‘Ulaizuzya Myoyo Yesu’
AMUBE ACILONGWE A LEZA
‘Ulaizuzya Myoyo Yesu’
Sena ncobeni Jehova ulatubikkila maano, naa tababikkili maano ciindi bantu nobapenga munyika? Bwiinguzi bwamu Bbaibbele kumubuzyo ooyu bulatukkazyika moyo. Masimpe, Leza ulababikkila maano bantu, alimwi uyanda kuti katukkomene. Buzuba abuzuba bantu balagwasyigwa kububotu bwa Leza, nobaba baabo batalumbi. Amubone majwi aamwaapostolo Paulo.—Amubale Milimo 14:16, 17.
Kaambila bantu bamumunzi wa Lustra batakali bakombi ba Leza, Paulo wakaamba kuti: “Mumazyalani aamusyule bamasi boonse wakabalekela kutobela nzila zyabo beni, nokuba kuti mubwini taakalilekela kubula bumboni nkaambo wakacita zibotu kwiinda mukumupa mvwula kuzwa kujulu aziindi eelyo nokuba micelo minji, alimwi wakamupa zyakulya zinji akuzuzya myoyo yanu akubotelwa.” Ino majwi aaya akali kupandulula nzi kubaswiilizi ba Paulo?
Cakali cuuba-uba kubantu baku Lustra kwaamvwisya majwi aa Paulo. Bakali kukkala akati kabantu bakali kucita milimo yabulimi alimwi ibakali kukkala mubusena bwakajisi mbolezi amaanzi. Pele mbuli mbwaakabayeezya Paulo, Leza nguupa mvwula alimwi aziindi zyazilyo. Aboobo, ciindi aciindi nibakali kutebula zisyango zinji akulya cakulya cibotu, bakali kugwasyigwa kububotu bwa Leza.
Majwi aa Paulo kubantu baku Lustra atuyiisya ziiyo zinji iziyandika kapati kujatikizya Jehova Leza.
Jehova ulatupa lwaanguluko lwakulisalila. Amubone kuti Jehova wakabalekela bantu bamuzisi zyoonse zya Bamasi “kutobela nzila zyabo beni.” Ibbuku limwi lyabasanduluzi ba Bbaibbele lyakaamba kuti majwi aaya alakonzya kwaamba “kucita kufwumbwa mbobayanda” naa “kucita ncobayeeya kuti cili kabotu.” Jehova tasinikizyi muntu uuli woonse kumukomba. Wakatupa lwaanguluko lwakulisalila—nguzu zyakusala ncotuyanda kucita mubuumi bwesu.—Deuteronomo 30:19.
Jehova uyanda kuti tumuzyibe. Paulo wakaamba kuti “taakalilekela kubula bumboni.” Ibbuku lyaambwa atala aawa lyakaamba kuti majwi aaya alakonzya kwaambwa kuti “wabatondezya bantu caantangalala kuti ngu Leza uuli buti.” Zilenge zya Leza zilapa bumboni buzulide kujatikizya “bube bwakwe butalibonyi,” kubikkilizya abubotu bwakwe, busongo, nguzu, alimwi aluyando lwakwe. (Baloma 1:20) Jehova wayubununa zyintu zinji mu Bbaibbele izijatikizya nguwe. (2 Timoteyo 3:16, 17) Sena taali masimpe kuti uyanda kuti tumuzyibe?
Jehova uyanda kuti katukkomene. Paulo wakaamba kuti ulatupa ‘zyakulya zinji akuzuzya myoyo yesu akubotelwa.’ Naba sizibi uutamuzyi Jehova ulakonzya kulya cakulya ncayanda akukkuta alimwi akukkomana mubuumi. Nokuba boobo, Leza uyanda kuti tube aalukkomano lwini-lwini lyoonse. Eeci cilakonzyeka lilikke kuti twaiya kasimpe kajatikizya nguwe alimwi akukabelesya mubuumi bwesu.—Intembauzyo 144:15; Matayo 5:3.
Toonse tulagwasyigwa kububotu bwa Jehova buzuba abuzuba. Amwiiye zinji kujatikizya mbomukonzya kutondezya kulumba kuli Leza walo uutupa ‘zyakulya zinji akuzuzya myoyo yesu akubotelwa’?
Magwalo aamu Bbaibbele aasalidwe kubalwa mu July
[Majwi aakwelelezya sikubala aali apeeji 11]
Buzuba abuzuba bantu balagwasyigwa kububotu bwa Leza, nobaba baabo batalumbi
