Mibuzyo Yabasikubala

Ikweelana amilawo yamu Bbaibbele yakubelesya bulowa munzila yeelede, mbuti Bakamboni ba Jehova mbobazibona inzila zyabusilisi zyakubelesya bulowa bwamuntu ngoonya uusilikwa?

Muciindi cakulisalila kufwumbwa ncotuyanda naa ikuccilila ceeco icaambwa abasilisi, Munakristo umwi aumwi weelede kuzibikkila maano kapati zintu nzyolyaamba Bbaibbele. Makani aali boobo ajatikizya buyo nguwe a Jehova.

Jehova, iwakatupa buumi wakalailila kuti bulowa tabweelede kuligwa pe. (Matalikilo 9:3, 4) Mu Mulawo ngwaakapa bana Israyeli bansiku, Leza wakaamba mbobwakeelede kubelesyegwa bulowa akaambo kakuti bwiiminina buumi. Wakalaila kuti: “Buumi bwacintu cipona buli mubulowa, alimwi mebo ndamuzumizya kuti kamububelesya acipaililo kumanya milandu yanu.” Ino mbuti ikuti naa muntu wajaya munyama kutegwa alye? Leza wakati: “Weelede kutila bulowa ansi akubuvwumba abulongo.” * (Levitiko 17:11, 13) Imulawo ooyu Jehova wakawiinduluka ziindi zinji. (Deuteronomo 12:16, 24; 15:23) Ibbuku lyaba Juda litegwa Soncino Chumash lyaamba kuti: “Bulowa tabweelede kuyobolwa pe, pele bweelede kubonwa kuti ncintu citeelede kubelesyegwa kwiinda mukubutila ansi.” Kunyina muna Israyeli wakeelede kulya, kuyobola naa kubelesya bulowa bwacilenge cili coonse icijisi buumi bwakazwa kuli Leza.

Ikutobela Mulawo wa Musa kwakamana Mesiya naakafwa. Pele, Leza ucizumanana kubona bulowa kuti bulisetekene. Kabasololelwa amuuya uusalala wa Leza, ibaapostolo bakalailila Banakristo kuti ‘batantamuke bulowa.’ Mulawo ooyo wakeelede kubikkilwa maano kapati. Wakali kuyandika kapati mbubwenya mbokuyandika kulikasya kubwaamu naa kukukomba mituni. (Milimo 15:28, 29; 21:25) Ciindi kupa alimwi akubikkwa bulowa nokwakaduma kapati mumwaanda wamyaka wa 20, Bakamboni ba Jehova bakalizyi kuti kucita boobu tiikwakali kweendelana ancolyaamba Jwi lya Leza. *

Zimwi ziindi, dokota ulakonzya kwaambila mulwazi ikuyobozya bulowa bwakwe mwini nsondo zili mbozibede kacitanasika ciindi cakwaandulwa (preoperative autologous blood donation, naa PAD) ikutegwa ikuti naa kwaakuyandika, ulakonzya kumubikka mulwazi ibulowa bwakwe mwini mbwaakayobozya. Pele ooko kugusya, kuyobola alimwi akubikka bulowa kulakazyanya kapati acaambwa kubbuku lya Levitiko alimwi alya Deuteronomo. Ibulowa tabweelede kuyobolwa pe; bweelede kutilwa ansi, calo icili mbuli kupilusya bulowa kuli Leza. Masimpe kuti, Mulawo wa Musa taucibeleki lino pe. Nokuba boobo, Bakamboni ba Jehova balazitobela njiisyo zya Leza zili mumulawo oyo, alimwi balikanzide ‘kutantamuka bulowa.’ Aboobo tatupi bulowa alimwi tatubuyoboli pe kutegwa tukabikkwe bulowa bwesu oobo bweelede ‘kutilwa.’ Ikucita boobo kulakazyanya amulawo wa Leza.

Inzila zimwi izijatikizya bulowa bwamuntu uusilikwa ngoonya tazisalede kabotu kuti zilakazyanya anjiisyo zya Leza zyaambidwe. Mucikozyanyo, Banakristo banji balazumina kugwisyigwa bulowa bumwi kuti bukapimwe, mpoonya camana eeco bulasoogwa. Inzila zyabumpiyompiyo bunji zimbi izijatikizya bulowa bwamuntu uusilikwa ngoonya azyalo zilakonzya kubelesyegwa abasilisi.

Mucikozyanyo, ciindi muntu naandulwa, zimwi ziindi bulowa bumwi bulakonzya kugusyigwa mumubili akwiinzyigwa mumuncini kwiinda mukubelesya nzila iitegwa hemodilution. Aciindi nciconya, bulowa busyaala mumubili wamulwazi bulasanganizyigwa amisamu iimbi iili mbuli maanzi. Mpoonya, bulainzyigwa mumuncini uujisi tupila tuli mbuli nsinga zyabulowa akupilusyigwa mulinguwe, calo cipa kuti bulowa buvwule kutandila ali boobo buyandika. Mbubwenya buyo, ibulowa buzwa acilonda camuntu ciindi naandulwa bulakonzya kwiinzyingwa mumuncini akusanzyigwa, mpoonya akupilusyigwa mumubili wamulwazi; nzila eeyi iitwa kuti cell salvage. Munzila iimbi, ibulowa bulakonzya kutumwa mumuncini walo kwaciindi cili mbocibede uukonzya kuzumanana kubeleka munzila njoonya ibeleka zizo zyamumubili (mbuli moyo, mapunga naa nsa). Mpoonya bulowa bwali mumuncini bulapilusyigwa mumulwazi. Munzila zimbi, bulowa bulainzyigwa mumuncini uuseba uutegwa separator naa centrifuge ikutegwa zintu zitayandiki mubulowa naa izijisi bulwazi zigwisyigwe. Zimwi ziindi, nzila eeyi ilakonzya kubelesyegwa ikugusya zibeela zimwi zyabulowa akuzibelesya abusena bumbi mumubili. Mubukkale bumwi, dokota ulakonzya kubweza bulowa bumwi akubusanganya acintu cimwi, kumane akubupilusya alimwi mumibili wamulwazi kutegwa acikonzye kupima ncayanda, naa ulakonzya kusanganya musamu mubulowa mpoonya akubupilusya alimwi mumulwazi.

Kuli nzila zyabusilisi zinji ziindene-indene, alimwi bamadokota baluujisi kujana nzila zipya nzyobakonzya kubelesya mubusilisi. Tauli mukuli wesu pe ikulanga-langa nzila ziindene-indene zyoonse alimwi akusala ceelede kucitwa. Munakristo umwi aumwi weelede kulisalila mwini kujatikizya mbobweelede kweendelezyegwa bulowa bwakwe nobamwaandula, nobamupima ikusola kujana cilubide mumubili, naa nokubelesyegwa nzila zyabusilisi ziliko aciindi eeco. Kakucili ciindi, imulwazi weelede kubuzya dokota naa syaazibwene mukwaandula kuti amwaambile cilangilwa kuyoocitwa kubulowa bwakwe anikwaandulwa. Mpoonya weelede kusala kweelana ambwaamuzumizya manjezeezya aakwe. (Amubone kabbokesi.)

Banakristo beelede kunooyeeya kulyaaba nkobakacita kuli Leza alimwi ‘akumuyanda amoyo wabo woonse, abuumi bwabo boonse, anguzu zyabo zyoonse alimwi amizeezo yabo yoonse.’ (Luka 10:27) Mukwiimpana abantu banji munyika, Bakamboni ba Jehova balacibikkila maano kapati cilongwe cabo a Leza. Sikupa Buumi ukulwaizya bantu boonse ikusyoma mubulowa bwa Jesu bwakatilwa. Tubala kuti: “Kwiinda mulinguwe [Jesu Kristo] twakaangununwa acinunuzyo cabulowa bwayooyo, inzya, ikulekelelwa kwamilandu yesu.”—Baefeso 1:7.

[Bupanduluzi Buyungizidwe]

[Kabbokesi/​Cifwanikiso]

MIBUZYO NJOMWEELEDE KULIBUZYA

Ikuti naa ibulowa bwangu bumwi buyakwiinzyigwa mumuncini umwi kunze lyamubili wangu alimwi ambweni buyooleka akweenda kwaciindi cili mbocibede, sena manjezeezya angu ayoondizumizya kubona bulowa oobu kuti bucili cibeela camubili wangu, aboobo tabuyandiki ‘kutilwa ansi’?

Sena manjezeezya angu aakayiisyigwa njiisyo zyamu Bbaibbele ayoondikatazya ikuti naa, ciindi nondipimwa ikubona cilubide mumubili naa nondaandulwa, ibulowa bwangu bumwi bwagwisyigwa, bwasanganizyigwa amisamu iimbi alimwi akupilusyigwa mumubili wangu?