1, 2. (a) Ino mbuyumu-yumu nzi mbobajana bantu banji ibazwa kumasi aambi mazuba aano? (Amubone cifwanikiso icili kumatalikilo aacibalo.) (b) Ndulayo nzi ndwaakapa mwaapostolo Paulo, alimwi ino eeci cileta mibuzyo nzi?

MYAKA iili 30 yainda, ba Osei, ^[1] ibatakali Bakamboni aciindi eeco, bakaunka ku Europe ikuzwa ku Ghana. Balayeeya kuti: “Tiilyakalampa pe, ndakabona kuti bantu banji tiibakali kundibikkila maano. Alimwi kwakali kutontola kapati. Ciindi nondakazwa abbuwa lyandeke alimwi ciindi cakusaanguna mubuumi bwangu nondakamvwa mbokutontola kapati, ndakatalika kulila.” Akaambo kakuti ba Osei tiibakauzyi kabotu mwaambo, kwaciindi ciinda kumwaka omwe cakabakatazya kujana mulimo weelela. Akaambo kakuti bakali kule kapati amukwasyi wabo, bakalendelelwa kapati.

² Amweezyeezye kujatikizya mbomunga mwayanda kuti bamwi bamulanganye ikuti nomwali mubukkale ibukozyenye. Sena inga tiimwakkomana kutambulwa amaanza obilo ku Ŋanda ya Bwami, tacikwe makani acisi nkomuzwa naa mubala? Mubwini, Bbaibbele likulwaizya Banakristo bakasimpe kuti: “Mutalubi kusamausya  beenzu.” (Heb. 13:2) Aboobo atulange-lange mibuzyo eeyi iitobela: Ino Jehova ubabona buti beenzu? Nkaambo nzi ncotweelede kucinca kujatikizya mbotubabona beenzu? Mbuti mbotukonzya kubagwasya kulimvwa kwaanguluka aabo ibazwa kumasi aambi ibali mumbungano yesu?

3, 4. Kweelana alugwalo lwa Kulonga 23:9, mbuti bantu ba Leza bansiku mbobakeelede kubabona beenzu, alimwi ino nkaambo nzi?

³ Jehova naakamana kugusya bantu bakwe mu Egepita, wakabapa milawo iyakali kutondezya mbobakeelede kubabikkila maano bantu banji ibatakali bana Israyeli ibakabasangana. (Kul. 12:38, 49; 22:21) Akaambo kakuti bamuzwakule kanji-kanji tababikkilwi maano, caluyando Jehova wakababikkila bubambe bwakali kuyoobagwasya. Bubambe bumwi wakali mulawo wakali kubazumizya kuti kabavwulula zyakulya.—Lev. 19:9, 10.

⁴ Muciindi cakubasinikizya buya bana Israyeli kuti kabalemeka bamuzwakule, Jehova wakabakulwaizya kuba alweetelelo. (Amubale Kulonga 23:9.) Bakalizyi ‘mbocakabede kuba mweenzu.’ Noliba leelyo kabatanaba bazike, ba Hebrayo bakali kunyansyigwa abana Egepita akaambo kamubala naa bukombi. (Matl. 43:32; 46:34; Kul. 1:11-14) Bana Israyeli tiibakali kukkala kabotu akaambo kakuti bakali beenzu, pele Jehova wakali kubalangila kuti kababona mweenzu ‘mbuli sicisinyina’ akati kabo.—Lev. 19:33, 34.

5. Ino ncinzi iciyootugwasya kwiiya Jehova mbwababikkila maano bamuzwakule?

⁵ Mazuba aano, tulakonzya kuba masimpe kuti mbubwenya mbocakabede kaindi, Jehova ulababikkila maano bamuzwakule ibajanika kumiswaangano mumbungano zyesu. (Dt. 10:17-19; Malk. 3:5, 6) Ikuti naa twazinzibala kuyeeya buyumu-yumu mbobajana, mbuli kusalululwa naa kutazyiba mwaambo, tuyoojana nzila zyakubatondezya luzyalo alimwi alweetelelo.—1Pet. 3:8.

6, 7. Ino ncinzi citondezya kuti Banakristo bamumwaanda wamyaka wakusaanguna bakaiya kutasalaulana?

⁶ Banakristo bamumwaanda wamyaka wakusaanguna bakaiya kuleka kusalulula ikwakali kucitika kapati akati kaba Juda. Lya Pentekoste mu 33 C.E., aabo ibakali kukkala mu Jerusalemu bakasamausya Banakristo bapya ibakazwide mumasi aaindene-indene. (Mil. 2:5, 44-47) Ikubikkila maano kwa Banakristo ba Juda nkobakatondezya kubasyominyina ibakazwide mumasi aaindene-indene kwakatondezya kuti bakalizyi ncocakali kwaamba “kusamausya beenzu.”

⁷ Nokuba boobo, mboyakali kuyaabukomena mbungano ya Bunakristo, kwakabuka penzi lyakusalaulana. Ba Juda ibakali kwaambaula mwaambo wa Chigiriki bakatalika kutongooka kuti bamukabafwu babo tiibakali kulanganyizyigwa kabotu. (Mil. 6:1) Kutegwa babambe makani aaya, baapostolo bakasala baalumi ibali ciloba kuti kababona kuti boonse bamukabafwu balanganizyigwa. Baalumi aabo boonse ibakasalwa bakajisi mazina aa Chigiriki, eeci ambweni citondezya kuti baapostolo bakali kuyanda kuti mazwanga aakaliko akati ka Banakristo bakaindi kujatikizya kusalaulana atazumanani.—Mil. 6: 2-6.

8, 9. (a) Ino mibuzyo nzi iikonzya kutugwasya kuzyiba naa tulasalulula naa kulisumpula akaambo kamubala? (b) Ino ncinzi ncotweelede kugwisya mumoyo wesu? (1Pet. 1:22)

⁸ Kufwumbwa naa tulizyi oobo naa pe, toonse mbotuzibona zintu kulajatikizyigwa kapati abukkale nkotwakakomenena. (Rom. 12:2) Kuyungizya waawo, kweelede kuti tulabamvwa basimukoboma, babelesima, basicikoloma kababelesya majwi aakusampaula kujatikizya baabo ibazwa kumasena aambi, ibabelesya mwaambo uumbi, naa mbobaindene mubala. Ino mbuti mbotujatikizyigwa kapati amizeezo iitali kabotu iili boobo? Alimwi ino tulimvwa buti ciindi umwi nasampaula cisi nkotuzwa—ambweni  kwiinda mukwaamba majwi aakubeja kujatikizya cintu cimwi icicitwa ooko nkotwakakomenena?

⁹ Kwaciindi cili mbocibede, mwaapostolo Petro wakajisi muuya wakusalulula kujatikizya baabo ibatakali ba Juda, pele mukuya kwaciindi wakaiya kutasalulula. (Mil. 10:28, 34, 35; Gal. 2:11-14) Mbubwenya buyo, ikuti naa twabona zitondezyo zili zyoonse mulindiswe izitondezya kuti tulasalulula naa kulisumpula akaambo kamubala, tweelede kusolekesya canguzu kugwisya muuya uuli boobo mumoyo wesu. (Amubale 1 Petro 1:22.) Tulakonzya kuzinzibala kuyeeya kujatikizya twaambo mbuli twakuti, kunyina naba omwe wandiswe uuyandika kufwutulwa; toonse tatulondokede tacikwe makani acisi nkotuzwa. (Rom. 3:9, 10, 21-24) Aboobo ino nkaambo nzi ncotweelede kulisumpula kwiinda bamwi? (1Kor. 4:7) Tweelede kulimvwa mbuli mbwaakali kulimvwa mwaapostolo Paulo, ooyo iwakakulwaizya Banakristo bananikenyina kuti ‘tiibakacili beenzu alimwi abamuzwakule, pele . . . baŋanda ya Leza.’ (Ef. 2:19) Kusolekesya kapati kutegwa tuuzunde muuya wakusalulula baabo ibazwa mubukkale bwiindene masimpe kuyootugwasya kusama buntu bupya.—Kol. 3:10, 11.

10, 11. Ino mbuti Boazi mbwaakaiya Jehova mbwababona beenzu munzila mbwaakamweendelezya Rute muna Moabu?

¹⁰ Cakutadooneka Boazi wakaiya Jehova mbwababona beenzu munzila mbwaakamweendelezya Rute muna Moabu. Ciindi naakaunka kuyoolingula myuunda yakwe ciindi cakutebula, Boazi wakabona mukaintu iwakali kubeleka canguzu kavwulula musyule lyababelesi bakwe. Naakamvwa kuti walomba kuti avwulule—nokuba kuti wakalijisi nguzu zyakucita boobo—Boazi wakamuzumizya kuvwulula nomuba mumakunka aabbaale.—Amubale Rute 2:5-7, 15, 16.

¹¹ Mubandi wakatobela utondezya kuti Boazi wakamubikkila maano Rute akaambo kabukkale mwaakabede mbwaanga wakali muzwakule. Wakamwaambila kuti akkale antoomwe akabunga kabamakaintu kutegwa bamaalumi ibakali kubeleka mumyuunda batamupenzyi pe. Wakabona masimpe kuti wakabweza cakulya alimwi amaanzi, mbubwenya mbuli babelesi mbaakanjizya ncito. Kuyungizya waawo, Boazi taakwe naakamusampaula mukaintu ooyu uupengede, pele muciindi caboobo, wakamufwida luzyalo.—Rut. 2:8-10, 13, 14.

12. Mbuti luzyalo mbolukonzya kubagwasya bamuzwakule?

¹² Boazi wakakkomana kapati ikutali buyo akaambo kaluyando lwini-lwini Rute ndwaakajisi kuli banyinazyala ba Naomi, pele alimwi wakakkomana kuti wakaba mukombi wa Jehova. Luzyalo lwa Boazi cakali citondezyo caluyando lutamani lwa Jehova kumukaintu ooyu iwakaboola kuti ‘ajane mayubilo mumababa aa Leza wa Israyeli.’ (Rut. 2:12, 20; Tus. 19:17) Mbubwenya buyo amazuba aano, luzyalo ndotutondezya lulakonzya kugwasya “bantu boonse” kuti bazyibe kasimpe alimwi akubona Jehova mbwabayanda.—1Tim. 2:3, 4.

13, 14. (a) Ino nkaambo nzi ncotweelede kusokelesya kubaanzya beenzu ku Ŋanda ya Bwami? (b) Mbuti mbotukonzya kwaanguluka kubandika abamuzwakule?

¹³ Tulakonzya kutondezya luzyalo kuli bamuzwakule ibaboola ku Ŋanda ya Bwami kwaciindi cakusaanguna kwiinda mukubaanzya. Bamuzwakule bapya inga ziindi zimwi bamvwa nsoni alimwi balalizandula. Akaambo kambobakakomezyegwa naa bukkale bwabo, inga kabalimvwa kuba bantu baansi kapati kweelana abaabo bamubala umbi. Aboobo ndiswe tweelede kubweza ntaamu yakusaanguna kubatondezya kuti tulababikkila maano kuzwa aansi amoyo. Ikuti naa kailiko mumwaambo wanu, JW Language app ilakonzya kumugwasya mbomukonzya kwiiya kwaanzya bamuzwakule mumwaambo wabo.—Amubale Bafilipi 2:3, 4.

¹⁴ Ambweni inga tiimwalimvwa kwaanguluka kubandika abantu bazwa kuzisi zimbi. Kutegwa  mucileke kulimvwa boobo, inga mwabaambila zintu zimwi kujatikizya ndinywe. Muciindi cisyoonto buyo mulakonzya kujana kuti mulikozyenye mbomucita zintu zinji kwiinda mbomwiindene alimwi akuti zilengwa zimwi azimwi zilijisi zintu zibotu azibi.

15. Ncinzi ciyootugwasya kubamvwisya aabo ibali mukucinca kutegwa bukkale bwabo bweendelane abukkale bwamucisi cipya oomo mobabede?

¹⁵ Kutegwa mubagwasye bamwi kulimvwa kwaanguluka mumbungano, cakutainda mumbali amulibuzye kuti, ‘Ikuti nondali kucisi cimbi, ino mbuti mbondinga ndayanda kweendelezyegwa?’ (Mt. 7:12) Amubakkazikile moyo aabo ibali mukusolekesya kucinca kutegwa bukkale bwabo bweendelane abukkale bwamucisi cipya mobabede. Kumatalikilo, tatukonzyi kubamvwisya cakumaninina mbobayeeya naa mbobacita zintu. Pele muciindi cakulangila kuti bacince bukkale bwabo kutegwa bweendelane abukkale bwesu, tweelede kubatambula mbubwenya mbobabede.—Amubale Baroma 15:7.

16, 17. (a) Ino zintu nzi nzyotukonzya kucita kutegwa tube acilongwe abamuzwakule? (b) Ino muunzila nzi motukonzya kubagwasya bamuzwakule mumbungano zyesu?

¹⁶ Ikuti naa twaiya kujatikizya cisi nkobakazwida alimwi abukkale bwabamuzwakule, inga catuubila kubandika ambabo. Mukukomba kwamumukwasyi wesu inga twabikkilizya ciindi cakuvwuntauzya kujatikizya bantu ibali mumbungano naa mucilawo cesu mbotutazyi kabotu zilengwa zyabo. Nzila aimbi mbotukonzya kuba acilongwe abamuzwakule nkwiinda mukubatamba kucakulya kuŋanda yesu. Mbwaanga Jehova “wakajalula mulyango kuli bamasi kuti batambule lusyomo,” sena andiswe inga tiitwajalula milyango yesu kubeenzu aabo “ibaciinga cesu calusyomo”?—Mil. 14:27, bupanduluzi buyungizyidwe; Gal. 6:10; Job. 31:32.

¹⁷ Kwiinda mukwiizya amukwasyi wabamuzwakule, tuyoozyiba alimwi akulumba kusolekesya  kwabo kucinca bukkale kutegwa bweendelane abukkale bwesu. Tuyoojana kuti bayandika lugwasyo kutegwa baiye mwaambo mupya. Alimwi, sena inga tiitwabatondezya mbunga izikonzya kubagwasya kujana ŋanda yeelela naa mulimo weelela? Lugwasyo luli boobo inga lwabagwasya kapati basyomima.—Tus. 3:27.

18. Ino ncikozyanyo nzi icitondezya bulemu alimwi akulumba ncobakonzya kwiiya bamuzwakule mazuba aano?

¹⁸ Mubwini, bamuzwakule beelede kusolekesya kucinca bukkale bwabo kutegwa bweendelane abukkale bwakucisi nkobabede. Rute wakapa cikozyanyo cibotu mumakani aaya. Cakusaanguna, wakatondezya bulemu kuzilengwa zyakubusena bupya nkwaakaunka kwiinda mukulomba kuti azumizyigwe kuvwulula. (Rut. 2:7) Kunyina naakacuubya-ubya coolwe eeci ncaakajisi akucita mbuli kuti wakali mukuli wabamwi kumucitila zintu zyoonse nzyaakali kuyanda. Cabili, wakalumba kumilimo yoonse yaluzyalo njaakatondezyegwa. (Rut. 2:13) Ciindi bamuzwakule nobatondezya muuya mubotu uuli boobu, tacidoonekwi buya kuti bayoolemekwa abantu bakubusena ooko alimwi abasyominyina.

19. Ino ntwaambo nzi tutupa kusamausya beenzu akati kesu?

¹⁹ Tulakkomana kuti Jehova akaambo kaluzyalo lwakwe wapa kuti bantu boonse ibazwa mubukkale bwiindene-indene bamvwe makani mabotu. Muzisi mobazwa, ndiza inga tiibakajisi coolwe cakwiiya Bbaibbele naa kuyanzana abantu ba Jehova cakulikwaya. Pele lino mbwaanga baba acoolwe cakuyanzana andiswe, sena tatweelede kubagwasya kutegwa batalimvwi mbuli beenzu akati kesu? Nokuba kuti inga twalela mulugwasyo ndotubapa kumubili naa zintu nzyotubacitila, luzyalo ndotubatondezya lutondezya luyando Jehova ndwajisi kulimbabo. Aboobo, mbotuli bantu ‘ibaiya Leza,’ atusolekesye kusamausya beenzu akati kesu.—Ef. 5:1, 2.