Ibbaibbele Lilakonzya Kubacinca Bantu

Ncinzi cakagwasya musimbi umwi iwakali kupenga kuzwa kubwana kuba abuumi bulaampindu ncobeni? Ncinzi cakakulwaizya mwaalumi umwi sikuzangila mfwulumende alimwi sinkondo kuba mukambausi wamakani mabotu siluumuno? Amubale zibalo eezyi kutegwa mujane bwiinguzi.

“Ndakali kuyanda kujana luyando akubikkilwa maano.”​—BA INNA LEZHNINA

MWAKA WAKUZYALWA: 1981

CISI NKOBAZWA: RUSSIA

MBOBAKABEDE KAINDI: KUPENGA KUZWA KUBWANA

MBONDAKABEDE KAINDI: Bazyali bangu bakali basyaantaambi andime ndakazyalwa kandili syaantaambi. Mumyaka iili cisambomwe yakusaanguna, ndakali kupona buumi bukkomanisya. Mpoonya bazyali bangu bakalekana. Nokuba kuti ndakacili muniini, ndakalizyi ncocaamba kulekana aboobo cakandicisa kapati. Nobakalekana, bataata amupati wangu musankwa bakali kukkala mudolopo ya Troitsk, mpoonya baama bakalongela ku Chelyabinsk antoomwe andime. Kumane mukuya kwaciindi, bakakwatwa kumbi. Bataata aaba ibakakwata baama bakali bacakolwa alimwi kanji-kanji bakali kubauma baama andime.

Mu 1993, mupati wangu musankwa ngondakali kuyanda kapati kanyikila. Ntenda eeyi yakatucika kapati tobamukwasyi. Aboobo baama bakatalika kunywa kutegwa bacikonzye kuliyumya, mpoonya abalo bakatalika kundipenzya mbuli bataata aaba bakujana. Ndakatalika kuyandaula nkondikonzya kujana buumi buli kabotu. Ndakali kuyanda kujana luyando alimwi kubikkilwa maano. Aboobo ndakatalika kuunka kuzikombelo ziindene-indene kusola kuyandaula luumbulizyo, pele kunyina nondakalujana.

BBAIBBELE MBOLYAKANDICINCA: Nondakali amyaka 13, sicikoloma umwi iwakali Kamboni wa Jehova wakandaambila makani amwi aamu Bbaibbele. Ndakakkomana kapati kuzyiba bantu aaba bamu Bbaibbele mbu Nowa alimwi a Jobu, balo ibakamubelekela Leza nokuba kuti bakali mubukkale bukatazya. Tiilyakalampa ndakatalika kwiiya Bbaibbele a Bakamboni alimwi akujanika kumiswaangano yabo.

Kwiiya Bbaibbele kwakandigwasya kuzyiba twaambo twamasimpe tunji kapati. Ndakakkomana kapati kuzyiba kuti Leza ulijisi zina. (Intembauzyo 83:18) Ndakagambwa kubona Bbaibbele mbolyakaambila limwi zintu izyakali kuyoocitika “kumazuba aamamanino.” (2 Timoteyo 3:​1-5) Alimwi ndakakkomana kapati kwiiya kujatikizya bulangizi bwabubuke. Amuciyeeyele buyo, ikuzyiba kuti ndiyoomubona alimwi mwanookwesu!​—Johane 5:​28, 29.

Nokuba boobo, tabali boonse ibakakkomana akaambo kazintu eezyi zipya nzyondakaiya. Baama abataata bakujana tiibakali kubayanda naaceya Bakamboni ba Jehova. Bakasola kundisinikizya kuti ndileke kwiiya Bbaibbele. Pele ndakali kuziyanda kapati zintu nzyondakali kwiiya, aboobo tiindakali kulangilwa kuleka.

Tiicakali cuuba-uba kuliyumya kukukazyigwa abanamukwasyi. Cintu cimbi icakandicisa kapati nciindi musyoonto wangu musankwa walo ngotwakali kuunka limwi kumiswaangano ya Bakamboni ba Jehova, naakanyikila awalo. Pele Bakamboni kunyina nobakandilekelezya naaceya. Akati kabotu ndakajana luyando alimwi akubikkilwa maano nkondakali kuyandaula mubuumi bwangu boonse. Ndakazyiba kuti eeci ncecikombelo cakasimpe. Aboobo mu 1996, ndakabbapatizyigwa akuba Kamboni wa Jehova.

MBONDAGWASYIGWA: Kwamyaka iili 6 yainda, ndalikwetwe kumwaalumi uuli kabotu kapati uutegwa Dmitry. Tubelekela antoomwe kuofesi yamutabi ya Bakamboni ba Jehova ku St. Petersburg. Mukuya kwaciindi, bazyali bangu bakacinca mbobakali kuzibona njiisyo zyesu.

Eelo kaka ndilalumba kapati kumuzyiba Jehova! Kumubelekela kwapa kuti buumi bwangu bube ampindu ncobeni.

“Ndakajisi mibuzyo minji kapati yalo iyakali kundikatazya.”​—BA RAUDEL RODRÍGUEZ RODRÍGUEZ

MWAKA WAKUZYALWA: 1959

CISI NKOBAZWA: CUBA

MBOBAKABEDE KAINDI: SIKUZANGILA MFWULUMENDE ALIMWI SINKONDO

MBONDAKABEDE KAINDI: Ndaakazyalilwa mu Havana, ku Cuba alimwi kulwana mubusena oobu kwakalidumide kapati. Nondakali kuyabukomena, ndakatalika kukkomanina cisobano cakulwana citegwa judo alimwi azisobano zimbi zyakunkondo.

Ndakali sicikolo alimwi bazyali bangu bakandikulwaizya kuunka kuyunivesiti. Nondakali nkuko, ndakatalika kulimvwa kuti bweende bwamapolitikisi bwamucisi cesu bwakali kuyandika kucinca. Aboobo ndakasala kuzanga. Bumwi buzuba mebo asicikoloma umwi twakauma kapokola umwi kusola kuti tumunyange ntobolo yakwe. Eeci cakapa kuti kapokola alicise kapati kumutwe. Aboobo mebo asicikoloma twakaangwa muntolongo akupegwa cisubulo cakujaigwa kwiinda mukudubulwa. Ndakajisi buyo myaka iili 20, ciindi eeci nondakali kuyanda kujaigwa.

Kandilendeledwe kapati muntolongo, ndakatalika kuyeeya mbondakali kuyoocita kumbele lyabasikundidubula. Tiindakali kuyanda kulibonya kuti ndiliyoowede. Pele aciindi nciconya eeci, ndakalikatazyidwe amibuzyo minji. Ndakali kulibuzya kuti: ‘Nkaambo nzi ncokuli kutalulama boobu munyika? Sena buumi oobu mbobuliko bulikke?’

BBAIBBELE MBOLYAKANDICINCA: Cisubulo cesu cakujaigwa mukuya kwaciindi bakacicinca akutupa cisubulo cakwaangwa myaka iili 30. Aciindi eeci, ndendilyo nondakazyibana a Bakamboni ba Jehova bamwi ibakaangidwe akaambo kalusyomo lwabo. Ndakagambwa kapati kubona Bakamboni aaba mbobakali basicamba pele basiluumuno. Nokuba kuti bakalaangidwe kakunyina mulandu, taakwe nobakanyemede pe.

Bakamboni bakandiyiisya kuti kuli makanze Leza ngajisi kujatikizya bantu. Bakanditondezya mu Bbaibbele kuti uyakwiicinca nyika eeyi akuba paradaiso iinyina bugwebenga alimwi akutalulama. Bakandiyiisya kuti nyika iyoozula bantu bali kabotu, balo ibayooba acoolwe cakupona mane kukabe kutamani mubukkale bulondokede.​—Intembauzyo 37:29.

Ndakazikkomanina kapati nzyondakali kwiiya kuli Bakamboni, pele bube bwangu bwakaliindene kapati abwabo. Ndakali kuyeeya kuti mebo inga tiindakonzya kuleka kutola lubazu mutwaambo twacisi naa kuzumina kudyaamininwa abamwi. Aboobo ndakasala kulibalila Bbaibbele endikke. Nondakalimanizya, ndakazyiba kuti Bakamboni ba Jehova mbabantu balikke ibalilemeka mbuli Banakristo bakaindi.

Kwiinda mukwiiya Bbaibbele, ndakabona kuti ndakali kuyandika kucinca buumi bwangu. Mucikozyanyo, ndakali kuyandika kucinca ŋambawido yangu nkaambo ndakajisi cilengwa cakubelesya majwi aakukonka. Ndakali kuyandika kuleka kufweba. Alimwi ndakali kuyandika kuleka kutola lubazu mutwaambo twacisi. Tiicakali cuuba-uba kucinca bukkale oobu, pele kwiinda mukugwasyigwa a Jehova, asyoonto-syoonto ndakacikonzya.

Pele cintu icakandikatazya kapati kucinca, nkwiiya kulijata kunyema. Noliba lino ndicuunjisi kupailila bube bwakulilesya. Ndagwasyigwa kapati atupango twamu Bbaibbele mbuli ka Tusimpi 16:​32, kalo ikaamba kuti: “Muntu uumuka kunyema uli kabotu kwiinda muntu singuzu, alimwi ooyo uujata moyo wakwe uli kabotu kwiinda yooyo uuzunda munzi.”

Mu 1991, ndakabbapatizigwa kuba Kamboni wa Jehova. Ndakabbilila mucidilamu camaanzi icakali muntolongo. Mwaka wakatobela, tobaange bamwi twakaangununwa akutumwa ku Spain nkaambo twakalijisi bacibbululu kuya. Mbotwakasikila buyo ku Spain, ndakaunka kumiswaangano ya Bakamboni ba Jehova. Okuya Bakamboni bakanditambula amaanza obilo mbuli kuti ndakali kuswaangana ambabo kwamyaka minji alimwi bakandigwasyilizya kutalika buumi bwangu bupya.

MBONDAGWASYIGWA: Ndilikkomene kapati lino kubelekela Leza antoomwe amukaintu wangu alimwi abana besu bobilo basimbi. Ndijisi coolwe cakubelesya ciindi cangu cinji kugwasya bantu kwiiya Bbaibbele. Zimwi ziindi ndilayeeya ciindi ciya nindatikafwe kandicili mukubusi, alimwi ndilalumba kapati kubona mbondagwasyigwa kuzwa ciindi eeco. Ndicipona alimwi ndilijisi bulangizi bwakumbele. Ndilangila kumbele kuyoobona mbociyoozuzikizyigwa cisyomezyo ca Paradaiso, ciindi nokuyooba bululami alimwi ciindi ‘lufwu nolutakabi limbi.’​—Ciyubunuzyo 21:​3, 4.

[Majwi aakwelelezya sikubala]

“Ndakakkomana kapati kuzyiba kuti Leza ulijisi zina”

[Cifwanikiso]

Mebo abalumi bangu tulakkomana kwaabila basyaantaambi mabbuku amumwaambo wakutambaika