• MWAKA WAKUZYALWA: 1963

• CISI NKOBAZWA: BRITAIN

• MBOBAKABEDE KAINDI: NDAKALI KUBELEKA MULIMO UUVWOLWA MALI MANJI

MBONDAKABEDE KAINDI:

Ndakazyalilwa mu Croydon, ku South London, alimwi ndili wanamba 6 mumukwasyi wabana bali 9. Bazyali bangu bakali kuzwa kunsumbu ya Caribbean ku St. Vincent. Baama bakali bacikombelo ca Methodist. Tiindakali kuyanda kwiiya kujatikizya Leza, pele ndakalijisi luyandisisyo lwakuzyiba zintu. Bunji bwaziindi notwakali kujala zikolo, ciindi cangu ndakali kucimanina kucizyiba camaanzi icakali afwaafwi kandibala mabbuku aayindene-indene ngondakali kulomba kulaibbulali.

Nokwakainda myaka iili mbwiibede kuzwa nondakamanizya cikolo, ndakayanda kutalika kugwasya bantu bapengede. Ndakatalika kubeleka abaabo ibatakajisi maanda aakukkala alimwi abalema. Mpoonya ndakaunka kuyunivesiti kuyakwiiya makani aajatikizya busilisi (health sciences). Nondakamanizya lwiiyo lwangu, ndakatalika kupegwa milimo yaatala kapati, aboobo eeci cakandipa kutalika kupona buumi busumpukide. Mbwaanga ndakali sikuvwuntauzya iwatakalembedwe mulimo kumbunga iigaminide, ndakali kuyandika buyo laputopu alimwi a Intaneti kutegwa kandibeleka mulimo wangu. Aboobo ciindi aciindi, ndakali kuunka kumasi aayindene-indene akukkala kwansondo zili mbozibede mumahotela aadula kapati, alimwi ayebeka alo aakajisi amasena aakunyanyaasya mubili. Kwaamba masimpe, ndakali kuyeeya kuti oobu mbobuumi ncobeni. Pele kunyina nondakaleka kababikkila maano bantu bapengede.

BBAIBBELE MBOLYAKANDICINCA:

Kwamyaka minji ndakali kulibuzya kuti, ‘Ino tuponena nzi alimwi ino buumi bujisi mpindu nzi?’ Pele kunyina nondakasola kuyandaula bwiinguzi mu Bbaibbele. Bumwi buzuba mu 1999, musyoonto wangu musimbi Margaret, iwakali umwi wa Bakamboni aa Jehova, wakandiswaya amweenzinyina umwi Kamboni walo iwakandibikkila maano kapati. Tiindakalimvwa anondakazumina kutalika kwiiya Bbaibbele anguwe, pele ndakamuka kuyaambele nkaambo mulimo wangu alimwi abuumi mbondakali kupona nzyakali kundimanina ciindi.

Mu 2002 lyacilimo, ndakalongela ku England nkoili kumusanza lwaambo. Okuya, ndakatalika kuyungizya lwiiyo kuyunivesiti kutegwa ndibe adigili mulwiiyo lwakuvwuntazya kujatikizya bukkale bwabantu (social research), kandijisi makanze akujana digili yamamanino njobapa kuyunivesiti. Ndakatalika kuunka-unka ku Ŋanda ya Bwami antoomwe amwanaangu musankwa yalo iyakali afwaafwi ankotwakali kukkala. Nokuba kuti ndakali kulukkomanina lwiiyo lwaatala, kwiiya Bbaibbele kwakandigwasya kapati kumvwisya mapenzi aamubuumi alimwi ambondikonzya kwaalwana. Ndakabona mboluli lwamasimpe lugwalo lwa Matayo 6:​24 ilwaamba kuti tatukonzyi kubelekela basimalelo bobilo. Tweelede kubelekela buyo cintu comwe, Leza naa lubono. Ndakalizyi kuti ndakeelede kusala kujatikizya zintu nzyodeelede kubikka mubusena bwakusaanguna mubuumi bwangu.

Mwaka wakaindide, kanji-kanji ndakali kujanika kukabunga kakwiiya Bbaibbele kwalo Bakamboni nkobakali kwiiya bbuku lyakuti Is There a Creator Who Cares About You? * Ndakazyiba kuti alikke Mulengi wesu Jehova, nguukonzya kumana mapenzi aabantu. Pele kuyunivesiti bakali kutuyiisya kuti tatuyandiki kugwasyigwa a Leza mubuumi bwesu. Eeci cakandinyemya kapati. Nokwakainda myezi yobilo, ndakaluleka lwiiyo lwangu lwakuyunivesiti mpoonya ndakasala kuti ndibikkile maano kapati kuzintu zyakumuuya.

Lugwalo lwamu Bbaibbele ilwakandikulwaizya kapati kucinca bukkale bwangu ndugwalo lwa Tusimpi 3:​5, 6 ilwaamba kuti: “Kosyoma Jehova amoyo wako woonse, utasyomi maano aako omwini pe. Munzila zyako zyoonse kolanga kulinguwe, eelyo walo ulalulamika nzila zyako.” Kwiiya kujatikizya Leza siluyando kwakalaampindu kapati kwiinda zintu zyakumubili zili zyoonse alimwi ampuwo njondakali kukonzya kujana akaambo kakuba adigili iisumpukide kapati. Mbondakali kuyaabwiiya zinji kujatikizya makanze aa Jehova kujatikizya nyika alimwi amulimo ngwaakabeleka Jesu mukwaaba buumi bwakwe akaambo kandiswe, cakandikulwaizya kuti ndaabe buumi bwangu ku Mulengi wesu. Aboobo ndakabbapatizyigwa mu April 2003. Mpoonya aasyoonto-syoonto ndakatalika kuubya-ubya buumi bwangu.

MBONDAGWASYIGWA:

Cilongwe cangu a Jehova ncintu nconditakonzyi kuula amuulo wamali aali woonse. Akaambo kakumuzyiba Jehova, ndaba aluumuno lwini-lwini alimwi alukkomano. Alimwi ndilakkomana kapati kuyanzana antoomwe abakombima bakasimpe.

Nyota yangu yakuyanda kuba aluzyibo nkoicili alimwi lino ndilikkomene azintu nzyondiiya mu Bbaibbele alimwi akumiswaangano ya Bunakristo. Ndilakkomana kwaambila bamwi nzyondisyoma. Ooyu ngowakaba mulimo wangu walo iwakali kundipa coolwe cakubagwasya ncobeni bantu kuba abuumi buli kabotu lino, alimwi akuba abulangizi bwakuyoopona kumbele munyika mpya. Kuzwa mu 2008, ndali kubeleka mumulimo waciindi coonse alimwi ndilikkomene kapati akukkutila kwiinda kaindi. Lino, ndijisi buumi bulaampindu ncobeni alimwi ndilamulumba kapati Jehova akaambo kaceeci.

• MWAKA WAKUZYALWA: 1973

• CISI NKOBAZWA: AUSTRIA

• MBOBAKABEDE KAINDI: SIKUUMA NJUKA

MBONDAKABEDE KAINDI:

Ndakakomenena mukadolopo kasyoonto kamu Braunau, ku Austria. Bantu bamukadolopo aaka bakalivwubide kapati alimwi kwakanyina bugwebenga. Mukwasyi wangu wakali wacikombelo ca Katolika alimwi ndakakomenena mucikombelo eeci.

Cintu cimwi icakacitika kandicili muniini cakandijatikizya kapati. Mu 1984, kandijisi myaka iibalilwa ku 11, twakali kuuma bbola amweenzuma umwi. Buzuba mbubonya oobu kumazuba, wakafwa muntenda yamumugwagwa. Lufwu lwamweenzuma lwakandicisa kapati. Nokwakainda myaka iili mbwiibede kuzwa noyakacitika ntenda eeyi, ndakali kulibuzya kujatikizya cicitika ciindi twafwa.

Nondakamanizya cikolo, ndakatalika kubeleka mulimo wakubamba malaiti. Nokuba kuti ndakajisi cilengwa cakuuma njuka alimwi akubbejelana mali manji kapati, tiindakajisi penzi lyamali pe. Ciindi cinji ndakali kucibelesya muzisobano alimwi ndakatalika kuyandisya nyimbo zya heavy metal azya punk rock. Buumi bwangu bwakali bwakuunka kukuzyana kumakkilabbu alimwi akumapobwe. Ndakali kupona buumi bwakulikondelezya akutalilemeka, pele ndakali kulimvwa kubula mpindu.

BBAIBBELE MBOLYAKANDICINCA:

Mu 1995, Kamboni umwi uucembeede wakandiswaya aŋanda yangu akundipa bbuku ilyakajisi bwiinguzi bwamu Bbaibbele kumubuzyo wakuti, Ncinzi cicitika muntu afwa? Mbwaanga lufwu lubyaabi lwamweenzuma lwakacili kundikatazya mumizeezo, ndakalibweza bbuku. Tiindakabala buyo zibalo izyakali kwaamba makani aalufwu, pele ndakalibala bbuku lyoonse.

Nzyondakabala zyakawiingula mubuzyo wangu kujatikizya lufwu. Pele kuli azimbi zinji nzyondakaiya. Akaambo kakuti ndakakomenena mucikombelo ca Katolika, lusyomo lwangu lwakayeeme kapati ali Jesu. Nokuba boobo, kwiinda mukwiiya Bbaibbele cakusitikila ndakatalika kuba acilongwe ciyumu a Jehova Leza, Bausyi Jesu. Ndakakkomana kapati kuzyiba kuti Jehova ulatubikkila maano alimwi uyanda kuti tumuzyibe. (Matayo 7:​7-​11) Ndakaiya kuti Jehova kuli mbwalimvwa alimwi akuti lyoonse ulazuzikizya ncaamba. Eeci cakandipa kuti ndiyande kuzyiba zinji kujatikizya businsimi bwamu Bbaibbele alimwi akubona mbobwakazuzikizyigwa. Nzyondakaiya zyakandipa kuba alusyomo luyumu muli Leza.

Tiilyakalampa, ndakazyiba kuti Bakamboni ba Jehova mbabantu balikke ibakali kubikkila maano kugwasya bantu kumvwisya Bbaibbele. Ndakali kwaalemba magwalo aakali mumabbuku aa Bakamboni mpoonya akwaalanga mu Bbaibbele lyangu lya Katolika. Mbondakali kuyaabuzumanana kucita boobu, ndakazyiba kuti ndakajana kasimpe.

Kwiiya Bbaibbele kwakandigwasya kuzyiba kuti Jehova uyanda kuti kandipona kweelana azyeelelo zyakwe. Kweelana ancondakabala kulugwalo lwa Baefeso 4:​22-​24, ndakabona kuti ndakeelede kusamununa ‘buntu bwangu bwakaindi,’ bwalo ibwakali kutondezya ‘bukkale bwangu bwakaindi’ alimwi akuti ndakeelede “kusama buntu bupya ibwakalengwa kweelana akuyanda kwa Leza.” Aboobo ndakabuleka bukkale bwangu bwakutalilemeka. Alimwi ndakabona kuti ndakeelede kuleka kuuma njuka, mbwaanga cilengwa eeci cakali kukulwaizya muuya wakuyandisya lubono alimwi abusyaacivwulemwangu. (1 Bakorinto 6:​9, 10) Ndakalizyi kuti, kutegwa ndizileke zintu eezyi, ndakeelede kuleka kuyanzana abalongwe bangu bakaindi mpoonya akujana balongwe bapya ibakali kutobela zyeelelo nzyondakali kutobela.

Kuleka zintu eezyi tiicakali cuuba-uba pe. Pele ndakatalika kujanika kumiswaangano ya Bakamboni ku Ŋanda ya Bwami alimwi akutalika kujana balongwe bapya mumbungano. Kunze lyaboobo, ndakazumanana kwiiya Bbaibbele cakusitikila ndemwini. Kucita boobu kwakapa kuti ndicince nyimbo nzyondakali kuswiilila, kucinca mbaakani zyangu mubuumi alimwi akutalika kulibamba kabotu. Mu 1995, ndakabbapatizyigwa kuba Kamboni wa Jehova.

MBONDAGWASYIGWA:

Lino mali alimwi azintu zyakumubili ndizilanga munzila yeelede. Ndakali muntu uufwambaana kunyema, pele mazuba aano ndili muntu uukkazika moyo. Alimwi tandicilibiliki kapati kujatikizya zyakumbele.

Ndilikkomene kuba cibeela cankamu yanyika yoonse yabantu babelekela Jehova. Akati kabantu aaba, ndilabona bamwi ibajisi mapenzi, pele bacizumanana kumubelekela Leza cakusyomeka. Ndilimvwa kukkomana kapati akaambo kakuti lino ndibelesya ciindi cangu anguzu kukomba Jehova alimwi akucitila bantu zintu zibotu, ikutali kucita buyo nzyondiyanda ndemwini.

• MWAKA WAKUZYALWA: 1963

• CISI NKOBAZWA: ENGLAND

• MBOBAKABEDE KAINDI: NDAKALITYOMPEDWE KAPATI MUBUUMI

MBONDAKABEDE KAINDI:

Ndakazyalilwa ku England, pele nondakali amyaka ibalilwa ku 7, twakalongela ku Australia. Twakaakutalika kukkala kubusena nkobaswaya basikweendeenda bwiitwa kuti Gold Coast ibuli ku Queensland, mu Australia. Nokuba kuti mukwasyi wesu tiiwakavwubide kapati, lyoonse twakalijisi nzyotwakali kuyandika.

Nokuba kuti ndakakomezyegwa mubukkale buli kabotu, kunyina nondakakkomene. Eeci cakandipa kutyompwa kapati mubuumi. Bataata bakali bacakolwa. Tiindakali kubayanda kapati akaambo kambobakali kunywa bukoko alimwi ambobakali kubeendelezya baama. Pele kumbele ndakatalika kumvwisya kaambo ncobakali boobu ciindi nondakazyiba zintu inzyakabacitikila nobakali basikalumamba ku Malaya.

Ndakatalika kuciindizya kunywa ciindi nondakacili kusekondali. Nondakali amyaka 16, ndakamanizya cikolo akusangana basikalumamba bamumaanzi. Aboobo ndakatalika kubelesya misamu iikola alimwi ndakaba acilengwa cakufweba. Ndakatalika kunywa bukoko cakuti tiindakali kukonzya kucita cili coonse kuti naa tiindanywa. Ndakaleka kunywa buyo awikkeendi, pele ndakatalika kunywa buzuba abuzuba.

Kandicili mukubusi, ndakatalika kudooneka naa Leza nkwali. Ndakatalika kulibuzya kuti, ‘ikuti naa Leza nkwali, nkaambo nzi ncazumizya bantu kupenga alimwi akufwa?’ Mane buya ndakatalika kulemba majwi aakweema kupa Leza mulandu akaambo kabubi boonse buli munyika.

Ndakabuleka busikalumamba bwamu maanzi kandili aamyaka 23. Mpoonya ndakatalika kubeleka milimo iisiyene-siyene mane buya akuunka mumasi aambi kwamwaka, pele kunyina cakamana kutyompwa nkondakajisi. Tiindakali kuyanda kulibikkila mbaakani iili yoonse naa kucita cintu cili coonse. Kunyina cintu cakali kundikkomanisya. Zintu mbuli kuba aŋanda yangu, mulimo mubotu alimwi akusumpulwa amulimo zyoonse ndakali kuzibona kuti tazigwasyi. Aboobo ndakali kujana “luumbulizyo” kwiinda mukunywa buyo bukoko alimwi akuswiilila nyimbo.

Ndilayeeya ciindi nondakalimvwa kuyandisisya kuzyiba mpindu yabuumi. Ndakali ku Poland, kuswaya cilabba cakupenzezya icakazyibidwe kapati aakaambo kazintu zibyaabi izyakali kucitika ku Auschwitz. Ndakali kubala kujatikizya zintu zyalunya izyakali kucitika kubusena oobu. Pele nondakaunka okuya akubona mbocakali cipati cilabba eeci, nguzu zyakandimana. Ndakaalilwa kumvwisya kaambo bantu ncobakali basilunya boobu kubantunyina. Ndilayeeya kandeendeenda kuzinguluka cilabba kumwi kayindeenda misozi akulibuzya kuti, ‘Nkaambo nzi?’

BBAIBBELE MBOLYAKANDICINCA:

Mu 1993, nondakazwa kucisi cimbi, ndakatalika kubala Bbaibbele kusola kuyandaula bwiinguzi. Pele tiilyakalampa, Bakamboni ba Jehova bobilo bakandiswaya akunditamba kumuswaangano wacooko iwakali kuyoocitilwa asitediyamu iyakali afwaafwi ankondakali kukkala. Aboobo ndakaunka.

Kwakaindide buyo myezi misyoonto nondakaunkide kusitediyamu eeyi nokwakali bbola, pele kwakali lwiindano lupati kapati aciindi camuswaangano wacooko ooyu. Bakamboni bakajisi bulemu, bakasamide kabotu alimwi abalo bana babo bakali kulilemeka kabotu. Ndakagambwa kapati ncondakabona aciindi cakulyookezya. Bakamboni banji kapati bakali kulida mubbuwa lyakusobanina bbola, pele ciindi nobakajokela mumasena mobakakkede, kunyina dooti lili lyoonse ndondakabona ilyakasyaala mubbuwa lyabbola. Kwiinda zyoonse, bantu aaba bakali kulibonya kukkutila akuba aluumuno, icintu ncondakali kuyanda kapati. Kunyina makani aali woonse ngondiyeeyede aakapegwa buzuba buya, pele bukkale bwa Bakamboni bwakandikkomanisya kapati.

Buzuba oobu kumangolezya, ndakayeeya mweenima iwakali kubala Bbaibbele alimwi akwiiya azikombelo ziindene-indene. Myaka yamusyule, wakandaambilide kuti Jesu wakaamba kuti muyoocizyiba cikombelo cakasimpe kwiinda mumicelo yancico. (Matayo 7:​15-​20) Aboobo ndakayeeya kuti ndisole kuzyiba kaambo Bakamboni ncobakayindene kapati azikombelo zimbi. Kwaciindi cakusaanguna mubuumi bwangu, ndakalimvwa kuba abulangizi asyoonto.

Nsondo yakatobela, Bakamboni bobilo ibakanditambide kumuswaangano wacooko bakaboola alimwi. Bakandilomba kwiiya Bbaibbele, mpoonya ndakazumina. Alimwi ndakatalika kujanika kumiswaangano ya Bunakristo antoomwe ambabo.

Mbondakali kuyaabwiiya Bbaibbele, ndakacinca kapati kujatikizya mbondakali kumubona Leza. Ndakayiya kuti talinguwe uupa kuti kakuli bubi akupenga alimwi akuti awalo lwakwe cilamucisa ciindi bantu nobacita zintu zibi. (Matalikilo 6:6; Intembauzyo 78:40, 41) Ndakaba aamakanze akusola kutacita cintu cili coonse cikonzya kumucisizya moyo Jehova. Ndakali kuyanda kukkomanisya moyo wakwe. (Tusimpi 27:11) Ndakaleka kuciindizya kunywa bukoko, kubelesya tombwe alimwi ndakabuleka bukkale bwakutalilemeka. Mu March 1994, ndakabbapatizyigwa kuba Kamboni wa Jehova.

MBONDAGWASYIGWA:

Ndilikkomene ncobeni alimwi akukkutila. Lino tandicibelesyi bukoko kusola kumana mapenzi aangu. Muciindi caboobo, ndayiya kuwaala mukuli wangu kuli Jehova.​—Intembauzyo 55:22.

Kwamyaka iili 10 yayinda, twalikwetene a Kamboni mubotu, Karen alimwi ndilijisi mwana musimbi muzyaanyina uutaliboteli uutegwa Nella. Toonse totatwe tulakkomana kubelesya ciindi cesu mumulimo wa Bunakristo, ikugwasya bantu kwiiya kasimpe kujatikizya Leza. Lino buumi bwangu bulaampindu.