Kingdom News No. 34

Nkaambo Nzi Buumi Ncobuzwide Boobu Mapenzi?

Sena ilakonzeka paradaiso iitakwe mapenzi?

MAPENZI MAPATI AINDILA—NKAAMBO NZI?

 Lyoonse bantu balaajisi mapenzi. Nokuba kuti banji bakali kuyeeya kuti milimo yamazubaano yasayaansi ilakonzya kwaamana, imapenzi mapati ayaabwiindila.

Milandu: Mbasyoonto baliiba kweenda munzila nokuba kukkala mumaanda abo beni. Mucisi cimwi mu Europe, akati kabantu botatwe, ibakacitilwa milandu balatandila kuli omwe mumwaka umwi wainda.

Cilawo: Ibusofwaazi bwamuuwo, ibulongo, amaanzi buyaabusakana. Mumasi aacisumpuka, cibeela cane camweelwe wabantu tacijani maanzi mabotu pe.

Bucete: Bavwula bantu bacete abafwa nzala kwiinda lyoonse. Ikwiinda a 90 pasenti yabantu mumanyika amwi bali mubucete; 30 pasenti yababelesi banyika, ibasika ku 800 milioni, tabakwe milimo antela tabakwe milimo iilondokede—alimwi myeelwe iyabuya ambele.

Inzala: Nokuba kuti nywebo lwenu mulizulizizye zyakulya, ayaabuvwula mamiliyoni aabantu babulide. Mumasi aatasumpukide, mwaka amwaka balasika ku 13 milioni bantu bafwa lufwu luletwaa nzala, bunji bwabo kabali bana.

Inkondo: Myaanda yazyuulu zyabantu bafwa mukulwana akati kamisyobo. Alimwi mumwaanda wamyaka uno wa 20, inkondo zyajaya myaanda yamamiliyoni aabantu.

Mapenzi Aambi: Kunze lya yaaya ali atala, amusanganye akunyongana kwamikwasyi kwalo kuyaabwiindila, bamatumbu batakwetwe balo bayaabuvwula, bantu babulide minzi bayaabuvwula, kutabelesya kabotu misamu kwalo kuvwulide, kutalilemeka kuvwulide. Wakaamba kabotu, iwakali minisita ku U.S. naakati: “Zyavwulisya zintu zitondezya kuti . . . lusumpuko lwanyongana.” Mumyaka yainda ino-ino iili 30, mweelwe wabantu mu U.S. wayungizigwa a 41 pasenti, pele yalo milandu yalunya yatanta cakufwambaana kusika ku 560 pasenti, kuzyalila musokwe kwakayungizigwa a 400 pasenti, kulekana a 300 pasenti, kulijaya kwabakubusi kwakainda ku 200 pasenti. Ncimwi buyo amumasi ambi.

Nkaambo nzi Mapenzi Ncaaindila?

Mulengi wesu ulapa kwiingula. Ijwi lyakwe eeci ciindi cizwide mapenzi liciita kuti “mazuba aakumamanino” lyalo nokwakali kuzooba “ziindi zikataazya.” (2 Timothy 3:1) Mmamanino aanzi? Ibbaibbele lyaamba “mamanino aanyika.”—Matayo 24:3, King James Version.

Imapenzi aasunu ncitondezyo cilibonya cakuti mamanino aabweende oobu bwazintu alaafwaafwi, kubikkilizya amamanino aabubi abaabo babuleta. (Matayo 24:3-14; 2 Timoteo 3:1-5; Ciyubunuzyo 12:7-12) Ino-ino Leza uyoobililizya kubona kuti mapenzi oonse aasunu amanwa kugwisigwa.—Jeremiya 25:31-33; Ciyubunuzyo 19:11-21.

ZIKOMBELO ZYANYIKA EEYI ZYAKAKILWA

 Muciindi cakugwasya kumana mapenzi aasunu, zikombelo zyanyika eeyi zilaayungizya. Muziindi zyankondo, ba Katolika bajaya ba Katolika, ba Protestanti bajaya ba Protestanti—mane kusika kumamiliyoni. Ino-ino mu Rwanda, mwalo bunji bwabantu mobali ba Katolika, mwakali kujayana kwalo kwakasika kumyaanda yazyuulu! (Amubone cifwanikiso kulumwensi.)

Sena Jesu mmuntu uunga waunka kunkondo antobolo antela apanga akujaya basiciiya bakwe akaambo kakuti bazwa kucisi cimbi? Inga tasoleli limwi! Ibbaibbele lyaamba kuti “oyo uuyanda Leza uleelede kuyanda mweenzinyina alakwe.” (1 Johane 4:20, 21) Izikombelo zyanyika eeyi zyakakilwa kucita boobu. “Balalyaamba kuti, Tulizi Leza, anu kumilimo yabo balamukazya.”—Tito 1:16.

Ikuyungizya awa, izikombelo zyanyika kwiinda mukutasumpula zyeelelo zya Bbaibbele zyakulilemeka zilakugwasilizya kutalilemeka kuli munyika yoonse mbwiizulwa.

Jesu wakaamba kuti bulazibika bukombi bwakubeja abwakasimpe kwiinda mu “micelo yabo”—muzintu zicita basicikombelo eeco. Alimwi wakaamba kuti: “Musamu umwi aumwi uutazyali micelo mibotu ulatemwa akusowelwa mumulilo.” ( Matayo 7:15-20) Ijwi lya Leza litukulwaizya kuloboka bukombi buzyala micelo mibi bwalo buzoonyonyoonwa akaambo nkakona ako.—Ciyubunuzyo 18:4.

Bukombi Bwakasimpe Teebwakakilwa Pe

Bukombi bwakasimpe ‘bulazyala micelo mibotu,’ ikapati luyando. (Matayo 7:17; Johane 13:34, 35) Mbunyina nzi bwa Banakristo bukamantene, bujatikizya masi aaindene, bwalo bucita luyando luli boobu? Mbaani balo bakaka kujaya bantu bamucikombelo cabo naba muntu umbi?—1 Johane 3:10-12.

Bakamboni ba Jehova balaa mpuwo yakuuzyala “mucelo mubotu” ooyo. Inyika yoonse mbwiizulwa, mumanyika aainda ku 230, ‘bafula mapanga aabo aba maamba aakulimya.’ (Isaya 2:4) Iluyando lwabo kubantu kumwi lulatondezegwa mukumvwa mulawo wa Kristo wakukambauka “makani mabotu” aa Bwami bwa Leza nyika yoonse. (Matayo 24:14) Alimwi balakucita akukusumpula ikulilemeka kuya kuyiisigwa mu Bbaibbele.—1 Ba-Korinto 6:9-11.

Bukombi bwakasimpe teebwakakilwa pe. Bugamika bantu kuli Ooyo alikke uukonzya kumana mapenzi aabantu. Ino-ino Ooyo uyooleta nyika mpya. Ino nguni Ooyo? (Amulange kupeeji lyakusule.)

PARADAISO IITAKWE MAPENZI NCINTU CISINIZIDWE

 Nomwali kukonzya, sena inga tamukwe kwaamana mapenzi oonse aakatazya bantu? Ncobeni inga mwaamana! Sena inga twayeeya kuti Mulengi wesu alikke uujisi nguzu zyakumana mapenzi aamuntu abusongo walo takoocita mbubwena?

Ibbaibbele lilatondezya kuti Leza uyoobililizya mutwaambo twabantu kwiinda mumfulumende yakwe yakujulu iili mumaanza aa Jesu Kristo. Iyoo “pwayaula” mfulumende zyalucengo zyaanyika. (Daniele 2:44; Matayo 6:9, 10) Nkaambo nzi? Sintembauzyo kaambila Leza ulaingula: “Bazibe kuti nduwe olike oojisi izina lya-Jehova, nduwe Mupatikampatila atala anyika yoonse”—Intembauzyo 83:18.

Yaakumana nyika eeyi, sena kuyooba bafutuka? “Nyika ilamana, . . . pele oyo uucita makanze aa-Taata ulakalilila kukabe kutamani” mbolyaamba Bbaibbele. (1 Johane 2:17) Nkuli aaba basikufutuka nkobayookkala kukabe kutamani? “Balulami bayookona nyika, bayookala alinjiyo lyoonse” mboliingula Bbaibbele.—Intembauzyo 37:9-11, 29; Tusimpi 2:21, 22.

Munyika mpya ya Leza, “takukooyooba limbi lufu, nikuba kuomoka nikuba kulila nikuba kuciswa.” (Ciyubunuzyo 21:4) Takukooyooba limbi milandu, bucete, inzala, malwazi, kuusa, noluba lufwu! Ee, nobaba bafwide bayakubusigwa alimwi! “Kulaba kubuka kwabafu.” (Incito 24: 15) Alimwi nyika lwayo iyoosandulwa kuba paradaiso ini-ini.—Isaya 35:1, 2; Luka 23:43.

Ninzi ncotweelede kucita kutegwa tukabe abuumi munyika ya Leza mpya? Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Bantu banji basyomeka munyika yoonse mbwiizulwa balalujana luzibo oolo. Eeci cibapa kwaakonzya mapenzi aabo lino, pele kwiinda waawa, cibapa lusyomo lwakuti mapenzi ngobatakonzi ayoomanizigwa kubambwa munyika ya Leza mpya.

[Picture credit line on page 2]

Cifwanikiso ca WHO cakatolwaa P. Almasy

[Picture credit line on page 3]

Jerden Bouman/Sipa Press