Bantu banji baamba kuti tatukonzyi kuzyiba cintu cili coonse kujatikizya kujulu nkaambo kunyina wakalibonena kale iwakazwa nkuko uukonzya kutwaambila kujatikizya nkuko. Kuyeeya kuli boobo kulilubide. Jesu Kristo wakaliko kale kujulu, busena bwamuuya, katanaboola anyika. Wakabaambila cakusalazya basololi bazikombelo bamumwaanda wamyaka wakusaanguna naakati: “Nkaambo ndakaboola kuzwa kujulu kuti nditaciti kuyanda kwangu, pele ndicite kuyanda kwayooyo wakandituma.” Aboobo Jesu wakaambila baapostolo bakwe mulomo mpande naakati: “Muŋanda ya Taata muli makkalilo manji.”—Johane 6:38; 14:2.

Mubwini, Bausyi Jesu ngu Leza, walo uujisi zina lyakuti Jehova, alimwi “ŋanda” ya Jehova ili kujulu. (Intembauzyo 83:18) Aboobo, kunyina uukonzya kupandulula kabotu zyakujulu kwiinda Jehova Leza alimwi a Jesu Kristo. Bakayubununa zinji kujatikizya kujulu kwiinda muzilengaano zigambya nzyobakapa kuli baabo basyomeka.

Cibalo citobela cilabandika zibeela zyamu Bbaibbele izipandulula nzyobakabona baalumi muzilengaano izili mbozibede. Nomulanga-langa zilengaano eezyi, amuyeeye kuti busena bwakujulu mbwamuuya, tabujisi zintu nzyotukonzya kujata naa kubona. Aboobo, muciindi cakupandulula makani munzila yakumuuya, calo icikonzya kukatazya kuti tuzimvwisye, Leza wakabamba zilengaano kutondezya zintu izili kujulu mbozibede kutegwa tucikonzye kuzimvwisya. Zilengaano ziyoomugwasya kumvwisya baabo ibakkala kujulu ikuli “makkalilo manji.”