Kulibilika akaambo kamapenzi aali munyika kulakonzya kubajatikizya kapati bantu kumubili alimwi amumizeezo. Banji ibakacitikilwa kale mapenzi aaya balimvwa kuti zintu kunyina nozikonzya kuba kabotu. Ino bacita buti?

• Ibamwi tabayandi nokuba kuyeeya zyakumbele.

• Ibamwi batalika kubelesya misamu iikola naa kuciindizya kunywa bukoko kutegwa baleke kuyeeya mapenzi ngobajisi.

• Ibamwi basyoonto balimvwa kuti inga cainda kubota kulijaya buyo. Balalibuzya kuti “Nkaambo nzi ncotweelede kuzumanana kupona?”

• Mapenzi aamwi ngomukonzya kujana inga ngakaindi kasyoonto buyo alimwi alakonzya kumana cakutayeeyela.

• Nokuba kuti mapenzi aanu taamana, kuli zintu zimwi nzyomukonzya kucita izikonzya kumugwasya kuliyumya.

• Bbaibbele lisyomezya kuti mapenzi oonse ngobajisi bantu ayoomana.

Bbaibbele lyaamba kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—Matayo 6:34.

Amubikkile buyo maano kuzintu zyabuzuba bumwi abumwi. Mutanoolibiliki kapati kujatikizya zintu zyakumbele cakuti mwaalilwa kucita zintu nzyomweelede kucita buzuba oobo.

Kulibilika kapati kujatikizya zintu zitali kabotu izikonzya kumucitikila inga kwapa buyo kuti mwiindile kutyompwa alimwi akumupa kubula bulangizi.

Sintembauzyo umwi wakaamba boobu naakali kupaila kuli Leza: “Ijwi lyako ndilambe kumaulu aangu, alimwi mumuni uumunikila nzila yangu.” (Intembauzyo 119:105) Amubone Jwi lya Leza Bbaibbele mbolili boobo:

Masiku, lambe lilatugwasya kubona mpotweelede kulyata. Mbubwenya buyo, Bbaibbele lilijisi busongo bukonzya kutugwasya ciindi notuyanda kupanga cakusala cikatazya kapati.

Mumuni ulakonzya kutugwasya kubona zintu zili kumbele. Mbubwenya buyo, Bbaibbele lilakonzya kutugwasya kubona kuti kumbele kuli bulangizi bwakuti zintu ziyooba kabotu.