Lufwu lwa Jesu cakali cintu ciyandika kapati icakacitika—wakafwa kutegwa buumi bwabantu bube mbubonya mbobwakabede kumatalikilo. Bantu kunyina nobakalengwa kabajisi cilengwa cakucita zintu zibi, kuciswa naa kufwa. (Matalikilo 1:31) Pele cibi cakanjila munyika kwiinda mumuntu omwe, Adamu. Jesu wakapa buumi bwakwe kutegwa atufwutule kucibi alufwu.—Amubale Matayo 20:28; Baroma 6:23.

Leza wakatondezya luyando lupati kwiinda mukutuma mwanaakwe anyika kuti atufwide. (1 Johane 4:9, 10) Jesu wakaambila basikumutobela kwiibaluka lufwu lwakwe kwiinda mupobwe lijatikizya mukamu alimwi awaini. Kucita boobo amwaka tutondezya kulumba akaambo kaluyando Leza a Jesu ndobakatondezya.—Amubale Luka 22:19, 20.

Ciindi cakusaanguna Jesu naakaambila basikwiiya bakwe kuti kabayeeya lufwu lwakwe, wakaamba kujatikizya cizuminano. (Matayo 26:26-28) Cizuminano eeci cakabapa kuti balo alimwi abamwi basyoonto babe abulangizi bwakuyooba bami alimwi abapaizi antoomwe a Jesu kujulu. Nokuba kuti mamiliyoni aabantu balaibaluka lufwu lwa Jesu, balikke aabo ibali mucizuminano eeco mbebalya mukamu alimwi akunywa waini.—Amubale Ciyubunuzyo 5:10.

Kwainda myaka iitandila ku 2,000 kuzwa ciindi Jehova naakatalika kusala bantu ibayooba bami. Mweelwe wambabo musyoonto kapati tweezyanisya awabaabo ibayoopona buumi butamani aanyika.—Amubale Ciyubunuzyo 7:4, 9, 17.