwi abasinke matwi. Wakababusya abafwide! (Luka 7:22; Johane 11:30-45) Cimwi ciindi sicinsenda umwi wakamukumbila kati: “Kuti koyanda, ulakonzya kundisalazya.” Ino wakacita buti Jesu? “Wa[ka]tambika ijanza lyakwe, wamwaampa, wamwaambila kuti, Ndazumina, kosalazigwa.” (Marko 1:40, 41) Jesu wakali kuyandisisya kubagwasya. Kwiinda mumaleele aaya wakatondezya luyando lwakwe kubantu bakapengede.

Sena eci nciyumu kusyoma? Pele Jesu wakacita bunji bwamaleele aakwe mubuleya. Nobaba basikumukazya ibakali kumuyandauda mulandu ciindi aciindi taakwe nobakakazya kuti wakali kucita maleele. (Johane 9:1-34) Kunze lyaboobo, imaleele aakwe akali amulimo. Akagwasya bantu kuti bamuzibe kuti Ngonguwe wakatumwaa Leza.—Johane 6:14.

Ikulanga-langa njiisyo alimwi abuumi bwa Jesu asyoonto buyo kutucitya kuti tumuyande kapati alimwi akuyanda kwiiya luyando lwakwe. Pesi eyi tiili nzila ilikke Jesu njaakonzya kweendelezya buumi bwanu. Taakali buyo mwiiyi mupati wakali kuyiisya luyando. Wakatondezya kuti wakaliko kale kali Mwana a Leza simuzyalwa alikke. (Johane 1:14; 3:16; 8:58; 17:5; 1 Johane 4:9) Alimwi nkwali ulapona lino kali muntu wamuuya, aboobo ulamujatikizya kapati. Ibbaibbele litwaambila kuti Jesu wakabusigwa akuti lino Mmwami mu Bwami bwa Leza. (Ciyubunuzyo 11:15) Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3; 20:31) Masimpe, ikuziba Jesu Kristo kulakonzya kumupa buumi butamani mu Paradaiso! Ino inga caba buti boobo? Sena tamukonzyi kwiiya makani aambi aajatikizya Jesu akubona mbuli “kuyanda Kristo [mbo]kutusinikizya” kuti tumwiiye? (2 Ba-Korinto 5:14) Bakamboni ba Jehova balilyaabide kumugwasya.—Johane 13:34, 35.

Ccita kuti kwatondezyegwa bumbi, busanduluzi bwa Bbaibbele bwazwa mu The Bible in Tonga, 1963.