Kupenga Koonse Kuyoomana Ino-ino!

 Aciindi cimwi mubuumi bwanu cakutadooneka kuli nomwakalibuzya kuti, ‘Nkaambo nzi ncokuli kupenga kapati boobu?’ Kwazyuulu zyamyaka, ibantu bapenga kapati ankondo, bucete, ntenda, lunya, ikutalulama, kuciswa alufwu. Mumwaanda wamyaka wainda, ibantu bapenga citanabwenwe. Sena kupenga koonse ooku kuli nokuyoomana?

Cilakkomanisya kuzyiba kuti kupenga kuyoomana alimwi kuyoomana ino-ino! Ijwi lya Leza, Ibbaibbele lyaamba kuti: “Sizibi takooyooba wo . . . Pele babombemyoyo bayoovuba nyika, bayookondwa muluumuno lunji.” Ino bayoocita oobo kwaciindi cilamfwu buti? “Balulami bayookona nyika, bayookala alinjiyo lyoonse.”—Intembauzyo 37:10, 11, 29.

Leza aakugusya bubi alimwi akupenga, inyika iyoocincwa akuba paradaiso. Mpoonya bantu banoopona mane kukabe kutamani kabakkomene abuumi buli kabotu. Ijwi lya Leza lisinsima kuti: “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa.”—Ciyubunuzyo 21:4.

Munyika eeyo mpya, nobaba bafwide bayoobusyigwa kubuumi kutegwa abalo bakagwasyigwe azilongezyo eezyo: “[Kuyooba] kubuka kwabafu, akwabaluleme akwabataluleme.” (Incito 24:15) Nkakaambo kaako Jesu Kristo ncaakali kukonzya kwaambila sizibi wakeempwa iwakaba alusyomo mulinguwe kuti: “Tunooli ayebo mu-Paradaiso.”—Luka 23:43.

 Ino Kupenga Kwakatalikila Nzi?

Mbwaanga Leza wakali kuyanda kuti bantu kabapona kabotu, nkaambo nzi ncaakalekela kupenga kuti kutalike? Nkaambo nzi ncaakulekela kwaciindi cilamfwu boobu?

Leza naakalenga Adamu a Eva, wakabalenga kabalondokede mumbazu zyoonse. Wakababikka mumuunda waparadaiso alimwi akubapa mulimo uukomanisya. Ibbaibbele yaamba kuti: “Leza naakabona zintu zyoonse nzyaakacita, wakabona kuti zyoonse zyabota loko.” (Matalikilo 1:31) Ikuti nobakamumvwida Leza, bakali kunoozyala bana balondokede alimwi nyika yoonse noyakali paradaiso oomo bantu mobakali kunookkala muluumuno alimwi kabakkomene mane kukabe kutamani.

Leza wakapa ba Adamu a Eva cipego citaliboteli cakulisalila kuba bube bwakuzyalwa ambubo. Tibakeelede kuba mbuli mincini iitayeeyi. Nokuba boobo, ikuzumanana abuumi bukkomanisya kwakayeeme akubelesya cipego cabo cakulisalila munzila iili kabotu—akuswiilila milawo ya Leza. Leza kuti: “Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola.” (Isaya 48:17) Ikutacibelesya kabotu cipego cakulisalila kwakali kuyooleta manyongwe mbwaanga bantu kunyina nobakalengwa kuti kabazwidilila kakunyina kweendelezyegwa a Leza. Ibbaibbele lyaamba kuti: “Muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.”—Jeremiya 10:23.

Mukubula coolwe, ibazyali besu bakusaanguna bakayeeya kuti bakali kukonzya kulyeendelezya beni akuzwidilila kakunyina Leza. Pele nibakakaka kweendelezyegwa a Leza, wakaleka kubagwasya, aboobo bakaleka kuba bantu balondokede. Mpoonya bakatalika  kusampuka mane bakacembala alimwi akufwa. Mbwaanga tuli bana babo, twakakukona kutalondoka alimwi alufwu.—Ba-Roma 5:12.

Ikaambo Kapati—Ngwani Uujisi Nguzu Zyakweendelezya?

Ino nkaambo nzi Leza ncaatakabanyonyweeda ba Adamu a Eva akulenga bantu bambi? Nkaambo kakuti bweendelezi bwa Leza, nkokuti, inguzu nzyajisi zyakweendelezya zyakakazyigwa. Imubuzyo wakali wakuti, Ngwani uujisi nguzu zyakweendelezya alimwi mbweendelezi bwani buli kabotu? Kweelana atwaambo ootu, Sena ibantu balakonzya kuzwidilila ikuti kabateendelezyegwi a Leza? Kwiinda mukubapa ciindi cili mbocibede cakusoleka kulyeendelezya beni, Leza uyoosinizya naa bantu balakonzya kuzwidilila ikuti kabeendelezyegwa anguwe naa eelyo nobalyeendelezya beni. Cakali kuyooba ciindi cikubwene kutegwa bantu basoleke nzila zyoonse zyabweendelezi, bukkale, bweende bwamali alimwi abukombi eezyo ziteendelezyegwi a Leza.

Ino ncinzi cacitika? Zyuulu-zyuulu zyamyaka zyainda zipa bumboni bwakuti kuli kupenga kutaambiki. Mumwaanda wamyaka wainda, ibantu bapenga citanabwenwe. Tuulunzuma twabantu bakafwa mu Nkondo ya Nyika Yabili. Ibantu bainda kutuulunzuma tuli mwaanda bakajaigwa munkondo. Milandu alunya zili koonse-koonse. Ikubelesya misamu iikola kulacitwa nyika yoonse. Malwazi aajanwa kwiinda mukoonana azumanana kutambukila bantu banji. Makumi-makumi aatuulunzuma twabantu balafwa amwaka anzala alimwi amalwazi. Ibukkale bwamukwasyi alimwi a zyeelelo zibotu zyayaansi koonse-koonse. Kunyina mfwulumende yabantu iikonzya kwaamanizya mapenzi aaya.  Kunyina mfwulumende noiba yomwe yacikonzya kumana kucembaala, kuciswa alimwi alufwu.

Ibukkale bwabantu buli buyo mbubwenya Ibbaibbele mbolyakasinsima zyakuciindi cesu. Ijwi lya Leza lipandulula ciindi ncotupona kuba “mazuba aakumamanino” aabukkale bwamazuba aano eelyo ‘nokuyooba ziindi zikataazya.’ Alimwi mbubwenya buyo Ibbaibbele mbolyakaamba, ‘ibantu babi abasikulibeja baindila kubija.’—2 Timoteo 3:1-5, 13.

Kupenga Kuli Afwaafwi Kumana

Bumboni boonse butondezya kuti tuli afwaafwi amamanino aakusoleka kwamuntu kuusisya mukulyeendelezya mwini kakunyina Leza. Cabonwa kabotu-kabotu kuti bweendelezyi bwabantu kakunyina kweendelezyegwa a Leza tabukonzyi kuzwidilila. Bulikke bweendelezi bwa Leza mbobukonzya kuleta luumuno, lukkomano, buumi buli kabotu alimwi butamani. Aboobo, ikulekelela bubi alimwi akupenga nkwaali kucita Jehova lino kuli kumamanino. Lino-lino Leza uyoonjililila mubukkale bwabantu kwiinda mukunyonyoona bukkale oobu bwamazuba aano butakkomanisyi.

Businsimi bwamu Bbaibbele bwaamba kuti: “Mumazuba aabaami abo [bweendelezi bwabantu buliko mazuba aano], Leza wakujulu uyoobusya bwami [kujulu] butakooyoonyonyoonwa abuniini mane kukabe kutamani, . . . Obo bwami buyoopwayaula akumanisya mami aya oonse [bweendelezi bwamazuba aano], alimwi bwalo buyooima nji kukabe kutamani.” (Daniele 2:44) Ikusinizya nguzu nzyajisi Jehova zyakweendelezya kwiinda mu Bwami bwakujulu nenjiisyo mpati iijanika mu Bbaibbele. Kasinsima zyacibeela ciyandika kapati cacitondezyo ca “kumazuba aakumamanino,” Jesu wakati: “Aya Makani Mabotu aa-Bwami azookambaukwa  munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:14.

Aakusika mamanino, ngwani uyoofwutuka? Ibbaibbele liingula kuti: “Baluleme bayookala munyika; baololokede mbebayoosyaala mulinjiyo; pele basizibi bayoonyonyoonwa munyika.” (Tusimpi 2:21, 22) Ibaluleme mbabaabo ibayiya makanze a Jehova akwaacita. Jesu Kristo wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Inzya, “nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:17.

Ccita kuti kwatondezyegwa bumbi, kuzubulula koonse kwamu Bbaibbele kuzwa mu The Bible in Tonga, 1963.