MYAKA misyoonto iyainda, mubuzyo uukkomanisya kapati wakalembwa mumuteende waku Korea uutegwa The Chosun Ilbo. Mwakali mubuzyo wakuti, “‘Sena Shim Cheong Uutembaulika,’ Iwatakazyi Cintu Nociba Comwe Kujatikizya Jesu—Wakaunka ku Helo?”

Mutwe wamakani wakali kukalazya akaambo kakuti Shim Cheong mukaintu mukubusi wamucaano caku Korea wakaaba buumi bwakwe kutegwa agwasye bausyi boofwu. Kwamyaka minji, wali kutembaulwa kapati. Alimwi mu Korea Shim Cheong ubonwa kuti ncikozyanyo camwana musimbi uulyaabide.

Muzeezo wakuti muntu uuli mbuli yooyu uyoosubulwa mumulilo wahelo akaambo kakuti tanaakali Munakristo uubbapatizyidwe, bantu banji bakali kuubona kuti tauli kabotu alimwi ulakalazya. Alimwi buya makani aaya akeelede kuti akacitika myaka minji kautanazyibwa mulumbe uujatikizya Jesu mumunzi mwaakali kukkala.

Cibalo cakali kubikkilizya akubuzya-buzya musololi wacikombelo. Wakabuzyigwa kuti naa aabo boonse bakafwa kakunyina kujana coolwe cakwiiya kujatikizya Jesu bayoopegwa cisubulo mumulilo wahelo. Ino wakaingula buti? Wakaingula kuti: “Tatuzyi pe. Pele tuyeeya buyo kuti kuli Bubambe bwa Leza bumwi [kujatikizya bantu bali boobo].”

Bbuku lyakuti The New Catholic Encyclopedia lyaamba kuti: “Lubbapatizyo lulayandika kutegwa muntu afwutulwe. Mbuli mbwaakaamba Kristo kuti, cita kuti umwi wazyalululwa mumeenda alimwi amumuuya usalala, nakonzya kunjila mu Bwami bwa Leza (Jn 3.5).” Akaambo kaceeci bamwi basyoma kuti aabo ibakafwa kakunyina kubbapatizyigwa basowelwa mumulilo wahelo naa kupenzyegwa munzila imwi buyo nobafwa.

Kuli abamwi banji ibaamba kuti njiisyo iili boobo taili yamasimpe. Mamiliyoni aabantu bafwa kabanyina luzibo lwamu Bbaibbele. Sena beelede kupenzyegwa kukabe kutamani? Ino ncinzi Bbaibbele ncolyaamba kujatikizya makani aaya?

Cakusalazya Bbaibbele litondezya kuti Leza ulababikkila maano bantu ibakapona kakunyina kuba aluzibo lwazintu nzyayanda. Lugwalo lwa Milimo 17:30 lutusyomezya kuti: “Leza wazileka buyo ziindi zyakutazyiba kuli boobu.” Aboobo, ino mbulangizi nzi buliko mu Bbaibbele kujatikizya baabo bakafwa kakunyina kuba acoolwe cakwiiya kujatikizya Leza?

Bwiinguzi bulakonzya kujanika mumajwi Jesu ngaakaambila cimwi cazigwebenga icakafwa antoomwe anguwe. Mwaalumi ooyu wakati kuli Jesu: “Ukandiyeeye waakunjila mu Bwami bwako.” Ino Jesu wakaingula buti? Wakati: “Ncobeni sunu ndikwaambila kuti, Uyooba andime mu Paladaiso.”—Luka 23:39-43.

Sena Jesu wakali kusyomezya kuti mwaalumi ooyu wakali kuyakuunka kujulu? Peepe. Mwaalumi ooyu ‘taakaningazyalwa alimwi’ mumaanzi alimwi amumuuya, calo icakali kuyandika kutegwa muntu ayelele kunjila mu Bwami bwakujulu. (Johane 3:3-6) Muciindi caboobo, Jesu wakali kusyomezya kuti sizibi ooyu wakali kuyoopona alimwi mu Paradaiso. Mbwaanga mwaalumi ooyu wakali mu Juda, kuboneka kuti wakalizyi kabotu kujatikizya Paradaiso aanyika, nkokuti muunda wa Edeni walo uupandulwidwe mubbuku lyakusaanguna mu Bbaibbele. (Matalikilo 2:8) Cisyomezyo ca Jesu cakamupa bulangizi bwabubuke mu Paradaiso ciindi noiyoobukulusyigwa alimwi anyika.

Alimwi buya Bbaibbele lisyomezya kuti kuyooba “bubuke bwabantu baluleme abataluleme.” (Milimo 24:15) “Bataluleme” mbabaabo batakapona kweelana azyeelelo zya Leza zyabululami akaambo kakuti tiibakazyi ncayanda Leza. Jesu uyoomubusya mwaalumi uutaluleme iwakabandika anguwe, kubikkilizya amamiliyoni naa mabbiliyoni aabantu bakafwa kakunyina kucita kuyanda kwa Leza. Mpoonya mu Paradaiso anyika, bayakuyiisyigwa ncayanda Leza,  alimwi bayooba aacoolwe cakutondezya kuti balamuyanda Leza kwiinda mukutobela milawo yakwe.

Ciindi bataluleme nobayoobusyigwa, sena lubeta lunooyeeme azintu nzyobakacita kabatanafwa? Peepe. Lugwalo lwa Baloma 6:7 lwaamba kuti: “Muntu wafwa waangununwa kucibi cakwe.” Bataluleme banooli baangununwa kuzibi zyabo kwiinda mukufwa. Aboobo lubeta lwabo lunooyeeme azintu nzyobayoocita baakubusyigwa, ikutali nzyobakacita mukutaziba kabatanafwa. Ino bayoojana mpindu nzi?

Baakubusyigwa, bataluleme bayooba acoolwe cakwiiya milawo ya Leza, yalo iyooyubununwa ciindi mabbuku aakuvwunga aacikozyanyo nayoovwungululwa. Eelyo bayoobetekwa “kweelana amilimo yabo,” nkokuti kutobela milawo ya Leza naa pe. (Ciyubunuzyo 20:12, 13) Kubantu banji bataluleme, eeci tacikabi coolwe cabili pe, pele ciyooba coolwe cabo cakusaanguna cakuba abuumi butamani kwiinda mukwiiya alimwi akucita kuyanda kwa Leza.

Njiisyo eeyi yamu Bbaibbele yabagwasya bantu banji kuba alusyomo muli Leza alimwi. Mukaintu wazina lya Yeong Sug wakali umwi wabaabo. Wakakomezyegwa kali mu Katolika ulyaabide. Bamukwasyi wakwe bakali bapaizi. Kayandisisya kuba siite, wakanjila cikolo ciyiisya zyabukombi (convent). Kwiinde ciindi wakazoocileka nkaambo wakatyompwa akaambo kazintu nzyaakali kubona ooko. Kuyungizya waawo, tanaakaisyoma njiisyo yamulilo wahelo, nkaambo wakalimvwa kuti kusubula bantu mumulilo wahelo tiicakaluleme alimwi tiicakali kutondezya luyando.

Mpoonya Kamboni wa Jehova umwi wakatondezya ba Yeong Sug majwi aaya amu Bbaibbele aakuti: “Baumi balizi kuti balafwa, pele bafwide tabezi cintu niciba comwe; tabacijisi impindu.” (Mukambausi 9:5) Kamboni ooyu wakabagwasya kuzyiba kuti basikale babo tabapenzyegwi mumulilo wahelo pe. Muciindi caboobo, baloona mulufwu kulindila bubuke.

Ba Yeong Sug nobakazyiba kuti bantu banji kunyina nobakamvwa kasimpe kamu Bbaibbele, bakaabikkila maano majwi a Jesu aajanika mulugwalo lwa Matayo 24:14 aakuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino ayoosika.” Lino balatola lubazu mukukambauka makani mabotu alimwi akwaambila bamwi bulangizi bubotu bwamu Bbaibbele.

Bbaibbele litwaambila kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.” (Milimo 10:34, 35) Oobu mbululami toonse mbotukonzya kulangila kuli Leza ‘uuyandisya bululami.’—Intembauzyo 33:5.