Sena Mulayanda Kuzyiba Zinji Kujatikizya Bbaibbele?

 Nkaambo nzi Ncomweelede Kulibala Bbaibbele?

KUNYINA bbuku limbi lili mbuli Bbaibbele—ndibbuku ilijisi malailile aaluyando kuzwa kuli Leza. (1 Ba-Tesalonika 2:13) Ikuti mwazitobela nzyoliyiisya Bbaibbele, muyoogwasyigwa kapati. Iluyando ndomujisi kuli Leza luyookomena alimwi muyoobaa cilongwe anguwe ooyo Sikupa “zipego zibotu zyoonse azyoolwe zyoonse zilondokede.” (Jakobo 1:17) Muyoozyiba mbomunga mwapaila kulinguwe. Iciindi nomuli mumapenzi, mulakonzya kugwasyigwaa Leza. Ikuti mweendelanya bukkale bwanu azyeelelo izili mu Bbaibbele, Leza uyoomupa buumi butamani.—Ba-Roma 6:23.

Ibbaibbele lijisi twaambo twamasimpe itukatalusya. Aabo ibajana luzibo lwa Bbaibbele balaangululwa kumakani aataluzi aasyomwaa tuulunzuma twabantu. Mucikozyanyo, ikuzyiba makani aakasimpe kujatikizya cicitika twafwa kulatwaangulula kukuyoowa kuti bantu bafwide balakonzya kutucisa naa kuti basazima alimwi abalongwe besu bakafwa bali mukupenzyegwa. (Ezekieli 18:4) Injiisyo ya Bbaibbele yabubuke ilabaumbulizya aabo bakafwidwa bayandwa babo. (Johane 11:25) Ikuzyiba makani aamasimpe kujatikizya bangelo babyaabi kulatukwabilila kuntenda zyakujatikizyigwaa mizimo alimwi  kutugwasya kuteelela ncokuli manyongwe manji kapati boobu aanyika.

Injiisyo nzyatupede Leza mu Bbaibbele zilatutondezya mbotunga twabaa bukkale ibugwasya kubuumi bwesu. Mucikozyanyo, ikuba “muntu uusitikide” muzintu kulagwasya kapati mukusumpula buumi bubotu. (1 Timoteo 3:2) Kwiinda ‘mukulisonzola kubusofwaazi boonse nibuba bwamubili nibuba bwamoyo,’ tweeleba kunyonyoona buumi bwesu. (2 Ba-Korinto 7:1) Kunze lyaboobo, ikutobela lulayo lwa Leza iluli mu Bbaibbele kusumpula lukkomano mulukwatano alimwi kupa bulemu kumuntu umwi aumwi.—1 Ba-Korinto 6:18.

Ikuti mwatobela caamba Jwi lya Leza, munooli bantu bakkomene. Luzibo lwa Bbaibbele lutugwasya kubaa luumuno lwamumoyo amumizeezo, kukkutila azyeezyo zyotujisi alimwi akubaa bulangizi. Lutugwasya kubaa bube bubotu kapati mbuli lweetelelo, luyando, lukondo, luumuno, buuya alusyomo alimwi akutugwasya kubutondezya bube oobu. (Ba-Galatiya 5:22, 23; Ba-Efeso 4:24, 32) Ibube buli boobo butugwasya kuba mulumi naa mukaintu, bausyi naa banyina, mwana mulombe naa musimbi imubotu alimwi uulombozyeka.

 Sena kuli nomwakatelaikide kujatikizya buumi bwanu bwakumbele? Ibusinsimi bwa Bbaibbele butondezya kuti tupona muciindi ciyandika kapati mubukkale bwabantu. Oobu businsimi tabupandululi buyo mboibede sunu nyika, pele alimwi bulatondezya kuti ino-ino Leza uyooyisandula nyika eeyi kuba paradaiso.—Ciyubunuzyo 21:3, 4.

Lugwasyo Mukuteelela Bbaibbele

Ambweni mwakasola kulibalila Bbaibbele pele cakamuyumina kuliteelela. Ambweni tamuzyi nkomukonzya kulanga mu Bbaibbele ikutegwa mujane bwiinguzi kumibuzyo yanu. Ikuti naa mboobo, tamuli nyolikke pe nomujisi penzi eelyo. Toonse tuyandika lugwasyo mukuliteelela kabotu Jwi lya Leza. Bakamboni ba Jehova mumasi aatandila ku 235 bali mukwaabila lwiiyo lwa Bbaibbele lutabbadelelwi kutuulunzuma twabantu. Balayandisisya kumugwasya anywebo.

Ibunji bwaziindi cilagwasya ikwiiya Bbaibbele bucebuce kutalikilaa njiisyo zyantalisyo. (Ba-Hebrayo 6:1) Mbomuyaabuzumanana, muyoocikonzya kulya “zilyo ziyumu”—nkokuti ikuteelela makani aakasimpe mayumu. (Ba-Hebrayo 5:14) Mu Bbaibbele momuzwa njiisyo zyoonse ziyiisigwa. Imabbuku aapandulula Bbaibbele mbuli broshuwa lyakuti Ncinzi Leza Ncayanda Kulindiswe? ayoomugwasya kuteelela Magwalo aabandika zibalo ziindene-indene.

 Sena Mulilisungwide Kutola Ciindi Cili Mbocibede Mvwiki Amvwiki Kutegwa Muliteelele Bbaibbele?

Ibubambe bwaciiyo ca Bbaibbele bulakonzya kucitwaa ciindi alimwi abusena buli kabotu kulindinywe. Ibanji bayiila mumaandaabo. Ibamwi mane balaiya kwiinda mukubelesya luwaile. Ipulogilamu yaciiyo taili yalwiiyo lwamalailile lujatikizya bantu banji pe, pele mbubambe bwamuntu omwe-omwe ibubambilidwe kumugwasya nywebo lwenu kweelanaa bukkale bwanu kubikkilizyaa luzibo alimwi alwiiyo ndomujisi. Kunyina misunko iicitwa pe, alimwi kunyina nomuyoowusigwa nsoni pe. Imibuzyo yanu iiyeeme aa Bbaibbele iyooyingulwa, alimwi muyooyiya mbomukonzya kubaa cilongwe a Leza.

Tamukayandiki kucibbadelela eeci ciiyo ca Bbaibbele. (Matayo 10:8) Cilapegwa kakunyina kubbadelelwa kubantu bazikombelo zyoonse alimwi akulibaabo ibanyina cikombelo nkobazulilwa pele ibayandisya camoyo woonse ikuyungizya luzibo ndobajisi kujatikizya Jwi lya Leza.

Ino mbaani bakonzya kutola lubazu mumubandi? Mukwasyi wanu woonse. Abalo balongwe bali boonse mbomukonzya kutamba balakonzya kutola lubazu. Alimwi ikuti naa mwayanda, imubandi ulakonzya kucitwa buyo andinywe.

Ibanji babikka ambali woola lyomwe kutegwa baiye Bbaibbele mvwiki amvwiki. Ikuti kamukonzya kutola ciindi ciindaawo naa mujisi buyo ciindi cisyoonto amvwiki, kunyina makani Bakamboni bayoomugwasya.

 Ikutambwa Kukwiiya

Twamutamba kuti mubazibye Bakamboni ba Jehova. Inzila yomwe mbomunga mwacita boobo nkwiinda mukulembela kukkeyala imwi akati kayaaya alaansaawa. Mpoonya kuyoocitwa bubambe bwakuti umwi wabo keendelezya ciiyo ca Bbaibbele citabbadelelwi kulindinywe.

□ Amunditumine broshuwa lyakuti Ncinzi Leza Ncayanda Kulindiswe?

□ Amundilembele kujatikizya ciiyo ca Bbaibbele citabbadelelwi caaŋanda.

Ccita kuti kwatondezyegwa bumbi, ibusanduluzi bwa Bbaibbele ibwabelesegwa mukuzubulula mbwamu The Bible in Tonga, 1963.