Munyika yoonse, bantu banji ibalyaamba kuti batobela Jesu Kristo balijatikizyidwe kapati mumapolitikisi. Bamwi balasola kusumpula nzyobasyoma alimwi azyeelelo zyabo kwiinda mukuzulilwa mucipani cimwi. Mpoonya, basimapolitikisi kanji-kanji babelesya makani aadumide kujatikizya mbobalilemeka bantu naa bukkale kutegwa baboongelezye basizikombelo. Cilidumide kubasololi bazikombelo kuyanda kuti bavwootelwe kutegwa babe acuuno mumfwulumende. Kumane muzisi zimbi, cikombelo ca “Bunakristo” cilakonzya kusumpulwa akubonwa kuti ncikombelo cacisi.

 Ino muyeeya buti? Sena basikutobela Jesu Kristo baleelede kujatikizyigwa mumapolitikisi? Mulakonzya kubujana bwiinguzi kwiinda mukulanga-langa cikozyanyo ca Jesu. Wakaamba kuti: “Ndamupa citondezyo, kuti mbubonya mbondamucitila, kamucita mbubonya andinywe.” (Johane 13:15) Caboola mumakani aamapolitikisi, ino ncitondezyo nzi Jesu ncaakatusiila?

 Peepe. Jesu kunyina naakajatikizyigwa amapolitikisi aamunyika.

 Jesu tanaakali kuyanda kuba mweendelezi. Wakakaka kuba mweendelezi wamfwulumende zyabantu ciindi Saatani Diabolosi naakamupa “mami oonse aamunyika.” (Matayo 4:8-10) a Aciindi cimwi, bantu bakabona kuti Jesu wakajisi bube bwalo ibwakali kuyoopa kuti abe mweendelezi mubotu, alimwi bakasola kumusungilizya kuti ajatikizyigwe mumapolitikisi. Bbaibbele lyaamba kuti: “Jesu mbwaanga wakalizyi kuti bakali kuyanda kuboola akumujata kutegwa bamubikke kuba mwami, wakazwa alimwi akuunka kucilundu alikke.” (Johane 6:15) Jesu tanaakacicita ncobakali kuyanda bantu kuti acite. Muciindi caboobo, wakakaka kutola lubazu mumapolitikisi.

 Kunyina lubazu Jesu nkwaakali kuwida mumakani aamapolitikisi. Mucikozyanyo, mumazuba aa Jesu ba Juda tiibakali kuciyanda kubbadela mitelo kumfwulumende yabana Roma alimwi bakali kukubona kuti mukuli uuminya. Ciindi nobakasola kumuyunga kuti atole lubazu mukaambo aaka, tanaakatalika kukazyanya ambabo kuti naa cakali buyo kabotu kutela naa pe. Wakabaambila kuti: “Amupe Kaisara zintu zya Kaisara, pele zintu zya Leza amupe Leza.” (Marko 12:13-17) Kunyina naakatola lubazu mumakani aaya pele wakatondezya kuti mitelo njobakali kuyanda beendelezi bamfwulumende yabana Roma, yalo iyakali kwiiminina Kaisara, yakeelede kubbadelwa. Aciindi ncomunya, Jesu wakatondezya kuti kumvwida beendelezi kuli mpokwakali kugolela. Aboobo muntu tanaakeelede kupa mfwulumende zintu zyakali kuyandika kupegwa kuli Leza, kubikkilizya akulyaaba alimwi akukomba.—Matayo 4:10; 22:37, 38.

 Jesu wakali kusumpula alimwi akuyiisya bamwi kujatikizya mfwulumende yakujulu, Bwami bwa Leza. (Luka 4:43) Tanaakajatikizyigwa mumapolitikisi nkaambo wakalizyi kuti Bwami bwa Leza, kutali mfwulumende zyabantu, mbobwakali kuyoopanga nyika kuti ibe kweelana ambwaakali kuyanda Leza. (Matayo 6:10) Wakalizyi kuti Bwami bwa Leza tabukabelesyi mfwulumende zyabantu kweendelezya, pele bwakali kuyoonjila mubusena bwanzizyo.—Daniele 2:44.

 Peepe. Basikutobela Jesu bakaumvwida mulawo wakwe ‘wakutaba banyika.’ (Johane 15:19) Bakatobela cikozyanyo cakwe akuzumanana kulyaandaanya mumapolitikisi aamunyika. (Johane 17:16; 18:36) Muciindi cakutola lubazu mumakani aamapolitikisi, bakali kucita mulimo Jesu ngwaakabalailila kucita, nkokuti kukambauka alimwi akuyiisya bantu kujatikizya Bwami bwa Leza.—Matayo 28:18-20; Milimo 10:42.

 Cintu cakali kuyandika kapati ku Banakristo bamumwaanda wamyaka wakusaanguna nkumvwida Leza. Pele alimwi bakalizyi kuti bakeelede kulemeka beendelezi bamfwulumende. (Milimo 5:29; 1 Petro 2:13, 17) Bakali kwiitobela milawo alimwi akubbadela mitelo. (Baroma 13:1, 7) Nokuba kuti tiibakali kutola lubazu mumapolitikisi, bakali kutambula lugwasyo alukwabililo lwamfwulumende.—Milimo 25:10, 11; Bafilipi 1:7.

 Bbaibbele lilatondezya caantangalala kuti Jesu alimwi abasikumutobela bakusaanguna tiibakali kujatikizyigwa mumapolitikisi. Akaambo kakaambo aaka, mbuli Banakristo, Bakamboni ba Jehova nyika yoonse tabatoli lubazu mutwaambo twacisi. Mbubonya mbuli Banakristo bakusaanguna, bacita mulimo Jesu ngwaakalailila, nkokuti kukambauka “makani mabotu aa Bwami.”—Matayo 24:14.