Kingdom News No. 35

Mwati Kuli Nobayooyandana Buya Bantu Boonse?

 Luyando Lwabusibukobonyina Lwamana

IMAMILIYONI aabantu balilendeledwe alimwi akuusa kapati, kabanyina nkobanga balangila lugwasyo. Imukaintu umwi iwakacileka makwebo wakaluula boobu: ‘Bumwi buzuba ciindi camangolezya mukamufwu umwi ngotukkala mudadaada omwe wakakonkomona amulyango wangu akundaambila kuti wakali kumvwa bukata. Cabulemu pele kumwi kandisinizizye ndakamwaambila kuti ndakajisi bubi. Wakalilekelela kundikatazya nkwaakandikatazya amane ngooyo waunka wapiluka.’

Icuusisya nsoni kapati ncakuti, imasiku ngoonaayo, mukamufwu ooyu wakalijaya. Kumbele imukaintu uulya simakwebo wakazikwaamba kuti “[wa]kaiya ciiyo cipati.”

Ikubula luyando lwabusibukobonyina kanjikanji kuleta mapenzi mapati. Ilyamazwanga aakati kamisyobo yabantu bamucisi ca Bosnia a Herzegovina, icakali cibeela cacisi ca Yugoslavia kaindi, ibantu bainda ku 1,000,000 bakasinikizigwa kuzwa akusiya maanda aabo, elyo aboobo imakumi aazyuulu aabantu akajaigwa. Akajaigwa abani? “Abasimukoboma,” mbwaakatongooka musimbi umwi wakatandwa kuzwa mumunzi wakwe. “Twakalibazyi bajayi aaba.”

Mucisi ca Rwanda imyaanda yazyuulu zyabantu bakajaigwa, kanjikanji abasimukobonyina beni-beni. “Iba Hutu aba Tutsi bakali kukkalaamwi, kabakwatana akati kabo, kabanyina makani naa kabatabikkilide maanu kuzyibana kuti ooyu mu Hutu, ooyu mu Tutsi,” mbolyakaluula ipepa lyamakani lya The New York Times. “Mpoona cintu cimwi cakazyikwiile kubbuka,” elyo “mpoonaawo kujayana kwakatalika.”

Abalo iba Juda abama Arab mucisi ca Israyeli bakkede antoomwe mubusena bomwe, pele ibunji bwabo balasulaikana. Ncimwi buyo abunji bwaba Katolika aba Protesitanti mucisi ca Ireland alimwi abamwi ibanji ibali mukuvwula mumasi amwi. Tacininga citikide eeci cakubulika kwaluyando kuli boobu munyika.

Nkaambo nzi Iluyando lwa Busibukobonyina Ncolwamana?

Mulengi wesu ulapa bwiinguzi. Ijwi lyakwe, Ibbaibbele, iciindi cino motukkede liciita kuti “mazuba aakumamanino.” Iciindi ibusinsimi bwa Bbaibbele nobwaamba kuti, ibantu banooli “basilunya.” Kaamba zya “ziindi zikataazya” zino, zyalo mu Magwalo iziitwa akuti “mamanino aaciindi,” Jesu Kristo wakaambilizya kuti “luyando lwabantu banji luyoomana.”—2 Timoteo 3:1-5; Mateyo 24:3, 12, Tonga Bible 1996.

Ikubula luyando kwamazubaano ncibeela cazitondezyo icaamba kuti tukkede mumazubaa mamanino aanyika ino. Pele, mucoolwe eeci alimwi cipandulula kuti eeyi nyika yabantu batakombi ono-ono iyakunjililwa abusena anyika impya iiluleme iiyendelezegwa muluyando.—Matayo 24:3-14; 2 Petro 2:5; 3:7, 13.

Pele sena mmasimpe tulijisi kaambo keni-keni kakusyoma kuti kucinca kuli boobo inga kwakonzeka—ikwakuti ibantu boonse balakonzya kwiiya kuyandana akukkala antoomwe calukamantano muluumuno?

 Mboluyakuzuzikizigwa Luyando Lwabusibukobonyina

“INO munamuzeesu nguni?” umwi similawo wamumwaanda wamyaka wakusaanguna mbwaakabuzya Jesu. Kakunyinaa kudonaika wakali kulangila kuti Jesu ulaamba kuti, ‘Mba Judanyoko.’ Pele mucikozyano camu-Samariya siluzyalo, Jesu wakatondezya kuti ibantu bamisyobo na zisi zimbi abalo mbaasimukoboma.—Luka 10:29-37; Johane 4:7-9.

Jesu wakaambisya kuti, icitobela kuzwa buyo aakuyanda Leza, nduyando lwasimukoboma lwalo ilweelede kutweendelezya mumaumi esu. (Matayo 22:34-40) Pele sena kuli nkamu yabantu kuciindi cimwi yakabayanda cini-cini basimukobonyina? Ibanakristo bakutaanguna bakacicita eeco! Bakali kuzyibilwa kuluyando ndobakajisi kubantu bamwi.—Johane 13:34, 35.

Ino mbuti ma mazubaano? Sena luyando luli mbuli lwakajisi Kristo lulalibonya kalucitwa abantu bali boonse? Ibbuku litegwa Encyclopedia Canadiana liluula boobu: “Imulimo wa Bakamboni ba Jehova nkubukuluka alimwi akutalisigwa lubo kwa Bunakristo bwakacitwaa Jesu abasiciiya bakwe . . . Boonse mbanyina.”

Pele ino eeci caamba nzi? Caamba kuti Bakamboni ba Jehova tabazumizyi cintu nociba cimwi—mbuli mukowa, cisi nkobazwa, nokuba kwiimpana kwaciimo cabantu—kubacitya kuti basulalike basimukobonyina. Nokuba kujaya muntu uuli woonse, tabaciciti pe, nkaambo munzila yacikozyano baafwula mapanga aabo kuba maamba aakulimya amasumo aabo kuba zizibyo zyamisamu. (Isaya 2:4) Atwaambe kuti Bakamboni balizyibidwe busungu bwabo bwakuyandisya kugwasya basimukobonyina.—Ba-Galatiya 6:10.

Aboobo tacigambyi kubala makani aakalembwa abasikulondola malembe ibapepa lyamakani kucisi caku California litegwa Sacramento Union ibakati: “Atwaambe buyo kuti bantu boonse munyika nobali kukkala kweendelana alusyomo lwa Bakamboni ba Jehova, kutila bulowa akusulaikana nokumanide, iluyando nokwali kunga ndoluzwide koonse-koonse.” Imulembi umwi mumagazini iitegwa Ring kucisi ca Hungary mboobu mbwaakakanana awalo: “Mebo lino ndasyoma kuti Bakamboni ba Jehova nobali mbabantu balikke bapona munyika, nokwatacili nkondo, alimwi masilikani nobajisi buyo milimo yakweendelezya myootokala mumigwagwa akupa mapepa aazumizya kunjila mumasi aambi.”

Pele kwaamba masimpe kuyooyandika kucinca kupati kwamunyika yoonse mboizulwa, ikutegwa bantu boonse bayandane. Ino kucinca kuli boobo inga kwaba buti? (Twamulomba kuti mubone kupeeji lyamamanino.)

 Iciindi Bantu Boonse Nobaya Kuyandana

IMUPAILO Jesu Kristo ngwaakayiisya utondezya kuti kucinca kupati kuli afwaafwi kapati. Mu Mulumbe wakwe uuzyibidwe kapati waa Cilundu, Jesu wakatuyiisya kukomba kuti: “Abuboole bwami bwako, alucitwe luyando lwako ansi aano mbubonya mbuli mbolucitwa kujulu.”—Mateyo 6:10, Tonga Bible 1996.

Ino Bwami bwa Leza ncinzi? Nimfwulumende ini-ini, iyeendelezezya kujulu. Nkakaambo kaako ncoyiitwa kuti “Bwami bwakujulu.” Jesu, “Mwami waluumuno,” wakabikkwa a Wisi kuba mweendelezi wayo.—Matayo 10:7; Isaya 9:6, 7; Intembauzyo 72:1-8.

Iciindi Ibwami bwa Leza bwaakuboola, ncinzi ciyakucitika kunyika ino iizwide lusulo? “Bwami,” obu “buyoopwayaula akumanisya” imfwulumende zyabumpelenge zyoonse zyanyika ino. (Daniele 2:44) Ibbaibbele lipandulula kuti: “Nyika ilamana . . . , pele oyo uucita makanze aa-Taata ulakalilila kukabe kutamani.”—1 Johane 2:17.

Kalijatikizya nyika mpya ya Leza, Ibbaibbele mboobu mbolyaamba: “Balulami bayookona nyika, bayookala alinjiyo lyoonse.” (Intembauzyo 37:9-11, 29; Tusimpi 2:21, 22) Ma! Eco kaka ciya kuba ciindi cakukkomana kutaambiki! “Takukooyooba limbi lufu, nikuba kuomoka nikuba kulila nikuba kuciswa.” (Ciyubunuzyo 21:4) Nibaba baabo bafwide bayakupona alimwi, kunze lyaboobo nyika yoonse mboizulwa iyakubambululwa kuba paradaiso yini-yini.—Isaya 11:6-9; 35:1, 2; Luka 23:43; Incito 24:15.

Kutegwa tukaakupone munyika eeyo mpya ya Leza, tweelede kuyandana, mbubwena Leza mbwatuyiisya kuti tucite. (1 Ba-Tesalonika 4:9) Sikwiiya Bbaibbele umwi wakucisi ca Kujwe wakaamba kuti: “Ndilangila ciindi eelyo, ibantu boonse nobana kuyiisidwe kuyandana mbubwena mbuli Bbaibbele mbolisyomezya.” Aboobo, tulakonzya kusinizya kuti Leza uyoozuzikizya zisyomezyo zyakwe! Walo waamba kuti “Ndaamba kale makani . . . lino njoocita obo.”—Isaya 46:11.

Pele kutegwa mukakkomane azilongezyo mu Bwami bwa Leza, mweelede kubaa luzibo luli mu Bbaibbele, kwiinda mukulwiiya, mbubwena mbuli mamiliyoni aabantu babombe myoyo mbobali mukucita nyika yoonse mboizulwa. (Johane 17:3) Ibroshuwa iijisi mapeeji aali 32 yakuti Ncinzi Leza Ncayanda Kulindiswe? iyoomugwasya kapati. Amujane kkopi yanu kwiinda mukukasaina kapepa kapedwe kupeeji lyamusule aaleeli akukatumina kukkeyala kufwaafwi ankomuzwa.

[Picture credit line on page 2]

Sikalumamba alimwi adilwe mu Bosnia: Reuters/Corbis-Bettmann