KUBAKUBUSI
9: Zyeelelo Nzyomutobela
NCOCAAMBA
Zyeelelo nzyomutobela zibikkilizya mbomulilemeka, nzyomusyoma alimwi abube bwanu. Mubwini, zyeelelo nzyomutobela zijatikizya zintu zyoonse zipa kuti mube boobo “mbomubede” mukati alimwi aanze.
IKAAMBO NCOCIYANDIKA
Ikuti kamubikkila maano kujatikizya zyeelelo nzyomutobela, muyakuziiminina nzyomusyoma muciindi cakulekela bakubusinyoko kumweendelezya.
“Bantu banji bali mbuli zidooli nzyomubona muzintoolo izisamikwa zisani zyakusambala. Tabalisalili zisani nzyobasama; pele bamwi mbobabasalila.”—Adrian.
“Ndakaiya kwiiminina cintu ciluzi noliba leelyo nocitali cuuba-uba kucita boobo. Ndilakonzya kubazyiba mbobabede balongwe bangu beni-beni kwiinda muzintu nzyobacita alimwi anzyondicita ciindi nondili abalo.”—Courtney.
NJIISYO YAMU BBAIBBELE: “Amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu.”—Baroma 12:2.
NCOMUKONZYA KUCITA
Amulizyibe bwini mbomubede lino alimwi ambomuyanda kuyooba kumbele kwiinda mukulingula zintu nzyomukonzya kucita, kulezya kwanu alimwi azintu nzyomusyoma cakusinizya. Nzila mbotu yakutalika kulilingula nkwiingula mibuzyo eeyi iitobela.
Zintu nzyomukonzya kucita: Ino ncipego nzi ncondijisi alimwi ino mulimo nzi ngondizyi? Ino nzintu nzi nzyondicita kabotu? (Mucikozyanyo: Sena ndilabamba ciindi? sena ndilalilesya? sena ndibeleka canguzu? sena ndili mwaabi?) Ino nzintu nzi zibotu nzyondicita?
NZILA IIGWASYA: Sena cilamukatazya kuzyiba zintu zibotu nzyomukonzya kucita? Amubuzye muzyali naa mulongwe ngomusyoma kutegwa amwaambile zintu nzyabona kuti mucita kabotu alimwi akumwaambila mbazu zigaminide momucita boobo.
NJIISYO YAMU BBAIBBELE: “Umwi aumwi alingule nzyacita lwakwe mwini, mpoonya ulajana kaambo kamupa kukondwa lwakwe mwini, ikutali akaambo kakulyeezyanya amuntu uumbi.”—Bagalatiya 6:4.
Kulezya: Ino nimbazu nzi zyabube bwangu mondiyandika kubambulula? Ino ndiilili nondilangilwa kapati kusunkwa kucita cintu citali kabotu? Ino muumbazu nzi mondiyandika kapati kulilesya?
NJIISYO YAMU BBAIBBELE: “Ikuti naa twaamba kuti, ‘tunyina cibi,’ twalyeena lwesu tobeni.”—1 Johane 1:8.
Kusyoma Cakusinizya: Ino nzyeelelo nzi nzyonditobela, alimwi nkaambo nzi? Sena ndilasyoma muli Leza? Ino mbumboni nzi bundipa kusinizya kuti nkwali ncobeni? Ino micito nzi njondibona kuti taili kabotu, alimwi nkaambo nzi? Ino ndisyoma kuti ncinzi ciyoocitika kumbele?
NJIISYO YAMU BBAIBBELE: “Kuyeeya kabotu kuyookulinda, abwalo bupampu buyookukwabilila.”—Tusimpi 2:11.
Andiza Inga Mwaakkomanina Ayaaya
BWIINGUZI KUMIBUZYO IILI 10 NJOBABUZYA BAKUBUSI
Ino Ndili Muntu Uuli Buti?
Kuzyiba zintu nzyolemeka mubuumi, zintu nzyocita kabotu, nzyotaciti kabotu, alimwi ambaakani nzyojisi ciyookugwasya kusala cabusongo ciindi nosungilizyigwa kucita cintu cibi.
BAKUBUSI BALABUZYA
Sena Ndili Muntu Uubikkila Maano Kuzintu?
Bakubusi bamwi balapegwa lwaanguluko lunji kwiinda bamwi. Ino ncinzi cipa kwiindana?
