Icuulu Camyaka Cipya Sena Ngamatalikilo Aabukkale Bupya?

IMWAANDA wamyaka wa 20 wakamana mu December 31, 1999 akaandabwe kabusiku. * Wakali mwaanda wamyaka iwakazwide manyongwe. Pele wakali mwaanda wamyaka nokwakali kuyaambele kapati muzyakupanga-panga zyasayaansi, kuyaambele muzyamisamu yabusilisi, mukuvwula kwamakani aamwaigwa alimwi akuyaambele nyika yoonse mboizulwa mubuvwubi. Aboobo ibunji bwabantu balangila kubaa bukkale bubotu alimwi akucinca kwazintu mucuulu camyaka eci cipya. Sena nkondo, bucete akusofwaazyigwa kwacilawo motukkede alimwi amalwazi zilamana lino mucuulu camyaka eci?

Ibunji bwabantu ncobalangila eci. Ino muzyi buti kuti icuulu camyaka cipya ciyooleta kucinca kutiikamugwasye akumukwabilila nywebo antoomwe amukwasyi wanu? Amulange-lange buyo kuvwula kwamapenzi ngotulaangawo.

Ikusofwaazya Nyika

Masi aasumpukide muzyakupanga-panga “ali mukunyonyoona akucisofwaazya kapati cilawo motukkede kubikkilizya akunyonganya bukkale bwazilenge.” Ikuti naa ciyanza eci cizumanane, “cilawo ncotukkede ciyoonyonyweedwa limwi.” —“Global Environment Outlook—2000,” United Nations Environment Programme.

Malwazi

“Kuya kusika mumwaka wa 2020, ibantu bali ciloba mubantu bali kkumi mumasi aacisumpuka balangilwa kunoofwa amalwazi aatayambukili kweezyanisya amweelwe uutasiki akucisela camweelwe oyu wabantu bafwa sunu amalwazi ngoonya aaya.”—“The Global Burden of Disease,” Harvard University Press, 1996.

Bahaazibwene bamwi baamba kuti “kuyoosika mumwaka wa 2010, ibantu batandila kutuluunzuma tuli 66 mumasi aali 23 mwalo bulwazi bwasikalileke [AIDS] mobudumide kapati, balangilwa kufwa.”—“Confronting AIDS: Evidence From the Developing World,” ilipooti yakacitwa abakabunga ka European Commission alimwi a World Bank.

Bucete

“Ibantu batandila ku 1,300,000,000 balapona amali aatasiki aku $1 (mali aaku Amelika) abuzuba alimwi ibatandila ku 1,000,000,000 tabakonzyi kulijanina cakulya cabuzubaa buzuba.”—“Human Development Report 1999,” United Nations Development Programme.

Inkondo

“Ikulwana [muzisi zisiyene-siyene] kulangilwa kuyaambele kapati kusikaa ciimo mpokutanasikide. Ikulwana kucitwa akaambo kakwiindana mubala amwaambo kubikkilizyaa cikombelo, . . . kulwana ooku kuyooleta . . . mazwanga aanoodumide kapati mumyaka yakusaanguna iili 25 mumwaanda wamyaka oyu . . . , elyo kunoofwa myaanda-myaanda yazyuulu zyabantu amwaka mumazwanga aaya.”—“New World Coming: American Security in the 21st Century,” U.S. Commission on National Security/21st Century.

Aboobo, ibusungu alimwi alukkomano luliko lino akaambo kacuulu camyaka cipya kwapa kuti bantu bataboni kuti busofwaazi, ikuciswa akucetaala alimwi ankondo zyaindila kwiinda lyoonse. Ibulyatu, kutasyomeka alimwi akuliyanda nzyezicitya mapenzi oonse aaya—ezi nziyanza zitakonzyi kumaniizyigwa kwiinda mukubelesya buhaabupampu bwasayaansi, ikuyaambele mulwiiyo lwakupanga-panga naa kwiinda mumapolitikisi.

 Icuulu Camyaka Mobayoolongezyegwa Bantu

MULEMBI umwi wansiku wakaamba kuti: “Muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” (Jeremiya 10:23) Muntu takonzyi pe alimwi takwe nguzu zyakweendelezya nyika. Alikke Mulengi wesu, Jehova Leza nguujisi nguzu alimwi nguukonzya kumaniizya mapenzi ngobajisi bantu.—Ba-Roma 11:33-36; Ciyubunuzyo 4:11.

Pele ndilili nayoocita obo? Ino uyoozicita buti? Ibumboni butondezya kuti tuli “kumazuba aakumamanino” kwini-kwini. Amujalule Bbaibbele lyanu akubala 2 Timoteo 3:1-5. Lilatondezya kabotu-kabotu tumpenda ibantu ntobakali kuzootondezya ‘kuziindi zikatazya’ eezino. Bupanduluzi bwa “mazuba aakumamanino” bulajanika akuli Matayo 24:3-14 alimwi a Luka 21:10, 11. Ooku tujana zintu zyakacitika kuzwa mu 1914, mbuli nkondo yanyika yoonse, malwazi alimwi akubulilana kwazyakulya mumasena manji.

Lino-lino “mazuba aakumamanino” alamana. Ibbuku lya Daniele 2:44 lyaamba kuti: “Leza wakujulu uyoobusya bwami butakooyoonyonyoonwa abuniini mane kukabe kutamani. . . . Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” Aboobo cakasinsimwa kuti Leza wakali kuzyookkazika Bwami naa imfwulumende yakali kuzyooyendelezya nyika. Kweelana ambolyaamba ibbuku lya Ciyubunuzyo 20:4, imfwulumende eyi iyooyendelezya kwamyaka iili cuulu—icuulu camyaka! Amulange-lange mbazu zimwi buyo bukkale bwabantu mbobuyoosumpulwa mu Cuulu Camyaka eci cabulemu:

Buvwubi. “Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe.”—Isaya 65:21, 22.

Buumi. “Lino meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.” “Lino takukooyooba naba omwe akati kabantu banyika uuamba kuti, Ndaciswa.”—Isaya 33:24; 35:5, 6.

Cilawo Motukkede. Leza ‘uyoobanyonyoona abo banyonyoona nyika.’—Ciyubunuzyo 11:18.

Luyanzano Lwabantu. “Tabakooyooluma nikuba kunyonyoona moonse mucilundu cangu cisalala, nkaambo nyika iyoozula luzibo lwa-Jehova.”—Isaya 11:9.

Tuulunzuma twabantu balazisyoma zisyomezyo eezi zyamu Bbaibbele, aboobo balijisi bulangizi bubotu bwabukkale bwakumbele. Akaambo kaceeci, bacikonzya kuliyumya mumakatazyo alimwi amapenzi aabacitikila mubuumi. Ino Bbaibbele inga lyamusololela buti mubuumi bwanu?

 Luzibo Lusololela Kubuumi!

SAYAANSI alimwi alwiiyo lwazyakupanga-panga zimwi ziindi zilakondelezya kapati! Nokuba boobo, luzibo lwabantunsi lwaalilwa kuleta luumuno alimwi alukkomano kubantu banji. Iluzibo lulikke lukonzya kuzizuzikizya eezi lulaambwa mu Bbaibbele kuli Johane 17:3, kuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.”

Luzibo oolu lulajanika mumwena mu Bbaibbele. Nokuba kuti ibanji balalilemeka bbuku eli lisalala, mbasyoonto buyo ibakalibala kale. Ino mbuti nywebo? Masimpe, ikubala Bbaibbele kuyandika kusolekesya kapati. Pele cilagwasya ikulibala. Ibbaibbele ndebbuku lilikke ‘lyakazwa kuli Leza, likondede kukufwundisya akukulaya, akukuolola akukupandulula makani aabululami.’—2 Timoteo 3:16.

Pele ino mbuti mbomukonzya kulujana luzibo lwamu Bbaibbele? Nkaambo nzi ncomutazumizyi Bakamboni ba Jehova kuti bamugwasye? Bayiisya tuulunzuma twabantu kwiinda mukubaunkila kumaandaabo kakunyina kubbadelesya. Ikutegwa bamugwasye mulwiiyo olu, babelesya mabbuku aapandulula Bbaibbele mbuli broshuwa lya Ncinzi Leza Ncayanda Kulindiswe? Lilijisi bwiinguzi bugaminide kumibuzyo yamu Bbaibbele njomunga mwabaanjiyo mbuli bwayeeyi: Ino Leza nguni? Mmakanze nzi ngajisi Leza kujatikizya nyika? Ino Bwami bwa Leza ninzi? Ino Bbaibbele inga lyabusumpula buti bukkale bwamumukwasyi wanu?

Ikuti naa kamuyanda kuti umwi wa Bakamboni ba Jehova akamuswaye kuŋanda yanu, amulembe mumasena muyandika kulembwa ansaawa. Balilibambilide ikumugwasya kuziba zinji kujatikizya Bulelo bubotu bwa Bwami bwa Leza bwa Myaka iili Cuulu!

□ Ndilayandisya kutambula broshuwa lyakuti Ncinzi Leza Ncayanda Kulindiswe?

Mutondezye mwaambo ngomuyanda․

□ Amundilembele kujatikizya ciiyo ca Bbaibbele caaŋanda cipegwa buyo

Bupanduluzi buyungizidwe